Wulu kɔ nuhua edwɛkɛ ne azo

Wulu kɔ nuninyɛne ne azo

Kenle Bie Nwo Nɔhalɛ Edwɛkɛ

Kenle Bie Nwo Nɔhalɛ Edwɛkɛ

Asoo wɔdwenle mɔɔ bazi kenle bie la anwo ɛlɛ ɔ? Baebolo ne kile kɛ ninyɛne titili bie mɔɔ ɔnrɛhyɛ ɔbasisi la baha menli kɔsɔɔti mɔɔ de azɛlɛ ye azo la.

Gyisɛse hilele yɛ kɛzi yɛbanwu kɛ “Nyamenle Belemgbunlililɛ ne ɛbikye” la. (Luku 21:31) Ɔhanle ɔdole ɛkɛ ne kɛ, ninyɛne mɔɔ basisi la bie mɔ a le konle konle, azɛlɛ ɛkpusulɛ mgbole, ɛhɔne yɛɛ ewule ngakyile​—yɛnwu ninyɛne ɛhye mɔ ɛnɛ.​—Luku 21:10-17.

Baebolo ne eza hanle kɛ subane mɔɔ alesama bala ye ali la boka ninyɛne mɔɔ bamaa yɛanwu ye kɛ yɛwɔ “mekɛ mɔɔ li awieleɛ” wɔ sonla tumililɛ nu la anu. Ɛbahola wɔagenga nwolɛ edwɛkɛ wɔ 2 Timote 3:1-5. Saa ɛnwu subane nee nyɛleɛ ɛhye mɔ ɛnɛ a, kpolerazulɛ biala ɛnle nwolɛ kɛ ɛbalie wɔali kɛ Baebolo ngapezo ɛhye amgba ɛra nu.

Boni a ɛhye kile a? Ɔnrɛhyɛ Nyamenle Belemgbunlililɛ ne bava nzenzaleɛ mgbole mɔɔ bamaa awie biala mɔɔ wɔ azɛlɛ ye azo ɛbɛlabɔlɛ ayɛ kpalɛ la ara. (Luku 21:36) Nyamenle ɛbɔ ninyɛne mgbalɛ mɔɔ azɛlɛ ne nee menli mɔɔ bɛbadɛnla zolɛ banyia la anwo ɛwɔkɛ wɔ Baebolo ne anu. Neazo ekyi ɛne.

TUMILILƐ KPALƐ

“Na bɛvale tumililɛ, enililɛ nee belemgbunlililɛ bɛmaanle ye [Gyisɛse] amaa menli, maanle maanle nee menli mɔɔ ka aneɛ ngakyile la amuala azonle ye. Ye tumililɛ ne le dahuu tumililɛ mɔɔ ɛnrɛpɛ nu ɛlɛ a yɛɛ bɛnrɛzɛkye ye belemgbunlililɛ ne.”​DANEƐLE 7:14.

Mɔɔ ɛhye kile: Ɛ nye balie wɔ arane mɔɔ tɛla biala mɔɔ Nyamenle ɛhyehyɛ na yeva ɔ Ra ne yezie zolɛ Belemgbunli la tumililɛ bo.

 KPƆKƐDELƐ KPALƐ

“Na maanlema ne anu biala ɛnrɛha kɛ: ‘Me nwo ɛdo me.’”​AYEZAYA 33:24.

Mɔɔ ɛhye kile: Ɛ nwo ɛnrɛdo wɔ ɛlɛ anzɛɛ ɛnrɛyɛ wuliravolɛ; ɛbahola wɔadɛnla aze mɔɔ ɛnwu ɛlɛ a.

DAHUU ANZODWOLƐ

“Ɔmaa bɛgyakyi konle wɔ azɛlɛ ye kɔsɔɔti azo.”​EDWƐNE 46:9.

Mɔɔ ɛhye kile: Yɛnrɛde konle nganeɛ mɔɔ ka yɛ ɛzulolɛ la bieko yɛɛ amaneɛnwunlɛ mɔɔ ɔfa ɔba la abo bapɛ.

MENLI MGBALƐ NGOME A BAYI AZƐLƐ YE AZO A

“Amumuyɛma ɛnle ɛkɛ bieko . . . Bɛlɛvoma banyia azɛlɛ ne.”​EDWƐNE 37:10, 11.

Mɔɔ ɛhye kile: Ɛtanevolɛma ɛnrɛdɛnla ɛkɛ ne bieko, menli mɔɔ kulo kɛ bɛyɛ tieyɛ bɛmaa Nyamenle la ala a bɛadɛnla ɛkɛ a.

AZƐLƐ YE AZO AMUALA BAYƐ PALADAESE

“Bɛbasisi azua na bɛadɛnla nu, yɛɛ bɛbayɛ vanye egyinli na bɛali nuhua ma.”​AYEZAYA 65:21, 22.

Mɔɔ ɛhye kile: Azɛlɛ ye azo amuala bayɛ kɛnlɛma. Nyamenle babua asɔne mɔɔ yɛyɛ kɛ ye ɛhulolɛdeɛ ɛyɛ ɛkɛ “wɔ azɛlɛ ye azo” la.​—Mateyu 6:10.