Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 42

Duzu A Gyihova Bahola Amaa Wɔayɛ A?

Duzu A Gyihova Bahola Amaa Wɔayɛ A?

“Nyamenle . . . [ɛlɛyɛ] gyima wɔ bɛ nu amaa bɛanyia ɛhulolɛ ne yɛɛ anwosesebɛ ne na bɛahola bɛayɛ.”​—FEL. 2:13.

EDWƐNE 104 Sunsum Ne Le Nyamenle Ahyɛlɛdeɛ

MƆƆ YƐBAZUKOA *

1. Duzu a Gyihova kola yɛ fa di ye bodane nwo gyima a?

GYIHOVA kola yɛ ɔ nwo debie biala mɔɔ ɔkulo la ɔfa ɔdi ye bodane nwo gyima. Kɛ neazo la, Gyihova ɛyɛ Kilehilevolɛ, Arɛlekyekyevolɛ yɛɛ Edwɛkpakavolɛ. Ninyɛne mɔɔ ɔkola ɔyɛ la anu ekyi bie ala ɛne. (Aye. 48:17; 2 Kɔl. 7:6; Gal. 3:8) Noko ɔta ɔdua menli nwo zo ɔdi ye bodane nwo gyima. (Mat. 24:14; 28:19, 20; 2 Kɔl. 1:3, 4) Eza Gyihova kola maa yɛ nuhua ko biala nrɛlɛbɛ nee anwosesebɛ amaa yeahola yeava yɛ yeayɛ debie biala mɔɔ ɔkulo la. Kɛ mbɔlɔba bie mɔ kile Gyihova duma ne abo la ɛne.

2. (a) Duzu ati a ɔdwu mekɛ ne bie a yɛnnwu ye kɛ Gyihova ɛlɛfa yɛ ayɛ gyima a? (b) Duzu a yɛbazuzu nwo wɔ edwɛkɛ ɛhye anu a?

2 Yɛ muala yɛkulo kɛ Gyihova fa yɛ yɛ gyima, noko wɔ bie mɔ afoa nu, bie a bɛnnwu ye kɛ Gyihova ɛlɛfa bɛ ayɛ gyima. Duzu ati ɔ? Ɔlua bɛ ɛvolɛ, bɛ tɛnlabelɛ nee mɔɔ bɛngola ye yɛ la ati, bɛte nganeɛ kɛ bɛnrɛhola bɛnrɛyɛ dɔɔnwo. Wɔ bie mɔ noko afoa nu, bɛte nganeɛ kɛ, mɔɔ bɛlɛyɛ la ala le kpalɛ na bɛnnwu deɛmɔti ɔwɔ kɛ bɛyɛ dɔɔnwo la. Wɔ edwɛkɛ ɛhye anu, yɛbazuzu kɛzi Gyihova bahola ava yɛ nuhua ko biala ali ye bodane nwo gyima la anwo. Akee yɛbanwu Baebolo nu menli​—mrenyia nee mraalɛ​—mɔɔ Gyihova maanle bɛnyianle ɛhulolɛ ne yɛɛ anwosesebɛ bɛyɛle gyima la. Awieleɛ bɔkɔɔ ne, yɛbazuzu kɛzi yɛbamaa adenle yɛamaa Gyihova ava yɛ ali gyima la anwo.

GYIHOVA MAA YƐNYIA MƆƆ YƐHYIA LA

3. Kɛ mɔɔ Felepaema 2:13 maa yɛnwu ye la, kɛzi Gyihova bamaa yɛanyia ɛhulolɛ ne na yɛayɛ ye gyima ne ɛ?

3 Kenga Felepaema 2:13. * Gyihova bahola amaa yɛanyia ɛhulolɛ ne yɛayɛ. Adenle boni azo? Bie a yɛnwu ngyianlɛ bie  wɔ asafo ne anu. Anzɛɛ bie a asafo nu mgbanyima ne mɔ gengale kɛlata bie mɔɔ vi Bɛtɛle mɔɔ ka ɛleka mɔɔ bɛhyia moalɛ dɔɔnwo la. Bie a ɛhye bamaa yɛabiza yɛ nwo kɛ, ‘Duzu a mebahola meayɛ meaboa a?’ Anzɛɛ bie a bɛva gyima bie mɔɔ yɛ se la bɛmaa yɛ, yemɔti yɛbabiza yɛ nwo kɛ, ‘Kɛ ɔkɛyɛ na yɛahola yɛayɛ ɛ?’ Anzɛɛ bie a saa yɛkenga Nyamenle Edwɛkɛ ne foa bie yɛwie a, yɛbiza kɛ, ‘Kɛ ɔkɛyɛ na meava Baebolo nu edwɛkɛ ɛhye meaboa awie mɔ ɛ?’ Gyihova ɛntinlitinli yɛ nwo zo kɛ yɛyɛ debie. Noko saa ɔnwu kɛ yɛlɛdwenle mɔɔ yɛbahola yɛayɛ yɛaboa la anwo a, ɔbahola yeamaa yɛanyia ɛhulolɛ ne na yɛayɛ.

4. Kɛzi Gyihova bahola amaa yɛanyia anwosesebɛ yɛayɛ ye gyima ɛ?

4 Eza Gyihova bahola amaa yɛ anwosesebɛ mɔɔ yɛhyia la. (Aye. 40:29) Ɔkola ɔfa ye sunsum ne ɔboa yɛ ɔmaa yɛfa yɛ ahyɛlɛdeɛ yɛyɛ gyima. (Ade. 35:30-35) Gyihova dua ye ahyehyɛdeɛ ne azo kile yɛ kɛzi bɛyɛ gyima bie mɔ la. Saa ɛnze gyima mɔɔ ɛlɛyɛ la anye zo kpalɛ a, biza nwolɛ moalɛ. Eza ɔwɔ kɛ ɛsɛlɛ wɔ anwuma Selɛ ne mɔɔ le atiakunlukɛnlɛma la ɛmaa ɔmaa wɔ “tumi bedevinli ne.” (2 Kɔl. 4:7; Luku 11:13) Kɛzi Gyihova maanle mrenyia nee mraalɛ bie mɔ nyianle ɛhulolɛ ne yɛɛ anwosesebɛ yɛle gyima la anwo neazo dɔɔnwo wɔ Baebolo ne anu. Mekɛ mɔɔ yɛlɛsuzu neazo ɛhye mɔ anwo la, bɔ mɔdenle kɛ ɛbanwu ndenle mɔɔ Gyihova bahola alua zo ava wɔ ali gyima wɔ adenle ko ne ala azo la.

MƆƆ GYIHOVA BOALE MRENYIA BIE MƆ MAANLE BƐYƐLE LA

5. Duzu a yɛsukoa yɛfi adenle mɔɔ Gyihova luale zo vale Mosisi yɛle gyima yɛɛ mekɛ mɔɔ ɔyɛle zɔ la anu a?

5 Gyihova maanle Mosisi yɛle Yizilayɛma dievolɛ. Noko mekɛ boni a Gyihova vale ye lile gyima a? Asoo mekɛ mɔɔ “bɛhilele Mosisi Yigyibiti nrɛlɛbɛ kɔsɔɔti” bɛwiele la yɛɛ Ɔkpale ye a? (Gyi. 7:22-25) Kyɛkyɛ, Gyihova vale Mosisi lile gyima wɔ mekɛ mɔɔ Yeziezie ye yemaa yenyia mɛlɛbɛnwoaze nee abotane la. (Gyi. 7:30, 34-36) Gyihova maanle Mosisi nyianle akɛnrasesebɛ gyinlanle Yigyibiti tumivolɛ ne anyunlu. (Ade. 9:13-19) Duzu a yɛsukoa yɛfi adenle mɔɔ Gyihova luale zo vale Mosisi yɛle gyima yɛɛ mekɛ mɔɔ ɔyɛle zɔ la anu a? Gyihova fa menli mɔɔ da subane kpalɛ ali na bɛfa bɛ nwo bɛto ɔ nwo zo la ɔdi gyima.​—Fel. 4:13.

6. Duzu a yɛsukoa yɛfi kɛzi Gyihova vale Bazelae lile gyima boale Belemgbunli Devidi la anu a?

6 Wɔ ɛvoya dɔɔnwo anzi, Gyihova luale Bazelae anwo zo boale Belemgbunli Devidi. Ɛnee “ɛhɔne ɛhu [Devidi nee] menli ne yɛɛ bɛvɛ yɛɛ nzuhɔne ɛhu bɛ” wɔ mekɛ mɔɔ bɛlɛnriandi Devidi ara Abesalɛm la. Bazelae mɔɔ ɛnee ɛyɛ kpanyinli la vale ye ngoane dole esiane nu na ɔ nee awie mɔ boale Devidi nee ye menli ne. Bazelae anga kɛ yeyɛ kpanyinli la ati, Gyihova ɛnrɛhola ɛnrɛva ye ɛnrɛyɛ gyima. Emomu, ɔvile atiakunlukɛnlɛma nu ɔvale mɔɔ ɔlɛ la ɔboale Nyamenle azonvolɛ mɔɔ bɛhyia moalɛ la. (2 Sa. 17:27-29) Duzu a yɛsukoa yɛfi nu a? Ɔnva nwo ɛvolɛ mɔɔ yɛnyia la, Gyihova bahola alua yɛ nwo zo ali yɛ mediema diedima ngyianlɛ nwo gyima, ɔbahola yeayɛ zɔ wɔ yɛ maanle ne anu anzɛɛ wɔ maanle fofolɛ zo. (Mrɛ. 3:27, 28; 19:17) Saa yɛdayɛ mumua ne yɛnrɛhola yɛnrɛyɛ zɔ bɔbɔ a, yɛbahola yɛaye ndoboa yɛaboa ewiade amuala gyima ne amaa saa ɔbaye kɛ bɛhyia moalɛ wɔ ɛleka bie a, bɛava bɛaboa.​—2 Kɔl. 8:14, 15; 9:11.

7. Kɛzi Gyihova vale Semɛyɔn lile gyima ɛ, na kɛzi ɛhye maa yɛ anwosesebɛ ɛ?

7 Gyihova bɔle Semɛyɔn, kpanyinli bie  mɔɔ di nɔhalɛ mɔɔ dɛnlanle Gyɛlusalɛm la ɛwɔkɛ kɛ ɔnrɛwu kɔkpula kɛ ɔbava ɔ nye yeanwu Mɛzaya ne. Bie a zɔhane ɛwɔkɛ ne maanle Semɛyɔn anwosesebɛ kpalɛ, ɔluakɛ ɛnee yeva ɛvolɛ dɔɔnwo yehendɛ Mɛzaya ne. Bɛmaanle ye ahatualɛ wɔ ye diedi nee ye kpundiigyinlanlɛ ne anwo. Kenle ko, “sunsum ne hilele ye adenle” maanle ɔhɔle ɛzonlenlɛsua ne anu. Ɔnwunle adɔma Gyisɛse, na Gyihova luale Semɛyɔn anwo zo hanle kakula ɛhye mɔɔ bayɛ Kelaese ne la anwo ngapezo. (Luku 2:25-35) Ɔkɛyɛ kɛ Semɛyɔn anva ɔ nye annwu kɛzi Gyisɛse yɛle ye azɛlɛ ye azo gyima ne la, noko ɔ nye liele nwolɛ adenle mɔɔ ɔnyianle la anwo, na mɔɔ tɛla biala la lua adenle zo! Wɔ ewiade fofolɛ ne anu, nrenyia nɔhavo zɔhane banwu kɛzi Gyisɛse tumililɛ ne bayɛ nyilalɛ amaa alesama mɔɔ wɔ azɛlɛ ye azo amuala la. (Mɔl. 22:18) Yɛdayɛ noko, ɔwɔ kɛ yɛmaa yɛ nye die nwolɛ adenle biala mɔɔ Gyihova bamaa yɛanyia wɔ ye ɛzonlenlɛ nu la anwo.

8. Kɛzi Gyihova bahola ava yɛ ali gyima kɛ mɔɔ ɔyɛle Baanabase la ɛ?

8 Wɔ ɛvoya mɔɔ limoa la anu, nrenyia bie mɔɔ bɛfɛlɛ ye Dwosefi mɔɔ le atiakunlukɛnlɛma la maanle adenle maanle Gyihova vale ye lile gyima. (Gyi. 4:36, 37) Ɔzɔho kɛ ɛnee Dwosefi bɔ mɔdenle wɔ awie mɔ mɔɔ ɔkyekye bɛ rɛle la anu, yemɔti ɛzoanvolɛ ne mɔ vɛlɛle ye Baanabase mɔɔ ɔ bo kile “Arɛlekyekyelɛ Ralɛ” la. Kɛ neazo la, mɔɔ Pɔɔlo rayɛle diedinli la, ɛnee mediema ne mɔ dɔɔnwo sulo kɛ bɛbabikye ye, ɔluakɛ ɛnee ɔkpɔ asafo ne mɔ la ati. Noko Baanabase mɔɔ ɛnee dwenle awie mɔ anwo la kyekyele Sɔɔlo arɛle na ɔboale ye, na Sɔɔlo anye liele nwo kpalɛ. (Gyi. 9:21, 26-28) Nzinlii, mgbanyima mɔɔ wɔ Gyɛlusalɛm la nwunle kɛ ɔwɔ kɛ bɛmaa mediema mɔɔ wɔ Anteɔko mɔɔ wɔ Selea la anwosesebɛ. Nwane a bɛzoanle ye a? Baanabase! Bɛzile kpɔkɛ kpalɛ. Kɛlɛtokɛ ne ka kɛ: Baanabase “[bɔle] ɔ bo ɔmaanle bɛ kɔsɔɔti anwosesebɛ kɛ, bɛva bɛ ahonle muala bɛhɔ zo bɛdoa Awulae.” (Gyi. 11:22-24) Ɛnɛ noko, Gyihova bahola aboa yɛ yeamaa yɛakyekye yɛ mediema Kilisienema arɛle. Kɛ neazo la, ɔbahola yealua yɛ nwo zo yeakyekye menli mɔɔ bɛ alɔvolɛ ɛwu la arɛle. Anzɛɛ bie a ɔbaha yɛ yeamaa yɛavɛlɛ awie mɔɔ ɔnde kpɔkɛ anzɛɛ adwenleadwenle ɛdɔ ɔ nwo la wɔ fonu zo na yɛaha edwɛkɛ ekyi yɛakyekye ɔ rɛle. Ɛbamaa adenle wɔamaa Gyihova ava wɔ ali gyima kɛ mɔɔ ɔyɛle Baanabase la ɔ?​—1 Tɛs. 5:14.

9. Duzu a yɛsukoa yɛfi kɛzi Gyihova boale Vasily ɔmaanle ɔyɛle sunsum nu mboaneneavolɛ kpalɛ la anu a?

9 Gyihova boale adiema bie mɔɔ bɛfɛlɛ ye Vasily la ɔmaanle ɔyɛle sunsum nu mboaneneavolɛ kpalɛ. Mɔɔ bɛkpale Vasily kɛ asafo nu kpanyinli la ɛnee yenyia ɛvolɛ 26, na ɛnee ɔte nganeɛ kɛ ɔnrɛhola ɔnrɛboa asafo ne wɔ sunsum nu, titili menli mɔɔ ɛlɛyia tɛnlabelɛ mɔɔ anu yɛ se la. Noko ɔnyianle ndetelɛ ɔvile ɔ gɔnwo mɔ mgbanyima mɔɔ lɛ anwubielɛ la ɛkɛ yɛɛ Belemgbunlililɛ Gyima Sukulu ne anu. Vasily bɔle mɔdenle kɛ ɔbanyia anyuhɔlɛ. Kɛ neazo la, ɔhɛlɛle bodane ngyikyi bie mɔ mɔɔ ɔbahola yeadwu nwo la wɔ kɛlata zo. Mekɛ mɔɔ ɔlɛdwu ko biala anwo la, ɔmaanle ɔholale ɔlile ye ɛzulolɛ zo konim. Kɛkala ɔka kɛ: “Mɔɔ ɛnee mesulo nwolɛ la, yemɔ a maa me nye die kpalɛ a. Saa Gyihova boa me maa menyia ngɛlɛlera mɔɔ fɛta mɔɔ ɔbaboa adiema bie la a, ɔmaa me nye die kpalɛ.” Mediema mrenyia, saa bɛmaa nwolɛ adenle bɛmaa Gyihova fa bɛ di gyima kɛ mɔɔ Vasily yɛle la a, ɔbamaa bɛahola  bɛali ɛzonlelilɛ kpole mɔɔ bɛlɛ wɔ asafo ne anu la anwo gyima.

MƆƆ GYIHOVA BOALE MRAALƐ BIE MƆ ƆMAANLE BƐYƐLE LA

10. Duzu a Abegɛle yɛle a, na duzu a yɛsukoa yɛfi nu a?

10 Ɛnee Belemgbunli Sɔɔlo doa Devidi nee ye menli mɔɔ di nɔhalɛ la, na ɛnee bɛhyia moalɛ. Devidi sonvolɛma ne bizale aleɛ ekyi vile Yizilayɛnli nrenyia bie mɔɔ ɔlɛ ezukoa na bɛfɛlɛ ye Neebale la ɛkɛ. Bɛnyianle adwenle kɛ bɛbahola bɛabiza, ɔluakɛ ɛnee bɛbɔ Neebale mboane ne anwo bane wɔ fienemgbole ne anu. Noko, Neebale mɔɔ ɛnee le angomedi la ammaa bɛ ɛhwee. Devidi vale ɛya kpole na ɔyɛle kɛ ɔku mrenyia mɔɔ wɔ Neebale sua nu la amuala. (1 Sa. 25:3-13, 22) Noko ɛnee Neebale aye Abegɛle mɔɔ anwo yɛ fɛ la ze nrɛlɛbɛ. Ɔvale akɛnrasesebɛ ɔdule ɔdɔle Devidi agyakɛ anu na ɔzele ye kɛ ɔmmadi mogya nwo fɔlɛ. Ɔluale nrɛlɛbɛ adenle zo ɔdule ye folɛ kɛ, ɔva debie biala ɔwula Gyihova asa anu. Mɛlɛbɛnwoaze nee nrɛlɛbɛ nu mɔɔ Abegɛle vile yɛle ninyɛne la hanle Devidi ahonle. Ɔhanle kɛ Gyihova a ɛzoa ye a. (1 Sa. 25:23-28, 32-34) Abegɛle nyianle subane bie mɔ mɔɔ maanle Gyihova vale ye lile gyima a. Zɔhane ala yɛɛ Gyihova bahola ava Kilisiene mraalɛ mɔɔ da nwunu nee ndelebɛbo ali la ali gyima amaa bɛamaa mbusua nee awie mɔ gyɛne mɔɔ bɛwɔ asafo ne anu la anwosesebɛ a.​—Mrɛ. 24:3; Tae. 2:3-5.

11. Duzu a Hyalɛm amra mraalɛ ne mɔ yɛle a, na nwane mɔ a ɛlɛsukoa bɛ ɛnɛ a?

11 Wɔ ɛvoya dɔɔnwo anzi, Hyalɛm amra mraalɛ boka menli mɔɔ Gyihova vale bɛ lile gyima maanle bɛdole Gyɛlusalɛm bane ne la anwo. (Nih. 2:20; 3:12) Ɔwɔ nu kɛ ɛnee Hyalɛm le maanzinli zo kpanyinli, noko ɛnee ɔ mra mraalɛ ne mɔ lɛ ɛhulolɛ kɛ bɛbayɛ gyima ɛsesebɛ zɔhane bie. (Nih. 4:15-18) Bɛanyɛ kɛ Tɛkowama mɔɔ ɛnee bɛlie duma na ‘bɛambɛlɛ bɛ nwo aze’ bɛanyɛ gyima ne bie la! (Nih. 3:5) Nea kɛzi Hyalɛm amra mraalɛ ne mɔ anye liele wɔ mekɛ mɔɔ bɛwiele bane ne to wɔ kenle 52 anu la! (Nih. 6:15) Ɛnɛ, mediema mraalɛ mɔɔ tu bɛ nwo maa la ɛlɛfa anyelielɛ aboa gyimalilɛ titili bie​—azua mɔɔ bɛyila zolɛ bɛmaa Gyihova la ɛsisilɛ nee bɛ ɛziezielɛ. Mɔdenlebɔlɛ nee nɔhalɛlilɛ mɔɔ bɛfa bɛyɛ gyima ɛhye mɔ la boa maa debie biala kɔ zo pɛpɛɛpɛ.

12. Kɛzi Gyihova bahola ava yɛ ali gyima kɛ mɔɔ ɔyɛle Tabeta la ɛ?

12 Gyihova hanle Tabeta maanle ɔyɛle ‘gyima kpalɛ dɔɔnwo’ ɔboale menli​—titili ahunlanvolɛ. (Gyi. 9:36) Ɔlua ye atiakunlukɛnlɛma subane zɔhane ati, mɔɔ ɔwule la, menli dɔɔnwo zunle ye. Ɔti mɔɔ ɛzoanvolɛ Pita dwazole ye la, bɛ nye liele kpole. (Gyi. 9:39-41) Duzu a yɛsukoa yɛfi Tabeta ɛkɛ a? Saa yɛle kakula o, kpanyinli o, nrenyia o, raalɛ o, yɛbahola yɛayɛ ninyɛne ngyikyi bie mɔ yɛaboa yɛ mediema mrenyia nee mraalɛ.​—Hib. 13:16.

13. Kɛzi Gyihova vale adiema raalɛ bie mɔɔ bɛfɛlɛ ye Ruth mɔɔ se nyiane la lile gyima ɛ, na duzu a ɔhanle a?

13 Ɛnee adiema raalɛ bie mɔɔ bɛfɛlɛ ye Ruth na ɔse nyiane la kulo kɛ ɔyɛ edwɛkpatɛlɛvolɛ. Mekɛ mɔɔ ɔle kakula la, ɔhɔle azua nu ɔhyɛle trate. Ɔhanle kɛ: “Ɛnee me nye die gyima ɛhye anwo.” Noko ɛnee ɔyɛ se kɛ ɔbaha Nyamenle Belemgbunlililɛ ne anwo edwɛkɛ yeahile awie mɔ wɔ anlenkɛ nloa. Ɔnva nwo kɛ ɛnee Ruth se nyiane la, ɔyɛle dahuu adekpakyelɛnli wɔ mekɛ mɔɔ ɔnyianle ɛvolɛ 18 la. Wɔ 1946, ɔhɔle Ɛzinzalɛ Arane Geleade Baebolo Sukulu ne bie, na nzinlii ɔhɔzonlenle wɔ Hawaii nee Japan. Gyihova vale ye lile gyima ɔmaanle  ɔbɔle edwɛkpa ne nolo wɔ maanle zɔhane mɔ azo. Wɔ ɛvolɛ asɛɛ 80 mɔɔ Ruth ɛva ɛyɛ ɛzonlenlɛ gyima ne la anzi, ɔka kɛ: “Gyihova ɛboa me kpalɛ. Yeboa me yemaa meli nyiane mɔɔ mese la azo konim. Medie medi bɔkɔɔ kɛ Gyihova bahola ava awie biala mɔɔ fa ɔ rɛle wula ye nu la ali gyima.”

MAA GYIHOVA ADENLE MAA ƆVA WƆ ƆLI GYIMA

14. Kɛ mɔɔ Kɔlɔsaema 1:29 kile la, saa yɛkulo kɛ Gyihova fa yɛ di gyima a, duzu a ɔwɔ kɛ yɛyɛ a?

14 Tetedwɛkɛ kile kɛ, Gyihova ɛva ye azonvolɛ ɛli gyima wɔ ndenle dɔɔnwo azo. Duzu a ɔbahola yeamaa wɔayɛ a? Ɔbagyinla ɛhulolɛ mɔɔ ɛlɛ kɛ ɛyɛ dɔɔnwo la azo. (Kenga Kɔlɔsaema 1:29.) Saa ɛlɛ ɛhulolɛ ne a, Gyihova bahola amaa wɔayɛ edwɛkpakavolɛ mɔɔ bɔ mɔdenle, kilehilevolɛ kpalɛ, arɛlekyekyevolɛ mɔɔ yɛ deɛ, gyimayɛvo mɔɔ bɔ mɔdenle, agɔnwolɛ kpalɛ, nee debie biala mɔɔ bamaa ye bodane ara nu la.

15. Kɛ mɔɔ 1 Timote 4:12, 15 kile la, duzu a ɔwɔ kɛ ngakula mgbavolɛ sɛlɛ Gyihova kɛ ɔboa bɛ ɔmaa bɛyɛ a?

15 Na bɛdabɛ ngakula mrenyia mɔɔ bɛlɛgyinla bɛ mgbavolɛ zo la noko ɛ? Yɛhyia mrenyia mɔɔ lɛ anwosesebɛ la anwo amaa bɛazonle kɛ asafo nu azonvolɛ. Wɔ asafo dɔɔnwo anu, asafo nu mgbanyima ne mɔ anwo zonle tɛla asafo nu azonvolɛ. Yɛ mediema mgbavolɛ, asoo bɛbahola bɛanyia ɛhulolɛ ne kɛ bɛdie ɛzonlelilɛ dɔɔnwo bɛado nu wɔ asafo ne anu ɔ? Ɔyɛ a mediema mrenyia bie mɔ ka kɛ, “Mele nolobɔlɛnli, ɔle kpalɛ, me nye die nwo.” Saa zɔhane a ɛte nganeɛ a, sɛlɛ Gyihova kɛ ɔmaa ɛnyia ɛhulolɛ ne, na ɛfɛta kɛ asafo nu sonvolɛ na ɔmaa ɛnyia anwosesebɛ ɛva ɛyɛ dɔɔnwo wɔ ye ɛzonlenlɛ nu. (Nol. 12:1) Nɔhalɛ nu, yɛhyia wɔ moalɛ!​—Kenga 1 Timote 4:12, 15.

16. Duzu a ɔwɔ kɛ yɛsɛlɛ Gyihova wɔ nwo a, na duzu ati ɔ?

16 Gyihova bahola ava wɔ ayɛ debie biala amaa ye bodane ara nu. Yemɔti sɛlɛ ye kɛ ɔmaa ɛnyia ɛhulolɛ ne yɛɛ anwosesebɛ mɔɔ ɛhyia la ɛyɛ ye gyima. Ɔnva nwo kɛ ɛle kakula anzɛɛ kpanyinli la, fa wɔ mekɛ, wɔ anwosesebɛ nee wɔ agyapadeɛ ye Gyihova ayɛlɛ kɛkala. (Nol. 9:10) Mmamaa ɛzulolɛ sɛkye nwolɛ adenle mɔɔ ɛlɛ ɛyɛ dɔɔnwo wɔ Gyihova ɛzonlenlɛ nu la yɛɛ mmamaa nganeɛ mɔɔ ɛte kɛ ɛngola dɔɔnwo yɛ la si wɔ adenle. Nea nwolɛ adenle mɔɔ yɛ muala yɛnyia kɛ yɛbahola yɛayɛ yɛ afoa nu ɛdeɛ ekyi yɛava yɛaye yɛ ɛlɔlɛ Selɛ ne ayɛlɛ a!

EDWƐNE 127 Sonla Holɛ Ko Mɔɔ Ɔwɔ Kɛ Meyɛ

^ ɛden. 5 Ɛte nganeɛ kɛ ɛngola ɛnyɛ dɔɔnwo wɔ Gyihova ɛzonlenlɛ nu ɔ? Asoo ɛngola ɛnnwu ye saa ɛ nwo tɛdɛ nvasoɛ tɛmaa ye ɔ? Anzɛɛ ɛnnwu deɛmɔti ɔwɔ kɛ ɛtu ɛ nwo ɛmaa Gyihova na ɛsonle ye kɛ mɔɔ ɔkpondɛ la ɔ? Edwɛkɛ ɛhye bahile ndenle ngakyile mɔɔ Gyihova bahola alua zo amaa wɔanyia ɛhulolɛ nee anwosesebɛ mɔɔ bamaa wɔayɛ biala mɔɔ hyia amaa ye bodane ara nu la.

^ ɛden. 3 Pɔɔlo hɛlɛle kɛlata ɛhye maanle ɛvoya mɔɔ limoa Kilisienema ne, noko ngyinlazo mɔɔ wɔ nu la baboa Gyihova azonvolɛ kɔsɔɔti.