Wulu kɔ nuhua edwɛkɛ ne azo

Wulu kɔ nuninyɛne ne azo

EDWƐKƐ 47

Kɛzi Yɛbamaa Ɛlɔlɛ Mɔɔ Yɛlɛ Yɛmaa Yɛ Nwo La Ayɛ Kpole La

Kɛzi Yɛbamaa Ɛlɔlɛ Mɔɔ Yɛlɛ Yɛmaa Yɛ Nwo La Ayɛ Kpole La

“Bɛmaa yɛhɔ zo yɛhulo yɛ nwo ngoko, ɔluakɛ ɛlɔlɛ vi Nyamenle.”—1 DWƆN 4:7.

EDWƐNE 109 Bɛvi Ahonle Nu Bɛhulo Bɛ Nwo

MƆƆ YƐBAZUKOA a

1-2. (a) Duzu ati a ɛzoanvolɛ Pɔɔlo hanle kɛ ɛlɔlɛ a le subane “mɔɔ le kpole kpalɛ” a? (b) Kpuya boni mɔ yɛbazuzu nwo a?

 MƆƆ Pɔɔlo ɛlɛka diedi, anyelazo nee ɛlɔlɛ nwo edwɛkɛ la, ɔdwulale ye kɛ, “mɔɔ le kpole kpalɛ wɔ [subane ɛhye mɔ anu] la a le ɛlɔlɛ.” (1 Kɔl. 13:13) Duzu ati a Pɔɔlo hanle edwɛkɛ ɛhye a? Kenle bie ɔnrɛhyia kɛ yɛnyia diedi wɔ Nyamenle ewiade fofolɛ ne anwo ɛwɔkɛ ne anu anzɛɛ yɛnyia anyelazo kɛ zɔhane ɛwɔkɛ ne mɔ bara nu ɔluakɛ ɛnee bɛra nu dɛbadɛba. Noko ɔbahyia kɛ yɛnyia ɛlɔlɛ yɛmaa Gyihova nee menli dahuu. Nɔhalɛ nu, yɛbahɔ zo yɛanyia ɛlɔlɛ kpole yɛamaa bɛ dahuu.

2 Kɛmɔ ɔbahyia kɛ yɛnyia ɛlɔlɛ dahuu la ati, yɛbazuzu kpuya nsa anwo. Mɔɔ limoa, duzu ati a ɔwɔ kɛ yɛkulo yɛ nwo ngoko a? Mɔɔ tɔ zo nwiɔ, kɛzi yɛda ɛlɔlɛ ali yɛkile yɛ nwo ngoko ɛ? Mɔɔ tɔ zo nsa, kɛ ɔkɛyɛ na yɛahɔ zo yɛanyia ɛlɔlɛ kpole yɛamaa yɛ nwo ɛ?

DUZU ATI A ƆWƆ KƐ YƐKULO YƐ NWO NGOKO A?

3. Duzu ati a ɔwɔ kɛ yɛkulo yɛ nwo ngoko a?

3 Duzu ati a ɔhyia kɛ yɛkulo yɛ nwo ngoko a? Ɛhye maa bɛnwu yɛ kɛ yɛle nɔhalɛ Kilisienema. Gyisɛse hanle hilele ye ɛdoavolɛma ne kɛ: “Saa bɛkulo bɛ nwo a—menli kɔsɔɔti banwu kɛ bɛle me ɛdoavolɛma.” (Dwɔn 13:35) Eza saa yɛnyia ɛlɔlɛ yɛmaa yɛ nwo ngoko a, ɔmaa yɛkɔ zo yɛyɛ ko. Pɔɔlo hanle kɛ ɛlɔlɛ maa “menli koyɛlɛ di munli.” (Kɔl. 3:14) Eza debie bieko mɔɔ anwo hyia mɔɔ ɔti ɔwɔ kɛ yɛda ɛlɔlɛ ali la wɔ ɛkɛ. Ɛzoanvolɛ Dwɔn hɛlɛle hɔmaanle ɔ mediema diedima kɛ: “Awie biala mɔɔ kulo Nyamenle la ɔwɔ kɛ kulo ɔ diema noko.” (1 Dwɔn 4:21) Saa yɛda ɛlɔlɛ ali yɛkile yɛ nwo ngoko a, ɛnee yɛlɛkile kɛ yɛkulo Nyamenle.

4-5. Yɛ kɛzi Nyamenle anwo ɛlɔlɛ mɔɔ yɛlɛ nee ɛlɔlɛ mɔɔ yɛlɛ yɛmaa awie mɔ la le ko la anwo neazo.

4 Kɛzi Nyamenle anwo ɛlɔlɛ mɔɔ yɛlɛ nee yɛ mediema nwo ɛlɔlɛ mɔɔ yɛlɛ la le ko ɛ? Ndonwo bie ɛne, suzu kɛzi yɛ sonlabaka ne ɛleka ngakyile nee ahonle ne le ko la anwo. Saa dɔketa bie kpondɛ kɛ ɔnwu kɛ yɛ ahonle ne bɔ kpalɛ anzɛɛ ɔmbɔ kpalɛ a, ɔsɔ yɛ sa akɔme nu ɔnea kɛzi yɛ ndinli ne mɔ ɛlɛyɛ gyima la. Kɛzi yɛbahola yɛava ngyinlazo ɛhye yɛatoto ɛlɔlɛ nwo debie mɔɔ yɛlɛsukoa la anwo ɛ?

5 Kɛ mɔɔ dɔketa sɔ yɛ sa akɔme nu a ɔkola ɔnwu kɛzi yɛ ahonle ne bɔ la, saa yɛdayɛ noko yɛbahola yɛanwu kɛ yɛlɛ Nyamenle anwo ɛlɔlɛ kpole a, ɔwɔ kɛ yɛnea kɛzi yɛkulo awie mɔ la. Saa yɛnwu kɛ ɛlɔlɛ mɔɔ yɛlɛ yɛmaa yɛ mediema la ɛha aze a, bie a ɛhye bahile kɛ Nyamenle anwo ɛlɔlɛ mɔɔ yɛlɛ la noko ɛlɛka aze. Noko saa yɛta yɛda ɛlɔlɛ ali yɛkile yɛ mediema diedima dahuu a, ɔle sɛkɛlɛneɛ mɔɔ kile kɛ yɛlɛ Nyamenle anwo ɛlɔlɛ kpole a.

6. Saa ɛlɔlɛ mɔɔ yɛlɛ yɛmaa yɛ mediema la ɛlɛka aze a, ɔkile duzu? (1 Dwɔn 4:​7-9, 11)

6 Saa ɛlɔlɛ mɔɔ yɛlɛ yɛmaa yɛ mediema la ɛlɛka aze a, ɔkile kɛ ngyegyelɛ bie wɔ ɛkɛ. Duzu ati ɔ? Ɔluakɛ ɛhye kile kɛ yɛngyi boɛ wɔ sunsum nu. Ɛzoanvolɛ Dwɔn maanle ɛhye anu lale ɛkɛ wɔ mekɛ mɔɔ ɔhakyele yɛ kɛ: “Awie mɔɔ ɛngulo ɔ diema mɔɔ ɔnwu ye la ɛnrɛhola ɛnrɛhulo Nyamenle mɔɔ ɔnnwu ye la.” (1 Dwɔn 4:20) Duzu a yɛsukoa yɛfi nu a? Saa yɛkulo “yɛ nwo ngoko” a, yɛɛ Gyihova anye die yɛ nwo a.—Kenga 1 Dwɔn 4:​7-9, 11.

KƐZI YƐDA ƐLƆLƐ ALI YƐKILE YƐ NWO NGOKO Ɛ?

7-8. Ndenle boni mɔ a yɛbahola yɛalua zo yɛala ɛlɔlɛ ali yɛahile yɛ nwo ngoko a?

7 Yɛnwu edwɛkɛ, “bɛhulo bɛ nwo ngoko” fane dɔɔnwo wɔ Nyamenle Edwɛkɛ ne anu. (Dwɔn 15:​12, 17; Wlo. 13:8; 1 Tɛs. 4:9; 1 Pita 1:22; 1 Dwɔn 4:11) Noko akee, ɛlɔlɛ le subane mɔɔ wɔ ahonle nu, yɛɛ dasanli biala ɛngola ɛnnwu yɛ ahonle nu. Ɔti, kɛ ɔkɛyɛ na yɛamaa awie mɔ anwu kɛ yɛkulo bɛ ɛ? Yɛdua yɛ edwɛkɛ nee yɛ nyɛleɛ zo.

8 Ndenle dɔɔnwo wɔ ɛkɛ mɔɔ yɛbahola yɛalua zo yɛamaa yɛ mediema anwu kɛ yɛkulo bɛ a. Neazo bie mɔ ɛne: “Bɛha nɔhalɛ bɛhile bɛ nwo ngoko.” (Zɛk. 8:16) “Bɛmaa anzodwolɛ ɛdɛnla bɛ avinli.” (Maake 9:50) “Bɛlimoa bɛli bɛ gɔnwo mɔ eni.” (Wlo. 12:10) “Bɛlie bɛ nwo ngoko.” (Wlo. 15:7) “Bɛhɔ zo . . . bɛva bɛhyɛ bɛ nwo.” (Kɔl. 3:13) “Bɛhɔ zo bɛboa bɛ nwo ngoko.” (Gal. 6:2) “Bɛhɔ zo . . . bɛkyekye bɛ rɛle ngoko.” (1 Tɛs. 4:18) “Bɛhɔ zo bɛmaa bɛ nwo anwosesebɛ.” (1 Tɛs. 5:11) “Bɛyɛ asɔne bɛmaa bɛ nwo ngoko.”—Gye. 5:16.

Kɛ ɔkɛyɛ na yɛaboa yɛ gɔnwo diedinli bie mɔɔ wɔ ngyegyelɛ nu la ɛ? (Nea ɛdendɛkpunli 7-9)

9. Kɛzi yɛkyekye awie mɔ arɛle a ɔmaa bɛnwu ye kɛ yɛkulo bɛ ɛ? (Eza nea nvoninli ne.)

9 Maa yɛzuzu ɛlɔlɛ ko mɔɔ bɛha nwolɛ edwɛkɛ wɔ ɛdendɛkpunli mɔɔ li ɛhye anyunlu la anu mɔɔ yɛda ye ali la anwo. Yɛbazuzu Pɔɔlo edwɛkɛ mɔɔ se: “Bɛhɔ zo . . . bɛkyekye bɛ rɛle ngoko” la anwo. Kɛzi awie mɔ mɔɔ yɛkyekye bɛ rɛle la le adenle titili mɔɔ yɛdua zo yɛmaa bɛnwu kɛ yɛkulo bɛ ɛ? Baebolo nwo buluku bie hanle kɛ, edwɛkɛkpɔkɛ mɔɔ Pɔɔlo vale lile gyima maanle ‘arɛlekyekyelɛ’ la kile kɛ “ɛgyinla awie anwo ɛkɛ wɔamaa ye anwosesebɛ wɔ mekɛ mɔɔ ɔlɛyia sɔnea mɔɔ anu yɛ se la.” Ɛhye ati, saa yɛkyekye yɛ diema diedinli bie mɔɔ wɔ amaneɛnwunlɛ nu la arɛle a, ɛnee yɛlɛboa ye yɛamaa yeadwazo na yeahɔ zo yealua ngoane adenle ne azo. Mekɛ biala mɔɔ yɛbakyekye adiema bie arɛlɛ la, ɛnee yɛlɛmaa yeanwu ye kɛ yɛkulo ye.—2 Kɔl. 7:​6, 7, 13.

10. Kɛzi ahunluyelɛyelalɛ nee arɛlekyekyelɛ zɔho bɛ nwo ɛ?

10 Yɛ kunlu mɔɔ ɔyelɛyela yɛ nee awie mɔ mɔɔ yɛkyekye bɛ rɛle la zɔho bɛ nwo. Wɔ adenle boni azo? Saa awie akunlu yelɛyela ye maa awie mɔɔ ɛlɛnwu amaneɛ la a, ɔmaa ɔkyekye ɔ rɛle na ɔnyia ɛhulolɛ kɛ ɔbayɛ debie yeaboa ye. Ɔti yɛ kunlu dimoa yelɛyela yɛ maa bɛ, na akee yɛakyekye bɛ rɛle. Yɛ kɛzi Pɔɔlo maanle ɔlale ali kɛ Gyihova ahunluyelɛyelalɛ ne ka ye maa ɔkyekye awie mɔ arɛle la nzonlɛ. Ɔhanle kɛ Gyihova le “anwunvɔnezelɛ Selɛ nee arɛlekyekyelɛ muala Nyamenle ne.” (2 Kɔl. 1:3) Wɔ ɛke, Pɔɔlo vale edwɛkɛkpɔkɛ “anwunvɔnezelɛ” lile gyima hilehilele kɛzi yɛ kunlu yelɛyela yɛ maa awie mɔ la anu. Ɛhye ati, ɔvɛlɛle Nyamenle anwunvɔnezelɛ Selɛ anzɛɛ anwunvɔnezelɛ Ɛvileka ɔluakɛ ɔ kunlu yelɛyela ye maa menli. Na zɔhane ahunluyelɛyelalɛ ne ka ye maa ɔkyekye “yɛ rɛle wɔ yɛ sɔnea kɔsɔɔti anu.” (2 Kɔl. 1:4) Kɛ mɔɔ nzubula nu nzukpa maa awie mɔɔ nzuhɔne ɛlɛku ye la ahonle tɔ ye azule nu la, zɔhane ala a Gyihova maa menli mɔɔ ɛlɛdi nyane la ahonle tɔ bɛ azule nu na ɔkyekye bɛ rɛle a. Kɛ ɔkɛyɛ na yɛazukoa Gyihova yɛamaa yɛ kunlu ayelɛyela yɛ amaa awie mɔ na yɛakyekye bɛ rɛle ɛ? Adenle ko a le kɛ yɛbanyia subane mɔɔ ɔbaboa yɛ yeamaa yɛakyekye awie mɔ arɛle la wɔ yɛ ahonle nu. Subane ɛhye mɔ bie a le boni?

11. Kɛ mɔɔ Kɔlɔsaema 3:12 nee 1 Pita 3:8 kile la, subane bieko boni mɔ a ɔwɔ kɛ yɛnyia amaa yɛahɔ zo yɛahulo awie mɔ na yɛakyekye bɛ rɛle a?

11 Duzu a baboa yɛ yeamaa yɛahulo yɛ nwo ngoko dahuu na ‘yɛahɔ zo yɛakyekye yɛ rɛle ngoko’ kenle ko biala a? Ɔwɔ kɛ yɛte yɛ mediema edwɛkɛ bo, yɛkulo bɛ na yɛda atiakunlukɛnlɛma ali yɛkile bɛ. (Kenga Kɔlɔsaema 3:12; 1 Pita 3:8.) Kɛzi subane ɛhye mɔ baboa yɛ ɛ? Saa yɛ kunlu yelɛyela yɛ maa yɛ mediema na yɛfi yɛ ahonle nu yɛdwenle bɛ nwo a, ɔbamaa yɛanyia ɛhulolɛ kpole kɛ yɛbakyekye bɛ rɛle wɔ mekɛ mɔɔ bɛlɛnwu amaneɛ la. Kɛ mɔɔ Gyisɛse hanle la, “mɔɔ ɛyi ahonle nu la a finde bɛ nloa a. Sonlakpalɛ fa ninyɛne mgbalɛ mɔɔ yeboɔboa ɔ nloa la bie maa.” (Mat. 12:​34, 35) Yɛ mediema mɔɔ yɛkyekye bɛ rɛle wɔ bɛ ngyianlɛ mekɛ nu la le adenle titili mɔɔ yɛdua zo yɛkile kɛ yɛkulo bɛ a.

KƐ ƆKƐYƐ NA YƐAHƆ ZO YƐANYIA ƐLƆLƐ KPOLE YƐAMAA YƐ NWO Ɛ?

12. (a) Duzu ati a ɔwɔ kɛ yɛkɔ zo yɛmaa yɛ nye da ɛkɛ a? (b) Kpuya boni mɔ a yɛbazuzu nwo a?

12 Yɛ muala yɛkulo kɛ ‘yɛkɔ zo yɛkulo yɛ nwo ngoko.’ (1 Dwɔn 4:7) Noko ɔwɔ kɛ yɛkakye kɛ Gyisɛse hanle kɛ “menli dɔɔnwo ɛlɔlɛ baha aze.” (Mat. 24:12) Ɛnee Gyisɛse ɛngile kɛ ye ɛdoavolɛma ne anu dɔɔnwo banyia subane ɛhye bie. Noko ɔwɔ kɛ yɛkɔ zo yɛmaa yɛ nye da ɛkɛ amaa ewiade ne anu ɛlɔlɛ mɔɔ baha aze la annyia yɛ nwo zo tumi. Mekɛ mɔɔ ɛhye wɔ yɛ adwenle nu la, maa yɛzuzu kpuya ɛhye mɔɔ anwo hyia la anwo: Duzu a baboa yɛ yeamaa yɛanwu kɛ yɛlɛnyia ɛlɔlɛ kpole yɛamaa yɛ mediema a?

13. Duzu a bahola azɔ yɛ ɛlɔlɛ ne anlea a?

13 Adenle ko mɔɔ yɛbalua zo yɛanwu kɛzi yɛ ɛlɔlɛ ne de la a le kɛ yɛbanleɛnlea kɛzi yɛyɛ yɛ ninyɛne wɔ tɛnlabelɛ bie mɔ anu la anu. (2 Kɔl. 8:8) Ɛzoanvolɛ Pita hanle tɛnlabelɛ ɛhye mɔ anu ko anwo edwɛkɛ kɛ: “Mɔɔ hyia kpalɛ la, bɛva ɛlɔlɛ mɔɔ anu yɛ se la bɛhulo bɛ nwo ngoko, ɔluakɛ ɛlɔlɛ keda ɛtane dɔɔnwo azo.” (1 Pita 4:8) Ɔti awie mɔ sinlidɔlɛ bahola azɔ yɛ ɛlɔlɛ ne anlea.

14. Kɛ mɔɔ 1 Pita 4:8 kile la, ɛlɔlɛ boni a yɛhyia nwo a? Maa neazo.

14 Maa yɛzuzu Pita edwɛkɛ ne anwo kpalɛ. Ngyɛnu 8 foa mɔɔ limoa la hanle ɛlɔlɛ mɔɔ ɔwɔ kɛ yɛnyia la anwo edwɛkɛ—“ɛlɔlɛ mɔɔ anu yɛ se.” Edwɛkɛ mɔɔ Pita vale lile gyima maanle “anu yɛ se” la abo kile kɛ “ɛtwe debie nu.” Ye foa ne mɔɔ tɔ zo nwiɔ la kilehile debie mɔɔ saa yɛlɛ ɛlɔlɛ mɔɔ anu yɛ se la a ɔbamaa yɛayɛ la anu. Ɔkeda yɛ mediema ne mɔ ɛtane zo. Yɛbahola yɛapɛ nwolɛ nvoninli zɛhae: Saa yɛfa yɛ sa amu nwiɔ yɛsɔ yɛ ɛlɔlɛ ne anu kɛ asɛɛ ɛdanlɛ bie mɔɔ yɛkola yɛtɛlɛ nu la, na yɛtɛlɛ nuhua too a, tɛ ɛtane ko anzɛɛ nwiɔ a ɔkeda zo a, emomu ɔkeda “ɛtane dɔɔnwo azo.” Bɛka kɛ ɛheda debie zo a, ɔle edwɛkɛ ngilenu mɔɔ kile kɛ ɛfa ɛtane wɔahyɛ a. Kɛ mɔɔ ɛdanlɛ kola keda evinli zo la, zɔhane ala a ɛlɔlɛ noko kola keda awie mɔ sinlidɔlɛ zo a.

15. Saa yɛlɛ ɛlɔlɛ kpole yɛmaa yɛ mediema a, duzu a yɛbahola yɛayɛ a? (Kɔlɔsaema 3:13)

15 Ɔwɔ kɛ ɛlɔlɛ mɔɔ yɛlɛ yɛmaa yɛ mediema diedima la yɛ kpole amaa yɛahola yɛava bɛ nvonleɛ yɛahyɛ bɛ—saa ɔnla aze kɛ yɛbayɛ ye zɔ bɔbɔ a. (Kenga Kɔlɔsaema 3:13.) Saa yɛkola yɛfa awie mɔ ɛtane yɛkyɛ bɛ a, ɛnee yɛlɛda ye ali kɛ yɛlɛ ɛlɔlɛ kpole na yɛkulo kɛ yɛyɛ mɔɔ sɔ Gyihova anye la. Duzu bieko a bahola aboa yɛ yeamaa yɛabu yɛ nye yɛagua awie mɔ nyɛleɛ mɔɔ ka ɛya nee bɛ nvonleɛ zo a?

Kɛ mɔɔ yɛfa nvoninli mɔɔ le kpalɛ la yɛsie na yɛkyikyi mɔɔ ɛha la, zɔhane ala a yɛfa ninyɛne mgbalɛ mɔɔ yɛ nee yɛ mediema diedima bɔ nu yɛ la yɛsie yɛ adwenle nu a, na tɛ bɛ subane ɛtane ne mɔ ɔ (Nea ɛdendɛkpunli 16-17)

16-17. Duzu bieko a baboa yɛ yeamaa yɛabu yɛ nye yɛagua awie mɔ nvonleɛ ngyikyi zo a? Maa neazo. (Eza nea nvoninli ne.)

16 Fa wɔ adwenle sie subane mgbalɛ mɔɔ ɛ mediema lɛ la azo na tɛ bɛ subane ɛtane ne mɔ ɔ. Suzu ndotonwo ɛhye anwo. Fa ye kɛ ɛ nee mediema ɛhɔ ayia bie abo. Bɛ nye liele, na mɔɔ bɛkpɔnenle la, bɛbɔle nu bɛpɛle nvoninli. Eza ɛpepɛle kɛyɛ nwiɔ bie ɛbokale nwo amaa saa mɔɔ ɛlimoale ɛpɛle la anye kpalɛ a wɔava yemɔ. Kɛkala wɔnyia nvoninli nsa. Noko ɛnwunle ye wɔ nvoninli ne ko anu kɛ adiema ko ɛmunla ɔ nyunlu. Kɛzi ɛbayɛ zɔhane nvoninli ne ɛ? Ɛbakyikyi, ɔluakɛ ɛlɛ nvoninli gyɛne nwiɔ mɔɔ ɛnee awie biala mɔɔ wɔ nu la ɛlɛsele a.

17 Maa yɛva nvoninli ne mɔ mɔɔ yɛva yɛzie la yɛtoto edwɛkɛ mɔɔ yɛfa yɛsie yɛ adwenle nu la anwo. Yɛta yɛkakye kɛzi yɛ nee yɛ mediema bɔle nu lieliele yɛ nye la. Noko fa ye kɛ wɔ mekɛ ɛhye mɔ ko anu, adiema bie hanle edwɛkɛ anzɛɛ yɛle debie mɔɔ gyegyele wɔ la. Kɛzi ɔwɔ kɛ yɛyɛ zɔhane edwɛkɛ ne mɔɔ wɔ yɛ ti anu la ɛ? Duzu ati a ɛmbɔ mɔdenle kɛ ɛbakyikyi kɛ mɔɔ ɛbakyikyi zɔhane nvoninli ne la ɛ? (Mrɛ. 19:11; Ɛfɛ. 4:32) Yɛbahola yɛakyikyi yɛ diema ne nvonleɛ ngyikyi nwo edwɛkɛ mɔɔ wɔ yɛ adwenle nu la ɔluakɛ ninyɛne mgbalɛ dɔɔnwo mɔɔ yɛ nee ye bɔle nu yɛle la wɔ yɛ adwenle nu. Edwɛkɛ ɛhye mɔ a yɛkulo kɛ yɛfa yɛsie yɛ adwenle nu a.

DEƐMƆTI YƐHYIA ƐLƆLƐ NWO TITILI ƐNƐ LA

18. Ɛlɔlɛ nwo ninyɛne titili boni mɔ a yɛzuzu nwo wɔ edwɛkɛ ɛhye anu a?

18 Duzu ati a yɛkulo kɛ yɛnyia ɛlɔlɛ kpole yɛmaa yɛ nwo a? Kɛ mɔɔ yɛzuzu nwo la, saa yɛda ɛlɔlɛ ali yɛkile yɛ mediema a, ɛnee yɛlɛda ɛlɔlɛ ali yɛahile Gyihova. Kɛzi yɛda ɛlɔlɛ ali yɛkile yɛ mediema ɛ? Adenle ko mɔɔ yɛdua zo yɛyɛ zɔ la a le kɛ yɛbakyekye bɛ rɛle. Saa yɛ kunlu yelɛyela yɛ maa yɛ nwo a, yɛbahola ‘yɛahɔ zo yɛakyekye yɛ rɛle ngoko.’ Kɛ ɔkɛyɛ na yɛahɔ zo yɛanyia ɛlɔlɛ kpole yɛamaa yɛ nwo ɛ? Ɔwɔ kɛ yɛyɛ biala mɔɔ yɛbahola la yɛfa yɛ mediema nvonleɛ yɛkyɛ bɛ.

19. Duzu ati a ɔhyia titili ɛnɛ kɛ yɛbala ɛlɔlɛ ali yɛahile yɛ nwo ngoko a?

19 Duzu ati a ɛnɛ a ɔhyia titili kɛ yɛda ɛlɔlɛ ali yɛkile yɛ nwo ngoko a? Nea deɛmɔti Pita hanle kɛ ɔwɔ kɛ yɛyɛ ye zɔ la: “Ninyɛne kɔsɔɔti awieleɛ ɛbikye. Yemɔti . . . bɛva ɛlɔlɛ mɔɔ anu yɛ se la bɛhulo bɛ nwo ngoko.” (1 Pita 4:​7, 8) Mekɛ mɔɔ amumuyɛ ewiade ɛhye ɛlɛbikye kpalɛ la, duzu a yɛbahola yɛamaa yɛ nye ala a? Gyisɛse hanle ye wɔ ye ɛdoavolɛma ne anwo kɛ: “Me duma ne ati maanle maanle kɔsɔɔti bakpɔ bɛ.” (Mat. 24:9) Amaa yɛahola yɛagyinla zɔhane ɛkpɔlɛ ne anloa la, ɔhyia kɛ yɛkɔ zo yɛyɛ ko. Mekɛ mɔɔ yɛlɛyɛ ye zɔ la, mɔdenle biala mɔɔ Seetan ɛlɛbɔ kɛ ɔkpakyekpakye yɛ nu la ɛnrɛyɛ boɛ, ɔluakɛ ɛlɔlɛ ka yɛ bɔ nu kpalɛ—“ɔmaa menli koyɛlɛ di munli.”—Kɔl. 3:14; Fel. 2:​1, 2.

EDWƐNE 130 Fa Ɛtane Kyɛ

a Mekɛ ɛhye a ɔhyia kpalɛ kɛ yɛda ɛlɔlɛ ali yɛkile yɛ mediema a. Duzu ati ɔ, yɛɛ kɛ ɔkɛyɛ na yɛala ɛlɔlɛ ali kpalɛ ɛ?