Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | NYAMENLE AHYƐLƐDEƐ NE SONLE BOLƐ MAA WƆ Ɔ?

Duzu A Ɛbayɛ Ye Wɔ Nyamenle Ahyɛlɛdeɛ Kpole Ne Anwo A?

Duzu A Ɛbayɛ Ye Wɔ Nyamenle Ahyɛlɛdeɛ Kpole Ne Anwo A?

“Kelaese ɛlɔlɛ ne ka yɛ . . . Ɔwule ɔmaanle bɛ muala amaa bɛdabɛ mɔɔ bɛde aze la andɛnla aze ammaa bɛ nwo bieko, emomu bɛadɛnla aze bɛamaa mɔɔ wule maanle bɛ.”2 Kɔlentema 5:14, 15.

ƆWƆ kɛ yɛkile anyezɔlɛ wɔ ahyɛlɛdeɛ mɔɔ sonle bolɛ la anwo. Gyisɛse zile ɛzukoalɛdeɛ zɔhane azo wɔ mekɛ mɔɔ ɔyɛle mrenyia bulu bie mɔɔ ewule ɛzulolɛ bie ɛha bɛ ayile la, ɛnee bɛnlɛ nwolɛ ayile wɔ zɔhane mekɛ. Bɛ nuhua ko ziale “ɔ nzi na ɔvale ɛnelɛ kpole ɔwulale Nyamenle anyunlunyia.” Gyisɛse hanle kɛ: “Bɛle bulu a bɛdele kpɔkɛ a, ɔnle zɔ ɔ? Na ngɔnla ne mɔɔ ɛha la wɔ ni?” (Luku 17:12-17) Ɛzukoalɛdeɛ boni a wɔ nu a? Yɛ rɛle bahola avi ninyɛne mgbalɛ mɔɔ awie mɔ yɛ maa yɛ la.

Ɛkpɔnedeɛ ne tɛla ahyɛlɛdeɛ biala mɔɔ bɛva bɛmaa yɛ la. Yemɔti duzu a ɔwɔ kɛ ɛyɛ wɔ mɔɔ Nyamenle ɛyɛ ɛmaa wɔ la anwo a?

  • Nwu Maavolɛ ne kpalɛ. Ɛkpɔnedeɛ ne ɛngile kɛ ye biala anu alesama amuala bɛanyia dahuu ngoane. Emomu, Gyisɛse zɛlɛle Nyamenle kɛ: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.” (Dwɔn 17:3) Saa ɛte kɛ ɛle kakula la, nrenyia bie liele wɔ ngoane a, asoo ɛnrɛhulo  kɛ ɛbade nrenyia ɛhye anwo edwɛkɛ dɔɔnwo nee deɛmɔti ɔliele wɔ ngoane la ɔ? Gyihova Nyamenle mɔɔ vale ɛkpɔnelɛ ahyɛlɛdeɛ ne mɔɔ die ngoane maanle la, kulo kɛ ɛnwu ye na ɛ nee ye nyia agɔnwolɛvalɛ kpalɛ. Baebolo ne ka kɛ, “Bɛbikye Nyamenle, na ɔbabikye bɛ.”Gyemise 4:8.

  • Nyia ɛkpɔnedeɛ ne anu diedi. “Awie biala mɔɔ die Ralɛ ne di la lɛ dahuu ngoane.” (Dwɔn 3:36) Duzu a diedi kile a? Ɔkile kɛ ɛyɛ debie; amaa wɔanyia ɛkpɔnedeɛ ne anu diedi la ɔwɔ kɛ ɛyɛ nwolɛ gyima. (Gyemise 2:17) Duzu gyima ɔ? Saa ahyɛlɛdeɛ bie bayɛ wɔ ɛdeɛ a, kyesɛ ɛtende ɛ sa na ɛdie. Ɔti ɔwɔ kɛ ɛmia ɛ nwo na ɛnyia ɛkpɔnedeɛ ne anu diedi. Kɛzi? Sukoa mɔɔ Nyamenle kulo kɛ ɛyɛ la, na yɛ ye zɔhane pɛpɛɛpɛ. * Sɛlɛ Nyamenle ɛkɛ ne ɛtanefakyɛ nee adwenle mɔɔ anu te la. Nyia anwodozo wɔ Nyamenle anu kɛ menli kɔsɔɔti mɔɔ kɛnyia ɛkpɔnedeɛ ne anu diedi la banyia anzodwolɛ, banebɔlɛ na bɛakpazi kenle bie!Hibuluma 11:1.

  • Kɔ Gyisɛse ewule Ngakyelɛlilɛ ne bie. Gyisɛse vale ɛvoyia bie ziele ɛkɛ amaa yɛahakye ɛkpɔnedeɛ nziezielɛ ne. Ɔhanle nwolɛ edwɛkɛ kɛ: “Bɛhɔ zo bɛyɛ ɛhye bɛva bɛhakye me.” (Luku 22:19) Gyihova Alasevolɛ bahakye Gyisɛse ewule ne wɔ Dwɛkɛ, April 11, 2017, mekɛ mɔɔ sɛnzɛne ne ɛhɔdɔ la. Ɛdendɛlɛ boka gyimalilɛ ne mɔɔ bali kɛyɛ dɔnehwele ko la anwo na ɔbahilehile kɛzi Gyisɛse ewule ne anwo hyia la anu nee kɛzi ɔbaboa yɛ ɛnɛ nee kenle bie la. Ɛkenle ɛvolɛ ne, menli kɛyɛ mgbe 20 hɔle Ngakyelɛlilɛ ne abo wɔ ewiade amuala. Yɛfa anyelielɛ yɛaze wɔ kɛ baboka yɛ nwo maa yɛhile Nyamenle ahyɛlɛdeɛ kpole ne anwo anyezɔlɛ.

^ ɛden. 7 Adenle mɔɔ ɛbalua zo wɔanwu Nyamenle na wɔabikye ye la a le kɛ ɛbazukoa ye Edwɛkɛ, Baebolo ne. Biza Gyihova Dasevolɛ bie anzɛɛ kɔ yɛ wɛbsaete www.jw.org/nzi na sukoa kɛzi ɛbayɛ ɛhye la.