Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Menzukoale Menli Mɔɔ Yɛle Neazo Kpalɛ La

Menzukoale Menli Mɔɔ Yɛle Neazo Kpalɛ La

Ɛnee Izak Marais wɔ Patterson, New York na ɔvɛlɛle me wɔ Colorado. Membizale ye kɛ, “Ɛze ɛvolɛ dodo mɔɔ meli ɔ?” Ɔbuale kɛ, “Ɛhɛe, meze wɔ ɛvolɛ.” Maa menga mɔɔ hɔvale edwɛkɛ ɛhye rale la mengile wɔ.

BƐWOLE me wɔ Wichita, Kansas, U.S.A., wɔ December 10, 1936, yɛle ngakula nna na medame a mele kpanyinli a. Ɛnee me awovolɛ, William nee Jean sonle Gyihova nɔhalɛ nu. Ɛnee me papa a le asafo sonvolɛ a, zɔhane mekɛ ne ɛnee kɛ bɛfɛlɛ adiema mɔɔ nea asafo ne azo la ɛne. Me nana Emma Wagner a hilehilele me mame Baebolo nu nɔhalɛ ne a. Menli dɔɔnwo mɔɔ Emma hilehilele bɛ nɔhalɛ ne la bie a le Gertrude Steele, mɔɔ zonlenle kɛ edwɛkpatɛlɛvolɛ mekɛ tendenle wɔ Puerto Rico la. * Yemɔti ɛnee menli dɔɔnwo wɔ ɛkɛ mɔɔ mebahola meazukoa bɛ neazo kpalɛ ne a.

MENGAKYELE AWIE MƆ NEAZO KPALƐ NE

Me papa ɛlɛfa magazine amaa awie wɔ awɔdenle ne azo

Kenle ko Folɛ nɔsolɛ bie mɔɔ ɛnee menyia ɛvolɛ nnu la, me nee me papa hɔle kɛ yɛkahyehyɛ Watchtower nee Consolation (kɛkala bɛfɛlɛ ye Awake!) magazine ne wɔ awɔdenle ne azo. Wɔ zɔhane mekɛ ne, ɛnee maanle ne ɛva ɔ nwo ɛwula Ewiade Konle II la anu ɛsesebɛ. Dɔketa bie mɔɔ ɛbo nza la ragyinlanle me Papa anyunlu na ɔbɔle ye aholoba wɔ afoa biala mɔɔ ɔngyi la anwo na ɔhanle kɛ me papa le foanvoanle yɛɛ ɔsulo sogya ɛhɔlɛ. Ɛnee dɔketa ne anye gyi me Papa anye abo kpoonwu na ɔhanle kɛ: “Ɛkulo a bɔ me ɛ, foanvoanle nrenyia!” Me ahonle dule noko me nye liele me Papa anwo. Magazine ne mɔɔ ɔlɛfa yeamaa menli ne la ala a ye adwenle wɔ zo a. Sogyanli bie razenle ɛkɛ na dɔketa ne deanle nu kɛ, “Di nrenyia ɛhye anwo gyima!” Sogyanli ne nwunle kɛ dɔketa ne ɛbo yemɔti ɔzele ye kɛ, “Kɔ sua nu kɔla maa ɛ nye zo ɛtete wɔ!” Ɔ nee ye hɔle. Me nye liele akɛnrasesebɛ mɔɔ Gyihova vale maanle me papa la anwo. Ɛnee ɔlɛ gyima nwiɔ mɔɔ bɛpepɛ enrinli wɔ ɛkɛ la wɔ Wichita, na ɛkɛ ne noko a dɔketa ne bapepɛ ye enrinli a!

Me nee me awovolɛ ɛlɛkɔ nyianu wɔ Wichita wɔ 1940 ne anu

Mɔɔ menlile ɛvolɛ mɔtwɛ la, me awovolɛ dɔnenle bɛ sua ne nee bɛ gyima ne, bɛyɛle sua ekyi bie mɔɔ bɛkola bɛfa kale bɛtwe ye la na yɛdule yɛhɔle Colorado kɛ bɛkazonle wɔ ɛleka mɔɔ bɛhyia moalɛ kpole  la. Yɛhɔdɛnlanle ɛleka mɔɔ bikye Grand Junction, me awovolɛ yɛle adekpakyelɛ gyima ne wɔ ɛkɛ, bɛvale mekɛ ekyii bɛzonle ɛya na eza bɛziele nyɛmoa. Ɔlua Gyihova moalɛ zo yɛɛ bɛ mɔdenlebɔlɛ ti, bɛkyekyele asafo wɔ ɛkɛ. Me Papa zɔnenle me nee awie mɔ gyɛne wɔ azule bie anu wɔ June 20, 1948, ɛnee Billie Nichols nee ɔ ye boka nwo. Nzinlii Billie Nichols nee ɔ ye, yɛɛ bɛ ra ne nee ɔ ye yɛle maangyebakyi gyima ne bie.

Yɛvale menli dɔɔnwo mɔɔ bɛvale bɛ nwo bɛwulale Belemgbunlililɛ gyima ne anu bɔkɔɔ la, titili Steele abusua ne​—Don nee Earlene, Dave nee Julia, yɛɛ Si nee Martha​—mɔɔ bɛ neazo ne boale me kpole la agɔnwolɛ kpalɛ na yɛ nee bɛ bɔle sunsum nu adawu mɔɔ maa anwosesebɛ. Bɛmaanle menwunle kɛzi saa awie fa Belemgbunlililɛ ne dimoa ye ɛbɛlabɔlɛ nu a ɔmaa ɔnyia anyelazo na ɔ nye die kpalɛ la.

YƐDULE BIEKO

Mɔɔ menlile ɛvolɛ 19 la, yɛ gɔnwo bie mɔɔ bɛfɛlɛ ye Bud Hasty la hanle kɛ memaa yɛhɔyɛ adekpakyelɛ gyima wɔ United States nyiakɛ. Maangyebakyi zo neavolɛ ne hanle kɛ yɛdu yɛhɔ Ruston, Louisiana, ɛleka mɔɔ Alasevolɛ dɔɔnwo ɛgyakyi daselɛlilɛ ɛhɔlɛ la. Ɔhanle kɛ yɛyɛ debiezukoalɛ ne amuala ɔnva nwo menli dodo mɔɔ bara la. Yɛnyianle ɛleka kpalɛ mɔɔ yɛbayia la. Yɛyɛle debiezukoalɛ ne amuala, noko wɔ mekɛ bie anu ɛnee me ne Hasty ala a kɔ a. Meyɛ gyimalilɛ ne bie a, ɛnee ɔdaye noko yeyɛ bie, yemɔti mɔɔ de ɛkɛ la a bua kpuya ne amuala a. Saa yɛkile wɔ nu a, yɛ mu nwiɔ yɛkɔ bama ne azo mɔɔ awie biala ɛnle ɛkɛ mɔɔ tie yɛ a! Akee adiema raalɛ kpanyinli bie bɔle ɔ bo kɛ ɔba. Baebolo sukoavoma nee menli mɔɔ bɛgyakyi daselɛlilɛ ɛhɔlɛ la dɔɔnwo noko bɔle ɔ bo kɛ bɛba, na yeangyɛ biala asafo ne nyinle.

Kenle ko bie me nee Bud yiale Church of Christ ɛsɔfo bie mɔɔ ɔhanle ngɛlɛlera bie mɔɔ menze nwolɛ edwɛkɛ la anwo edwɛkɛ la. Ɛhye maanle menzuzule ninyɛne mɔɔ medie medi la anwo kpalɛ. Menvale dapɛne ko menzile epe nɔɔzo biala menzukoale kpuya ne mɔ mɔɔ ɔbizale la anwo debie. Yemɔ boale me kpalɛ ɔmaanle menzɔle nɔhalɛ ne anu, na ɛnee me kunlu anu a meyia ɛsɔfo fofolɛ na meva megua ɔ nwo zo.

Yeangyɛ, maangyebakyi zo neavolɛ ne hanle kɛ mendu mengɔ El Dorado, Arkansas, mengɔmboa ɛkɛ ne asafo ne. Mɔɔ mengɔle ɛkɛ ne la, ɛnee meta mesia meba menli mɔɔ bɛnea bɛmaa awie mɔ kɔ sogya la ɛkɛ wɔ Colorado. Kenle ko bie, ɛnee me nee adekpakyelɛma bie mɔ a lua a, yɛnyianle accident wɔ Texas na me kale ne bubule bɔkɔɔ. Yɛvɛlɛle adiema  bie na ɔravale yɛ ɔhɔle ye sua nu yɛɛ ɛnee ɔfa yɛ ɔkɔ debiezukoalɛ. Bɛhanle bɛhilele mediema ne mɔ kɛ esiane ɛdo yɛ yemɔti bɛvale ezukoa bɛboale yɛ. Eza adiema ne dɔnenle me kale bubulera ne dɔla 25.

Yɛnyianle kale yɛhɔle Wichita, ɛleka mɔɔ ɛnee yɛ gɔnwo bie, E. F. “Doc” McCartney ɛlɛyɛ adekpakyelɛ gyima la. Ɛnee ɔ mra mrenyia ndalɛ ne, Frank nee Francis le me gɔnwo mɔ yɛɛ bɛtɛde me gɔnwo mɔ. Bɛdɔnenle bɛ kale dɛba bie bɛmaanle me dɔla 25, ezukoa mɔɔ menyianle ye wɔ me kale bubulera ne anu la anloa pɛpɛɛpɛ. Ɛhye a le mekɛ mɔɔ limoa mɔɔ menwunle ye wienyi kɛ ɔluakɛ melɛfa Belemgbunlililɛ ne mealimoa la ati Gyihova fa mɔɔ mehyia nwolɛ la maa me a. Mɔɔ mengɔdwule ɛkɛ ne la, McCartney nee ɔ ye vale adiema raalɛ bie mɔɔ ɔlɛ subane kpalɛ mɔɔ bɛfɛlɛ ye Bethel Crane la hilele me. Ɛnee ye mame Ruth wɔ Wellington, Kansas na ɔle Dasevolɛ mɔɔ bɔ mɔdenle. Ɔyɛle adekpakyelɛ too ye ɛvolɛ 90 ne anu. Yeandwu ɛvolɛ ko yɛɛ me nee Bethel gyale wɔ 1958 a, na ɔbɔle adekpakyelɛ gyima ne abo wɔ El Dorado.

NWOLƐ ADENLE MƆƆ YƐ ANYELIELƐ

Mɔɔ yɛzuzule neazo kpalɛ mɔɔ yɛnyianle ye wɔ mekɛ mɔɔ yɛlɛnyi anwo la, yɛzile kpɔkɛ kɛ yɛbayɛ gyima biala mɔɔ Gyihova ahyehyɛdeɛ ne bava amaa yɛ la. Bɛmaanle yɛyɛle adekpakyelɛ titilima wɔ Walnut Ridge, Arkansas. Akee wɔ 1962, yɛ nye liele kɛ bɛdole ɛsalɛ bɛvɛlɛle yɛ kɛ yɛhɔ Geleade sukulu ne mɔɔ tɔ zo 37 la bie la. Mɔɔ maanle yɛ nye liele kpalɛ la a le kɛ, ɛnee Don Steele boka yɛ. Mɔɔ yɛwiele sukulu ne la, bɛmaanle me nee Bethel hɔle Nairobi, Kenya. Mɔɔ yɛfi New York yɛahɔ la, yɛ rɛle bɔle kpole kpalɛ mɔɔ ɛnee yɛngola tendɛ bɔbɔ, noko mɔɔ yɛyiale mediema ne mɔ wɔ Nairobi airport la, yɛ nye liele kpole!

Me nee Mary yɛɛ Chris Kanaiya ɛlɛkɔ daselɛlilɛ wɔ Nairobi

Yeangyɛ, yɛ nye liele Kenya nee yɛ ɛzonlenlɛ gyima ne anwo. Chris nee Mary Kanaiya a le yɛ Baebolo sukoavoma mɔɔ bɛlimoale bɛnyianle anyuhɔlɛ a. Bɛtɛyɛ dahuu ɛzonlenlɛ gyima ne wɔ Kenya. Ye ɛvolɛ bieko, bɛhanle kɛ yɛhɔ Kampala, Uganda, na ɛnee yɛdayɛ a yɛle edwɛkpatɛlɛvolɛma mɔɔ yɛlɛdimoa yɛahɔ ɛkɛ a. Yɛ nye liele kpalɛ ɔluakɛ menli dɔɔnwo nyianle ɛhulolɛ kɛ bɛsukoa Baebolo ne anu nɔhalɛ ne, na bɛrayɛle Alasevolɛ. Noko mɔɔ yɛlile ɛvolɛ nsa nee foa wɔ Africa la, ɛnee ɔwɔ kɛ yɛfi ɛkɛ yɛkɔkyekye yɛ abusua, yemɔti yɛziale yɛhɔle United States. Mekɛ mɔɔ yɛfi Africa la, yɛ rɛle bɔle dɛlale mekɛ mɔɔ yɛfi New York yɛara Africa la. Ɛnee yɛkulo menli mɔɔ bɛwɔ Africa la kpalɛ yɛɛ ɛnee yɛlɛ anyelazo kɛ kenle ko dedee yɛbazia yɛara.

YƐNYIANLE GYIMALILƐ FOFOLƐ

Yɛhɔdɛnlanle Colorado adɔleɛ, ɛleka mɔɔ me awovolɛ de la. Yeangyɛ, yɛwole yɛ ra raalɛ mɔɔ limoa, Kimberly, yɛɛ ɛvolɛ ko siane nnu anzi, yɛwole Stephany noko. Yɛanva gyima fofolɛ mɔɔ yɛnyianle kɛ awovolɛ la yɛanli nwɔhoa fee na yɛbɔle ɔ bo kɛ yɛfa nɔhalɛ ne yɛawula yɛ mra ne mɔ ahonle nu. Ɛnee yɛkulo kɛ yɛda neazo kpalɛ ne mɔɔ bɛyɛle bɛmaanle yɛ la bie ali. Saa ɛyɛ neazo kpalɛ ɛmaa ɛ mra a, ɔboa bɛ kpole, noko yemɔ angomekye ɛngile kɛ bɛbanyi bɛazonle Gyihova. Me mediema ngakula nwiɔ vile nɔhalɛ ne anu. Yɛlɛ anyelazo kɛ bɛdabɛ noko bɛbazukoa neazo kpalɛ ne mɔɔ bɛyɛle bɛmaanle bɛ la.

Ɛnee yɛ nye die yɛ mra ne mɔ ɛtetelɛ nwo yɛɛ dahuu yɛbɔ mɔdenle kɛ yɛbayɛ ninyɛne yɛabɔ nu. Kɛmɔ ɛnee yɛde yɛbikye Aspen, Colorado la ati, yɛ muala yɛ nye liele ezukɔtweaba zo ɛkpɔsalɛ nwo  amaa ɔyɛ a yɛabɔ nuhua kɛ abusua la yɛahɔkpɔsakpɔsa zolɛ. Mekɛ ɛhye mɔ maanle yɛnyianle adenle yɛ nee yɛ mra ne mɔ bɔle adawu. Eza ɛnee yɛ nee bɛ kɔtɛnla ɛleka bie nɔɔzo na yɛbɔ adawu kpalɛ wɔ mekɛ mɔɔ yɛlɛte senle la. Ɛnee bɛle ngakula ɛdeɛ, noko bɛbizale kpuya mɔɔ le kɛ “Saa menyi a, duzu a mebayɛ a?” yɛɛ “Nwane a ɔwɔ kɛ megya ye a?” Yɛbɔle mɔdenle kɛ yɛbava sunsum nu ninyɛne yɛawula yɛ mra ne mɔ adwenle nee bɛ ahonle nu. Yɛvale dahuu ɛzonlenlɛ gyima ne nee awie mɔɔ bɛ nee ye lɛ bodane ko mɔɔ bɛbagya ye la yɛziele bɛ nye zo. Yɛbɔle mɔdenle yɛmaanle bɛdele ɔ bo kɛ ɔnle kɛ bɛgya wɔ mekɛ mɔɔ bɛtɛde ngakula la. Yemɔti ɛnee yɛta yɛka kɛ, “Kendɛ too kɔdwu kɛ ɛbanyia ɛvolɛ 23 la.”

Yɛbɔle mɔdenle yɛ nee bɛ hɔle debiezukoalɛ nee daselɛlilɛ dahuu kɛ mɔɔ yɛ awovolɛ yɛle la. Yɛmaa mediema mɔɔ bɛwɔ dahuu ɛzonlenlɛ gyima ne anu la bie mɔ batɛnla yɛ sua nu. Ɛnee eza yɛta yɛfa anyelielɛ yɛka mekɛ mɔɔ ɛnee yɛle edwɛkpatɛlɛvolɛma la anwo edwɛkɛ. Yɛhanle kɛ kenle ko dedee, yɛ muala yɛbahɔ Africa. Yɛ mra ne mɔ anye liele nwo.

Ɛnee yɛyɛ abusua debiezukoalɛ dahuu, na yɛyɛle tɛnlabelɛ ngakyile mɔɔ ɔbahola yeazi sukulu la anwo yɛkile. Yɛmaa ngakula ne mɔ yɛ bɛ nwo kɛ Dasevolɛ mɔɔ ɔlɛbua kpuya mɔɔ awie kɛbiza la. Bɛ nye liele adenle ɛhye mɔɔ bɛdua zo bɛsukoa la anwo, na ɔmaanle bɛnyianle anwodozo. Mɔɔ bɛlɛnyi la, ɛnee ɔyɛ a bɛtendɛ bɛ nzo abo wɔ abusua debiezukoalɛ ne anwo. Kenle ko menvale atete menganle mengilele bɛ kɛ awie biala ɛhɔ na yɛnrɛzukoa debie. Ɔzinle bɛ nwo na bɛbɔle ɔ bo kɛ bɛsu, na bɛhanle kɛ bɛkpondɛ kɛ bɛsukoa debie. Ɛhye maanle yɛnwunle kɛ amgba yɛlɛboa bɛ yɛamaa bɛ nye alie sunsum nu ninyɛne nwo. Bɛ nye liele debiezukoalɛ ne anwo, na yɛmaanle bɛ adenle yɛmaanle bɛhilele bɛ adwenle. Ɛnee saa bɛka kɛ bɛnlie nɔhalɛ ngilehilelɛ bie bɛndo nu a, ɔgyegye yɛ. Noko yɛnwunle mɔɔ amgba wɔ bɛ ahonle nu la kpalɛ. Saa yɛ nee bɛ suzu ninyɛne nwo wie a, ɔmaa bɛnwu Gyihova adwenle wɔ ninyɛne nwo.

YƐYƐLE NZENZALEƐ DƆƆNWO

Yɛ mra ne mɔ ɛtetelɛ hɔle ndɛndɛ wɔ yɛ nye zo dɛlale kɛzi yɛzuzule la. Ɔlua Gyihova ahyehyɛdeɛ ne moalɛ nee ye adehilelɛ zo, yɛbɔle mɔdenle biala mɔɔ yɛbahola la yɛtetele bɛ yɛmaanle bɛhulole Gyihova. Mɔɔ bɛ mu nwiɔ bɛwiele ndoazo sukulu, bɛnyianle ndetelɛ mɔɔ ɔbaboa bɛ yeamaa bɛayɛ gyima bɛanlea bɛ nwo na bɛbɔle adekpakyelɛ gyima ne abo la, yɛ nye liele kpole kpalɛ. Bɛ nee mediema mraalɛ gyɛne nwiɔ dule hɔle Cleveland, Tennessee kɛ bɛkaboa ɛleka mɔɔ bɛhyia moalɛ kpole la. Ɛnee yɛ nwo dɔ bɛ kpalɛ, noko yɛ nye liele kɛ bɛlɛfa bɛ mekɛ ne bɛayɛ dahuu ɛzonlenlɛ gyima ne la. Me nee Bethel bɔle adekpakyelɛ gyima ne abo bieko, na ɛhye bukele gyima fofolɛ dɔɔnwo anwo adenle maanle yɛ. Ɛnee yɛgyinla maangyebakyi zo neavolɛ ne agyakɛ anu yɛsonle asafo ne mɔ yɛɛ yɛyɛle nyianu bo gyima bie mɔ.

Kolaa na yɛ mra ne mɔ adu ahɔ Tennessee la, bɛhɔle akpɔsa wɔ London Bɛtɛle. Mɔɔ bɛdwule ɛkɛ ne la, Stephany, mɔɔ ɛnee yeli ɛvolɛ 19 la yiale Paul Norton, adiema nrenyia bie mɔɔ ɔyɛ gyima wɔ Bɛtɛle ɛkɛ la. Nzinlii, Kimberly noko yiale ɔ gɔnwo bie mɔɔ ɛnee ɔ nee ye yɛ gyima la, Brian Llewellyn. Mɔɔ Stephany nyianle ɛvolɛ 23 la, Paul gyale ye. Ye ɛvolɛ ko anzi, Brian noko gyale Kimberly mɔɔ ɛnee yeli ɛvolɛ 25 la. Yemɔti amgba bɛhendɛle too bɛdwule ɛvolɛ 23 na bɛagya. Yɛliele bɛ agyalɛ ne mɔ yɛdole nuhua bɔkɔɔ.

Yɛ nee Paul, Stephany, Kimberly yɛɛ Brian wɔ Malawi Bɛtɛle wɔ ɛvolɛ 2002 ne anu

Yɛ mra ne mɔ se neazo mɔɔ yɛ nee bɛ nana nee bɛ nenyia mɔ yɛle maanle bɛ la boale bɛ ɔmaanle bɛlile Gyisɛse edwɛkɛ ne mɔɔ se, “bɛbɔ mɔdenle bɛdwenle Nyamenle Belemgbunlililɛ ne” anwo la azo ɔnva nwo kɛ ɔyɛ a bɛ nwo kyele bɛ wɔ ezukoa afoa nu la. (Mat. 6:33) Wɔ April 1998, bɛvɛlɛle Paul nee Stephany bɛmaanle bɛhɔle Geleade sukulu ne mɔɔ tɔ zo 105 la bie, na bɛwiele la, bɛmaanle bɛhɔzonlenle wɔ Malawi, Africa. Wɔ mekɛ ko ne ala anu, bɛdole ɛsalɛ bɛvɛlɛle Brian nee Kimberly kɛ bɛhɔyɛ gyima wɔ London Bɛtɛle na nzinlii, bɛyele bɛ bɛhɔle Malawi Bɛtɛle. Yɛ nye liele kpole kpalɛ ɔluakɛ ɔle kpalɛ kɛ mgbavolɛ nee mbɛlɛra bava bɛ mekɛ azonle Gyihova.

NWOLƐ ADENLE BIEKO MƆƆ ƆYƐ ANYELIELƐ

Wɔ January 2001, bɛvɛlɛle me wɔ fonu zo kɛ mɔɔ menganle ye wɔ mɔlebɛbo ne la. Adiema Marais,  mɔɔ nea Translation Services (ɛleka mɔɔ bɛnea edwɛkɛbohilelɛ gyima) ne azo la hanle kɛ mediema ne mɔ kpondɛ kɛ bɛyɛ gyimalilɛ bie mɔɔ bɛbava bɛaboa edwɛkɛbohilelɛma mɔɔ bɛwɔ ewiade amuala bɛamaa bɛade Nrelenza aneɛ ne abo kpalɛ la na bɛkpondɛ kɛ meboka kilehilevolɛma ne anwo. Ɛnee meli ɛvolɛ 64. Me nee Bethel yɛle nwolɛ asɔne na yɛ nee yɛ awovolɛ mɔɔ bɛyɛ mgbanyinli la zuzule nwolɛ. Saa yɛkɔ a yɛnrɛhola yɛnrɛnlea bɛ, noko bɛhanle kɛ yɛhɔ. Menvɛlɛle adiema Marais bieko kɛ yɛbayɛ gyima ne.

Akee me mame nyianle kansa. Menganle kɛ yɛkulo kɛ yɛtɛnla sua nu na yɛboa me diema Linda yɛmaa ɔnea ye. Me mame hanle kɛ, “Ɛndɛnla ɛleka biala. Saa wɔangɔ a me nwo ɛnrɛdɔ me.” Linda noko hanle kɛ yɛhɔ. Yɛ nye liele bɛ tunwomaa sunsum ne nee kɛzi mediema ne mɔ boale bɛ la anwo kpole! Mɔɔ yɛhɔdwule Watchtower Educational Center ne mɔɔ wɔ Patterson la, ye alehyenlɛ nu, Linda vɛlɛle me kɛ me Mame ɛwu. Yɛvale yɛ nwo yɛwulale yɛ gyima ne anu kpalɛ kɛ mɔɔ saa me mame de aze a anrɛɛ ɔbamaa yɛ anwosesebɛ kɛ yɛyɛ la.

Mɔɔ maanle yɛ nye liele kpole kpalɛ la a le kɛ, bɛmaanle yɛlimoale yɛhɔle Malawi Bɛtɛle, ɛleka mɔɔ yɛ mra ne mɔ nee bɛ hu mɔ wɔ la. Yɛ nee bɛ bɔle nuhua bieko! Eza yɛhilele debie wɔ Zimbabwe nee Zambia. Mɔɔ mengilele debie ɛvolɛ nsa nee foa la, bɛmaanle yɛziale yɛhɔle Malawi kɛ yɛhɔhɛlɛ Alasevolɛ mɔɔ bɛngyi afoa biala la ati bɛyiale ɛkpɔlɛ na bɛgyinlanle nuhua la edwɛkɛ ne mɔ. *

Yɛ nee yɛ nlɔnra ne mɔ ɛlɛkɔ daselɛlilɛ

Eza yɛ rɛle bɔle bieko wɔ 2005, wɔ mekɛ mɔɔ yɛziale yɛhɔle sua nu wɔ Basalt, Colorado, ɛleka mɔɔ me nee Bethel doale adekpakyelɛ gyima ne azo la. Brian nee Kimberly noko rale sua nu wɔ 2006 ne anu kɛ bɛba bɛaratete bɛ mra mraalɛ nwiɔ ne, Mackenzie nee Elizabeth. Paul nee Stephany tɛbɔ Malawi, na Paul boka bɛ Ɔfese Kɔmatii ne anwo. Melɛkɔ ɛvolɛ 80, na me nye die kpole kɛ mgbavolɛ dɔɔnwo mɔɔ me nee bɛ yɛle gyima mekɛ bie la ɛrali me gyakɛ anu la. Anyelielɛ mɔɔ yɛnyia la fɛta bɔkɔɔ, mɔɔ ɛva ɛhye ɛra titili la a le neazo kpalɛ mɔɔ awie mɔ yɛle maanle yɛ na yɛdayɛ noko yɛbɔle mɔdenle yɛlale ye ali yɛhilele yɛ mra nee yɛ nlɔnra la.

^ ɛden. 5 Kenga Steele abusua ne edwɛkpatɛlɛvolɛ gyima ne anwo edwɛkɛ wɔ May 1, 1956, m. 269-272, yɛɛ March 15, 1971, m. 186-190 Watchtower ne mɔ anu.

^ ɛden. 30 Kɛ neazo la, nea Trophim Nsomba ɛbɛlabɔlɛ nu edwɛkɛ mɔɔ wɔ April 15, 2015, Ɛzinzalɛ Arane ne m. 14-18 anu la.