Wulu kɔ nuhua edwɛkɛ ne azo

Wulu kɔ nuninyɛne ne azo

EDWƐKƐ 43

“Ɔbamaa Bɛayɛ Se”—Adenle Boni Azo?

“Ɔbamaa Bɛayɛ Se”—Adenle Boni Azo?

“[Gyihova bamaa] bɛazi pi, ɔbamaa bɛayɛ se, ɔbamaa bɛagyinla kpundii.”—1 PITA 5:10.

EDWƐNE 38 Ɔbamaa Wɔayɛ Se

MƆƆ YƐBAZUKOA a

1. Kɛzi Nyamenle boale ye azonvolɛ wɔ tete ne ɛ?

 NYAMENLE EDWƐKƐ ne ta ka nɔhavoma anwo edwɛkɛ kɛ bɛ nwo yɛ se. Noko bɛ nuhua ne mɔɔ bɛlɛ anwosesebɛ kpole bɔbɔ la ande nganeɛ dahuu kɛ bɛ nwo yɛ se. Kɛ neazo la, wɔ mekɛ bie mɔ anu, Belemgbunli Devidi dele nganeɛ kɛ ‘ɔ nwo yɛ se kɛ boka,’ noko ɔdwule mekɛ gyɛne nu la, “ɛzulolɛ hanle” ye. (Edw. 30:7) Saa Nyamenle sunsum ne ba Samesɛn anwo zo a, ɔmaa ɔnyia anwosesebɛ kpole bie ɛdeɛ, noko ɛnee ɔze kɛ saa Nyamenle amboa ye a, ‘ye anwosesebɛ ne bavi ye nu na yeayɛ kɛ mrenyia kɔsɔɔti la.’ (Ndɛ. 14:​5, 6; 16:17) Kɛmɔ Gyihova maanle nɔhavoma ɛhye mɔ tumi la ati a ɛnee bɛ nwo yɛ se zɔhane a.

2. Duzu ati a ɛzoanvolɛ Pɔɔlo hanle kɛ ɔyɛ bɛtɛɛ a ɛnee ɔ nwo ɛyɛ se a? (2 Kɔlentema 12:​9, 10)

2 Ɛzoanvolɛ Pɔɔlo nwunle kɛ ɔhyia kɛ Gyihova maa ɔdaye noko tumi. (Kenga 2 Kɔlentema 12:​9, 10.) Ɛnee Pɔɔlo lɛ kpɔkɛdelɛ nwo ngyegyelɛ kɛ yɛ nuhua dɔɔnwo la. (Gal. 4:​13, 14) Ɔdwu mekɛ ne bie a, ɔwɔ kɛ ɔdaye noko ɔmia ɔ nye na yeahola yeayɛ mɔɔ le kpalɛ la. (Wlo. 7:​18, 19) Ɔyɛ a adwenleadwenle tɔ ɔ nwo yɛɛ ɛzulolɛ ka ye wɔ mɔɔ ɔbahola yeado ye kenle bie la anwo. (2 Kɔl. 1:​8, 9) Noko saa Pɔɔlo yɛ bɛtɛɛ a, ɛnee ɔ nwo ɛyɛ se. Wɔ adenle boni azo? Gyihova maanle Pɔɔlo tumi mɔɔ ɔhyia la. Na ɔmaanle ɔ nwo yɛle se.

3. Kpuya boni mɔ a yɛbazuzu nwo wɔ edwɛkɛ ɛhye anu a?

3 Gyihova ɛbɔ ɛwɔkɛ kɛ ɔbamaa yɛdayɛ noko yɛ nwo ayɛ se. (1 Pita 5:10) Noko saa yɛanyɛ tumi zɔhane anwo ɛhwee a, ɔnle kɛ yɛmaa yɛ nye da kɛ yɛ sa baha ye. Kɛ neazo la, kale bie engine a maa ɔkola ɔkɔ a. Noko kyesɛ delava ne tia senle ne azo kolaa na yeahola yeadu yeahɔ ɛleka biala mɔɔ ɔwɔ kɛ ɔkɔ la. Zɔhane ala a Gyihova ɛziezie ɔ nwo kɛ ɔbamaa yɛ tumi mɔɔ yɛhyia la a, noko kyesɛ yɛyɛ nwolɛ debie na yɛanyia zolɛ nvasoɛ. Duzu a Gyihova ɛva ɛmaa yɛ mɔɔ ɔbamaa yɛ nwo ayɛ se a? Na duzu a ɔhyia kɛ yɛyɛ amaa yɛanyia zɔhane tumi ne a? Saa yɛsuzu kɛzi Gyihova maanle menli nsa ɛhye mɔ—ngapezonli Dwona, Gyisɛse mame Mɛle yɛɛ ɛzoanvolɛ Pɔɔlo anwo yɛle se la anwo a, ɔbamaa yɛanwu kpuya ɛhye mɔ anwo mualɛ. Eza yɛbanwu kɛzi Gyihova kɔ zo dua ndenle ko ne ala azo ɛnɛ maa ye azonvolɛ anwo yɛ se la.

ASƆNEYƐLƐ NEE DEBIEZUKOALƐ BAMAA Ɛ NWO AYƐ SE

4. Kɛ ɔkɛyɛ na yɛanyia tumi yɛavi Gyihova ɛkɛ ɛ?

4 Adenle ko mɔɔ yɛbahola yɛalua zo yɛanyia tumi yɛavi Gyihova ɛkɛ ne la a le kɛ yɛbayɛ asɔne. Gyihova noko bamaa yɛanyia “tumi bedevinli ne” yeava yeabua yɛ asɔneyɛlɛ ne. (2 Kɔl. 4:7) Eza saa yɛkenga ye Edwɛkɛ ne na yɛdwenledwenle nwolɛ a, ɔbamaa yɛ nwo ayɛ se. (Edw. 86:11) “Tumi” wɔ Gyihova edwɛkɛ ne mɔɔ wɔ Baebolo ne anu la anu. (Hib. 4:12) Saa ɛsɛlɛ Gyihova na ɛkenga ye Edwɛkɛ ne a, ɔbamaa wɔanyia anwosesebɛ mɔɔ ɛhyia nwo amaa wɔagyinla kpundii, ɛ nye ahɔ zo alie anzɛɛ wɔayɛ gyimalilɛ bie mɔɔ yɛ se la. Nea kɛzi Gyihova maanle ngapezonli Dwona anwo yɛle se la.

5. Duzu ati a ɛnee ngapezonli Dwona hyia akɛnrasesebɛ a?

5 Ɛnee ngapezonli Dwona hyia akɛnrasesebɛ. Gyihova maanle ye gyimalilɛ bie mɔɔ yɛ se la noko ɔnriandile. Ɛhye ati, anrɛɛ ahumu kpole bie mɔɔ ɔdule la maa yeawu na ɔvale menli mɔɔ ɔ nee bɛ wɔ meli ne anu la ngoane ɔdole esiane nu. Mɔɔ bɛvuandinle ye bɛdole nyevile ne anu la, fɛlɛ kpole bie menle ye, na ɛnee fɛlɛ ne akunlu le awozinli kpalɛ. Ɛnea a kɛzi Dwona dele nganeɛ ɛ? Asoo ɛnee ɔsuzu kɛ ɔbawu ɛkɛ ɔ? Asoo ɔnyianle adwenle kɛ Gyihova ɛkpo yɛ ɔ? Bie a adwenleadwenle kpole dɔle Dwona anwo.

Saa yɛlɛyia sɔnea a, kɛ ɔkɛyɛ na yɛanyia anwosesebɛ kɛ mɔɔ ngapezonli Dwona yɛle la ɛ? (Nea ɛdendɛkpunli 6-9)

6. Kɛ mɔɔ Dwona 2:​1, 2, 7 kile la, duzu a maanle Dwona anwo yɛle se wɔ mekɛ mɔɔ ɔla fɛlɛ ne akunlu la ɛ?

6 Duzu a Dwona yɛle amaa ɔ nwo ayɛ se wɔ mekɛ mɔɔ ɔ ngomekye ɔla fɛlɛ ne akunlu la ɛ? Ɔyɛle asɔne. (Kenga Dwona 2:​1, 2, 7.) Dwona yɛle Gyihova anwo anzosesebɛ ɛdeɛ, noko ɛnee ɔlɛ anwodozo kɛ, kɛmɔ yebɛlɛ ɔ nwo aze na yenlu ɔ nwo la ati, Gyihova badie ye asɔneyɛlɛ. Eza Dwona dwenledwenle Ngɛlɛlera ne anwo. Duzu ati a yɛkola yɛka ye zɔ a? Edwɛkɛ dɔɔnwo mɔɔ wɔ Edwɛne ne anu la bie ala a wɔ ye asɔneyɛlɛ ne mɔɔ bɛhɛlɛ ye wɔ Dwona tile 2 ne la a. (Kɛ neazo la, fa Dwona 2:​2, 5 toto Edwɛne 69:1; 86:7 anwo.) Ɔda ali wienyi kɛ ɛnee Dwona ze edwɛkɛ zɔhane mɔ kpalɛ. Na mekɛ mɔɔ ɔdwenledwenlenle nwo wɔ ye amaneɛnwunlɛ ne anu la, ɔmaanle ɔnyianle anwodozo kɛ Gyihova baboa ye. Nzinlii Dwona hɔdɔle file zo, na ɛnee yeziezie ɔ nwo kɛ ɔbalie gyimalilɛ bieko mɔɔ bɛbava bɛamaa ye la yeado nu na yeayɛ ye bɔkɔɔ.—Dwona 2:10–3:4.

7-8. Kɛzi adiema nrenyia bie mɔɔ wɔ Taiwan nyianle anwosesebɛ wɔ mekɛ mɔɔ ɔlɛyia sɔnea la ɛ?

7 Dwona neazo ne bahola aboa yɛ wɔ mekɛ mɔɔ yɛlɛyia sɔnea ngakyile la. Kɛ neazo la, adiema nrenyia Zhiming b mɔɔ wɔ Taiwan la anwo dole ye kpole bie. Ɛnee eza ɔwɔ kɛ ɔgyinla dwazotia kpole mɔɔ ɔlua ye diedi ne ati ye mbusuafoɔ fa ba ɔ nwo zo la anloa. Asɔneyɛlɛ nee debiezukoalɛ maa ɔnyia anwosesebɛ ɔfi Gyihova ɛkɛ. Ɔhanle kɛ: “Ɔyɛ na melɛyia ngyegyelɛ a, me adwenle tufonyia na ɔmmaa mengola menzie me nwo dii menyɛ me ti anwo debiezukoalɛ.” Noko ɔmmaa ɔ sa nu ɛndo. Ɔhanle kɛ: “Mɔɔ limoa, meyɛ asɔne. Akee mefa me earphone ne metuodua me nzo na mebɔ Belemgbunlililɛ edwɛne ne mɔ bie metie. Ɔdwu mekɛ ne bie a, meto edwɛne ne bie ngyikyingyikyi kɔkpula kɛ me adwenle bagyinla la. Akee mebɔ ɔ bo mesukoa debie.”

8 Bɛtianwo debiezukoalɛ ɛmaa Zhiming ɛnyia anwosesebɛ wɔ ndenle mɔɔ ɔ nye ɛnla la azo. Kɛ neazo la, mɔɔ bɛyɛle ye apelehyɛne bie bɛwiele na ɔlɛte kpɔkɛ ngyikyingyikyi la, nɛɛse bie hanle hilele ye kɛ kɛmɔ ye mogya ɛhɔ aze la ati, ɔwɔ kɛ bɛmaa ye mogya. Noko nɔe ne mɔɔ aleɛ kye a bɛbayɛ Zhiming apelehyɛne ne la, ɔgengale adiema raalɛ bie mɔɔ bɛyɛle ye apelehyɛne ko ne ala bie la anwo edwɛkɛ. Adiema raalɛ ne mogya hɔle aze bɔbɔ dɛlale ye ɛdeɛ ne; yeanlie mogya noko ɔdele kpɔkɛ. Zɔhane anwubielɛ ne maanle Zhiming anwosesebɛ maanle ɔhɔle zo ɔlile nɔhalɛ.

9. Saa sɔnea bie ɛmaa wɔ adwenle ɛdu ɛfonyia a, duzu a ɛbahola wɔayɛ a? (Eza nea nvoninli ne.)

9 Saa ɛlɛyia sɔnea a, wɔ adwenle tufonyia too mɔɔ ɛngola ɛnyɛ asɔne kpalɛ ɔ? Anzɛɛ ɛnnyia anwosesebɛ ɛnzukoa debie ɔ? Kakye kɛ Gyihova te wɔ tɛnlabelɛ ne abo bɔkɔɔ. Ɔti saa ɛyɛ asɔne sikalɛ bie bɔbɔ a, ɛbahola wɔanyia anwodozo kɛ ɔbava debie mɔɔ ɛhyia nwolɛ la yeamaa wɔ. (Ɛfɛ. 3:20) Saa ɛnde kpɔkɛ, wɔvɛ anzɛɛ wɔ adwenle ɛdu ɛfonyia la ati ɔmaa ɔyɛ se kɛ ɛbagenga anzɛɛ ɛbazukoa debie a, ɛbahola wɔabɔ mɔdenle wɔadie Baebolo ne anzɛɛ yɛ mbuluku ne mɔ mɔɔ bɛyɛ bɛ ɔdio la bie. Eza saa ɛtie yɛ edwɛne ne mɔ bie anzɛɛ ɛnea vidio mɔɔ wɔ jw.org la bie a, ɔbaboa wɔ. Saa ɛyɛ asɔne na ɛkpondɛ nwolɛ mualɛ ne ɛfi sunsum nu nziezielɛ mɔɔ Gyihova ɛyɛ ɛmaa yɛ la anu a, ɛnee ɛlɛmaa ye adenle wɔamaa yeamaa wɔ anwosesebɛ.

Ɛ MEDIEMA DIEDIMA BAHOLA AMAA Ɛ NWO AYƐ SE

10. Kɛzi yɛ mediema Kilisienema maa yɛ nwo yɛ se ɛ?

10 Gyihova bahola alua yɛ mediema Kilisienema anwo zo yeamaa yɛ nwo ayɛ se. Saa yɛlɛyia sɔnea bie anzɛɛ ɔnla aze ɔmmaa yɛ kɛ yɛbayɛ gyimalilɛ bie mɔɔ yɛ se la a, bɛbahola ‘bɛakyekye yɛ rɛle kpole kpalɛ.’ (Kɔl. 4:​10, 11) Yɛhyia agɔnwolɛma, titili wɔ “anwongyelelɛ mekɛ” nu. (Mrɛ. 17:17) Saa yɛ sa nu to a, yɛ mediema diedima bahola ava mɔɔ yɛhyia nwo la amaa yɛ, bɛakyekye yɛ rɛle na bɛamaa yɛ anwosesebɛ bɛamaa yɛahɔ zo yɛazonle Gyihova. Suzu kɛzi awie mɔ maanle Gyisɛse mame Mɛle anwosesebɛ la anwo.

11. Duzu ati a ɛnee ɔwɔ kɛ Mɛle maa ɔ nwo yɛ se a?

11 Ɛnee ɔwɔ kɛ Mɛle maa ɔ nwo yɛ se amaa yeahola yeayɛ Gyihova ɛhulolɛdeɛ. Mɔɔ anwumabɔvolɛ Geebeleɛle hanle hilele ye kɛ ɔbanrenzɛ wɔ mekɛ mɔɔ bɛtɛgyale ye la, nea kɛzi ɔbayɛ kɛ ɔmaanle adwenleadwenle dɔle ɔ nwo a. Ɛnee ɔtɛtetele ɔdaye mumua ne ɔ mra bɔbɔ ɛlɛ, noko ɔwɔ kɛ ɔnea kakula ne mɔɔ ɔbarayɛ Mɛzaya ne la. Na kɛmɔ ɛnee Mɛle nee nrenyia ɛtɛdale ɛlɛ la ati, kɛ ɔkɛyɛ na yeahilehile edwɛkɛ ne amuala anu yeahile Dwosefi mɔɔ ɛbɔ ye ɛwɔkɛ kɛ ɔbagya ye la ɛ?—Luku 1:​26-33.

12. Kɛ mɔɔ Luku 1:​39-45 kile la, kɛzi Mɛle nyianle anwosesebɛ mɔɔ ɔhyia la ɛ?

12 Kɛzi Mɛle nyianle anwosesebɛ mɔɔ ɔhyia nwo la ɔvale ɔyɛle gyimalilɛ titili ɛhye mɔɔ yɛ se la ɛ? Ɔkpondɛle moalɛ ɔvile awie mɔ ɛkɛ. Kɛ neazo la, ɔhanle ɔhilele Geebeleɛle kɛ ɔha kɛzi ɔbayɛ ye gyima ne la anwo edwɛkɛ dɔɔnwo ɔhile ye. (Luku 1:34) Ɛhye anzi, ɔpɛle adenle ɔhɔle Dwuda “sua bie mɔɔ gua awoka zo la azo” ɔhɔkpɔlale ye busuanli Ɛlezabɛte. Zɔhane ɛkpɔlalɛ ne boale ye kpalɛ. Ɛlezabɛte hanvole Mɛle na Gyihova sunsum ne hanle ye maanle ɔhanle ngapezo bie mɔɔ ɔbamaa Mɛle anwosesebɛ la. (Kenga Luku 1:​39-45.) Mɛle hanle kɛ Gyihova ‘ɛva ɔ sa ɛyɛ ninyɛne mgbole.’ (Luku 1:​46-51) Gyihova luale Geebeleɛle nee Ɛlezabɛte anwo zo maanle Mɛle anwosesebɛ.

13. Mɔɔ adiema raalɛ bie mɔɔ wɔ Bolivia la kpondɛle moalɛ vile ɔ mediema azonvolɛ ɛkɛ la, kɛzi ɔboale ye ɛ?

13 Ɛdawɔ noko ɛbahola wɔanyia anwosesebɛ wɔavi ɛ mediema azonvolɛ ɛkɛ kɛ mɔɔ Mɛle nyianle ye la. Ɛnee adiema raalɛ Dasuri mɔɔ wɔ Bolivia la hyia anwosesebɛ ɛhye bie. Mɔɔ Dasuri papa anwo dole ye kpole bie, mɔɔ ɛnee bɛnnyia ye ewule ne anwo ayile la, bɛhɔdole ye asopiti na ɔliele ɔdole ɔ nwo zo kɛ ɔbanlea ye. (1 Tim. 5:4) Ɛnee ɔyɛ a ɔnla aze fee. Ɔhanle kɛ: “Fane dɔɔnwo ne ala, mendele nganeɛ kɛ menrɛhola menrɛnlea ye bieko.” Ɔkpondɛle moalɛ ɔ? Mɔlebɛbo ne yeanyɛ ye zɔ. Ɔhanle kɛ: “Ɛnee mengulo kɛ megyegye mediema ne mɔ. Menyianle adwenle kɛ, ‘Gyihova ala a baboa me a.’ Noko membanwunle kɛ, saa mete me nwo mefi awie mɔ anwo a, ɛnee melɛbɔ mɔdenle kɛ me ngomekye mebali me ngyegyelɛ ne mɔ anwo gyima.” (Mrɛ. 18:1) Dasuri zile kpɔkɛ kɛ ɔbahɛlɛ ɔ gɔnwo bie mɔ ngɛlata na yeahilehile ye tɛnlabelɛ ne anu yeahile bɛ. Ɔse: “Mennwu kɛzi mekilehile anwosesebɛ mɔɔ me mediema Kilisienema maanle menyianle ye la anu a. Bɛrɛlɛle me aleɛ wɔ asopiti ɛkɛ na bɛgengale Baebolo ne anu edwɛkɛ mɔɔ yɛ arɛlekyekyelɛ la bɛhilele me. Saa yɛze kɛ ɔtɛkale yɛ ngome a, ɔmaa yɛ nye die kpalɛ. Yɛboka Gyihova abusua kpole bie anwo—abusua mɔɔ bɛlɛ ɛhulolɛ kɛ bɛbaboa wɔ, bɛ nee wɔ bazu na bɛ nee wɔ aho wɔ konle ne la.”

14. Duzu ati a ɔwɔ kɛ yɛmaa mgbanyima ne mɔ boa yɛ a?

14 Adenle ko mɔɔ Gyihova dua zo maa yɛ nwo yɛ se la a le asafo nu mgbanyima ne mɔ. Bɛle ahyɛlɛdeɛ mɔɔ ɔdua zo ɔmaa yɛ anwosesebɛ na ɔmaa yɛ nwo tɔ yɛ a. (Aye. 32:​1, 2) Ɔti saa wɔ adwenle tufonyia a, ka wɔ ngyegyelɛ ne kile asafo nu mgbanyima ne mɔ. Saa bɛmaa wɔ moalɛ bie a, fa anyelielɛ die to nu. Gyihova bahola alua bɛ nwo zo amaa ɛ nwo ayɛ se.

WƆ KENLE BIE NWO ANYELAZO NE BAMAA Ɛ NWO AYƐ SE

15. Anyelazo boni a Kilisienema kɔsɔɔti lɛ a?

15 Anyelazo mɔɔ Baebolo ne maa yɛnyia la kola maa yɛ nwo yɛ se. (Wlo. 4:​3, 18-20) Kɛ Kilisienema la, yɛlɛ anyelazo kɛnlɛma kɛ yɛbadɛnla aze dahuu wɔ azɛlɛ ne mɔɔ bayɛ paladaese la azo anzɛɛ wɔ anwuma Belemgbunlililɛ ne anu. Yɛ anyelazo ne maa yɛ anwosesebɛ maa yɛgyinla sɔnea ngakyile nloa, yɛbɔ edwɛkpa ne nolo na yɛyɛ gyimalilɛ ngakyile mɔɔ wɔ asafo ne anu la. (1 Tɛs. 1:3) Anyelazo ko ne ala a maanle Pɔɔlo anwo yɛle se a.

16. Duzu ati a ɛnee ɔhyia kɛ ɛzoanvolɛ Pɔɔlo maa ɔ nwo yɛ se a?

16 Ɛnee ɔhyia kɛ Pɔɔlo maa ɔ nwo yɛ se. Wɔ ye kɛlata ne mɔɔ ɔhɛlɛle ɔhɔmaanle Kɔlentema la anu, ɔvale ɔ nwo ɔtotole buakɛ mɔɔ ɔngyɛ na yeabɔ la anwo. ‘Ɔyiale ngyegyelɛ ngakyile,’ ‘ɔ nye zo danle ye,’ ‘bɛyɛle ye kpɔdekpɔde’ yɛɛ ‘bɛbɔle ye bɛdole aze.’ Ɛnee ye ngoane bɔbɔ la esiane nu. (2 Kɔl. 4:​8-10) Pɔɔlo hɛlɛle edwɛkɛ ɛhye mɔ wɔ ye edwɛkpatɛlɛvolɛ adendulɛ mɔɔ tɔ zolɛ nsa la anu. Bie a mekɛ zɔhane ɛnee ɔnze kɛ bɔ zo mɔɔ ɔbayia ngyegyelɛ dɔɔnwo a. Ɔbayia nzakadolɛma, bɛbahye ye, ɔbabutu nyevile nu yɛɛ bɛbado ye efiade.

17. Duzu a 2 Kɔlentema 4:​16-18 maa yɛnwu kɛ ɔmaanle Pɔɔlo anwosesebɛ ɔmaanle ɔgyinlanle kpundii a?

17 Pɔɔlo vale ye adwenle ziele ye anyelazo ne azo na yemɔ maanle ɔnyianle anwosesebɛ ɔgyinlanle kpundii. (Kenga 2 Kɔlentema 4:​16-18.) Ɔhanle ɔhilele Kɔlentema ne kɛ, saa ɔ nwonane ne “ɛlɛsɛkye” bɔbɔ a, ɔnrɛmaa yemɔ ɛnrɛmaa ɔ sa nu ɛnrɛdo. Pɔɔlo vale ye adwenle ziele mɔɔ ɔbanyia ye kenle bie la azo. Anyelazo mɔɔ ɔlɛ kɛ ɔbadɛnla ngoane nu dahuu wɔ anwuma la le “kpole kpalɛ” tɛla anwongyelelɛ biala mɔɔ ɛnee ɔlɛkɔ nu la. Pɔɔlo dwenledwenlenle zɔhane anyelazo ne anwo, ɛhye ati ɔdele nganeɛ kɛ ɔlɛnyia anwosesebɛ “fofolɛ alehyenlɛ biala.”

18. Kɛzi kenle bie nwo anyelazo ne maanle Tihomir nee ye abusua ne anwo yɛle se ɛ?

18 Adiema nrenyia Tihomir mɔɔ wɔ Bulgaria la anyelazo ne maanle ye anwosesebɛ. Ɛvolɛ ekyii mɔɔ ɛpɛ nu la, ɔ diema kakula nrenyia Zdravko yiale kale esiane na ɔwule. Ɛhye ati ɛnee Tihomir di nyane kpole. Amaa yeahola yeagyinla ɛhye anloa la, ɛnee ɔ nee ye abusua ne pɛle kɛzi ewudwazo ne bayɛ la anwo nvoninli wɔ bɛ adwenle nu. Ɔhanle kɛ: “Kɛ neazo la, yɛzuzule ɛleka mɔɔ yɛbayia Zdravko, aleɛ mɔɔ yɛbado yɛamaa ye, menli mɔɔ yɛbado ɛsalɛ yɛavɛlɛ bɛ wɔ ɛkponle mɔɔ yɛbalimoa yɛado yɛamaa ye abo la yɛɛ awieleɛ mekɛ ne anwo edwɛkɛ mɔɔ yɛbaha yɛahile ye la anwo.” Tihomir hanle kɛ bɛ adwenle mɔɔ bɛva bɛzie bɛ anyelazo ne azo la ɛlɛmaa ye abusua ne anwosesebɛ yeamaa bɛahɔ zo bɛagyinla kpundii na bɛahendɛ mekɛ mɔɔ Gyihova bava adwazo ɔ diema ne la.

Ɛnea a kɛzi wɔ ɛbɛlabɔlɛ bayɛ wɔ ewiade fofolɛ ne anu ɛ? (Nea ɛdendɛkpunli 19) c

19. Duzu a ɛbahola wɔayɛ amaa wɔ anyelazo ne anu amia a? (Eza nea nvoninli ne.)

19 Kɛ ɔkɛyɛ na wɔamaa wɔ anyelazo ne anu amia ɛ? Kɛ neazo la, saa ɛlɛ anyelazo kɛ ɛbadɛnla ngoane nu dahuu wɔ azɛlɛ ye azo a, kenga Paladaese ne anwo edwɛkɛ mɔɔ wɔ Baebolo ne anu la na dwenledwenle nwolɛ. (Aye. 25:8; 32:​16-18) Dwenledwenle kɛzi asetɛnla bayɛ wɔ ewiade fofolɛ ne anu la anwo. Pɛ ye nvoninli kɛ ɛwɔ ɛkɛ. Nwane mɔ a ɛnwu bɛ a? Ɛnelɛ boni a ɛte a? Kɛzi ɛte nganeɛ ɛ? Amaa wɔahola wɔapɛ ɛhye anwo nvoninli kpalɛ la, nea Paladaese nwo nvoninli mɔɔ wɔ yɛ mbuluku ne mɔ anu la bie, anzɛɛ nea edwɛne vidio le kɛ Anzodwolɛ Bara, Ɔnrɛhyɛ Na Yeara Nu anzɛɛ Banlea. Saa yɛfa yɛ adwenle yɛsie ewiade fofolɛ nwo anyelazo ne azo kpalɛ a, yɛ ngyegyelɛ ne bayɛ ‘mekɛ ezinra nu debie yɛɛ ɔnrɛyɛ ɛlomboɛ.’ (2 Kɔl. 4:17) Gyihova balua anyelazo ne mɔɔ yeva yemaa wɔ la azo yeamaa ɛ nwo ayɛ se.

20. Saa yɛyɛ bɛtɛɛ a, kɛ ɔkɛyɛ na yɛanyia tumi ɛ?

20 Saa yɛyɛ bɛtɛɛ bɔbɔ a, ‘Nyamenle bamaa yɛ tumi.’ (Edw. 108:13) Gyihova ɛhile wɔ mɔɔ ɛyɛ a ɛbanyia anwosesebɛ wɔavi ye ɛkɛ ne la dɛba. Ɔti saa ɛhyia moalɛ amaa wɔayɛ gyimalilɛ bie, wɔagyinla sɔnea nloa anzɛɛ ɛ nye ahɔ zo alie a, fi wɔ ahonle nu sɛlɛ Gyihova na dua bɛtianwo debiezukoalɛ zo kpondɛ adehilelɛ fi ye ɛkɛ. Maa ɛ mediema Kilisienema ɛmaa wɔ anwosesebɛ. Dwenledwenle wɔ anyelazo ne anwo dahuu. Akee ɛbanyia ‘anwosesebɛ wɔ tumi muala anu kɛ mɔɔ [Nyamenle] anyunlunyia tumi ne de la, amaa wɔava abotane nee anyelielɛ wɔagyinla debie biala anloa.’—Kɔl. 1:11.

EDWƐNE 33 Fa Wɔ Adesoa Ne Maa Gyihova

a Edwɛkɛ ɛhye baboa bɛdabɛ mɔɔ bie a bɛte nganeɛ kɛ ɔyɛ se kɛ bɛbagyinla sɔnea bie mɔɔ bɛlɛyia la anloa anzɛɛ bɛdabɛ mɔɔ bɛnyia gyimalilɛ bie mɔɔ bɛte nganeɛ kɛ ɔbo bɛ nwo zo la. Yɛbanwu kɛzi Gyihova bahola amaa yɛ anwosesebɛ nee mɔɔ yɛbahola yɛayɛ amaa yɛanyia ye moalɛ ne azo nvasoɛ la.

b Bɛhakyi aluma bie mɔ.

c NVONINLI NE ANWO NGILENU: Adiema raalɛ bie mɔɔ le mumule la ɛlɛdwenledwenle ɛwɔkɛ mɔɔ wɔ Baebolo ne anu la anwo na ɔlɛbɔ edwɛne vidio amaa yeaboa ye yeamaa yeapɛ kɛzi ɛbɛlabɔlɛ bayɛ wɔ ewiade fofolɛ ne anu la anwo nvoninli.