Wulu kɔ nuhua edwɛkɛ ne azo

Wulu kɔ nuninyɛne ne azo

Baebolo Ngilehilelɛ​—Nrɛlɛbɛ Mɔɔ Ɛmkpa Nwo

Baebolo Ngilehilelɛ​—Nrɛlɛbɛ Mɔɔ Ɛmkpa Nwo

PƐ YE NVONINLI NEA: Ɛlɛkɔ akpɔsa wɔ tete ninyɛne ɛzielɛ ɛleka bie, na ɔluakɛ ninyɛne mɔɔ wɔ ɛkɛ ne la ɛhyɛ kpalɛ la ati, dɔɔnwo ɛzɛkye, bie mɔ ɛkpa nwo yɛɛ bie mɔ anwo ɛkpa. Bie mɔ bɔbɔ ɛleka bie ɛbubu. Noko ko bie wɔ ɛkɛ mɔɔ le ngakyile; ɔle kɛnlɛma kɛ mɔɔ ɛnee ɔde ye mɔlebɛbo ne ala la. Yemɔti ɛbiza ahenle mɔɔ nee wɔ ɛlɛkɔ akpɔsa ne la kɛ, “Ɛhye le fofolɛ ɔ?” Ɔbua kɛ, “Kyɛkyɛ, yehyɛ yedɛla mɔɔ ɛha la anu dɔɔnwo yɛɛ sumunli kɛ bɛ nee ye rale la bɛtɛsieziele ye ɛlɛ.” Ɛbiza ye kɛ, “Bɛvale bɛziele kpalɛ ɔ?” Ɔbua kɛ, “Kyɛkyɛ, yemɔ bɔbɔ a ezule nee anwoma ɛbɔ ye kpalɛ a. Yɛɛ menli ɛtanema ɛbɔ mɔdenle biala kɛ bɛsɛkye ye.” Bie a ɛhye bazi ɛ nwo na wɔabiza kɛ, ‘Duzu a bɛvale bɛyɛle a?’

Wɔ adenle bie azo, Baebolo ne le kɛ deɛ zɔhane mɔɔ ɔwɔ ninyɛne ɛzielɛ ɛleka ne la. Ɔle tete buluku mɔɔ ɛhyɛ kpalɛ ɛdɛla mbuluku dɔɔnwo a. Tete mbuluku dɔɔnwo wɔ ɛkɛ ne ɛdeɛ, noko le kɛ ninyɛne mɔɔ wɔ ninyɛne ɛzielɛ ɛleka ne la, bɛ nuhua dɔɔnwo ɛkpa nwo. Kɛ neazo la, mɔɔ bɛhanle ye wɔ abɔdeɛ nwo nrɛlɛbɛ nwo la nee mɔɔ bɛlie bɛdo nu ɛnɛ la ɛnle ko. Folɛdulɛ mɔɔ bɛfa bɛmaa wɔ kpɔkɛdelɛ nwo la kɛkala ɛmboa fee. Yɛɛ tete mbuluku bie mɔ wɔ ɛkɛ ne mɔɔ bɛ foa bie ɛzɛkye bɔkɔɔ a.

Noko Baebolo ne le ngakyile. Bɛbɔle ye ɛhɛlɛlɛ bo la yebo ɛvolɛ 3,500 noko debie biala tɛbɔ nu pɛpɛɛpɛ. Bɛbɔle mɔdenle kɛ bɛsɛkye ye nee nuhua edwɛkɛ ne wɔ ɛvoya dɔɔnwo mɔɔ ɛze la anu noko yehola yegyinla ngyegyelɛ ne mɔ anloa. Saa yɛfa nuhua edwɛkɛ ne yɛtoto adwuleso adwenle nwo a, yɛnwu kɛ ɔwɔ ɔ nyunlu ɔtɛla biala na ɛhye yɛ azibɛnwo.​—Nea ɛlɛka “Yekpa Nwo Anzɛɛ Ɔka Na Nzinlii Bɛanwu Ye Ɔ?

 NGYINLAZO MƆƆ YƐHYIA NWO ƐNƐ LA

Bie a, ɛbabiza kɛ, ‘Asoo yɛbahola yɛava Baebolo ngilehilelɛ yɛayɛ gyima wɔ adwuleso ewiade ɛhye anu ɔ?’ Kolaa na wɔabua la, biza ɛ nwo kɛ: ‘Ɛnɛ, alesama ngyegyelɛ titili a le boni? Boni a ka yɛ ɛzulolɛ kpalɛ a?’ Bie a, konle, anwoma nee nzule mɔɔ bɛsɛkye ye, amumuyɛ nee nzisi bara wɔ adwenle nu. Akee nea ngyinlazo bie mɔ mɔɔ Baebolo ne kilehile la. Mekɛ mɔɔ ɛlɛyɛ ɛhye la, biza ɛ nwo kɛ, ‘Saa alesama kola ava ngyinlazo ɛhye mɔ ayɛ gyima a, anrɛɛ kɛzi ewiade ne bayɛ ɛ?’

ANZODWOLƐ

“Anyelielɛ a le bɛdabɛ mɔɔ bɛkpondɛ anzodwolɛ la, ɔluakɛ bɛbavɛlɛ bɛ Nyamenle amra.” (Mateyu 5:9) “Saa ɔkɛyɛ boɛ a, bɛ nee menli kɔsɔɔti ɛdɛnla anzodwolɛ nu.”​—Wulomuma 12:18.

ANWUNVƆNEZELƐ NEE ƐTANEFAKYƐ

“Anyelielɛ a le anwunvɔnezelɛma, ɔluakɛ bɛbaze bɛ anwunvɔne.” (Mateyu 5:7) “Saa bɛ nuhua bie lɛ edwɛkɛ tia ɔ gɔnwo bɔbɔ a, bɛhɔ zo bɛnyia abotane na bɛva bɛhyɛ bɛ nwo bɔkɔɔ. Kɛ mɔɔ Gyihova * ɛva bɛ ɛtane ɛhyɛ bɛ la, bɛdabɛ noko bɛyɛ ye zɔhane ala.”​—Kɔlɔsaema 3:13.

MENLI AVINLI KOYƐLƐ

Nyamenle maanle “menli mɔɔ wɔ maanle kɔsɔɔti anu la luale sonla ko anwo zo rale, kɛ bɛradɛnla azɛlɛ ye ɛleka biala.” (Gyima ne 17:26) “Nyamenle ɛnnea sonla nyunlu, na wɔ maanle biala anu awie biala mɔɔ sulo ye na ɔyɛ mɔɔ ɔle kpalɛ la, ɔdie ye ɔto nu.”​—Gyima ne 10:34, 35.

ƐBULƐ MƆƆ BƐNYIA YE BƐAMAA AZƐLƐ NE

‘Gyihova Nyamenle maanle sonla hɔdɛnlanle Yidɛn tola ne anu kɛ ɔyɛ nu egyinli na ɔziezie ɛkɛ.’ (Mɔlebɛbo 2:15) Nyamenle ‘bɛazɛkye bɛdabɛ mɔɔ bɛlɛsɛkye azɛlɛ ne la.’​—Yekile 11:18.

ANYEBOLO NEE ƐBƐLATANE ƐBƆLƐ

“Bɛnlea bɛ nwo boɛ wɔ anyebolo biala anwo, ɔluakɛ saa sonla nyia ɔ nwo bɔbɔ a, ye ninyɛne ne ɛnrɛhola ɛnrɛmaa ye ngoane.” (Luku 12:15) “Adwɔmane ɛbɛla nee nyɛleɛ evinli biala anzɛɛ anyebolo ɛdeɛ, bɛmmabɔ zo wɔ bɛ avinli, ɔluakɛ ɛhye ɛnfɛta menli mɔɔ le nwuanzanwuanza la.”​—Ɛfɛsɛsema 5:3.

NƆHALƐLILƐ NEE GYIMA ƐSESEBƐYƐLƐ

“Yɛkulo kɛ yɛfa nɔhalɛlilɛ yɛbɔ yɛ ɛbɛla wɔ debie biala anu.” (Hibuluma 13:18) “Mɔɔ le awule la mmawua bieko; emomu ɔyɛ gyima ɛsesebɛ.”​—Ɛfɛsɛsema 4:28.

NVASOƐ MƆƆ WƆ ZO KƐ YƐBABOA AWIE MƆ

“Bɛkyekye menli mɔɔ arɛle ɛbɔ la arɛle, bɛboa mɔɔ ɛyɛ bɛtɛɛ la, bɛnyia awie biala anwo abotane.” (1 Tɛsalonaekama 5:14) ‘Bɛnlea nrisa nee ahunlanvolɛ wɔ bɛ anwongyelelɛ nu.’​—Gyemise 1:27.

Baebolo ne ɛnga subane mgbalɛ ɛhye mɔ anwo edwɛkɛ ala, emomu ɔkilehile yɛ ɔmaa yɛfa ɛzukoalɛdeɛ mɔɔ wɔ ngyinlazo ɛhye mɔ anu la yɛbɔ yɛ ɛbɛla alehyenlɛ ko biala. Saa yɛ muala yɛfa Baebolo ngilehilelɛ ɛhye mɔ yɛbɔ yɛ ɛbɛla a, asoo alesama ngyegyelɛ zo ɛnrɛde? Saa zɔhane a, ɛnee Baebolo ngyinlazo hyia na ɔle ye mekɛ nu ɛdeɛ ɔtɛla biala! Duzu a Baebolo ngilehilelɛ bahola ayɛ amaa wɔ ɛnɛ a?

 KƐZI BAEBOLO NGILEHILELƐ BAHOLA ABOA WƆ KƐKALA LA

Awie mɔɔ ze nrɛlɛbɛ tɛla biala la hanle kɛ: “Nrɛlɛbɛ dua mɔɔ vi ye gyimayɛlɛ nu ba la azo di benle.” (Mateyu 11:19) Asoo ɛnlie ɛndo nu ɔ? Saa ɛbanwu kɛ awie le nrɛlɛbɛvolɛ a, kyesɛ ɔfa ye nrɛlɛbɛ ne ɔyɛ gyima. Bie a ɛbabiza kɛ: ‘Saa Baebolo ne amgba bahola aboa a, asoo ɔnle kɛ ɔnyia me ɛbɛlabɔlɛ zo tumi ɔ? Kɛzi ɔbahola yeaboa me wɔ me ngyegyelɛ mekɛ nu ɛ?’ Suzu neazo ɛhye anwo.

Ɛnee ninyɛne ɛlɛkɔ boɛ amaa Delphine. * Ɔyɛ gyima yɛɛ ɔ kunlu dwo ɔ nwo. Arɛlevile nu ala, ninyɛne hakyile. Ɔ ra raalɛ mɔɔ ɛnee ɛgyinla bɛlɛra la wule. Ye agyalɛ zɛkyele. Ye ezukoasɛm yɛle basaa. Ɔka kɛ: “Me rɛle vile sonla holɛ ko mɔɔ ɛnee mede la​—menlɛ ralɛ raalɛ, menlɛ kunli yɛɛ menlɛ awuke. Mendele nganeɛ kɛ akee mewie bɔkɔɔ​—awie biala ɛnze me, menlɛ anwosesebɛ nee anyelazo biala.”

Mekɛ ɛhye yɛɛ Delphine nwunle kɛ edwɛkɛ ɛhye le nɔhalɛ a: “Yɛ ngoane mekɛ le ɛvolɛ abulasuu, saa anwosesebɛ wɔ nu a, abulatwɛ; noko nuhua le ɛvɛlɛ nee nyane ngome; ɔngyɛ ɛnee bɛpɛ nu, ɛnee yɛminli.”​—Edwɛndolɛ 90:10.

Wɔ Delphine anwongyelelɛ mekɛ ne anu ɔkpondɛle moalɛ wɔ Baebolo ne anu. Mɔɔ Baebolo ne yɛle maanle ye la zinle ɔ nwo. Kɛ mɔɔ edwɛkɛ nsa  mɔɔ doa zo la bamaa yɛanwu ye la, menli dɔɔnwo ɛnwu ye kɛ Baebolo folɛdulɛ mɔɔ bɛvale bɛyɛle gyima la ɛyɛ nwanwane debie wɔ bɛ ɛbɛlabɔlɛ nu. Bɛrade nganeɛ kɛ Baebolo ne le kɛ deɛ titili ne mɔɔ wɔ ninyɛne ɛzielɛ ɛleka ne mɔɔ yɛlimoa yɛha nwolɛ edwɛkɛ la. Ɔnle kɛ mbuluku gyɛne mɔɔ ɛha mɔɔ ɔngyɛ na yeakpa nwo la. Asoo yemɔ kile kɛ bɛvale debie ngakyile a bɛyɛle Baebolo ne a? Asoo kɛmɔ Nyamenle adwenle a wɔ nu na tɛ sonla adwenle la ati ɔ?​—1 Tɛsalonaekama 2:13.

Bie a, ɛdawɔ noko wɔnwu ye kɛ sonla ngoane le ezinraa yɛɛ asetɛnla nu le ngyegyelɛ ngome. Saa ngyegyelɛ ɛlɛbu ava ɛ nwo zo a, nienwu a ɛbakpondɛ moalɛ, arɛlekyekyelɛ nee folɛdulɛ kpalɛ wɔavi a?

Maa yɛzuzu ndenle titili nsa mɔɔ Baebolo ne bahola aboa wɔ wɔ ɛbɛlabɔlɛ nu la anwo. Ɔbahola yeaboa wɔ yeamaa

  1. wɔahoati ngyegyelɛ ne, saa ɔbayɛ boɛ a.

  2. wɔali ngyegyelɛ mɔɔ bara la anwo gyima.

  3. wɔagyinla ngyegyelɛ mɔɔ ɛnrɛhola nwolɛ ɛhwee yɛ la anloa.

Edwɛkɛ mɔɔ doa zo la baha ninyɛne nsa ɛhye mɔ anwo edwɛkɛ.

^ ɛden. 10 Baebolo ne maa yɛnwu kɛ Nyamenle duma a le Gyihova.​—Edwɛndolɛ 83:18, NW.

^ ɛden. 24 Wɔ edwɛkɛ ɛhye nee nsa mɔɔ doa zo la anu, bɛhakyi aluma bie mɔ.