Wulu kɔ nuhua edwɛkɛ ne azo

Wulu kɔ nuninyɛne ne azo

Kpuya Mɔɔ Vi Kengavolɛma Ɛkɛ

Kpuya Mɔɔ Vi Kengavolɛma Ɛkɛ

Asoo ɔle kpalɛ kɛ Kilisienenli bava etu abɔ ɔ nwo bane avi awie mɔ anwo ɔ?

Kilisienema bahola ayɛ biala mɔɔ bɛbahola la abɔ bɛ nwo bane, noko ɔwɔ kɛ bɛfa Baebolo ngyinlazo bɛdi gyima. Ngyinlazo ɛhye mɔ maa yɛnwu kɛ ɔnle kpalɛ kɛ Kilisienenli bava etu abɔ ɔ nwo bane avi awie mɔ anwo. Suzu ɛhye mɔ anwo:

Sonla ngoane le nwuanzanwuanza wɔ Gyihova anye zo. Ɛnee edwɛndolɛnli Devidi ze kɛ Gyihova a le “ngoane nzufeanvea a.” (Edw. 36:9) Ɔti, saa Kilisienenli kpa kɛ ɔdua adenle kpalɛ zo yeabɔ ɔdaye anzɛɛ ye agyapadeɛ nwo bane a, ɔwɔ kɛ ɔnea kɛ ɔnrɛhu sonla anzɛɛ ɔnrɛli mogya nwo ɛzonle.​—Mɛla 22:8; Edw. 51:14.

Debie biala kola maa yɛdi mogya nwo ɛzonle ɛdeɛ, noko ɔnyɛ se kɛ yɛbava etu yɛahu awie​—bie a yɛ nye fuu anzɛɛ yɛ nye ɛnla nwo. * Bieko, sonla mɔɔ ɛlɛkɔ ahɔteta ɔ gɔnwo na ɔlɛ etu la ahonle badu, yemɔti saa ɔnwu etu a ɔbamaa bɛapele na bie ahu ɔ gɔnwo.

Mɔɔ Gyisɛse zele ye ɛdoavolɛma ne kɛ bɛva dadeɛ bɛzia bɛ nwo wɔ nɔe ne mɔɔ aleɛ kye a ɔbawu la, ɛnee ɔngile kɛ bɛfa bɛabɔ bɛ nwo bane. (Luku 22:36, 38) Emomu, Gyisɛse maanle bɛvale dadeɛ bɛrale ɔluakɛ ɛnee ɔkulo kɛ ɔkile bɛ ɛzukoalɛdeɛ bie kɛ saa menli ekpunli bie boɔboa bɛ nwo ba bɛ nwo zo bɔbɔ a, ɔnle kɛ bɛyɛ basabasa.  (Luku 22:52) Mɔɔ Pita hwenle ye dadeɛ ne pɛle ɛsɔfo kpanyinli ne akɛlɛ ne anzo wiele la, Gyisɛse zele Pita kɛ: “Sia fa wɔ dadeɛ ne wula ye boa ne anu.” Akee Gyisɛse hanle nɔhalɛ edwɛkɛ mɔɔ ɔtɛkakyile na ɔle ngyinlazo mɔɔ kile ye ɛdoavolɛma adenle badwu ɛnɛ la kɛ: “Bɛdabɛ mɔɔ bɛtwe dadeɛ la kɔsɔɔti bawu dadeɛ nloa.”​—Mat. 26:51, 52.

Kɛmɔ Maeka 4:3 ka la, Nyamenle menli ne ‘babolo bɛ konle dadeɛ ne mɔ ava azo ɛya na bɛabolo bɛ atwɛ ne mɔ bɛayɛ ɛdedadeɛ.’ Subane ɛhye mɔɔ maa bɛnwu nɔhalɛ Kilisienema la nee ɛzoanvolɛ Pɔɔlo folɛdulɛ ne yia: “Bɛmmafa ɛtane bɛtua awie biala ɛtane kakɛ. . . . Saa ɔkɛyɛ boɛ a, bɛ nee menli kɔsɔɔti ɛdɛnla anzodwolɛ nu.” (Wlo. 12:17, 18) Pɔɔlo yiale ngyegyelɛ dɔɔnwo mɔɔ “nwule avinli esiane” boka nwo la, noko ɔyɛle mɔɔ ɔka la, yeammaa banebɔlɛ mɔɔ ɔbanyia la angyia ye andɛla Baebolo ngyinlazo mɔɔ ɔbava yeali gyima la. (2 Kɔl. 11:26) Emomu, ɔvale ɔ nwo ɔdole Nyamenle nee nrɛlɛbɛ mɔɔ wɔ Ye Edwɛkɛ ne anu la azo​—nrɛlɛbɛ mɔɔ “le kpalɛ tɛla konle adu” la.​—Nol. 9:18.

Kilisienema bu ngoane kɛ ɔsonle bolɛ ɔtɛla anwonyia. “[Sonla] ninyɛne ne ɛnrɛhola ɛnrɛmaa ye ngoane.” (Luku 12:15) Ɛhye ati, saa yɛtendɛ bɛtɛɛ yɛkile amumuyɛnli bie na yeandie a, Kilisienema mɔɔ bɛze nrɛlɛbɛ la tie ngyinlazo mɔɔ wɔ Gyisɛse edwɛkɛ ɛhye anu la: “Bɛmmadwazo bɛtia ɛtanevolɛ.” Bie a ɔwɔ kɛ yɛfa yɛ tɛladeɛ ne mɔɔ vea ɔ bo nee aguzo ne noko yɛmaa ye. (Mat. 5:39, 40; Luku 6:29) * Ɔnle kɛ yɛmaa nwule anye ba yɛ nwo zo. Saa yɛkpo “ɛbɛlabɔlɛ nu ninyɛne mɔɔ awie fa tu ɔ nwo” na yɛ kpalɛzoamra nwu kɛ yɛle Gyihova Alasevolɛ mɔɔ kulo anzodwolɛ a, nwule ɛnrɛra yɛ nwo zo.​—1 Dwɔn 2:16; Mrɛ. 18:10.

Kilisienema bu adwenle mɔɔ awie mɔ lɛ la. (Wlo. 14:21) Saa ɔda ali kɛ adiema bie lɛ etu mɔɔ ɔfa ɔbɔ ɔ nwo bane a, ɔbazi ɔ mediema bie mɔ anwo, na bɔbɔ yeadenda bɛ gyakɛ anu. Ɛhulolɛ maa yɛfa awie mɔ ngyianlɛdeɛ yɛdimoa yɛ ɛdeɛ nyunlu, saa bɔbɔ ɔwɔ kɛ yɛfa debie mɔɔ yɛte nganeɛ kɛ mɛla maa adenle la yɛsie ahane a.​—1 Kɔl. 10:32, 33; 13:4, 5.

Kilisienema bɔ mɔdenle kɛ bɛbayɛ neazo kpalɛ. (2 Kɔl. 4:2; 1 Pita 5:2, 3) Saa bɛfa Baebolo nu folɛdulɛ bɛmaa Kilisienenli bie mɔɔ fa ɛtu bɔ ɔ nwo bane la dedee na yeandie a, bɛbabu ye kɛ ɔnyɛ neazo kpalɛ. Ɔnrɛfɛta kɛ bɛbava gyimalilɛ anzɛɛ nwolɛ adenle titili bie mɔ bɛamaa ye wɔ asafo ne anu. Zɔhane ala a ɔde wɔ Kilisienenli mɔɔ ɔfa etu ɔyɛ gyima la noko afoa nu a. Nea kɛzi ɔle kpalɛ kɛ ɔbakpondɛ gyima gyɛne a! *

Kɛzi Kilisienenli bie bakpa kɛ ɔbɔ ɔ nwo, ye abusua anzɛɛ ye agyapadeɛ nwo bane la le ɔ ti anwo kpɔkɛzilɛ, zɔhane ala a gyima mɔɔ ɔbayɛ la noko de a. Ɔti, Baebolo ngyinlazo maa yɛnwu Nyamenle nrɛlɛbɛ nee kɛzi ɔkulo yɛ la. Kilisienema mɔɔ bɛnyi sunsum nu la bu ngyinlazo ɛhye mɔ, na bɛzi kpɔkɛ kɛ bɛnrɛva etu bɛnrɛbɔ bɛ nwo bane. Bɛze kɛ menli mɔɔ lɛ anwodozo wɔ Nyamenle anu na bɛfa Baebolo ngyinlazo bɛbɔ bɛ ɛbɛla la lɛ nɔhalɛ banebɔlɛ dahuu.​—Edw. 97:10; Mrɛ. 1:33; 2:6, 7.

Wɔ anwongyelelɛ kpole ne anu, Kilisienema bava bɛ rɛle awula Gyihova anu, na bɛnrɛbɔ mɔdenle kɛ bɛbɔ bɛ nwo bane

^ ɛden. 3 Kilisienenli bahola azi kpɔkɛ kɛ ɔtɔ etu yeava yeahu nane yeali anzɛɛ yeabɔ ɔ nwo bane yeavi nane mɔɔ anwo yɛ ɛzulolɛ la anwo. Saa yɛnva yɛnli gyima a, ɔwɔ kɛ yɛye awolɛ ne yɛfi nu, bɔbɔ yɛtudu na yɛfa yɛsie boɛ. Wɔ ɛleka mɔɔ mɛla ɛmmaa adenle anzɛɛ tua kɛ awie banyia etu la, Kilisienema di mɛla ɛhye azo.​—Wlo. 13:1.

^ ɛden. 2 Mɔɔ fale yɛ nwo bane mɔɔ yɛbɔ yɛavi bɔnadolɛ nwo la, nea edwɛkɛ How to Prevent Rapemɔɔ wɔ March 8, 1993, Awake! ne anu la.

^ ɛden. 4 Saa ɛkpondɛ etu mɔɔ bɛfa bɛdi gyima la anwo edwɛkɛ dɔɔnwo a, nea November 1, 2005 The Watchtower ne, m. 31; yɛɛ July 15, 1983, m. 25-26.