Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Gyihova Yilale Me Kpɔkɛzilɛ Ne Azo Kpalɛ

Gyihova Yilale Me Kpɔkɛzilɛ Ne Azo Kpalɛ

Mɔɔ yɛvale trate ekyi mɔɔ ɛha yɛveale azua mɔɔ wɔ yɛ azɛlɛsinli ne anu nlenkɛ ne mɔ abo yɛwiele la, yeangyɛ yɛɛ aleɛ hyenle a. Ɛnee ɔle ɛvolɛ 1939, yɛdwazole nɔɔzo yɛpɛle adenle kɛyɛ dɔnehwele ko yɛhɔle sua ekyi Joplin mɔɔ wɔ Missouri, U.S.A. nyiakɛ adɔleɛ la. Mɔɔ yɛwiele ala la, yɛvole yɛ kale ne yɛhɔyiale ekpunli gyɛne mɔɔ ɛha la. Mekɛ ɛhye anu ɛnee bɔ zo mɔɔ aleɛ ɛhye a. Noko, duzu ati a yɛhɔle daselɛlilɛ kolaa na aleɛ ahye na yɛvile azɛlɛsinli ne anu ndɛndɛ zɔhane a? Nzinlii mebaha meahile wɔ.

ƆYƐ me fɛ kɛ me awovolɛ Fred nee Edna Molohan tetele me maanle me nye liele Nyamenle ɛzonlenlɛ nwo la. Mɔɔ bɛwole me wɔ 1934 la, ɛnee bɛva ɛvolɛ 20 bɛzonle kɛ Baebolo Sukoavoma (Gyihova Alasevolɛ.) Ɛnee yɛ abusua ne wɔ sua ekyi Parsons mɔɔ wɔ Kansas nyiakɛ aduduleɛ la. Ɛnee yɛwɔ asafo mɔɔ asɛɛ nuhua amra amuala le Kilisienema mɔɔ bɛkpokpa bɛ la anu. Yɛ abusua ne vale anyelielɛ bɔle nu hɔle debiezukoalɛ, eza yɛhanle Nyamenle Edwɛkɛ ne anu nɔhalɛ ne yɛhilele awie mɔ. Ɛnee yɛta yɛyɛ awɔdenle zo daselɛlilɛ wɔ Folɛ ewiazo mɔɔ ɛnee yɛfɛlɛ ye bagua nu daselɛlilɛ la. Ɔyɛ a yɛfɛ kpalɛ noko yɛ Papa ta fa yɛ kɔ sua zo na ɔtɔ ice cream ɔmaa yɛ wɔ mekɛ mɔɔ yɛkpɔne la.

Yɛ asafo ekyi ne azɛlɛsinli ne le kpole na azua ngyikyi dɔɔnwo yɛɛ ɛya dɔɔnwo mɔɔ bikye la boka nwo. Saa yɛkɔ ɛyazonlɛma ne ɛkɛ a, yɛta yɛfa yɛ mbuluku ne mɔ yɛmaa bɛ yɛdie aleɛ, kolonvia anzɛɛ ngɔkɔlɛ. Kɛmɔ me Papa ɛye mbuluku ne mɔ anwo ndoboa dɛba la ati, yɛdi aleɛ ɛhye mɔ.

DASELƐLILƐ GYIMA

Me awovolɛ dɔle gramafuu mɔɔ ɛnee yɛfa yɛyɛ daselɛlilɛ gyima ne a. Ɛnee mele ekyi somaa kɛ mebava meali gyima, noko ɛnee me nye die kɛ mebaboa me Papa nee me Mame meamaa bɛabɔ Adiema Rutherford ɛdendɛlɛ ne mɔ wɔ mekɛ mɔɔ bɛlɛyɛ sia kɔkpɔla nee Baebolo ɛzukoalɛ la.

Me nee me papa yɛɛ me mame gyi yɛ kale ne anyunlu

Me Papa vale speaker mgbole ziele yɛ 1936 Ford ne ati zo. Kale ɛhye boale kpalɛ ɔmaanle yɛbɔle Belemgbunlililɛ edwɛkpa ne nolo. Ɔyɛ a, yɛdimoa yɛbɔ edwɛne mɔɔ bɛhye la yɛmaa menli adwenle ba yɛ nwo zo, na akee yɛabɔ Baebolo nu ɛdendɛlɛ mɔɔ bɛhye la. Saa ɛdendɛlɛ ne si a, yɛkyɛ mbuluku yɛmaa menli mɔɔ anye liele nwo la.

Wɔ sua ekyi Cherryvale, Kansas azo, kpolisima ne zele me Papa kɛ ɔmmafa kale ne ɔsie nwɔhoalilɛleka ne mɔɔ menli tɛnla die bɛ ɛnwomenle wɔ Molɛ la, emomu ɔva ɔzie ɔ nzi. Me Papa diele na  ɔvale kale ne ɔhɔziele adenle ne ɛleka mɔɔ menli ne bahola ade edwɛkɛ ne kpalɛ la na ɔdoale gyimalilɛ ne azo. Ɛnee me nye die kɛ me nee me Papa nee me diema nrenyia kpanyinli Jerry balua wɔ zɔhane mekɛ ne.

Wɔ 1930 awieleɛ, yɛyɛle nolobɔlɛ titili bie, “blitz,” amaa yɛaha edwɛkɛ ne wɔ azɛlɛsinli mɔɔ dwazotia wɔ ɛkɛ kpalɛ la azo ndɛndɛ. Ɔyɛ a yɛdwazo ndɛ kolaa na aleɛ ahye (kɛ mɔɔ yɛyɛle ye wɔ Joplin, Missouri) la. Yɛyɛ ye bɛtɛɛ yɛfa trate anzɛɛ mbuluku ngyikyi yɛfea awie mɔ nlenkɛ bo. Yemɔ anzi, yɛkɔyia sua ne kandiba yɛnea saa kpolisima ne ɛtɛkyele awie biala a.

Wɔ zɔhane ɛvolɛ ne mɔ anu, ɛnee ɛzonlenlɛ gyima ne foa gyɛne mɔɔ yɛ anyelielɛ la a le ngɛlata mɔɔ yɛfa yɛkenda yɛ nwo yɛto ɛlɔnwɔne la. Amaa yɛabɔ Belemgbunlililɛ ne nolo la, yɛvale ngɛlata yɛhendanle yɛ nwo yɛdole ɛlɔnwɔne wɔ sua zo. Mekakye bie mɔɔ yɛyɛle ye wɔ yɛ ɛkɛ ne mɔɔ ɛnee yɛ gɔnwo mɔ ɛva kɛlata mɔɔ bɛhɛlɛ zo “Religion Is a Snare and a Racket” bɛhenda bɛ nwo la. Bɛpɛle adenle mɔɔ kɛyɛ mayɛlɛ ko (km 1.6) wɔ sua ne azo na bɛziale bɛrale sua nu. Ɔyɛ anyelielɛ kɛ bɛanyia dwazotia biala emomu bɛyiale menli dɔɔnwo mɔɔ ɛnee bɛ nye die edwɛkɛ ne anwo la.

NYIANU MƆƆ LIMOA

Ɛnee yɛ abusua ne ta tu adenle fi Kansas kɔ nyianu wɔ Texas. Ɛnee me Papa yɛ gyima wɔ Missouri-Kansas-Texas Railroad, ɔti ɛnee yɛkola yɛfa ye gyima nu kɛlata ne yɛpɛ adenle yɛkɔkpɔla yɛ mbusuafoɔ na eza yɛkɔ nyianu. Ɛnee me Mame adiema nrenyia kpanyinli Fred Wismar nee ɔ ye Eulalie de Temple, Texas. Mɔɔ Uncle Fred le kpavolɛ la, ɔzukoale nɔhalɛ ne na bɛzɔnenle ye wɔ 1900 mɔlebɛbo. Ɔhanle mɔɔ ɔzukoale la bie ɔhilele ɔ mediema ne mɔ nee me mame. Ɛnee mediema mɔɔ wɔ central Texas mɔɔ mekɛ bie ɔzonlenle bɛ kɛ maangyebakyi zo neavolɛ la amuala ze ye kpalɛ. Ɛnee ɔle atiakunlukɛnlɛma, ɔ nye die ɔ nwo, na ɔyɛ anyelielɛ kɛ ɛ nee ye balua. Ɛnee ɔbɔ mɔdenle wɔ nɔhalɛ ne anu, na ɔnyianle me nwo zo tumi kpalɛ wɔ mekɛ mɔɔ mele kpavolɛ la.

Wɔ 1941, yɛ abusua ne vale keteke dule adenle hɔle nyianu kpole bie wɔ St. Louis, Missouri. Bɛzele mgbavolɛ nee mbɛlɛra ne mɔ amuala kɛ bɛradɛnla ɛleka titili bie mɔɔ bɛziezie bɛmaa bɛ wɔ nyianu ne abo la amaa bɛadie Adiema Rutherford ɛdendɛlɛ mɔɔ ati se “Children of the King” la. Bɛmaanle ɛdendɛlɛ ne bɛwiele la, bɛhyɛle ngakula 15,000 ne debie. Adiema Rutherford nee ye boavolɛma ne maanle yɛ nuhua ko biala Children, buluku fofolɛ ne ko.

Wɔ April 1943, yɛhɔle “Call to Action” Nyianu ne wɔ Coffeyville, Kansas. Bɛbɔle nolo kɛ asafo ne mɔ amuala bayɛ sukulu fofolɛ bie mɔɔ bɛfɛlɛ ye Teokelase Ɛzonlenlɛ Sukulu la. Eza bɛmaanle yɛ buluku bie mɔɔ ɛzukoalɛdeɛ 52 wɔ nu mɔɔ yɛbava yɛayɛ sukulu ne la. Nzinlii wɔ zɔhane ɛvolɛ ne anu, menyɛle me sukoavo gyimalilɛ mɔɔ limoa la. Ɛnee nyianu zɔhane le titili maa me ɔluakɛ bɛzɔnenle me nee menli ekyi bie wɔ nzule weɛlɛkɔkɔ bie mɔɔ wɔ ɛya bie mɔɔ wɔ ɛkɛ la anu.

 ƐNEE BƐTƐLE ƐZONLENLƐ LE ME BODANE

Menwiele sukunwiɔ wɔ 1951 na ɛnee ɔwɔ kɛ mesi me kenle bie nwo kpɔkɛ. Ɛnee mekulo kɛ mekɔsonle wɔ Bɛtɛle, ɛleka mɔɔ Jerry zonlenle la, ɔti yeangyɛ, bɛvale me ademizalɛ kɛlata ne bɛhɔle Brooklyn Bɛtɛle. Kpɔkɛzilɛ ɛhye boale me wɔ sunsum nu kpalɛ. Yeangyɛ, bɛliele me ademizalɛ kɛlata ne bɛdole nu na bɛvɛlɛle me kɛ membɛla Bɛtɛle wɔ March 10, 1952.

Ɛnee mesuzu kɛ bɛbamaa meayɛ gyima wɔ ɛleka mɔɔ bɛpelente mbuluku la amaa meaboa wɔ yɛ mbuluku ne mɔ ɛyɛlɛ nu. Noko, bɛmaanle menyɛle gyima wɔ ɛleka mɔɔ bɛdi aleɛ la na nzinlii bɛ nee me hɔle egyaade, na menyianle anwubielɛ ngɛnlɛma wɔ ɛkɛ. Ɔti, meannyia adenle meanyɛ gyima wɔ ɛleka mɔɔ bɛpelente mbuluku la ɛlɛ. Asolo mekɛ mɔɔ awie biala fa yɛ gyima wɔ egyaade ɛkɛ ne a, ɔti mefa mekɛ mɔɔ menyia ye wɔ alehyenlɛ ne anu la bie mesukoa debie kpalɛ wɔ Bɛtɛle mbulukuzielɛleka ne. Ɛhye maanle menyianle anyuhɔlɛ wɔ sunsum nu na me diedi nu mianle. Eza ɔmaanle kpɔkɛ mɔɔ membɔle kɛ mebava mekɛ dɔɔnwo meazonle Gyihova wɔ Bɛtɛle la anu mianle kpalɛ. Jerry vile Bɛtɛle na ɔgyale Patricia wɔ 1949, noko ɛnee ɔde ɔbikye Brooklyn. Bɛboale me kpole kpalɛ yɛɛ bɛmaanle me anwosesebɛ wɔ mekɛ mɔɔ mengɔle Bɛtɛle fofolɛ la.

Mengɔle Bɛtɛle la, yeangyɛ ahyehyɛdeɛ ne yɛle ngyehyɛleɛ mɔɔ bɛbava bɛazɔ mediema mrenyia bie mɔ bɛanlea amaa bɛanyia mrenyia dɔɔnwo mɔɔ bɛbamaa bagua nu ɛdendɛlɛ a. Bɛmaa mediema ɛhye mɔ fi Brooklyn tu adenle kɛyɛ mayɛlɛ 200 (km 322) kɔkpɔla asafo ne mɔ, maa ɛdendɛlɛ na bɛ nee bɛ bɔ nu kɔ daselɛlilɛ. Menyianle nwolɛ adenle ɛhye bie. Mɔɔ membɔle me bagua nu ɛdendɛlɛ mɔɔ limoa mɔɔ ye tendenle bayɛ kɛyɛ dɔnehwele ko abo la, ɛnee me ahonle ɛdu. Ɛnee meta mefa keteke a mekɔkpɔla asafo ne mɔ a. Wɔ 1954 Molɛ ewiazo bie mɔɔ ɛnee ɛyɛlɛ wɔ nu la, menvole keteke bie mɔɔ ɛlɛkɔ New York la, na ɛnee ɔwɔ kɛ medwu Bɛtɛle wɔ ye nɔsolɛ nu. Noko, ahumu kpole bie mɔɔ dule la maanle anwoma ne yɛle weɛlɛkɔkɔ kpalɛ. Keteke ne engine lunle, ɔti meangola meandwu New York City kɔkpula kɛ bɛbɔle nwonlomɔ dɔne nnu wɔ Kenlenzile. Menvale keteke adenle bie mɔɔ la azɛlɛ bo la anu mengɔle Brooklyn, na mengɔnyɛle gyima wɔ egyaade ne. Mengale amozi ekyi yɛɛ ɛnee mevɛ kpalɛ, ɔluakɛ nɔe ne amuala meanla. Noko, anyelielɛ mɔɔ menyianle menvile asafo ne mɔ mɔɔ menzonlenle bɛ yɛɛ mediema fofolɛ mɔɔ menyiale bɛ anu la sonle bolɛ tɛla afɔle biala mɔɔ membɔle la.

Yɛlɛsiezie yɛ nwo yɛamaa WBBR azo gyimalilɛ ne

Mɔɔ mengɔle Bɛtɛle fofolɛ la, bɛmaanle membokale mediema mɔɔ yɛ gyima wɔ WBBR riledio gyimayɛlɛleka ne la anwo. Ɛnee riledio gyimayɛlɛleka ne wɔ 124 Columbia Heights, sua ne nzɛzo nwiɔ ne azo. Ɛnee me gyima a le kɛ mebaboka menli mɔɔ wɔ Baebolo ɛzukoalɛ ngyehyɛleɛ bie mɔɔ bɛyɛ ye dapɛne biala la anwo. Adiema A. H. Macmillan mɔɔ ɛnee ɛva mekɛ tendenle ɛzonle wɔ Bɛtɛle la vale ɔ nwo wulale riledio zo gyimayɛlɛ ɛhye anu dahuu. Ɛnee yɛta yɛfɛlɛ ye Adiema Mac. Ɔyɛle kpundiigyinlanlɛ wɔ Gyihova ɛzonlenlɛ nu anwo neazo kɛnlɛma ɔmaanle yɛdayɛ mgbavolɛ mɔɔ ɛnee yɛwɔ Bɛtɛle la.

Yɛkyehyɛ WBBR anwo ɛsalɛdolɛ kɛlata wɔ daselɛlilɛ nu amaa menli anyia ɛhulolɛ kɛ bɛbadie bie

Bɛhɛlɛle me kɛlata wɔ 1958 kɛ menyɛ gyima memboa Geleade Sukulu ne. Ɛnee me gyima a le kɛ mebaboa bɛdabɛ mɔɔ bɛwie sukulu ne la meamaa bɛanyia visa na eza meayɛ adendulɛ nwo ngyehyɛleɛ meamaa mediema ɛhye mɔ mɔɔ bɔ mɔdenle la. Wɔ ɛvolɛ zɔhane mɔ anu, ɛnee alopile mɔɔ bɛfa bɛtu adenle la bolɛ yɛ se kpalɛ, ɔti bɛdabɛ mɔɔ bɛwie sukulu ne la anu ekyi bie ala a kola fa alopile tu adenle a. Bɛ nuhua dɔɔnwo mɔɔ bahɔ Afrika nee Aduduleɛ Maanle mɔɔ wɔ moɔmoa la fa meli. Mɔɔ bɛbɔle ɔ bo kɛ bɛfa alopile mɔɔ fa menli dɔɔnwo bɛayɛ gyima la, ɔmaanle alopile ɛvolɛ bolɛ hanle aze kpalɛ, ɔti yeangyɛ edwɛkpatɛlɛvolɛma dɔɔnwo vole alopile hɔle ɛleka mɔɔ bɛbayɛ bɛ gyima ne la.

Melɛhyehyɛ bɛdabɛ mɔɔ bɛlɛba bɛawie Geleade sukulu la amodinli kɛlata

NYIANU NWO ADENDULƐ

Wɔ 1960, me gyima ne yɛle kpole, bɛhanle kɛ menyɛ alopile mɔɔ bava mediema avi United States ahɔ maanle maanle avinli nyianu wɔ Europe wɔ 1961 la anwo ngyehyɛleɛ. Yemɔti mendɛnlanle  alopile zɔhane anu menvile New York mengɔle nyianu wɔ Hamburg, Germany. Wɔ nyianu ne anzi, me nee me gɔnwo mɔ Bɛtɛlema nsa hayele kale vile Germany hɔkpɔlale Italy Bɛtɛle ne mɔɔ wɔ Rome la. Yɛvi ɛkɛ ne la, yɛhɔle France yɛhɔnleanle Pyrenees Mountains na yɛdoale zo yɛhɔle Spain, ɛleka mɔɔ ɛnee bɛva bɛ sa bɛdo yɛ gyima ne azo la. Yɛkyekyele mbuluku kɛ asɛɛ ahyɛlɛdeɛ la yɛvale yɛhɔmaanle yɛ mediema mɔɔ wɔ Barcelona la. Yɛ nye liele kpole kɛ yɛnwunle bɛ la! Yɛvale kale yɛhɔle Amsterdam, na ɛkɛ ne a yɛvale alopile yɛziale yɛrale New York a.

Kɛyɛ ye ɛvolɛ anzi, bɛmaanle menyɛle ayiama bie mɔ mɔɔ bahɔ maanle maanle avinli nyianu titili bie wɔ ewiade ɛleka dɔɔnwo la adendulɛ nwo ngyehyɛleɛ. Nyianu ɛhye a le “Everlasting Good News” ne mɔɔ bɛyɛle ye wɔ 1963 la. Bɛyɛle ngyehyɛleɛ bɛmaanle ayiama 583 dule adenle hɔle nyianu wɔ ewiade ɛleka ngakyile mɔɔ bie a le Europe, Asia, South Pacific, Honolulu, Hawaii, Pasadena, nee California la. Ɛnee yɛbagyinla Lebanon nee Jordan na bahilehile yɛ ninyɛne bie mɔ mɔɔ fale azɛlɛ ngakyile mɔɔ wɔ Baebolo ne anu la anwo wɔ yɛ adendulɛ ne anu. Saa ɛye alopile mɔɔ ayiama ne bavo yɛɛ ɛleka mɔɔ bɛbala la anwo ngyehyɛleɛ ɛyɛlɛ ɛsie ahane a, yɛ Bɛtɛle gyimalilɛleka ne eza lile visa mɔɔ bɛbava bɛahɔ maanle ngakyile ɛhye mɔ azo la anwo gyima.

ME ADENDULƐ BOAVOLƐ FOFOLƐ

Ɛnee ɛvolɛ 1963 le mekɛ titili ma me ɔlua debie bie ati. Wɔ June 29 mengyale Lila Rogers mɔɔ vi Missouri mɔɔ limoale me nyunlu ɛvolɛ nsa wɔ Bɛtɛle la. Yɛ atɔfolɛlielɛ ne anzi dapɛne ko, me nee Lila boka mediema mɔɔ hɔle akpɔsa wɔ ewiade ɛleka ngakyile la anwo na yɛhɔle Greece, Egypt nee Lebanon. Yɛvale alopile yɛpɛle adenle ekyi yɛvile Beirut yɛhɔle Dwɔdan. Kɛmɔ ɛnee bɛva bɛ sa bɛdo gyima ne azo wɔ Jordan na bɛha bɛhile yɛ kɛ bɛmmaa Gyihova Alasevolɛ visa bɛmmaa bɛngɔ maanle ne anu la ati, ɛnee yɛngola yɛnnwu mɔɔ bazi mekɛ mɔɔ yɛbadwu ɛkɛ la. Nea kɛzi yɛ nye liele wɔ mekɛ mɔɔ yɛdwule na yɛnwunle kɛ menli bie gyi anwumalɛne agyinlaleɛ sua bie ati zo na bɛhɛlɛ edwɛkɛ “Welcome Jehovah’s Witnesses” wɔ debie zo bɛgyi ɛkɛ la! Ɔyɛ anyelielɛ kɛ yɛnwunle azɛlɛ ngakyile mɔɔ Baebolo ne ka nwolɛ edwɛkɛ wɔ yɛ nye zo la. Yɛhɔnleanle ɛleka mɔɔ tete amra dɛnlanle, ɛleka mɔɔ Gyisɛse nee ɛzoanvolɛma ne hanle edwɛkɛ ne yɛɛ ɛleka mɔɔ Kilisiene ɛzonlenlɛ bɔle ɔ bo na ɔdɛlɛle ɔhɔle ewiade ɛleka biala la.​—Gyi. 13:47.

Lila ɛva ɛvolɛ 55 ɛboa me wɔ ɛzonlenlɛ gyima ne anu. Yɛhɔle Spain nee Portugal fane dɔɔnwo wɔ mekɛ mɔɔ ɛnee bɛva bɛ sa bɛdo gyima ne azo wɔ ɛkɛ la. Yɛholale yɛmaanle mediema ne mɔ anwosesebɛ, mbuluku nee ninyɛne gyɛne mɔɔ bɛhyia nwo la. Eza yɛhɔkpɔlale mediema bie mɔ mɔɔ la efiade wɔ sogyama sua dɛba bie mɔɔ wɔ Cádiz, Spain la. Me nye liele kpole kɛ mengolale memaanle Baebolo nu ɛdendɛlɛ memaanle bɛ anwosesebɛ la.

Yɛ nee Patricia nee Jerry Molohan ɛlɛkɔ 1969 “Peace on Earth” Nyianu ne

Ɔvi 1963 mɔɔ ba la, menyia nwolɛ adenle meboa memaa bɛyɛ maanle maanle avinli nyianu  mɔɔ bɛbayɛ wɔ Africa, Australia, Central nee South America, Europe, Aduduleɛ Maanle ne mɔ, Hawaii, New Zealand yɛɛ Puerto Rico azo la anwo ngyehyɛleɛ. Me nee Lila ɛhɔ nyianu bie mɔ mɔɔ yɛ rɛle ɛnrɛvi bɛ ɛlɛ a, bie a le mɔɔ bɛyɛle ye wɔ Warsaw, Poland, wɔ 1989 la. Mediema dɔɔnwo mɔɔ vi Russia la holale hɔle zɔhane nyianu kpole ne bie​—bɛ mekɛ mɔɔ limoa! Yɛyiale mediema dɔɔnwo mɔɔ bɛ diedi ne ati, bɛdole bɛ efiade ɛvolɛ dɔɔnwo wɔ Soviet Union la.

Bɛtɛle mbusua nee edwɛkpatɛlɛvolɛma mɔɔ wɔ ewiade amuala mɔɔ menyia adenle mehɔkpɔla bɛ na memaa bɛ anwosesebɛ la maa me nye die kpalɛ. Wɔ yɛ ɛkpɔlalɛ mɔɔ li awieleɛ mɔɔ yɛhɔle ye wɔ South Korea la, yɛhɔkpɔlale mediema 50 mɔɔ wɔ efiade wɔ Suwon la. Mediema zɔhane mɔ amuala lale subane kpalɛ ali na ɛnee bɛ nye la kɛ bɛbazia bɛayɛ bɛ ɛzonlenlɛ gyima ne bieko. Yɛ nye liele kpole kɛ yɛyiale bɛ la!​—Wlo. 1:11, 12.

ANYUHƆLƐ MƆƆ ƐRA LA MAA ME NYE DIE

Menwu kɛzi Gyihova ɛyila ye menli yemaa bɛnyia anyuhɔlɛ la. Mɔɔ bɛsɔne me wɔ ɛvolɛ 1943 la, ɛnee nolobɔlɛma kɛyɛ 100,000 a wɔ ɛkɛ a, noko ɛnɛ, nolobɔlɛma mɔɔ bo 8,000,000 la ɛlɛsonle Gyihova wɔ maanle 240 azo. Edwɛkɛhanlɛ gyima ne mɔɔ edwɛkpatɛlɛvolɛma mɔɔ bɛwie Geleade lile ɔ nyunlu la a vale ɛhye rale a. Nea kɛzi ɔyɛ anyelielɛ kɛ me nee edwɛkpatɛlɛvolɛma ɛhye mɔ dɔɔnwo bɔle nu yɛle gyima na memboale bɛ memaanle bɛhɔle ɛleka mɔɔ bɛbayɛ bɛ gyima ne wɔ maanle gyɛne zo a!

Ɔyɛ me fɛ kɛ menzile kpɔkɛ wɔ me mgbavolɛ nu kɛ metɛlɛ me ɛzonlenlɛ gyima ne anu ɔlua Bɛtɛle ɛzonlenlɛ mɔɔ membizale nwolɛ adenle la azo. Gyihova yilale me kpɔkɛzilɛ ne azo kpalɛ. Saa ɛye Bɛtɛle ɛzonlenlɛ mɔɔ maa me nye die la ɛsie ahane a, me nee Lila anye die kɛ yɛ nee asafo mɔɔ wɔ Brooklyn bɔle nu yɛle gyima na yɛnyianle agɔnwolɛma dɔɔnwo la.

Lila boa me maa meyɛ me Bɛtɛle gyima ne dahuu. Ɔnva nwo kɛ kɛkala mebo ɛvolɛ 84 la, mekola meboa memaa bɛdi ngɛlata mɔɔ ba Bɛtɛle la anwo gyima.

Me nee Lila, ɛnɛ

Ɔle nwolɛ adenle kpole kɛ meboka Gyihova ahyehyɛdeɛ ne anwo na menwu ngakyile kpole mɔɔ wɔ bɛdabɛ mɔɔ bɛsonle Gyihova nee bɛdabɛ mɔɔ bɛnzonle ye avinli la. Yɛkola yɛte edwɛkɛ mɔɔ wɔ Malakae 3:18 la abo kpalɛ: “Bɛbanwu ngakyile mɔɔ wɔ sonla mɔɔ di pɛlepɛle nee mɔɔ yɛ amumuyɛ la avinli la, nee ngakyile mɔɔ wɔ sonla mɔɔ sonle Nyamenle nee mɔɔ ɛnzonle Nyamenle la avinli la.” Yɛnwu kɛ Seetan ewiade ne anu ɛlɛyɛ se alehyenlɛ biala, menli ɛnlɛ anyelazo yɛɛ bɛ nye ɛnlie kpalɛ wɔ ɛbɛlabɔlɛ nu. Noko wɔ ngyegyelɛ mekɛ ɛhye anu, menli mɔɔ kulo Gyihova na bɛsonle ye la anye die yɛɛ bɛlɛ kenle bie anyelazo. Ɔle nwolɛ adenle kpole kɛ yɛlɛbɔ Belemgbunlililɛ edwɛkpa ne nolo la! (Mat. 24:14) Yɛ nye la mekɛ mɔɔ ɔnrɛhyɛ Nyamenle Belemgbunlililɛ ne bazɛkye ewiade dɛba ɛhye na yeamaa ewiade fofolɛ ne nee nuhua nyilalɛ ne amuala mɔɔ kpɔkɛdelɛ kpalɛ nee dahuu ngoane boka nwo ara la ade. Akee Gyihova nɔhalɛ azonvolɛ mɔɔ wɔ azɛlɛ ye azo la badɛnla aze dahuu.