Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 10

Gyihova Anwo Ɛlɔlɛ Nee Anyezɔlɛ Bamaa Wɔazɔne

Gyihova Anwo Ɛlɔlɛ Nee Anyezɔlɛ Bamaa Wɔazɔne

“Duzu a si me ɛzɔnenlɛ nwo adenle a?”​—GYI. 8:36.

EDWƐNE 37 Fa Wɔ Ɛkɛla Muala Sonle Gyihova

MƆƆ YƐBAZUKOA *

1-2. Kɛ mɔɔ Gyima ne 8:27-31, 35-38 kile la, duzu a hanle Yiteyopeanli ne maanle ɔzɔnenle a?

ƐKULO kɛ ɛsɔne na ɛyɛ Kelaese ɛdoavolɛ ɔ? Ɛlɔlɛ nee anyezɔlɛ ɛha menli dɔɔnwo ɛmaa bɛyɛ zɔ. Suzu kpanyinli bie mɔɔ ɛnee ɔsonle Yiteyopea ɔbahyema bie la neazo ne anwo nea.

2 Yiteyopeanli ne yɛle mɔɔ ɔzukoale ye wɔ Ngɛlɛlera ne anu la anwo debie ndɛndɛ. (Kenga Gyima ne 8:27-31, 35-38.) Duzu a boale ye a? Ɔda ali kɛ ɛnee ɔ nye die Nyamenle Edwɛkɛ ne anwo; mɔɔ ɔde ye ehwili ne anu ɔlɛkɔ la, ɛnee ɔlɛkenga Ayezaya buluku ne foa bie. Mɔɔ Felepe nee nrenyia ne dendɛle la, ɔhilele mɔɔ Gyisɛse ɛyɛ ɛmaa ye la anwo anyezɔlɛ. Noko duzu a maanle kpanyinli zɔhane pɛle adenle hɔle Gyɛlusalɛm a? Ɔluakɛ ɛnee yenyia Gyihova anwo ɛlɔlɛ. Kɛzi yɛnwu ɛhye ɛ? Ɛnee yehɔzonle Gyihova wɔ Gyɛlusalɛm na ɔlɛsia yeara sua nu. Ɔkɛyɛ kɛ ɛnee nrenyia ne ɛgyakyi ɛzonlenlɛ mɔɔ bɛwole ye bɛdole nu la na yeva ɔ nwo yebɔ maanle mɔɔ nuhua menli ne ɛdu bɛ nwo ɛmaa nɔhalɛ Nyamenle ne la. Gyihova anwo ɛlɔlɛ ko ne ala a kpusule ye maanle ɔliele ɛzɔnenlɛ na ɔrayɛle Kelaese ɛdoavolɛ a.​—Mat. 28:19.

3. Duzu a bahola azi awie adenle kɛ ɔzɔne a? (Nea ɛlɛka “ Duzu A Wɔ Wɔ Ahonle Nu A?”)

3 Gyihova anwo ɛlɔlɛ bahola aha wɔ amaa wɔalie ɛzɔnenlɛ. Noko ɛlɔlɛ bahola amaa wɔakpo kɛ ɛbayɛ zɔ. Kɛzi? Dwenle neazo bie mɔ anwo. Bie a ɛkulo wɔ abusua ne yɛɛ ɛ gɔnwo mɔ mɔɔ bɛnle diedima la kpalɛ, na ɔgyegye wɔ kɛ saa ɛsɔne a, bɛbakpɔ wɔ. (Mat. 10:37) Anzɛɛ bie a ɛkulo  subane bie mɔ mɔɔ ɛze kɛ Nyamenle kyi la yɛɛ bie a ɔyɛ se kɛ ɛbagyakyi subane zɔhane mɔ. (Edw. 97:10) Anzɛɛ bie a ɔvi wɔ ngakula nu, ɛdi ɛvoyia mɔɔ ɔvi adalɛ ɛzonlenlɛ nu la. Bie a ɛ nye die ɛvoyia ɛhye mɔ anu ninyɛne bie mɔ mɔɔ maa ɛ nye die la anwo. Ɛhye ati, ɔyɛ se kɛ ɛbagyakyi ɛvoyia mɔɔ Gyihova kyi la ɛlilɛ. (1 Kɔl. 10:20, 21) Yemɔti ɔwɔ kɛ ɛbiza ɛ nwo kɛ, “Duzu anzɛɛ nwane a mekulo ye kpalɛ a?”

AWIE MƆƆ ƆHYIA KƐ YƐKULO YE KPALƐ LA

4. Debie titili mɔɔ bamaa wɔalie ɛzɔnenlɛ la a le boni?

4 Ɛlɛ ninyɛne mgbalɛ dɔɔnwo mɔɔ ɔwɔ kɛ ɛkulo na ɛkile nwolɛ anyezɔlɛ a. Kɛ neazo la, kolaa na wɔabɔ ɔ bo kɛ ɛ nee Gyihova Alasevolɛ sukoa bɔbɔ la, bie a ɛnee ɛ nye die Baebolo ne anwo kpalɛ. Yɛɛ bie a ɛnee ɛkulo Gyisɛse kpalɛ. Kɛkala mɔɔ wɔnwu Gyihova Alasevolɛ la, bie a ɛbahulo kɛ ɛ nee bɛ tu. Noko ninyɛne mgbalɛ ɛhye mɔ mɔɔ ɛbahulo la ɛnrɛmaa ɛnrɛyila ɛ nwo zo ɛnrɛmaa Gyihova na wɔazɔne. Debie titili mɔɔ bamaa wɔalie ɛzɔnenlɛ la a le Gyihova Nyamenle mumua ne anwo ɛlɔlɛ. Saa ɛkulo Gyihova kpalɛ a, ɛnrɛmaa debie anzɛɛ awie biala ɛnrɛzi wɔ adenle kɛ ɛbazonle ye. Ɛlɔlɛ mɔɔ ɛbanyia wɔamaa Gyihova la baboa wɔ yeamaa wɔalie ɛzɔnenlɛ na wɔahɔ zo wɔazonle Nyamenle dahuu.

5. Kpuya boni mɔ a yɛbazuzu nwo a?

5 Gyisɛse hanle kɛ yɛva yɛ ahonle muala, yɛ ɛkɛla muala, yɛ adwenle muala nee yɛ anwosesebɛ muala yɛhulo Gyihova. (Maake 12:30) Kɛ ɔkɛyɛ na wɔanyia ɛlɔlɛ kpole zɛhae wɔamaa Gyihova na wɔabu ye kpalɛ ɛ? Saa ɛdwenledwenle ɛlɔlɛ mɔɔ Gyihova ɛla ye ali ɛhile yɛ la anwo a, ɔbamaa ɛdawɔ noko wɔahulo ye bie. (1 Dwɔn 4:19) Saa ɛnyia Gyihova anwo ɛlɔlɛ kpole zɛhae a, kɛzi ɔbaha wɔ nganeɛdelɛ nee wɔ nyɛleɛ ɛ? *

6. Kɛ mɔɔ Wulomuma 1:20 kile la, adenle ko mɔɔ ɛbahola wɔalua zo wɔazukoa Gyihova anwo debie la a le boni?

6 Sukoa Gyihova anwo debie ɔlua ye abɔdeɛ zo. (Kenga Wulomuma 1:20; Yek. 4:11) Dwenledwenle mbaka nee nane nane mɔɔ Gyihova ɛbɔ nee kɛzi bɛmaa yɛnwu kɛ ɔze nrɛlɛbɛ kpalɛ la anwo. Sukoa nwanwane adenle mɔɔ bɛluale zo bɛbɔle wɔ la anwo debie ekyii. (Edw. 139:14) Eza dwenle tumi mɔɔ Gyihova ɛva ɛbɔ sɛnzɛne ne la anwo; nɔhalɛ ne a le kɛ ɔle nwɔlɔra mgbe mgbe mɔɔ wɔ ɛkɛ la anu ko ala. * (Aye. 40:26) Saa ɛyɛ zɔ a, ɔbamaa wɔabu Gyihova kpole kpalɛ. Noko Gyihova mɔɔ ɛbanwu kɛ ɔze nrɛlɛbɛ yɛɛ ɔlɛ tumi la le ninyɛne mɔɔ bamaa ɛ nee ye anyia agɔnwolɛvalɛ la anu ekyi bie ala. Amaa wɔanyia Gyihova anwo ɛlɔlɛ kpole la, ɔwɔ kɛ ɛsukoa ɔ nwo ninyɛne dɔɔnwo.

7. Amaa wɔahulo Gyihova kpalɛ la, anwodozo boni a ɔwɔ kɛ ɛnyia a?

7 Ɔwɔ kɛ ɛnyia anwodozo kɛ Gyihova kulo ɛdawɔ mumua ne kpalɛ. Asoo ɔyɛ se ɔmaa wɔ kɛ ɛbalie wɔali kɛ anwuma nee aze Bɔvolɛ ne ze kɛ ɛde aze na ɔkulo wɔ kpalɛ ɔ? Saa ɔle zɔ a, kakye kɛ Gyihova nee “yɛ nuhua ko biala avinli anwa.” (Gyi. 17:26-28) Ɔneɛnlea “ahonle kɔsɔɔti anu” na yebɔ wɔ ɛwɔkɛ kɛ mɔɔ Devidi  zele Sɔlɔmɔn la kɛ, “saa ɛkpondɛ ye a, ɔbamaa wɔanwu ye.” (1 Ek. 28:9) Nɔhalɛ nu, deɛmɔti ɛlɛsukoa Baebolo ne la a le kɛ, Gyihova mumua ne ka kɛ, “Mehwe wɔ mebikye me nwo.” (Gyɛ. 31:3) Saa ɛnwu mɔɔ Gyihova ɛyɛ ɛmaa wɔ la kpalɛ a, ɛlɔlɛ mɔɔ ɛlɛ ɛmaa ye la bayɛ kpole.

8. Kɛzi ɛbahile ɛlɔlɛ mɔɔ Gyihova ɛla ye ali ɛhile wɔ la anwo anyezɔlɛ ɛ?

8 Amaa wɔahile kɛ ɛkulo Gyihova la, ɔwɔ kɛ ɛ nee ye tendɛ wɔ asɔneyɛlɛ nu. Mekɛ mɔɔ ɛlɛka wɔ ngyegyelɛ wɔahile Nyamenle na wɔala ye ase wɔ debie biala mɔɔ yeyɛ yemaa wɔ anwo la, ɛlɔlɛ mɔɔ ɛlɛ ɛmaa ye la bayɛ kpole. Na saa ɛnwu kɛzi Gyihova bua wɔ asɔneyɛlɛ la a, ɔbamaa agɔnwolɛvalɛ mɔɔ ɛ nee ye lɛ la anu amia. (Edw. 116:1) Ɛhye bamaa wɔanyia anwodozo kɛ ɔte wɔ edwɛkɛ bo. Noko amaa wɔabikye Gyihova kpalɛ la, ɔwɔ kɛ ɛnwu adwenle mɔɔ ɔlɛ wɔ ninyɛne nwo la. Eza ɔwɔ kɛ ɛnwu mɔɔ ɔkpondɛ yeavi wɔ ɛkɛ la. Amaa wɔanyia ɔ nwo nrɛlɛbɛ la, kyesɛ ɛsukoa ye Edwɛkɛ Baebolo ne.

Adenle kpalɛ ko mɔɔ yɛbalua zo yɛabikye Nyamenle na yɛanwu mɔɔ ɔkpondɛ yeavi yɛ ɛkɛ la a le kɛ yɛbazukoa Baebolo ne (Nea ɛdendɛkpunli 9) *

9. Kɛ ɔkɛyɛ na wɔahile kɛ ɛ nye sɔ Baebolo ne ɛ?

9 Sukoa kɛ ɛbahile Nyamenle Edwɛkɛ Baebolo ne anwo anyezɔlɛ. Baebolo ne ala a maa yɛnwu Gyihova nee ye bodane ne mɔ anwo nɔhalɛ ne a. Amaa wɔahile kɛ ɛ nye sɔ Baebolo ne la, kenga ye dahuu, siezie ɛ nwo maa wɔ Baebolo ɛzukoalɛ ne na fa mɔɔ ɛlɛsukoa la bɔ wɔ ɛbɛla. (Edw. 119:97, 99; Dwɔn 17:17) Ɛlɛ ngyehyɛleɛ mɔɔ ɛfa ɛkenga Baebolo ne ɔ? Ɛdi zo na ɛbɔ mɔdenle kɛ ɛbagenga ye alehyenlɛ biala ɔ?

10. Debie ko mɔɔ yɛ anyelielɛ wɔ Baebolo ne anwo la a le boni?

10 Debie ko mɔɔ yɛ anyelielɛ wɔ Baebolo ne anwo la a le kɛ, ɔka ninyɛne mɔɔ Gyisɛse yɛle mɔɔ menli nwunle ye la anwo edwɛkɛ. Yemɔ ala a le buluku mɔɔ ka ninyɛne mɔɔ Gyisɛse ɛyɛ ɛmaa wɔ la anwo edwɛkɛ a. Mekɛ mɔɔ ɛlɛsukoa mɔɔ Gyisɛse yɛle nee mɔɔ ɔhanle anwo debie la, ɔbaha wɔ yeamaa ɛ nee ye anyia agɔnwolɛvalɛ.

11. Kɛ ɔkɛyɛ na wɔahulo Gyihova ɛ?

 11 Sukoa kɛ ɛbahulo Gyisɛse, na ɛlɔlɛ mɔɔ ɛlɛ ɛmaa Gyihova la bayɛ kpole. Duzu ati ɔ? Ɔluakɛ Gyisɛse lale ɔ Ze subane ne mɔ ali pɛpɛɛpɛ. (Dwɔn 14:9) Yemɔti, mekɛ mɔɔ ɛlɛsukoa Gyisɛse anwo debie dɔɔnwo la, ɔbamaa wɔanwu Gyihova kpalɛ na wɔahile ɔ nwo anyezɔlɛ. Nea kɛzi ɛnee Gyisɛse akunlu yelɛyela ye maa bɛdabɛ mɔɔ menli ɛmbu bɛ bie la​—ehyiavolɛma, menli mɔɔ ɛnde kpɔkɛ yɛɛ bɛdabɛ mɔɔ bɛle bɛtɛɛ la. Eza dwenle folɛdulɛ kpalɛ mɔɔ ɔfa ɔmaa wɔ, mɔɔ saa ɛtie a ɔbamaa wɔ ɛbɛlabɔlɛ awie wɔ boɛ la anwo.​—Mat. 5:1-11; 7:24-27.

12. Mekɛ mɔɔ ɛlɛsukoa Gyisɛse anwo debie la, duzu a ɔbamaa wɔayɛ a?

12 Amaa wɔanyia Gyisɛse anwo ɛlɔlɛ kpole la, ɔwɔ kɛ ɛkɔ zo ɛdwenledwenle afɔle mɔɔ ɔbɔle amaa yɛanyia ɛtanefakyɛ la anwo. (Mat. 20:28) Saa ɛte ɔ bo kɛ Gyisɛse vile ye ɛhulolɛ nu wule maanle wɔ a, ɔbaha wɔ yeamaa wɔanlu ɛ nwo na wɔazɛlɛ Gyihova ɛkɛ ɛtanefakyɛ. (Gyi. 3:19, 20; 1 Dwɔn 1:9) Eza Gyisɛse nee Gyihova anwo ɛlɔlɛ bamaa wɔabikye menli mɔɔ bɛkulo Gyihova la.

13. Duzu a Gyihova ɛmaa wɔnyia a?

13 Sukoa kɛ ɛbahulo Gyihova abusua ne. Wɔ mbusuafoɔ nee ɛ gɔnwo mɔ mɔɔ bɛnle diedima la ɛnrɛde deɛmɔti ɛkulo kɛ ɛyila ɛ nwo zo ɛmaa Gyihova la abo. Bie bɔbɔ a bɛbadwazo bɛatia wɔ. Gyihova baboa wɔ, ɔlua sunsum nu abusua mɔɔ ɔbamaa wɔanyia la azo. Saa ɛkɔ zo ɛbikye sunsum nu abusua zɔhane a, ɛbanyia ɛlɔlɛ nee moalɛ mɔɔ ɛhyia la. (Maake 10:29, 30; Hib. 10:24, 25) Mekɛ ɛlɛkɔ la, bie a wɔ mbusuafoɔ baboka ɛ nwo bɛazonle Gyihova na bɛava ye ngyinlazo ne mɔ bɛabɔ bɛ ɛbɛla.​—1 Pita 2:12.

14. Kɛ mɔɔ 1 Dwɔn 5:3 ka la, duzu a wɔnwu ye wɔ Gyihova ngyinlazo ne mɔ anwo a?

14 Sukoa kɛ ɛbamaa ɛ nye azɔ Gyihova ngyinlazo ne mɔ na wɔava wɔayɛ gyima. Kolaa na wɔanwu Gyihova la, bie a ɛnee ɛlɛ wɔ ngyinlazo, noko kɛkala wɔnwu kɛ Gyihova ngyinlazo ne mɔ a le kpalɛ a. (Edw. 1:1-3; kenga 1 Dwɔn 5:3.) Dwenle Baebolo nu folɛdulɛ mɔɔ bɛva bɛmaa kunlima, yelɛma, awovolɛ nee ngakula la anwo. (Ɛfɛ. 5:22–6:4) Ɛbɔle ɔ bo kɛ ɛfa folɛdulɛ zɔhane wɔayɛ gyima la, wɔ abusua asetɛnla ɛtɛyɛle kpalɛ ɔ? Agɔnwolɛvalɛ nwo folɛdulɛ mɔɔ Gyihova ɛva ɛmaa mɔɔ ɛlɛdi zo la ɛmaa wɔnyia subane mgbalɛ, ɔnle zɔ ɔ? Asoo kɛkala ɛ nye ɛnlie? (Mrɛ. 13:20; 1 Kɔl. 15:33) Ɔda ali kɛ ɛbaha kɛ ɛhɛe.

15. Saa ɛnnwu kɛzi ɛfa Baebolo ngyinlazo bie mɔɔ wɔnwu ye la wɔayɛ gyima a, duzu a ɛbahola wɔayɛ a?

15 Ɔdwu mekɛ ne bie a, ɛnnwu kɛzi ɛfa Baebolo ngyinlazo bie mɔɔ wɔnwu ye la wɔayɛ gyima a. Ɛhye ati a Gyihova dua ye ahyehyɛdeɛ ne azo maa ɛnyia mbuluku ngakyile mɔɔ bamaa wɔanwu mɔɔ le kpalɛ nee ɛtane la. (Hib. 5:13, 14) Saa ɛkenga na ɛsukoa mbuluku ɛhye mɔ a, ɛbanwu nvasoɛ mɔɔ wɔ zo nee kɛzi ɛbahola wɔava wɔayɛ gyima la, na ɛhye bamaa wɔabikye Gyihova ahyehyɛdeɛ ne.

16. Kɛzi Gyihova ɛhyehyɛ ye menli ne ɛ?

16 Sukoa kɛ ɛbahulo Gyihova ahyehyɛdeɛ ne na gyinla ɔ nzi. Gyihova ɛhyehyɛ ye menli ne wɔ asafo ngakyile nu; na ɔ Ra Gyisɛse a le bɛ ti a. (Ɛfɛ. 1:22; 5:23) Gyisɛse ɛkpa mrenyia ekyii bie mɔɔ bɛkpokpa bɛ la kɛ bɛli gyima mɔɔ ɔkulo kɛ bɛyɛ ye ɛnɛ la anyunlu. Gyisɛse vɛlɛle ekpunli ɛhye kɛ “akɛlɛ nɔhavo nee badwema,” na bɛfa gyima mɔɔ bɛlɛ kɛ bɛmaa wɔ sunsum  nu aleɛ na bɛabɔ ɛ nwo bane wɔ sunsum nu la anyebolo zo. (Mat. 24:45-47) Ndenle mɔɔ akɛlɛ nɔhavo ne dua zo nea wɔ la ko a le kɛ bɛkpa mboaneneavolɛma mɔɔ bɛfɛta la kɛ bɛnlea wɔ. (Aye. 32:1, 2; Hib. 13:17; 1 Pita 5:2, 3) Mgbanyima ne mɔ lɛ ɛhulolɛ kɛ bɛbava bɛ nwo bɛamaa wɔ, bɛakyekye ɛ rɛle na bɛaboa wɔ bɛamaa wɔahɔ zo wɔabikye Gyihova. Noko ninyɛne mɔɔ anwo hyia mɔɔ bɛbahola bɛayɛ bɛamaa wɔ la ko a le kɛ, bɛbaboa wɔ bɛamaa wɔahilehile awie mɔ Gyihova anwo debie.​—Ɛfɛ. 4:11-13.

17. Kɛ mɔɔ Wulomuma 10:10, 13, 14 kile la, kɛmɔti a yɛka Gyihova anwo edwɛkɛ yɛkile awie mɔ ɛ?

17 Boa awie mɔ maa bɛhulo Gyihova. Gyisɛse zele ye ɛdoavolɛma kɛ bɛhilehile awie mɔ Gyihova anwo debie. (Mat. 28:19, 20) Bie a ɛbali mɛla zɔhane azo kɛ mɔɔ bɛse yɛyɛ la ati. Noko mekɛ mɔɔ ɛlɔlɛ mɔɔ ɛlɛ ɛmaa Gyihova ɛlɛyɛ kpole la, ɛbade nganeɛ kɛ ɛzoanvolɛ Pita nee Dwɔn la. Bɛhanle kɛ: “Yɛmɛ, yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.” (Gyi. 4:20) Saa yɛboa awie yɛmaa ɔkulo Gyihova a yɛ nye die kpalɛ. Nea kɛzi edwɛkpakavolɛ Felepe anye liele wɔ mekɛ mɔɔ ɔboale Yiteyopeanli ne ɔmaanle ɔnwunle Ngɛlɛlera ne anu nɔhalɛ ne na ɔzɔnenle la! Saa ɛsukoa Felepe na ɛdi Gyisɛse mɛla mɔɔ se yɛbɔ edwɛkpa ne nolo la azo a, ɛnee ɛlɛkile kɛ amgba ɛkulo kɛ ɛyɛ Gyihova Dasevolɛ. (Kenga Wulomuma 10:10, 13, 14.) Ɛhye bamaa wɔabiza kpuya mɔɔ Yiteyopeanli ne bizale la bie kɛ: “Duzu a si me ɛzɔnenlɛ nwo adenle a?”​—Gyi. 8:36.

18. Duzu a yɛbazuzu nwo wɔ edwɛkɛ mɔɔ doa zo la anu a?

18 Debie mɔɔ hyia wɔ ɛbɛlabɔlɛ nu mɔɔ ɛbahola wɔayɛ la a le kɛ ɛbazi kpɔkɛ kɛ ɛsɔne. Ɔluakɛ ɛhye anwo hyia kpalɛ la ati, ɔwɔ kɛ ɛsuzu mɔɔ ɔkile la anwo kpalɛ. Duzu a ɔwɔ kɛ ɛnwu ye wɔ ɛzɔnenlɛ nwo a? Kolaa na bɛazɔne wɔ yɛɛ wɔ wɔ ɛzɔnenlɛ ne anzi, duzu a ɔwɔ kɛ ɛyɛ a? Yɛbabua kpuya zɔhane mɔ wɔ edwɛkɛ mɔɔ doa zo la anu.

EDWƐNE 2 Wɔ Duma A Le Gyihova

^ ɛden. 5 Menli mɔɔ bɛkulo Gyihova la bie mɔ twenlehwenle bɛ bo aze kɛ bɛbazɔne na bɛayɛ ye Alasevolɛ. Saa zɔhane a ɛte nganeɛ a, edwɛkɛ ɛhye bamaa wɔanwu ninyɛne bie mɔ mɔɔ ɛbahola wɔayɛ amaa wɔahola wɔazɔne la.

^ ɛden. 5 Asolo awie biala, yemɔti asolo kɛzi bie mɔ bava nzuzulɛ mɔɔ yɛva yɛmaa wɔ edwɛkɛ ɛhye anu la ayɛ gyima la.

^ ɛden. 6 Saa ɛkpondɛ neazo dɔɔnwo a, nea Was Life Created? yɛɛ The Origin of Life​—Five Questions Worth Asking brohyua ne mɔ anu.

^ ɛden. 61 NVONINLI NWO EDWƐKƐ: Adiema raalɛ bie ɛva trate ɛmaa bɛlɛra bie mɔɔ yeyia ye wɔ gua nu la.