Rosie ka kɛ, “Ɛnee meta medwenle ninyɛne nwo memaa ɔyɛ ɛzulolɛ wɔ me adwenle nu.” Ngɛlɛlera mɔɔ boale ye la anu ko a le Mateyu 6:34: “Bɛmmadwenledwenle ɛhyema anwo, ɔluakɛ ɛhyema ɔdaye ɔbanyia ye adwenleadwenle ɛdeɛ. Kenle biala anu ngyegyelɛ zonle maa kenle ne.” Rosie akee hanle kɛ Gyisɛse edwɛkɛ zɔhane boale ye maanle ɔgyakyile kɛ ɔbadwenle mɔɔ bazi ɛhyema la anwo. Ɔdoale zo kɛ, “Melɛ ngyegyelɛ, yemɔti mendwenledwenle ninyɛne mɔɔ ɔtɛsile anzɛɛ ɔnrɛzi la anwo memboka tɛnlabelɛ ne anwo.”

Yasmine noko nwunle kɛ adwenleadwenle ɛlɛbo ɔ nwo zo. “Ɛnee mesu fane dɔɔnwo wɔ dapɛne ne anu yɛɛ ɔdwu mekɛ ne bie a mengola da nɔɔzo. Mendele nganeɛ kɛ adwenle ɛtane ɛlɛfo me nwo zo.” Ngɛlɛlera boni a boale ye a? Ɔhwenle adwenle ɔhɔle 1 Pita 5:7 ne azo: “Bɛvuandi bɛ adwenleadwenle muala bɛgua [Nyamenle anwo] zo ɔluakɛ ɔdwenle bɛ nwo.” Yasmine ka kɛ: “Ɛnee akee mekɔ zo mefa me asɔneyɛlɛ meto Gyihova anyunlu na ɔbuale me. Mendele nganeɛ kɛ bɛye debie ɛlomboɛ bie bɛvi me kɔme zo. Ɔyɛ a, adwenle ɛtane ne sia ba noko kɛkala meze kɛzi mebali nwolɛ gyima la.”

Kakula bɛlɛra bie mɔɔ bɛfɛlɛ ye Isabella la ka kɛ: “Menea a bɛvale tu sie bɛwole me ɔluakɛ ɔwɔ me papa noko anwo. Amaa meatuto me nwo na meanlea TV la metu ninyɛne mɔɔ anwo hyia la mesie. Ɔnle subane kpalɛ ɔluakɛ ɔmaa adwenleadwenle yɛ kpole na ɔmmaa sonla ɛnyɛ gyima kpalɛ.” Ngyinlazo mɔɔ boale ye la wɔ 2 Timote 2:15, ɔse: “Bɔ mɔdenle ɛsesebɛ fa ɛ nwo maa Nyamenle kɛ awie mɔɔ fɛta, gyimayɛvolɛ mɔɔ ɛnze ɛhwee nwo nyiane.” Isabella ka kɛ: “Memkpondɛ kɛ Gyihova se me gyima nwo nyiane ɔluakɛ mendule menziele la ati.” Yenyia anyuhɔlɛ kpalɛ.

Zɔhane ala a Kelsey hanle kɛ: “Saa menyia gyimalilɛ bie a, mekendɛ dedee kenle mɔɔ li awieleɛ la na meayɛ. Mesu, mengola da yɛɛ ɔgyegye me. Ɛnee ninyɛne ɛngɔ boɛ ɛmmaa me.” Kelsey nyianle moalɛ wɔ Mrɛlɛbulɛ 13:16 anu: “Badwemafo fa adwenle yɛ ye debie biala, na koasea ye ye koasea ne kile.” Ɔhilele kɛzi ngɛlɛlera ɛhye mɔɔ ɔdwenlenle nwolɛ la boale ye la anu: “Nrɛlɛbɛ wɔ nu kɛ yɛbalimoa yɛaziezie yɛ nwo yɛazie wɔ debie nwo. Ɛnɛ melɛ buluku ekyii mɔɔ la me ɛkponle ne azo dahuu mɔɔ mehyehyɛ gyima mɔɔ mebayɛ la wɔ nu a. Ɔmaa mesiezie me nwo memaa gyima na mengendɛ too kenle mɔɔ li awieleɛ la na meayɛ.”

Kirsten ka kɛ: “Me hu gyakyile me nee me mra nna ne ɛkɛ ne hɔle.” Ngɛlɛlera boni a boale ye a? Mrɛlɛbulɛ 17:17 kenga kɛ: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenyia a.” Kirsten dule agyakɛ boale menli mɔɔ sonle Gyihova kɛ ɔdaye la. Boni a ɔnwunle a? “Me gɔnwo mɔ boale me wɔ ndenle ngakyile zo! Bie mɔ gyakyile aleɛ nee felawɔse wɔ me anlenkɛ ne anloa. Fane nsa mɔɔ me nee me mra ne mɔ dule vile sua mɔɔ yɛde nu la anu la, mediema boale yɛ wɔ yɛ ninyɛne ɛzoalɛ nu. Bɛ nuhua ko boale maanle menyianle gyima. Me gɔnwo mɔ boale me dahuu.”

Delphine mɔɔ yɛlimoa yɛha ye edwɛkɛ la noko anwo yɛle ye koonwu. Mɔɔ ye debie biala vile ɔ sa la ɔhanle kɛ: “Mendele nganeɛ kɛ ɛbɛlabɔlɛ ne le kɛ sotɔɔ yɛɛ megyi alienwo melɛnea menli mɔɔ wɔ nu la. Me nwo yɛle me koonwu kpalɛ.” Ngɛlɛlera ko mɔɔ boale ye la a le Edwɛndolɛ 68:6: ‘Nyamenle maa mɔɔ ɛnlɛ bie la awuke maa ɔtɛnla nu.’ Ɔhilele nu kɛ: “Meze ye kɛ ɛnɛ, ngyɛnu ɛhye ɛnga awuke kpalɛ mɔɔ yɛ nye dua ye la anwo edwɛkɛ. Emomu, mendele ɔ bo kɛ Nyamenle maa yɛ sunsum nu awuke, ɛleka mɔɔ banebɔlɛ wɔ na bɛboɔboa menli mɔɔ kulo Gyihova la anloa la. Ɛnee meze kɛ saa mebahola meabikye awie mɔ a, kyesɛ mebikye Gyihova. Ɔti Edwɛndolɛ 37:4 boale me: ‘Maa ɛ nye ɛlie [Gyihova] anwo, na ɔbamaa wɔanyia mɔɔ ɛkpondɛ la.’”

Ɔdwulale ye kɛ: “Menwunle ye kɛ ɔhyia kɛ mefa me nwo mebeta Gyihova anwo kyengye. Ɔle kpalɛ ɔbo zo. Akee mengɛlɛle ninyɛne mɔɔ mebahola me nee awie mɔ abɔ nu ayɛ la mendole ɛkɛ, amaa meahola me nee menli mɔɔ bɛdabɛ noko bɛkulo Gyihova la ava agɔnwolɛ. Menzukoale kɛ mebava me adwenle meahɔ kpalɛ mɔɔ awie mɔ yɛ la azo na meabu me nye meagua bɛ sinlidɔlɛ zo.”

Ɔle nɔhalɛ kɛ Nyamenle azonvolɛ ɛnli munli. Gyihova Alasevolɛ yia ngyegyelɛ kɛ awie biala la. Noko Baebolo ne mɔɔ yɛsukoa la maa yɛboa menli mekɛ biala. Nrɛlɛbɛ wɔ nu kɛ ɛbanyia agɔnwolɛma zɛhae. Noko akee, asoo Baebolo ngyinlazo bahola aboa wɔ wɔ ngyegyelɛ mɔɔ ɛnrɛhola nwolɛ ɛhwee yɛ ɛnɛ, le kɛ ewule mɔɔ ɛnlɛ ye ayile nee alɔbɔlɛlilɛ nu ɔ?