Wulu kɔ nuhua edwɛkɛ ne azo

Wulu kɔ nuninyɛne ne azo

EDWƐKƐ 46

Gyihova Maa Yɛnyia Anwodozo Kɛ Ɔbayɛ Azɛlɛ Ne Paladaese

Gyihova Maa Yɛnyia Anwodozo Kɛ Ɔbayɛ Azɛlɛ Ne Paladaese

“Awie biala mɔɔ bakpondɛ nyilalɛ wɔ azɛlɛ ne azo la nɔhalɛ Nyamenle ne bayila ye.”—AYE. 65:16.

EDWƐNE 3 Yɛ Anwosesebɛ, Yɛ Anyelazo, Yɛ Anwodozo

MƆƆ YƐBAZUKOA a

1. Duzu edwɛkɛ a ngapezonli Ayezaya hanle hilele ɔ gɔnwo mɔ Yizilayɛma a?

 NGAPEZONLI Ayezaya hanle Gyihova anwo edwɛkɛ kɛ ɔle “nɔhalɛ Nyamenle.” Hibulu edwɛkɛkpɔkɛ mɔɔ bɛhile ɔ bo “nɔhalɛ” la kile “amen.” (Aye. 65:​16, ɔbdw.) “Amen” abo kile “ɔyɛ ɛkɛ,” anzɛɛ “ye biala anu.” Saa bɛlɛka Gyihova anzɛɛ Gyisɛse anwo edwɛkɛ wɔ Baebolo ne anu na bɛfa “amen” bɛdi gyima a, ɔmaa yɛnyia anwodozo kɛ edwɛkɛ ne le nɔhalɛ. Ɛhye ati, edwɛkɛ mɔɔ Ayezaya hanle hilele ɔ gɔnwo mɔ Yizilayɛma la anu la ɛkɛ: Saa Gyihova ka edwɛkɛ biala a, ɔba nu. Nɔhalɛ nu, dahuu Gyihova di ye ɛwɔkɛ ne mɔ azo.

2. Duzu ati a yɛbahola yɛanyia ɛwɔkɛ mɔɔ Gyihova ɛbɔ wɔ yɛ kenle bie nwo la anu anwodozo a, na kpuya boni mɔ a yɛbazuzu nwo a?

2 Asoo yɛbahola yɛanyia anwodozo kɛ ɛwɔkɛ mɔɔ Gyihova ɛbɔ wɔ yɛ kenle bie nwo la bara nu ɔ? Mɔɔ Ayezaya hanle ye edwɛkɛ ne la, ɔ nzi kɛyɛ ɛvolɛ 800, ɛzoanvolɛ Pɔɔlo hilehilele deɛmɔti yɛbahola yɛava yɛ nwo yɛado Nyamenle ɛwɔkɛ ne mɔ azo dahuu la anu. Ɔhanle kɛ: “Nyamenle ɛngola ɛmbɔ adalɛ.” (Hib. 6:18) Kɛ mɔɔ nzukpa nee nzule mɔɔ ngyenle wɔ nu la ɛngola ɛnvi nzubula ko anu ɛmba la, zɔhane ala a Gyihova mɔɔ nɔhalɛ ne vi ye ɛkɛ la ɛngola ɛmbɔ adalɛ a. Ɛhye ati, yɛbahola yɛanyia edwɛkɛ biala mɔɔ Gyihova ɛha, mɔɔ yɛ kenle bie nwo ɛwɔkɛ kɔsɔɔti mɔɔ yebɔ la boka nwo la anu anwodozo bɔkɔɔ. Wɔ edwɛkɛ ɛhye anu, yɛbazuzu kpuya ɛhye mɔ anwo: Duzu a Gyihova ɛbɔ ɛwɔkɛ kɛ ɔbava yeamaa yɛ a? Anwodozo boni a yemaa yɛnyia kɛ amgba ye ɛwɔkɛ ne mɔ bara nu a?

DUZU A GYIHOVA ƐVA ƐBƆ ƐWƆKƐ A?

3. (a) Ɛwɔkɛ boni a anwo hyia Nyamenle azonvolɛ kpalɛ a? (Yekile 21:​3, 4) (b) Duzu a menli bie mɔ yɛ ye wɔ nwo a?

3 Ɛwɔkɛ mɔɔ yɛbazuzu nwo la anwo hyia Nyamenle azonvolɛ mɔɔ wɔ ewiade amuala la kpalɛ. (Kenga Yekile 21:​3, 4.) Gyihova ɛbɔ ɛwɔkɛ kɛ mekɛ bie bara mɔɔ “ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko” a. Saa yɛ nuhua dɔɔnwo ɛlɛdi awie mɔ daselɛ a, yɛka Paladaese nwo edwɛkɛ ɛhye mɔɔ wɔ Baebolo ne anu mɔɔ ka ahonle la yɛkile bɛ. Duzu a bie mɔ yɛ ye wɔ nwolɛ a? Bie a bɛbaha kɛ, “Ɔle anyelazo kɛnlɛma, noko menlie menli kɛ ɔbara nu.”

4. (a) Duzu a ɛnee Gyihova ze a, yɛɛ duzu a ɔnwunle ye a? (b) Saa Gyihova bɔ ɛwɔkɛ a, duzu bieko a ɔyɛ a?

4 Nɔhalɛ nu, mɔɔ Gyihova maanle ɛzoanvolɛ Dwɔn hɛlɛle kɛzi asetɛnla bayɛ wɔ Paladaese la anwo ɛwɔkɛ ɛhye la, ɛnee Gyihova ze kɛ yɛdayɛ mɔɔ yɛwɔ ɛkɛ ne ɛnɛ la baha anyelazo ɛhye anwo edwɛkɛ ahile awie mɔ wɔ mekɛ mɔɔ yɛlɛka Belemgbunlililɛ ne anwo edwɛkɛ yɛahile bɛ la. Eza Gyihova nwunle kɛ, ɔbayɛ se kɛ menli dɔɔnwo balie “ninyɛne fofolɛ” ɛhye ali. (Aye. 42:9; 60:2; 2 Kɔl. 4:​3, 4) Ɔti kɛ ɔkɛyɛ na yɛaboa awie mɔ yɛamaa bɛanyia anwodozo kɛ nyilalɛ mɔɔ bɛha nwolɛ edwɛkɛ wɔ Yekile 21:​3, 4 la bara nu ɛ? Na kɛ ɔkɛyɛ na yɛdayɛ noko yɛanyia Gyihova nee ye ɛwɔkɛ ne mɔ anu anwodozo kpole ɛ? Gyihova ambɔ ɛwɔkɛ ɛhye mɔɔ ka ahonle la ala, emomu, eza ɔmaanle yɛ ninyɛne mɔɔ yɛbahola yɛagyinla zo yɛava yɛ nwo yɛado zo la. Bie mɔ a le boni?

GYIHOVA MAA YƐNYIA ANWODOZO KƐ YE ƐWƆKƐ NE BARA NU

5. Ngyehyɛnu boni mɔ a boa yɛ maa yɛfa yɛ nwo yɛto Nyamenle ɛwɔkɛ ne azo a, na duzu edwɛkɛ a bɛka a?

5 Yɛnwu deɛmɔti yɛbahola yɛava yɛ nwo yɛado Paladaese nwo ɛwɔkɛ mɔɔ Gyihova ɛbɔ la azo la wɔ ngyehyɛnu mɔɔ doa zo la anu. Yɛkenga ye wɔ ɛkɛ ne kɛ: “Na Mɔɔ de belemgbunli ebia ne azo la hanle kɛ: ‘Nea! Melɛyɛ ninyɛne kɔsɔɔti fofolɛ.’ Eza ɔhanle kɛ: ‘Kɛlɛ, ɔluakɛ edwɛkɛ ɛhye le zɔ yɛɛ ɔle nɔhalɛ.’ Na ɔzele me kɛ: ‘Bɛra nu bɛwie! Mame a mele Alefa nee Omiga ne a, mɔlebɛbo nee awieleɛ ne.’”—Yek. 21:​5, 6a.

6. Kɛzi edwɛkɛ mɔɔ bɛhɛlɛ ye wɔ Yekile 21:​5, 6 la maa yɛnyia Nyamenle ɛwɔkɛ ne anu anwodozo kpole ɛ?

6 Kɛzi Baebolo ne anu edwɛkɛ ɛhye maa anwodozo mɔɔ yɛlɛ wɔ Nyamenle ɛwɔkɛ ne anu la yɛ kpole ɛ? Revelation Climax buluku ne hanle ngyehyɛnu ɛhye mɔ anwo edwɛkɛ kɛ: “Ɔle kɛ asɛɛ Gyihova mumua ne ɛlɛfa ɔ sa awula kɛlata bie abo ava ahile kɛ kenle bie nyilalɛ ɛhye mɔ bara nu amgba.” b Bɛhɛlɛ Nyamenle ɛwɔkɛ ne wɔ Yekile 21:​3, 4. Akee wɔ ngyehyɛnu 5 nee 6 ne, saa yɛbaha a, Gyihova vale ɔ sa wulale ɔ bo, na ɔmaa yɛnwu kɛ ye edwɛkɛ ne le nɔhalɛ. Akee maa yɛnlea edwɛkɛ mɔɔ Gyihova hanle ɔvale ɔhilele kɛ yɛbahola yɛava yɛ nwo yɛado ɔ nwo zo la.

7. Nwane a bɔle ɔ bo kɛ ɔtendɛ wɔ ngyɛnu 5 ne anu a, na duzu ati a edwɛkɛ ɛhye le edwɛkɛ titili a?

7 Ngyɛnu 5 ne bɔle ɔ bo kɛ: “Na Mɔɔ de belemgbunli ebia ne azo la hanle kɛ.” (Yek. 21:5a) Gyihova mumua ne dendɛle fane nsa ala wɔ ɛnyelɛzodeɛnwunlɛ ne mɔɔ wɔ Yekile buluku ne anu la anu na ɛhye le nuhua ko. Ɔti, tɛ anwumabɔvolɛ bie anzɛɛ Gyisɛse mɔɔ bɛdwazo ye bɔbɔ la a maa yɛnyia anwodozo ɛhye a, emomu Gyihova mumua ne ɔ! Nɔhalɛ edwɛkɛ ɛhye maa yɛnwu ye wienyi kɛ yɛbahola yɛava yɛ nwo yɛado edwɛkɛ mɔɔ doa zo la azo bɔkɔɔ. Duzu ati ɔ? Ɔluakɛ Gyihova ‘ɛngola ɛmbɔ adalɛ.’ (Tae. 1:2) Ɛhye maa yɛkola yɛfa yɛ nwo yɛto edwɛkɛ mɔɔ yɛkenga ye wɔ Yekile 21:​5, 6 la azo bɔkɔɔ.

“NEA! MELƐYƐ NINYƐNE KƆSƆƆTI FOFOLƐ”

8. Edwɛkɛ boni a Gyihova hanle vale zile zo kɛ ye ɛwɔkɛ ne bara nu a? (Ayezaya 46:10)

8 Eza maa yɛzuzu edwɛkɛkpɔkɛ “Nea!” anwo. (Yek. 21:5) Bɛta bɛfa Giliki edwɛkɛkpɔkɛ mɔɔ bɛhile ɔ bo “nea!” la bɛdi gyima wɔ Yekile buluku ne anu. Buluku bie hanle kɛ ndeanu sɛkɛlɛneɛ ne (!) mɔɔ bɛvale bɛlile gyima la “le adenle mɔɔ bɛdua zo bɛtwe kengavolɛ ne adwenle bɛkɔ edwɛkɛ mɔɔ doa zo la azo a.” Duzu a doa ndeanu sɛkɛlɛneɛ ne azo a? Nyamenle hanle kɛ: “Melɛyɛ ninyɛne kɔsɔɔti fofolɛ.” Ɛnee Gyihova ɛlɛka nzenzaleɛ mɔɔ bara kenle bie la anwo edwɛkɛ ɛdeɛ, noko wɔ ye afoa nu, ɛnee ɔze ye wienyi kɛ ɛwɔkɛ ɛhye bara nu, ɔti ɔka nzenzaleɛ ɛhye mɔ anwo edwɛkɛ kɛ asɛɛ bɛra nu dɛbadɛba.—Kenga Ayezaya 46:10.

9. (a) Kɛzi edwɛkɛ, “melɛyɛ ninyɛne kɔsɔɔti fofolɛ” maa yɛnwu ninyɛne nwiɔ mɔɔ Gyihova bayɛ la ɛ? (b) Duzu a bado “anwuma” nee “azɛlɛ” mɔɔ wɔ ɛkɛ ne kɛkala la ɛ?

9 Maa yɛzuzu Yekile 21:5 ne anu edwɛkɛ sikalɛ ɛhye mɔɔ doa zo la noko anwo: “Melɛyɛ ninyɛne kɔsɔɔti fofolɛ.” Wɔ Yekile tile ɛhye anu, edwɛkɛ sikalɛ zɔhane maa yɛnwu ninyɛne nwiɔ mɔɔ Gyihova bayɛ la—ɔbahakyi ninyɛne bie mɔ yɛɛ ɔbayɛ mɔɔ ɛzɛkye la boɛ. Mɔɔ limoa, ninyɛne boni mɔ a Gyihova bahakyi bɛ a? Yɛkenga ye wɔ Yekile 21:1 kɛ: “Alimoa anwuma ne nee alimoa azɛlɛ ne ɛpɛ nu.” “Alimoa anwuma ne” kile arane ne mɔ mɔɔ Seetan nee ye sunsum ɛtane ne mɔ di bɛ nwo zo la. (Mat. 4:​8, 9; 1 Dwɔn 5:19) Wɔ Baebolo ne anu, “azɛlɛ” kola kile menli mɔɔ de azɛlɛ ne azo la. (Gyn. 11:​1, ɔbdw; Edw. 96:1) Ɛhye ati, “alimoa azɛlɛ ne” kile amumuyɛma mɔɔ wɔ ɛkɛ ne ɛnɛ la. Tɛ kɛ Gyihova bayɛ “anwuma” nee “azɛlɛ” ne boɛ; emomu, ɔbaye bɛ yeavi ɛkɛ bɔkɔɔ na yeava fofolɛ yeazie ɔ bo zo. Ɔbava “anwuma fofolɛ nee azɛlɛ fofolɛ”—mɔɔ le arane fofolɛ mɔɔ banlea tenlenema anwo zo la yeazie anwuma nee azɛlɛ mɔɔ wɔ ɛkɛ ne ɛnɛ la abo zo.

10. Ninyɛne boni mɔ a Gyihova bayɛ bɛ fofolɛ a?

10 Eza yɛnwu ninyɛne mɔɔ Gyihova hanle kɛ ɔbayɛ bɛ fofolɛ la anwo edwɛkɛ wɔ Yekile 21:5. Yɛ ye nzonlɛ kɛ Gyihova anga kɛ: “Melɛbɔ ninyɛne kɔsɔɔti fofolɛ.” Emomu, ɔhanle kɛ: “Melɛyɛ ninyɛne kɔsɔɔti fofolɛ.” Gyihova bamaa alesama ali munli na ɔbayɛ kɛ asɛɛ yeyɛ azɛlɛ ne nee alesama fofolɛ la. Kɛ mɔɔ Ayezaya hanle la, Gyihova bamaa azɛlɛ ne amuala ayɛ kɛnlɛma kɛ Yidɛn tola ne la. Eza ɔbayɛ yɛ fofolɛ, mɔɔ kile kɛ ɔbayɛ yɛ nuhua ko biala ayile bɔkɔɔ. Ɔbayɛ abuburama, anyezinlirama nee anzondilirama ayile yɛɛ ɔbamaa mowuamra bɔbɔ adwazo ara ngoane nu.—Aye. 25:8; 35:​1-7.

“EDWƐKƐ ƐHYE LE ZƆ YƐƐ ƆLE NƆHALƐ. . . . BƐRA NU BƐWIE!”

11. Duzu a Gyihova hanle hilele Dwɔn kɛ ɔyɛ a, na duzu ati ɔ?

11 Edwɛkɛ boni bieko a Nyamenle ɛha mɔɔ maa yɛnyia ye nu anwodozo a? Gyihova hanle hilele Dwɔn kɛ: “Kɛlɛ, ɔluakɛ edwɛkɛ ɛhye le zɔ yɛɛ ɔle nɔhalɛ.” (Yek. 21:5) Gyihova anga kɛ Dwɔn ‘ɛhɛlɛ’ edwɛkɛ ne ala. Eza ɔhanle deɛmɔti ɔwɔ kɛ ɔkɛlɛ la. Ɔhanle kɛ: “Ɔluakɛ edwɛkɛ ɛhye le zɔ yɛɛ ɔle nɔhalɛ”—kile kɛ, yɛkola yɛfa yɛ nwo yɛto Nyamenle edwɛkɛ zo bɔkɔɔ. Yɛ nye die nwo kpalɛ kɛ Dwɔn diele edwɛkɛ mɔɔ bɛhanle bɛhilele ye kɛ ‘ɔhɛlɛ’ la. Ɛhye ati, yɛkola yɛkenga Paladaese nwo ɛwɔkɛ mɔɔ Nyamenle ɛbɔ la anwo edwɛkɛ na yɛdwenledwenle nyilalɛ mɔɔ yɛbanyia ye kenle bie la anwo.

12. Duzu ati a Gyihova kola ka kɛ: “Bɛra nu bɛwie!” a?

12 Edwɛkɛ boni bieko a eza Nyamenle hanle a? “Bɛra nu bɛwie!” (Yek. 21:6) Akee Gyihova hanle edwɛkɛ ne kɛ asɛɛ debie biala mɔɔ ɔhanle ye wɔ Paladaese nwo ɛwɔkɛ ne anwo la ɛra nu dɛbadɛba. Na ɔkola ɔka ye zɔ ɔluakɛ debie biala ɛngola ɛnzi ye adenle kɛ ɔbamaa ye bodane ara nu. Eza Gyihova hanle edwɛkɛ bieko mɔɔ maa yɛnyia ye nu anwodozo bɔkɔɔ kɛ ye ɛwɔkɛ ne bara nu la wɔ edwɛkɛ mɔɔ doa zo la anu. Duzu edwɛkɛ a ɔhanle a?

“MAME A MELE ALEFA NEE OMIGA NE A”

13. Duzu ati a Gyihova hanle kɛ: “Mame a mele Alefa nee Omiga ne” a?

13 Kɛ mɔɔ yɛhanle la, Gyihova dendɛle fane nsa wɔ ɛnyelɛzodeɛnwunlɛ ne mɔɔ bɛvale bɛmaanle Dwɔn la anu. (Yek. 1:8; 21:​5, 6; 22:13) Wɔ ko biala anu, Gyihova hanle edwɛkɛ ɛhye: “Mame a mele Alefa nee Omiga ne a.” Wɔ Giliki ngɛlɛleramgbɔkɛ ne mɔ anu, alefa a bɔ ɔ bo a yɛɛ omiga a li awieleɛ a. Mɔɔ Gyihova hanle kɛ ɔle “Alefa nee Omiga ne” la, ɛnee ɔlɛkile kɛ saa ɔbɔ debie bie abo a, ɔyɛ too ɔkɔ ye awieleɛ bɔkɔɔ.

Saa Gyihova bɔ debie bie abo a, ɔyɛ too ɔkɔ ye awieleɛ bɔkɔɔ (Nea ɛdendɛkpunli 14, 17)

14. (a) Maa neazo mɔɔ kile mekɛ mɔɔ Gyihova hanle kɛ “Alefa” yɛɛ mekɛ mɔɔ ɔbaha kɛ “Omiga” la. (b) Kɛzi edwɛkɛ mɔɔ wɔ Gyɛnɛsese 2:​1-3 la maa yɛnyia anwodozo ɛ?

14 Mɔɔ Gyihova bɔle Adam nee Yive la, ɔhanle bodane mɔɔ ɔlɛ ɔmaa alesama nee azɛlɛ ne la ɔhilele bɛ. Baebolo ne hanle kɛ: “Nyamenle yilale bɛ na ɔzele bɛ kɛ: ‘Bɛwo bɛmaa bɛ nwo ɛzo, bɛyi azɛlɛ ne na bɛnlea zolɛ.’” (Gyn. 1:28) Wɔ zɔhane mekɛ ne, ɛnee Gyihova ɛlɛka kɛ “Alefa.” Ɔhanle ye bodane ne wienyi: Mekɛ bie bara mɔɔ Adam nee Yive abozoamra mɔɔ bɛdi munli na bɛyɛ tieyɛ la bayi azɛlɛ ne na bɛahakyi ye bɛamaa yeayɛ Paladaese a. Saa zɔhane mekɛ ne ba a, wɔ adenle bie azo, Gyihova baha kɛ “Omiga.” Mɔɔ bɛbɔle “anwuma nee aze nee debie biala mɔɔ wɔ nu la bɛwiele la,” Gyihova hanle edwɛkɛ bie mɔɔ maa yɛnwu kɛ ye ɛwɔkɛ ne bara nu la. Ɔwɔ Gyɛnɛsese 2:​1-3. (Kenga.) Gyihova yɛle kenle mɔɔ tɔ zo nsuu la nwuanzanwuanza. Duzu a ɛhye kile a? Ɛhye kile kɛ ɔyele kenle mɔɔ tɔ zo nsuu la ɔziele ahane kɛ ɔbava yeali bodane mɔɔ ɔlɛ ɔmaa alesama nee azɛlɛ ne la anwo gyima. Ɔti ɛnee ɔle kɛ asɛɛ ɔlɛka kɛ ye bodane ne bara nu bɔkɔɔ wɔ kenle mɔɔ tɔ zo nsuu ne la awieleɛ.

15. Duzu ati a ɛnee ɔle kɛ asɛɛ Seetan ɛzɛkye bodane mɔɔ Nyamenle lɛ maa alesama la ɛ?

15 Mɔɔ Adam nee Yive dele atua la, bɛrayɛle ɛtanevolɛma na bɛvale ɛtane nee ewule bɛmaanle bɛ bo zo amra. (Wlo. 5:12) Ɛhye ati, bie a ɔbayɛ kɛ asɛɛ Seetan ɛzɛkye Nyamenle bodane mɔɔ ɔlɛ kɛ menli mɔɔ di munli na bɛyɛ tieyɛ la ɛyi azɛlɛ ne la. Ɛnee yeyɛ kɛ asɛɛ Seetan ɛzi Gyihova adenle mɔɔ ɔnrɛhola ɔnrɛha “Omiga” ɛlɛ. Ɔbayɛ kɛ Seetan nyianle adwenle kɛ Gyihova ɛnrɛhola ɛnrɛli ye ɛwɔkɛ zo. Bie a Seetan zuzule kɛ Gyihova bahu Adam nee Yive na yeabɔ agyalɛma fofolɛ mɔɔ bɛdi munli la yeamaa bɛali Ye bodane mɔɔ ɔlɛ ɔmaa alesama la anwo gyima. Noko saa Nyamenle yɛle ye zɔhane a, anrɛɛ Abɔnsam babɔ Ye somolɛ kɛ ɔle adalɛ. Duzu ati ɔ? Ɔluakɛ, kɛ mɔɔ bɛhɛlɛ ye wɔ Gyɛnɛsese 1:28 la, ɛnee Gyihova ɛha ɛhile Adam nee Yive kɛ bo zo amra bayi azɛlɛ ne.

16. Duzu ati a bie a Seetan nyianle adwenle kɛ ɔbahola yeabɔ Gyihova somolɛ kɛ yeangola yeanli ye bodane nwo gyima a?

16 Kpɔkɛ boni bieko a ɔbayɛ kɛ Seetan nyianle adwenle kɛ Nyamenle bazi a? Bie a Seetan nyianle adwenle kɛ Gyihova bamaa Adam nee Yive adenle yeamaa bɛawo mralɛ mɔɔ bɛnli munli na bɛnrɛhola bɛnrɛli munli ɛlɛ la. (Nol. 7:20; Wlo. 3:23) Saa ɔba ye zɔ a, yemɔ Abɔnsam bahola abɔ Gyihova somolɛ kɛ yeangola yeanli ye bodane nwo gyima. Duzu ati ɔ? Ɔluakɛ kpɔkɛzilɛ ɛhye ɛnrɛmaa Nyamenle ɛnrɛhola ɛnrɛli ye bodane mɔɔ yemɔ a le kɛ ɔbamaa Adam nee Yive abozoamra mɔɔ bɛdi munli na bɛyɛ tieyɛ la ayi Paladaese azɛlɛ ne la anwo gyima.

17. Kɛzi Gyihova lile Seetan nee alesama mɔɔ limoa la atuadelɛ ne anwo gyima ɛ, na duzu a bavi nu ara a? (Eza nea nvoninli ne.)

17 Gyihova lile Seetan nee alesama mɔɔ limoa la atuadelɛ ne anwo gyima wɔ adenle mɔɔ ɔbayɛ kɛ ɔmaanle Seetan edwɛkɛ hale ɔ ti anu la azo. (Edw. 92:5) Gyihova maanle Adam nee Yive wole ngakula ɔvale ɔhilele kɛ ye edwɛkɛ ne le nɔhalɛ, ɔnle adalɛ. Yɛɛ Gyihova hilele kɛ saa ɔka kɛ ɔbayɛ debie a, debie biala ɛnrɛhola ɛnrɛzi ye adenle. Ɔnleanle kɛ ye bodane ne bara nu ɔlua ‘ralɛ’ bie mɔɔ ɔzoanle ye mɔɔ ɔbalie Adam nee Yive abozoamra mɔɔ yɛ tieyɛ la azo. (Gyn. 3:15; 22:18) Ɔbayɛ kɛ ɛkpɔnedeɛ nwo ngyehyɛleɛ ne mɔɔ Gyihova yɛle la zinle Seetan anwo kpole! Duzu ati ɔ? Ɔluakɛ ɔle ngyehyɛleɛ mɔɔ gyi ɛlɔlɛ mɔɔ angomedi ɛnle nu la azo. (Mat. 20:28; Dwɔn 3:16) Seetan ɛnlɛ subane ɛhye bie, ɔle angomedi. Ɔti, ɔlua ɛkpɔnedeɛ nwo ngyehyɛleɛ ne ati, duzu a bazi a? Ɔkadwu Ɛvolɛ Apenle Ko ne awieleɛ la, Adam nee Yive abozoamra mɔɔ bɛli munli na bɛyɛ tieyɛ la badɛnla paladaese azɛlɛ ne azo, kɛ mɔɔ Gyihova limoale hanle la. Wɔ zɔhane mekɛ ne, saa yɛbaha a, Gyihova baha kɛ “Omiga.”

KƐZI YƐMIA ANWODOZO MƆƆ YƐLƐ WƆ GYIHOVA ƐWƆKƐ NE ANU LA

18. Edwɛkɛ nsa mɔɔ maa yɛnyia anwodozo la boni a Nyamenle ɛha ɛhile yɛ a? (Eza nea ɛlɛka, “ Edwɛkɛ Nsa Mɔɔ Maa Yɛnyia Gyihova Ɛwɔkɛ Ne Anu Anwodozo La.”)

18 Kɛ mɔɔ yɛnwu ye la, edwɛkɛ mɔɔ maa yɛnyia anwodozo la boni a yɛbahola yɛaha nwolɛ edwɛkɛ yɛahile bɛdabɛ mɔɔ bɛnlie bɛnli kɛ Paladaese nwo ɛwɔkɛ mɔɔ Nyamenle ɛbɔ la bara nu la ɛ? Mɔɔ limoa, Gyihova mumua ne a bɔle ɛwɔkɛ ne a. Yekile buluku ne hanle kɛ: “Mɔɔ de belemgbunli ebia ne azo la hanle kɛ: ‘Nea! Melɛyɛ ninyɛne kɔsɔɔti fofolɛ.’” Ɔlɛ nrɛlɛbɛ, tumi nee ɛhulolɛ mɔɔ ɔbamaa ye ɛwɔkɛ ne ara nu a. Mɔɔ tɔ zo nwiɔ, Gyihova ze kɛ ɛwɔkɛ mɔɔ yebɔ la bara nu bɔkɔɔ, ɔti wɔ ɔ nye zo a bɛra nu dɛbadɛba. Ɔti a ɔhanle kɛ: “Edwɛkɛ ɛhye le zɔ yɛɛ ɔle nɔhalɛ. . . . Bɛra nu bɛwie!” la. Mɔɔ tɔ zo nsa, saa Gyihova bɔ debie bie abo a, ɔyɛ too ɔkɔ ye awieleɛ bɔkɔɔ, ɔti a ɔhanle kɛ: “Mame a mele Alefa nee Omiga ne a” la. Gyihova bamaa Seetan anwu kɛ ɔle adalɛ na ɔnrɛhola ɔnrɛzi ye adenle kɛ ɔbamaa ye bodane ara nu.

19. Saa menli ɛnlie Paladaese nwo ɛwɔkɛ mɔɔ Nyamenle ɛbɔ la ɛndo nu a, duzu a ɛbahola wɔayɛ a?

19 Kakye kɛ, mekɛ biala mɔɔ ɛbaha edwɛkɛ mɔɔ Nyamenle ɛha mɔɔ maa yɛnyia anwodozo la anwo edwɛkɛ wɔahile awie mɔ la, ɛnee anwodozo mɔɔ ɛdawɔ mumua ne ɛlɛ wɔ Gyihova ɛwɔkɛ ne mɔ anu la anu ɛlɛmia. Ɔti mekɛ biala mɔɔ ɛbagenga Paladaese nwo edwɛkɛ mɔɔ ka ahonle mɔɔ wɔ Yekile 21:4 wɔahile awie na ɔbaha kɛ, “Ɔle anyelazo kɛnlɛma, noko menlie menli kɛ ɔbara nu” la, duzu a ɛbahola wɔayɛ a? Duzu ati a ɛngenga ngyehyɛnu 5 nee 6 na ɛngilehile nu a? Saa yɛbaha a, maa ɔnwu kɛzi Gyihova mumua ne ɛva ɔ sa ɛwula ye ɛwɔkɛ ne abo la.—Aye. 65:16.

EDWƐNE 145 Nyamenle Ɛva Paladaese Ɛbɔ Ɛwɔkɛ

a Edwɛkɛ ɛhye kilehile kɛzi Gyihova ɛmaa yɛnyia anwodozo kɛ Paladaese ne mɔɔ yebɔ yɛ nwolɛ ɛwɔkɛ la amgba bara nu la anu. Mekɛ biala mɔɔ yɛbaha anwodozo ɛhye anwo edwɛkɛ yɛahile awie mɔ la, ɔmaa diedi mɔɔ yɛdayɛ mumua ne yɛlɛ wɔ Gyihova ɛwɔkɛ ne mɔ anu la yɛ kpole.