Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 43

Sonle Gyihova Angomekye

Sonle Gyihova Angomekye

“Gyihova le Nyamenle mɔɔ ɔkulo kɛ bɛsonle ɔ ngomekye.”​—NAHUM 1:2.

EDWƐNE 51 Yɛyila Yɛ Nwo Zo Yɛmaa Nyamenle!

MƆƆ YƐBAZUKOA *

1. Duzu ati a ɔwɔ kɛ yɛsonle Gyihova angomekye a?

ƆFƐTA kɛ yɛsonle Gyihova angomekye, ɔluakɛ ɔdaye a ɔle yɛ Bɔvolɛ nee Ngoane Maavolɛ a. (Yek. 4:11) Noko, ɔyɛ a yɛyia ngyegyelɛ. Ɔwɔ nu kɛ yɛkulo Gyihova yɛɛ yɛbu ye, noko ɔyɛ a yɛnva ɛzonlenlɛ mɔɔ fɛta ye la yɛmmaa ye. Ɔwɔ kɛ yɛnwu kɛzi ɛhye bahola azi la. Noko mɔɔ limoa, bɛmaa yɛzuzu kɛzi Gyihova mɔɔ yɛsonle ɔ ngomekye abo kile la anwo.

2. Kɛ mɔɔ Adendulɛ 34:14 kile la, saa yɛdu yɛ nwo yɛmaa kɛ yɛsonle Gyihova angomekye a, duzu a yɛbayɛ a?

2 Wɔ Baebolo ne anu, Nyamenle mɔɔ yɛsonle ɔ ngomekye la kile kɛ, yɛnyia ɛlɔlɛ kpole yɛamaa ye. Gyihova mɔɔ yɛsonle ɔ ngomekye la kile kɛ yɛnrɛzonle debie biala yɛnrɛboka ɔ nwo. Yɛnrɛmaa awie anzɛɛ debie biala ɛnrɛzɛkye ɛlɔlɛ kpole mɔɔ yɛlɛ yɛmaa Gyihova la.​—Kenga Adendulɛ 34:14.

3. Duzu ati a yɛlɛ ndelebɛbo kpalɛ mɔɔ ɔti yɛsonle Gyihova angomekye a?

3 Yɛdayɛ mumua ne a yɛdu yɛ nwo yɛmaa kɛ yɛsonle Gyihova a. Duzu ati ɔ? Ɔluakɛ yɛnyia ɔ nwo nɔhalɛ ndelebɛbo ɔlua ɔ nwo debie mɔɔ yɛzukoale la azo. Yɛ nye ɛralie ye subane ngɛnlɛma ne mɔ anwo. Yɛnwu mɔɔ ɔkulo nee mɔɔ ɔngulo la yɛɛ yɛdie yɛto nu. Yɛte bodane mɔɔ ɔlɛ ɔmaa alesama la abo yɛɛ yɛgyi ɔ nzi. Ɔle enililɛ yɛɛ nwolɛ adenle kpole kɛ yɛbayɛ ɔ gɔnwo. (Edw. 25:14) Debie biala mɔɔ yɛsukoa ye wɔ yɛ Bɔvolɛ ne anwo la maa yɛbikye ye.​—Gye. 4:8.

4. (a) Ndenle boni mɔ a Abɔnsam dua zo maa edwɛkɛ ba ɛlɔlɛ mɔɔ yɛlɛ yɛmaa Gyihova la anwo a? (b) Duzu a yɛbazuzu nwo wɔ edwɛkɛ ɛhye anu a?

4 Abɔnsam a di ewiade ɛhye azo tumi a, na ɔdua ninyɛne mɔɔ wɔ nu la azo ɔmaa ɔyɛ se kɛ yɛbaho yɛatia yɛ nwonane nu atiakunluwɔzo ne mɔ. (Ɛfɛ. 2:1-3; 1 Dwɔn 5:19) Ye bodane a le kɛ, ɔmaa yɛahyɛ ɛlɔlɛ mɔɔ yɛlɛ yɛmaa Gyihova  la anu amaa yɛanzonle Gyihova angomekye. Bɛmaa yɛnlea ndenle nwiɔ mɔɔ ɔdua zo ɔyɛ zɔ la. Mɔɔ limoa la, ɔmaa yɛbɔ mɔdenle kɛ yɛkpondɛ anwonyia yɛɛ mɔɔ tɔ zo nwiɔ, ɔmaa yɛsi kpɔkɛ ɛtane wɔ anyelielɛ ninyɛne nwo.

MMAYƐ EZUKOA NWO ANYEBOLO

5. Duzu ati a ɔwɔ kɛ yɛkpo ezukoa nwo anyebolo ɛ?

5 Yɛ muala yɛkulo kɛ yɛnyia aleɛ kpalɛ mɔɔ yɛbali, yɛnyia tɛladeɛ kpalɛ yɛwula na yɛtɛnla ɛleka mɔɔ yɛ nwo tɔ yɛ la. Noko, ɔwɔ kɛ yɛnea boɛ na yɛanyɛ ezukoa nwo anyebolo. Menli dɔɔnwo mɔɔ wɔ Seetan ewiade ne anu la ‘kulo ezukoa’ nee ninyɛne mɔɔ ezukoa kola tɔ la. (2 Tim. 3:2) Ɛnee Gyisɛse ze kɛ, ye ɛdoavolɛma babɔ mɔdenle kɛ bɛnyia bɛ nwo. Yemɔti ɔhanle kɛ: “Awie biala ɛnrɛhola ɛnrɛzonle menlenlɛ nwiɔ; ɔluakɛ ɔbahulo ko na yeakpɔ ko, anzɛɛ ɔbali ko eni yeagyakyi ko. Bɛnrɛhola bɛnrɛzonle Nyamenle nee Anwonyia.” (Mat. 6:24) Awie mɔɔ ɛlɛsonle Gyihova na ɔbazɛkye mekɛ nee anwosesebɛ dɔɔnwo kɛ ɔnyia ɔ nwo wɔ ewiade ne anu la ɛlɛsonle menlenlɛ nwiɔ. Ɔnrɛhola ɔnrɛzonle Gyihova angomekye.

Kɛzi Lawɔdesiama bie mɔ nwunle bɛ nwo . . . yɛɛ kɛzi Gyihova nee Gyisɛse nwunle bɛ la (Nea ɛdendɛkpunli 6)

6. Duzu a yɛsukoa yɛfi edwɛkɛ mɔɔ Gyisɛse hanle hilele Lawɔdesia asafo ne la anu a?

6 Mɔɔ ɛvoya mɔɔ limoa Y.M. ɛlɛba ye awieleɛ la, Lawɔdesia asafo ne anu amra dule bɛ nloa anu hanle kɛ: “Mele sukoavolɛ yɛɛ menyia me nwo na mengyia ɛhwee.” Noko Gyihova nee Gyisɛse nwunle bɛ kɛ, ‘bɛyɛ anwunvɔne na bɛ nwo yɛ alɔbɔlɛ na bɛle ehyianvolɛma, bɛ nye ɛzi yɛɛ bɛlɛ bɛ nwo zɔ.’ Tɛ kɛ ɛnee bɛlɛ ezukoa la ati a Gyisɛse dule bɛ folɛ a, emomu ɛnee ɛhulolɛ mɔɔ bɛlɛ bɛmaa anwonyia la ɛlɛsɛkye bɛ nee Gyihova avinli agɔnwolɛvalɛ ne. (Yek. 3:14-17)  Saa yɛnwu kɛ anwonyia ɛhulolɛ ɛlɛsosɔ ndinli wɔ yɛ ahonle nu a, ɔwɔ kɛ yɛyɛ nwolɛ debie ndɛndɛ na yɛkakyi yɛ adwenle. (1 Tim. 6:7, 8) Saa yɛanyɛ zɔ a, yɛ ahonle ne anu bahyɛ nwiɔ na Gyihova ɛnrɛlie yɛ ɛzonlenlɛ ɛnrɛdo nu. “Ɔkulo kɛ [yɛsonle] ɔ ngomekye.” (Mɛla 4:24) Kɛzi yɛbahola yɛanyia ezukoa nwo adwenle mɔɔ ɛnfɛta la ɛ?

7-9. Duzu a ɛsukoa ɛfi asafo nu kpanyinli bie mɔɔ bɛfɛlɛ ye David la neazo ne anu a?

7 Suzu asafo nu kpanyinli bie mɔɔ yɛ gyima ɛsesebɛ mɔɔ bɛfɛlɛ ye David mɔɔ ɔwɔ United States la anwo. Devidi mumua ne ka kɛ, ɛnee ɔyɛ gyima ɛsesebɛ kpalɛ ɔmaa ye gyimamenle ne. Bɛmaanle ye gyinlabelɛ kpole wɔ kɔmpɛlɛ mɔɔ ɔyɛ gyima wɔ nu la anu, na bɛhanle kɛ ɔboka menli mɔɔ bɔ mɔdenle kpalɛ wɔ maanle ne anu la anwo. David ka kɛ, “Mekɛ zɔhane, mendele nganeɛ kɛ ɛhye le Gyihova nyilalɛ.” Asoo ɔle zɔ?

8 Akee David nwunle kɛ ye gyima ne ɛlɛsɛkye ɔ nee Gyihova agɔnwolɛvalɛ ne. Ɔka kɛ: “Saa mewɔ debiezukoalɛ bo anzɛɛ daselɛlilɛ nu a, gyima nu ngyegyelɛ a medwenle nwo a. Ɛnee menyia ezukoa dɔɔnwo, noko adwenleadwenle dɔle me nwo yɛɛ ɛnee ngyegyelɛ ɛlɛba me agyalɛ ne anu.”

9 David nwunle kɛ ɔwɔ kɛ ɔsi kpɔkɛ na ɔyɛ ninyɛne mɔɔ anwo hyia la. Ɔka kɛ: “Menzile kpɔkɛ kɛ meyɛ tɛnlabelɛ ne anwo debie.” Ɛnee David kulo kɛ ɔyɛ ye mekɛ ngyehyɛleɛ kpalɛ wɔ gyima nu, yemɔti ɔvale mɔɔ yezuzu nwo la ɔdole ye gyimamenle ne anyunlu. Duzu a zile a? David gyima vile ɔ sa! Kɛzi ɔyɛle ye nyɛleɛ ɛ? Ɔka kɛ: “Ye alehyenlɛ nu, membizale adekpakyelɛ boavolɛ nwo adenle.”  Amaa bɛahola bɛanlea bɛ nwo la, ɔ nee ɔ ye yɛle gyima bie mɔɔ ba aze la. Ɔyɛle ekyi la, ɔbɔle dahuu adekpakyelɛ bo, na nzinlii ɔ ye rabokale ɔ nwo. Agyalɛma ɛhye kpale kɛ bɛbayɛ gyima mɔɔ menli ɛmbu ye bie la, noko tɛ gyima mɔɔ ɛnee bɛlɛyɛ la a anwo hyia bɛ kpalɛ a. Ɔwɔ nu kɛ bɛ ahatualɛ zo dele kolaa, noko siane biala, ɛnee bɛnyia mɔɔ baza bɛ nwo kakɛ tua la. Ɛnee bɛkulo kɛ bɛfa Gyihova bɛdimoa, na bɛnwunle ye wienyi kɛ, ɔnea menli mɔɔ bɛfa Belemgbunlililɛ ne bɛdimoa la.​—Mat. 6:31-33.

10. Kɛ ɔkɛyɛ na yɛabɔ yɛ ahonle nwo bane ɛ?

10 Saa yɛlɛ bie anzɛɛ yɛnlɛ bie bɔbɔ a, ɔwɔ kɛ yɛbɔ yɛ ahonle nwo bane. Adenle boni azo? Mmakulo anwonyia. Yɛɛ mmamaa wɔ gyima kyia wɔ tɛla Gyihova ɛzonlenlɛ. Kɛ ɔkɛyɛ na wɔanwu kɛ ɛlɛkulo anwonyia ɛ? Kpuya mɔɔ ɛbahola wɔabiza ɛ nwo la bie mɔ ɛne: ‘Asoo meta medwenle me gyima nwo wɔ mekɛ mɔɔ mewɔ asafo ayia bo anzɛɛ daselɛlilɛ nu la ɔ? Asoo meta medwenledwenle kɛ ɔkɛyɛ na meanyia ezukoa kenle bie la anwo ɔ? Asoo ezukoa nee nwonane afoa nu ninyɛne ɛlɛmaa ngyegyelɛ ara me agyalɛ ne anu ɔ? Asoo melɛ ɛhulolɛ kɛ mebayɛ gyima mɔɔ menli ɛmbu ye bie la, amaa meahola meanyia mekɛ dɔɔnwo meazonle Gyihova ɔ?’ (1 Tim. 6:9-12) Saa yɛlɛdwenledwenle kpuya zɔhane mɔ anwo a, ɔwɔ kɛ yɛkakye kɛ Gyihova kulo yɛ yɛɛ yebɔ menli mɔɔ sonle ɔ ngomekye la ɛwɔkɛ kɛ: “Menrɛgyakyi wɔ ɛlɛ, yɛɛ menrɛkpo wɔ ɛlɛ.” Ɛhye ati a ɛzoanvolɛ Pɔɔlo hɛlɛle kɛ: “Bɛmmamaa ezukoa nwo anyebolo ba bɛ ɛbɛlabɔlɛ nu” la.​—Hib. 13:5, 6.

KPA NINYƐNE MƆƆ ƐFA ƐDIELIE Ɛ NYE LA NRƐLƐBƐ NU

11. Kɛzi anyelielɛ ninyɛne mɔɔ awie bakpa la kola ka ye ɛ?

11 Gyihova kulo kɛ yɛ nye die wɔ ɛbɛlabɔlɛ nu, na yemaa yɛ ninyɛne mɔɔ maa yɛ nye die la. Nɔhalɛ nu, Nyamenle Edwɛkɛ ne ka kɛ, “debie kpalɛ biala ɛnle ɛkɛ ɛmmaa sonla kɛ ɔkɛli na ɔkɛnlo na ɔ nye kɛlie ye gyima ɛsesebɛ nwo.” (Nol. 2:24) Noko akee ewiade ne anu ninyɛne mɔɔ bɛfa bɛdielie bɛ nye la dɔɔnwo wɔ ɛkɛ ne mɔɔ ɔkola ɔboda yɛ. Ɔmaa menli dɔɔnwo die ɛbɛlabɔlɛ nwo ngyinlazo anzɛɛ ninyɛne mɔɔ Nyamenle Edwɛkɛ ne tendɛ tia la bɛto nu​—anzɛɛ bɛ nye die nwo.

Nwane a ɛlɛsiezie ninyɛne mɔɔ ɛfa ɛdielie ɛ nye la ɛ? (Nea ɛdendɛkpunli 11-14) *

12. Kɛ mɔɔ 1 Kɔlentema 10:21, 22 kile la, duzu ati a ɔwɔ kɛ yɛkpa ninyɛne mɔɔ yɛfa yɛdie yɛ nye la nrɛlɛbɛ nu ɛ?

 12 Yɛkulo kɛ yɛsonle Gyihova angomekye, yemɔti yɛnrɛhola yɛnrɛli aleɛ wɔ “Gyihova ɛkponle zo” nee “sunsum ɛtane ɛkponle zo.” (Kenga 1 Kɔlentema 10:21, 22.) Saa ɛ nee awie to ɛsalɛ di aleɛ a, ɔkile kɛ ɛ gɔnwo ɔ. Saa yɛkpa anyelielɛ ninyɛne mɔɔ si basabasayɛlɛ, sunsum ɛtane nyɛleɛ yɛɛ nla nwo ɛbɛlatane nwo adua la a, ɛnee ɔle kɛ asɛɛ yɛ nee Nyamenle agbɔvolɛ ɛlɛto ɛsalɛ ali aleɛ la. Ɛhye baboda yɛ na yeazɛkye yɛ nee Gyihova agɔnwolɛvalɛ ne.

13-14. Kɛ mɔɔ Gyemise 1:14, 15 kile la, duzu ati a ɔwɔ kɛ yɛnea boɛ wɔ anyelielɛ ninyɛne mɔɔ yɛkpa la anwo a? Maa ndonwo.

13 Suzu kɛzi anyelielɛ ninyɛne bahola ayɛ kɛ aleɛ la anwo nea. Saa yɛdi aleɛ a, yɛsi kpɔkɛ wɔ mɔɔ yɛdi la anwo. Noko saa aleɛ ne kɔ yɛ kunlu a, ninyɛne bie mɔ mɔɔ yɛnlɛ zolɛ tumi la kɔ zo wɔ yɛ nu, na awieleɛ bɔkɔɔ ne, nwonane ne fa anwosesebɛ mɔɔ wɔ aleɛ ne anu la yɛ gyima. Aleɛ kpalɛ maa yɛnyia kpɔkɛdelɛ kpalɛ na aleɛ mɔɔ ɛnle kpalɛ la maa yɛ nwo to yɛ. Bie a yɛnrɛnwu ye ɛkɛ ne ala, noko mekɛ ɛlɛkɔ la, ɔbala ali.

14 Kɛ anyelielɛ ninyɛne de la ɛne, yɛkola yɛsi mɔɔ yɛkulo kɛ ɔkɔ yɛ adwenle nu la anwo kpɔkɛ. Yemɔ anzi, yɛ adwenle nee yɛ ahonle ne yɛ nwolɛ gyima, na yɛngola yɛnyɛ nwolɛ ɛhwee. Anyelielɛ ninyɛne mɔɔ le kpalɛ la boa yɛ; noko mɔɔ ɛnle kpalɛ la boda yɛ. (Kenga Gyemise 1:14, 15.) Bie a yɛnrɛnwu kɛzi anyelielɛ ninyɛne mɔɔ ɛnle kpalɛ baboda yɛ la ɛkɛ ne ala, noko mekɛ ɛlɛkɔ la, yɛbanwu ye. Ɛhye ati, Baebolo ne bɔ yɛ kɔkɔ kɛ: “Bɛmmamaa bɛbɛlɛbɛla bɛ: Nyamenle ɛnle awie mɔɔ bɛbɛlɛbɛla ye a. Na mɔɔ sonla kɛlua la yɛɛ ɔbu a; ɔluakɛ mɔɔ dua maa ɔ nwonane ne la balua ɔ nwonane ne azo anyia ɛzɛkyelɛ.” (Gal. 6:7, 8) Wɔnwu deɛmɔti ɔhyia kɛ yɛkpo anyelielɛ ninyɛne biala mɔɔ si ninyɛne mɔɔ Gyihova kyi adua la!​—Edw. 97:10.

15. Ahyɛlɛdeɛ boni a Gyihova ɛva ɛmaa yɛ a?

15 Gyihova menli dɔɔnwo anye die kɛ bɛbanlea JW Broadcasting®, TV zo gyimalilɛ mɔɔ anwo te la. Adiema raalɛ ko mɔɔ bɛfɛlɛ ye Marilyn la hanle kɛ: “JW Broadcasting ɛboa me ɛmaa menyia adwenle kpalɛ, ɔngyia kɛ meyɛ nyeyenu wɔ ninyɛne mɔɔ wɔ ɛkɛ ne la anu. Saa me nwo yɛ me koonwu anzɛɛ me sa nu to a, mekpondɛ ɛdendɛlɛ mɔɔ maa anwosesebɛ la metie. Ɛhye maa mebikye Gyihova nee ye ahyehyɛdeɛ ne. JW Broadcasting gyimalilɛ ne ɛhakyi me ɛbɛlabɔlɛ bɔkɔɔ.” Ɛlɛnyia ahyɛlɛdeɛ ɛhye mɔɔ vi Gyihova ɛkɛ la azo nvasoɛ ɔ? Saa ɛye siane biala gyimalilɛ ne ɛsie ɛhane a, ɔdio nee vidio gyimalilɛ ngakyile yɛɛ edwɛne mɔɔ maa anwosesebɛ la dɔɔnwo wɔ ɛkɛ ne mɔɔ ɛbahola wɔadie anzɛɛ wɔnlea bɛ mekɛ biala a.

16-17. Duzu ati a ɔwɔ kɛ yɛnea boɛ wɔ mekɛ dodo mɔɔ yɛfa yɛdielie yɛ nye la anwo a, na kɛ ɔkɛyɛ na yɛayɛ zɔ ɛ?

16 Tɛ anyelielɛ ninyɛne mɔɔ yɛkpa la ala a ɔwɔ kɛ yɛnea boɛ wɔ nwo a, emomu mekɛ dodo mɔɔ yɛfa yɛdie yɛ nye la noko boka nwo. Saa yɛannea boɛ wɔ nwo a, yɛbazɛkye mekɛ dɔɔnwo wɔ anyelielɛ ninyɛne nwo yɛadɛla mekɛ dodo mɔɔ yɛfa yɛsonle Gyihova la. Ɔnla aze ɔmmaa bie mɔ kɛ bɛbazi mekɛ dodo mɔɔ bɛfa bɛdie bɛ nye la anwo kpɔkɛ. Adiema raalɛ bie mɔɔ ɛnyia ɛvolɛ 18 mɔɔ bɛfɛlɛ ye Abigail  la ka kɛ: “Saa mefɛ wɔ alehyenlɛ ne anu na menea TV wɔ nɔsolɛ nu a, ɔboa me. Noko mekanwu ye la, ɛnee medɛnla TV ne anwo dɔnehwele dɔɔnwo.” Adiema nrenyia bie mɔɔ bɛfɛlɛ ye Samuel la ka kɛ: “Ɔyɛ a menea vidio nzinrenzinra dɔɔnwo wɔ yintanɛte ne azo. Mebɔ ɔ bo ngyikyi ngyikyi, na me nye kara me nwo zo la ɛnee meva dɔnehwele kɛyɛ nna menlea.”

17 Kɛ ɔkɛyɛ na wɔava mekɛ dodo mɔɔ fɛta la wɔalie ɛ nye ɛ? Mɔɔ limoa la a le kɛ, ɛbanwu mekɛ dodo mɔɔ ɛkulo kɛ ɛsɛkye ye wɔ nwo la. Ɔbayɛ boɛ a, fa dapɛne ko yɛ nwolɛ kɛlɛtokɛ. Kɛlɛ mekɛ dodo mɔɔ ɛkulo kɛ ɛfa ɛnea TV, ɛfa ɛkɔ yintanɛte ne azo anzɛɛ ɛbɔ game wɔ wɔ fonu ne azo la wɔ calendar zo. Saa ɛnwu kɛ ɛlɛsɛkye mekɛ dɔɔnwo wɔ anyelielɛ ninyɛne nwo a, bɔ mɔdenle yɛ mekɛ ngyehyɛleɛ kpalɛ. Dimoa fa mekɛ ne yɛ ninyɛne mɔɔ anwo hyia la na akee wɔava mɔɔ ɛha la wɔalie ɛ nye. Akee sɛlɛ Gyihova kɛ ɔboa wɔ ɔmaa ɛli wɔ ngyehyɛleɛ ne azo. Saa ɛyɛ zɔ a, ɛbanyia mekɛ nee anwosesebɛ dɔɔnwo wɔamaa bɛtianwo Baebolo ɛzukoalɛ, abusua ɛzonlenlɛ, asafo ayia yɛɛ nolobɔlɛ nee ngilehilelɛ gyima ne. Eza ɔnrɛmaa wɔ adwenle ɛnrɛbua wɔ fɔlɛ wɔ mekɛ mɔɔ wɔkpa kɛ ɛfa wɔalie ɛ nye la anwo.

KƆ ZO FI AHONLE NU SONLE GYIHOVA ANGOMEKYE

18-19. Kɛ ɔkɛyɛ na yɛahile kɛ yɛlɛfi yɛ ahonle nu yɛazonle Gyihova angomekye ɛ?

18 Mɔɔ ɛzoanvolɛ Pita hɛlɛle Seetan ewiade ne awieleɛ nee ewiade fofolɛ ne anwo edwɛkɛ wiele la, ɔhanle kɛ: “Alɔvolɛ, kɛmɔ bɛlɛkendɛ ninyɛne ɛhye mɔ la ati, bɛbɔ mɔdenle kɛ awieleɛ bɔkɔɔ ne bɛbanwu bɛ kɛ ngehanleɛ nee dɛne biala ɛnle bɛ nwo na bɛde anzodwolɛ nu.” (2 Pita 3:14) Saa yɛtie folɛdulɛ zɔhane na yɛmaa yɛ nwo te wɔ ɛbɛlabɔlɛ nu yɛɛ sunsum nu a, ɔbahile kɛ yɛlɛfi ahonle nu yɛazonle Gyihova angomekye.

19 Seetan nee ye ewiade ne bahɔ zo abɔ mɔdenle kɛ bɛmaa yɛava ninyɛne gyɛne yɛalimoa yɛ ɛbɛlabɔlɛ nu. (Luku 4:13) Noko ɔnva nwo ngyegyelɛ biala mɔɔ yɛyia la, yɛnrɛmaa awie biala anzɛɛ debie biala ɛnrɛzɛkye ahonle nu mɔɔ yɛlɛfi yɛazonle Gyihova la. Yɛbɔ kpɔkɛ kɛ, yɛfa ɛzonlenlɛ mɔɔ fɛta Gyihova la yɛamaa ye​—yɛfi yɛ ahonle nu yɛazonle ɔ ngomekye!

EDWƐNE 30 Me Ze, Me Nyamenle Nee Me Gɔnwo

^ ɛden. 5 Yɛdu yɛ nwo yɛmaa kɛ yɛbazonle Gyihova. Noko asoo ɔ ngomekye a yɛsonle ye a? Kpɔkɛ mɔɔ yɛsisi la bahile kɛ yɛlɛsonle Gyihova angomekye anzɛɛ yɛnyɛ zɔ. Bɛmaa yɛzuzu yɛ ɛbɛlabɔlɛ afoa titili nwiɔ mɔɔ bamaa yɛanwu kɛzi ɛzonlenlɛ mɔɔ yɛlɛfa yɛamaa Gyihova de la anwo.

^ ɛden. 53 NVONINLI NWO EDWƐKƐ: Yɛnrɛhulo kɛ yɛbali aleɛ mɔɔ bɛdonle ye wɔ egyaade mɔɔ bɛnli ɛkɛ ne eni la. Yemɔti, duzu ati a yɛkulo kɛ yɛnea anyelielɛ ninyɛne mɔɔ basabasayɛlɛ, sunsum ɛtane nyɛleɛ anzɛɛ nla nu ɛbɛlatane wɔ nu la ɛ?