Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 3

Kɛ Ɔkɛyɛ Na Wɔabɔ Wɔ Ahonle Nwo Bane Ɛ?

Kɛ Ɔkɛyɛ Na Wɔabɔ Wɔ Ahonle Nwo Bane Ɛ?

‘Bɔ wɔ ahonle nwo bane tɛla debie biala mɔɔ ɛfa ɛsie la.’​—MRƐ. 4:23.

EDWƐNE 36 Yɛbɔ Yɛ Ahonle Nwo Bane

MƆƆ YƐBAZUKOA *

1-3. (a) Duzu ati a Gyihova hulole Sɔlɔmɔn a, na nyilalɛ boni mɔ a ɔnyianle a? (b) Kpuya boni mɔ a yɛbabua wɔ edwɛkɛ ɛhye anu a?

SƆLƆMƆN rayɛle Yizilayɛ belemgbunli wɔ mekɛ mɔɔ ɛnee ɔle kakula kpavolɛ la. Mɔɔ ɔbɔle ye belemgbunlililɛ ne abo la, Gyihova yele ɔ nwo hilele ye wɔ ɛlalɛ nu na ɔzele ye kɛ: “Duzu a ɛkpondɛ kɛ meyɛ memaa wɔ a?” Sɔlɔmɔn buale ye kɛ: “Mele kakula somaa mɔɔ menze nwolɛ bie, . . . Ɛhye ati mebodo wɔ, maa me nrɛlɛbɛ [“ahonle mɔɔ yɛ tieyɛ,” NW] maa menva menzie wɔ menli ne.” (1 Arl. 3:5-10) “Ahonle mɔɔ yɛ tieyɛ”​—mɛlɛbɛnwoaze modolɛ boni ɛne! Ɔnyɛ nwanwane kɛ Gyihova hulole Sɔlɔmɔn la! (2 Sa. 12:24) Yɛ Nyamenle ne anye liele kakula Sɔlɔmɔn mualɛ ne anwo kpalɛ, ɔti ɔmaanle ye “nrɛlɛbɛ kpole nee ndelebɛbo dɔɔnwo.”​—1 Arl. 3:12.

2 Mekɛ tendenle ala mɔɔ Sɔlɔmɔn lile nɔhalɛ la, ɔnyianle nyilalɛ dɔɔnwo. Ɔnyianle nwolɛ adenle kpole ɔzile ɛzonlenlɛ sua ɔmaanle ‘Gyihova, Yizilayɛ Nyamenle ne.’ (1 Arl. 8:20) Nyamenle nrɛlɛbɛ mɔɔ ɔvale ɔmaanle ye la ati, ɔliele duma. Bɛhɛlɛle edwɛkɛ mɔɔ ɔhanle mekɛ mɔɔ Nyamenle sunsum ne wɔ ɔ nwo zo la wɔ Baebolo mbuluku nsa anu. Nuhua ko a le Mrɛlɛbulɛ buluku ne.

3 Bɛha ahonle ne anwo edwɛkɛ kɛyɛ fane ɛya wɔ Mrɛlɛbulɛ buluku ne anu. Kɛ neazo la, yɛkenga ye wɔ Mrɛlɛbulɛ 4:23 kɛ: ‘Bɔ wɔ ahonle nwo bane tɛla debie biala mɔɔ ɛfa ɛsie la.’ Wɔ ngyɛnu ɛhye anu, edwɛkɛkpɔkɛ “ahonle” kile duzu? Yɛbabua kpuya zɔhane wɔ edwɛkɛ ɛhye anu. Eza yɛbazuzu kpuya gyɛne nwiɔ anwo: Kɛzi Seetan bɔ mɔdenle kɛ ɔsɛkye yɛ ahonle ne ɛ? Na duzu a yɛbayɛ yɛava yɛabɔ yɛ ahonle ne anwo bane a? Amaa yɛali nɔhalɛ yɛamaa Nyamenle la, ɔwɔ kɛ yɛte kpuya nwiɔ zɔhane mualɛ ne abo.

 ‘WƆ AHONLE’ A LE DUZU?

4-5. (a) Kɛzi Edwɛndolɛ 51:6 maa yɛte mɔɔ edwɛkɛkpɔkɛ “ahonle” kile la abo ɛ? (b) Kɛzi yɛbahola yɛava yɛ kpɔkɛdelɛ yɛayɛ kɛzi yɛde wɔ yɛ nu la anwo ndonwo ɛ?

4 Mrɛlɛbulɛ 4:23, edwɛkɛkpɔkɛ “ahonle” gyi ɛkɛ maa kɛzi awie de anzɛɛ “mɔɔ wɔ sonla nu” la. (Kenga Edwɛndolɛ 51:6.) Wɔ adenle fofolɛ zo, “ahonle” gyi ɛkɛ maa yɛ nzuzulɛ, yɛ nganeɛdelɛ, yɛ adwenle nee yɛ atiakunluwɔzo. Ɔkile kɛzi yɛde wɔ yɛ nu, na tɛ kɛzi menli nwu yɛ la.

5 Yɛbahola yɛava yɛ kpɔkɛdelɛ yɛayɛ kɛzi yɛde wɔ yɛ nu la anwo ndonwo. Mɔɔ limoa, amaa yɛanyia kpɔkɛdelɛ kpalɛ la, ɔwɔ kɛ yɛdi aleɛ kpalɛ na yɛkpundikpundi yɛ agbɔkɛ nu dahuu. Zɔhane ala a amaa yɛanyia sunsum nu kpɔkɛdelɛ kpalɛ la, ɔwɔ kɛ yɛdi sunsum nu aleɛ kpalɛ na yɛkile kɛ yɛlɛ Gyihova anu diedi dahuu a. Ɛhye kile kɛ yɛbava mɔɔ yɛsukoa la yɛayɛ gyima na yɛaha yɛ diedi ne anwo edwɛkɛ yɛahile awie mɔ. (Wlo. 10:8-10; Gye. 2:26) Mɔɔ tɔ zo nwiɔ, saa yɛnea kɛzi yɛde wɔ ɛnyelɛ zo la a, bie a yɛbadwenle kɛ yɛte kpɔkɛ, noko amuanrɛɛ ewule bie wɔ yɛ nu. Zɔhane ala a, ninyɛne ngakyile mɔɔ yɛyɛ ye wɔ yɛ ɛzonlenlɛ nu la ati, yɛbadwenle kɛ yɛ nwo yɛ se wɔ diedi ne anu a, noko bie a atiakunluwɔzo ɛtane ɛlɛsɔ ndinli wɔ yɛ nu. (1 Kɔl. 10:12; Gye. 1:14, 15) Ɔwɔ kɛ yɛkakye kɛ Seetan kulo kɛ yɛnyia ye adwenle ne bie. Kɛzi ɔbahola yeayɛ ɛhye ɛ? Na kɛzi yɛbahola yɛabɔ yɛ nwo bane ɛ?

KƐZI SEETAN BƆ MƆDENLE KƐ ƆSƐKYE YƐ AHONLE NE LA

6. Seetan bodane a le boni, na kɛzi ɔbɔ mɔdenle kɛ ɔbadwu nwo ɛ?

6 Seetan kulo kɛ yɛyɛ kɛ ɔdaye la​—atuadelɛnli mɔɔ ɔnli Gyihova ngyinlazo zo na ɔyɛ mɔɔ ɔkulo la. Seetan ɛnrɛhola ɛnrɛtinlitinli yɛ nwo zo kɛ yɛdwenle na yɛyɛ yɛ ninyɛne kɛ ɔdaye la. Ɔti, ɔbɔ mɔdenle kɛ ɔdua ndenle gyɛne zo yeadwu ye bodane nwo. Kɛ neazo la, ɔmaa menli mɔɔ yenyia bɛ nwo zo tumi dɛba la bɔ yɛ yia. (1 Dwɔn 5:19) Ɔ nye la kɛ yɛ nee bɛ badu, ɔnva nwo kɛ yɛze kɛ agɔnwolɛ ɛtane “sɛkye” yɛ adwenle nee yɛ nyɛleɛ la. (1 Kɔl. 15:33; ɔbdw.) Seetan luale adenle ɛhye  azo nyianle Belemgbunli Sɔlɔmɔn. Ɔgyale awozonle ɛzonlenlɛ mraalɛ dɔɔnwo na awieleɛ kolaa “ye mraalɛ ne mɔ hakyile ye adwenle” vile Gyihova anwo.​—1 Arl. 11:3.

Kɛ ɔkɛyɛ na wɔabɔ wɔ ahonle nwo bane wɔavi mɔdenle mɔɔ Seetan ɛlɛbɔ kɛ ɔsɛkye ye la anwo ɛ? (Nea ɛdendɛkpunli 7) *

7. Duzu bieko a Seetan dua zo maa menli nyia ye adwenle ne bie a, na duzu ati a ɔwɔ kɛ yɛnea boɛ wɔ nwo a?

7 Seetan dua sini nee tɛlevihyɛne gyimalilɛ zo maa menli dɔɔnwo nyia ye adwenle ne bie. Ɔze kɛ gyimalilɛ ɛhye mɔ anu edwɛkɛ ɛmmaa yɛ nye ɛnlie ala; ɔka kɛzi yɛdwenle, yɛte nganeɛ na yɛyɛ yɛ ninyɛne la. Gyisɛse vale ɛhye lile gyima kpalɛ wɔ ye ngilehilelɛ nu. Fa ye ndonwo mɔɔ fale Samɛleanli agɔnwolɛ kpalɛ ne yɛɛ kakula nrenyia ne mɔɔ hɔzɛkyele ye agyapadeɛ ne la kɛ neazo. (Mat. 13:34; Luku 10:29-37; 15:11-32) Noko, menli mɔɔ Seetan ɛzɛkye bɛ adwenle la, bahola aha edwɛkɛ azɛkye yɛ adwenle. Ɔwɔ kɛ yɛyɛ nyeyenu. Sini nee TV zo gyimalilɛ bahola amaa yɛ nye alie na yɛazukoa debie yɛavi nu mɔɔ ɔnzɛkye yɛ adwenle a. Noko ɔwɔ kɛ yɛnea boɛ. Saa yɛlɛkpa anyelielɛ ninyɛne a, ɔwɔ kɛ yɛbiza yɛ nwo kɛ, ‘Asoo sini anzɛɛ TV zo gyimalilɛ ɛhye ɛlɛkilehile me kɛ ɔle kpalɛ kɛ mebali me nwonane ne atiakunluwɔzo nzi ɔ?’ (Gal. 5:19-21; Ɛfɛ. 2:1-3) Saa ɛnwu kɛ gyimalilɛ bie ɛlɛda Seetan adwenle ali a, duzu a ɔwɔ kɛ ɛyɛ a? Kpo ye kɛ mɔɔ ɛkɛkpo ewulenzane la!

8. Kɛzi awovolɛ bahola aboa bɛ mra amaa bɛabɔ bɛ ahonle nwo bane ɛ?

8 Awovolɛ, bɛlɛ ɛzonlelilɛ titili kɛ bɛbabɔ bɛ mra nwo bane amaa Seetan anzɛkye bɛ ahonle. Ɔda ali kɛ, bɛbɔ mɔdenle kɛ bɛbabɔ bɛ mra nwo bane bɛavi anwodolɛ nwo. Bɛmaa bɛ awuke nu te, na bɛye debie biala mɔɔ bamaa bɛ mra ne mɔ anwo ado bɛ la bɛfi ɛkɛ. Zɔhane ala a, ɔwɔ kɛ bɛbɔ bɛ mra nwo bane bɛfi sini, TV zo gyimalilɛ, ɛlɛtɔlɔneke ninyɛne mɔɔ bɛfa bɛdi nwɔhoa yɛɛ yintanɛte zo gyimalilɛ ngakyile  mɔɔ da Seetan adwenle ali la anwo a. Gyihova ɛmaa bɛ tumi kɛ bɛboa bɛ mra bɛmaa bɛrayɛ Ɔ gɔnwo mɔ. (Mrɛ. 1:8; Ɛfɛ. 6:1, 4) Ɔti bɛmmasulo kɛ bɛbagyinla Baebolo ngyinlazo zo bɛali mɛla wɔ sua nu. Maa ɛ mra ne mɔ ɛnwu mɔɔ bɛkola bɛnea nee mɔɔ ɔnle kɛ bɛnea, na boa bɛ maa bɛde deɛmɔti wɔzi kpɔkɛ zɔhane la abo. (Mat. 5:37) Ngakula ne mɔ ɛlɛnyi a, boa bɛ maa bɛdabɛ mumua ne bɛva Gyihova ngyinlazo bɛzi mɔɔ le kpalɛ nee mɔɔ ɛnle kpalɛ la anwo kpɔkɛ. (Hib. 5:14) Akee kakye kɛ, ɛ mra ne mɔ bazukoa dɔɔnwo avi mɔɔ ɛka la anu, noko wɔ neazo baboa bɛ kpalɛ.​—Mɛla 6:6, 7; Wlo. 2:21.

9. Adwenle boni a Seetan ɛmaa yelie duma a, na duzu ati a esiane wɔ nu a?

9 Adenle bieko mɔɔ Seetan dua zo sɛkye yɛ ahonle la a le kɛ, ɔmaa yɛfa yɛ nwo yɛto sonla nrɛlɛbɛ zo yɛtɛla Gyihova. (Kɔl. 2:8) Suzu adwenle ko mɔɔ Seetan ɛmaa yelie duma la anwo​—ezukoa dɔɔnwo mɔɔ yɛbanyia la a anwo hyia kpalɛ wɔ ɛbɛlabɔlɛ nu a. Bie a menli mɔɔ lɛ adwenle ɛhye bie la banyia ezukoa dɔɔnwo anzɛɛ bɛnrɛnyia. Noko ye biala anu, ɔle esiane. Duzu ati ɔ? Ɔluakɛ ɔbamaa bɛava bɛ adwenle bɛazie ezukoa dɔɔnwo ɛkpondɛlɛ zo mɔɔ bɛnzuzu kɛzi ɔbaha bɛ kpɔkɛdelɛ, bɛ abusua anzɛɛ agɔnwolɛvalɛ mɔɔ bɛ nee Nyamenle lɛ la anwo a. (1 Tim. 6:10) Yɛ nye die kɛ yɛ anwuma Selɛ ne boa yɛ maa yɛnyia ezukoa nwo adwenle kpalɛ la.​—Nol. 7:12; Luku 12:15.

KƐ ƆKƐYƐ NA YƐABƆ YƐ AHONLE NWO BANE Ɛ?

Kɛ mɔɔ sinzavolɛma yɛɛ nlenkɛ sinzavolɛma yɛle ye wɔ tete ne la, ɔwɔ kɛ yɛmaa yɛ nye da ɛkɛ amaa Seetan anzɛkye yɛ ahonle (Nea ɛdendɛkpunli 10-11) *

10-11. (a) Duzu a ɔwɔ kɛ yɛyɛ amaa yɛabɔ yɛ nwo bane a? (b) Duzu a ɛnee sinzavolɛma yɛ ye wɔ tete ne a, na kɛzi yɛ adwenle ne le kɛ sinzavolɛ ɛ?

10 Saa yɛbahola yɛabɔ yɛ ahonle ne anwo bane a, ɔwɔ kɛ yɛnwu sɔnea ne na yɛbɔ yɛ nwo bane yɛfi nwolɛ ndɛndɛ. Edwɛkɛkpɔkɛ mɔɔ bɛhile ɔ bo kɛ ‘bɔ nwolɛ bane’ mɔɔ wɔ Mrɛlɛbulɛ 4:23 la maa yɛkakye gyima mɔɔ sinzavolɛ yɛ la. Wɔ Belemgbunli Sɔlɔmɔn mekɛ zo, ɛnee sinzavolɛma gyinla sua ne bane ne ati zo na saa bɛnwu kɛ esiane bie ɛlɛba a, bɛabɔ sua ne azo amra amaneɛ ndɛndɛ. Ɛhye maa yɛnwu mɔɔ ɔwɔ kɛ yɛyɛ amaa yɛazi Seetan adenle na yeanzɛkye yɛ adwenle la.

11 Wɔ tete ne, ɛnee sinzavolɛma nee anlenkɛ sinzavolɛma yɛ gyima bɔ nu. (2 Sa. 18:24-26) Bɛyɛ gyima bɛbɔ nu bɛbɔ suakpole ne anwo bane, saa kpɔvolɛ ɛlɛba a, bɛnea kɛ bɛtoto suakpole ne anlenkɛ ne anu. (Nih. 7:1-3) Yɛ adwenle * ne mɔɔ yɛva Baebolo ne yɛtete ye la bahola ayɛ kɛ sinzavolɛ mɔɔ bɔ yɛ kɔkɔ wɔ mekɛ mɔɔ Seetan ɛlɛbɔ mɔdenle kɛ ɔba yɛ ahonle ne anwo la​—wɔ adenle fofolɛ zo, saa ɔlɛnyia yɛ adwenle, yɛ nganeɛdelɛ nee yɛ nzuzulɛ zo tumi a. Saa yɛ adwenle ne bɔ yɛ kɔkɔ a, ɔwɔ kɛ yɛtie na yɛto yɛ sɛkɛlɛneɛ adenle zo anlenkɛ ne anu.

12-13. Duzu a bɛbabɔ mɔdenle kɛ bɛmaa yɛayɛ a, noko kɛzi ɔwɔ kɛ yɛyɛ yɛ nyɛleɛ ɛ?

12 Suzu neazo bie mɔɔ fale kɛzi yɛbahola yɛabɔ yɛ nwo bane amaa yɛannyia Seetan adwenle ne bie la anwo. Gyihova ɛhilehile yɛ kɛ yɛmmabɔ ‘adwɔmane ɛbɛla nee nyɛleɛ evinli biala azo wɔ yɛ avinli bɔbɔ.’ (Ɛfɛ. 5:3) Noko saa yɛ gɔnwo mɔ sukuluma anzɛɛ gyimayɛvoma bɔ ɔ bo  kɛ bɛka nla nwo edwɛkɛ a, duzu a yɛbayɛ a? Yɛze kɛ ɔwɔ kɛ “yɛkpo ɛbɛlatane nee ewiade atiakunluwɔzo.” (Tae. 2:12) Yɛ sɛkɛlɛneɛ adenle zo sinzavolɛ ne mɔɔ le yɛ adwenle ne la babɔ yɛ kɔkɔ. (Wlo. 2:15) Asoo yɛbadie ye? Bie a yɛbadie bɛ anzɛɛ yɛbanlea nvoninli mɔɔ bɛlɛnea la bie. Noko mekɛ ɛhye a ɔwɔ kɛ yɛto anlenkɛ ne anu a, ɔlua adawu ne mɔɔ yɛbahakyi ye anzɛɛ yɛbavi ɛkɛ la azo.

13 Ɔhyia akɛnrasesebɛ amaa yɛakpo atipɛnema ngyegyelɛ na yɛannyia adwenle ɛtane anzɛɛ yɛanyɛ mɔɔ ɛnle kpalɛ la. Yɛlɛ anwodozo kɛ Gyihova ze mɔdenle mɔɔ yɛbɔ la na ɔbamaa yɛ anwosesebɛ nee nrɛlɛbɛ mɔɔ yɛhyia la amaa yɛakpo Seetan adwenle. (2 Ek. 16:9; Aye. 40:29; Gye. 1:5) Noko kɛ ɔkɛyɛ na yɛahɔ zo yɛayɛ biala mɔɔ yɛbahola la yɛabɔ yɛ ahonle nwo bane ɛ?

MAA Ɛ NYE ƐLA ƐKƐ

14-15. (a) Ɔwɔ kɛ yɛbuke yɛ ahonle nu yɛmaa duzu, na kɛzi yɛbayɛ ye ɛ? (b) Kɛzi Mrɛlɛbulɛ 4:20-22 boa maa yɛnyia yɛ Baebolo ɛgengalɛ zo nvasoɛ kpalɛ ɛ? (Eza nea ɛlɛka “ Kɛzi Bɛdwenledwenle Edwɛkɛ Nwo La.”)

14 Amaa yɛabɔ yɛ ahonle nwo bane la, tɛ ninyɛne ɛtane ala a ɔwɔ kɛ yɛkpo a, eza ɔwɔ kɛ yɛdie ninyɛne mgbalɛ yɛto nu. Dwenle suakpole mɔɔ bɛdo nwolɛ bane la neazo ne anwo bieko. Suakpole ne nlenkɛ sinzavolɛ ne to anlenkɛ ne anu amaa agbɔvolɛ anwolo nu, noko ɔyɛ a, ɔbuke ɔmaa bɛfa aleɛ nee ninyɛne gyɛne bɛwolo nu. Saa bɛambuke anlenkɛ ne fee a, ɛhɔne bahu sua ne azo amra. Zɔhane ala a ɔwɔ kɛ yɛta yɛbuke yɛ ahonle nu amaa Nyamenle adwenle anyia yɛ nwo zo tumi a.

15 Gyihova adwenle wɔ Baebolo ne anu, ɔti saa yɛkenga a, yɛmaa Gyihova adwenle nyia yɛ nzuzulɛ, yɛ nganeɛdelɛ nee yɛ nyɛleɛ zo tumi. Kɛ ɔkɛyɛ na yɛanyia yɛ Baebolo ɛgengalɛ zo nvasoɛ kpalɛ ɛ? Asɔneyɛlɛ nwo hyia. Adiema raalɛ ko ka kɛ: “Kolaa na meagenga Baebolo ne la, meyɛ asɔne kɛ Gyihova ɛboa me ɔmaa ‘menwu nwanwane ninyɛne’ mɔɔ wɔ ye Edwɛkɛ ne anu la.” (Edw. 119:18) Eza ɔwɔ kɛ yɛdwenledwenle mɔɔ yɛkenga la anwo. Saa yɛyɛ asɔne, yɛkenga Nyamenle Edwɛkɛ ne na yɛdwenledwenle nwo a, ɔdwu yɛ “ahonle nu” na ɔmaa yɛ nye die Nyamenle adwenle ne anwo.​—Kenga Mrɛlɛbulɛ 4:20-22; Edw. 119:97.

16. Kɛzi menli dɔɔnwo ɛnyia JW Broadcasting ne azo nvasoɛ ɛ?

16 Adenle bieko mɔɔ yɛbahola yɛalua zo yɛamaa Nyamenle adwenle anyia yɛ nwo zo tumi la a le kɛ yɛbanlea ninyɛne mɔɔ wɔ JW Broadcasting® azo la. Agyalɛma bie ka kɛ, “Gyihova ɛlua siane biala gyimalilɛ ne azo ɛbua yɛ asɔneyɛlɛ! Saa yɛlɛdi alɔbɔlɛ anzɛɛ yɛ nwo yɛ yɛ koonwu a, gyimalilɛ ne maa yɛnyia anwosesebɛ. Yɛta yɛbɔ edwɛne ne mɔ mɔɔ wɔ nu la wɔ sua nu. Saa yɛlɛto aleɛ o, yɛlɛsiezie sua nu o, debie ekyi biala bɔbɔ mɔɔ yɛlɛyɛ la ɛnee edwɛne ne gyi zo.” Gyimalilɛ ɛhye mɔ boa yɛ maa yɛbɔ yɛ ahonle ne anwo bane. Bɛboa bɛmaa yɛdwenle kɛ Gyihova la na yɛkpo Seetan adwenle.

17-18. (a) Kɛ mɔɔ 1 Arelemgbunli 8:61 kile la, saa yɛfa mɔɔ Gyihova kilehile yɛ la yɛyɛ gyima a, duzu a si a? (b) Duzu a yɛsukoa yɛfi Belemgbunli Hɛzikaya neazo ne anu a? (d) Kɛ mɔɔ Devidi asɔneyɛlɛ mɔɔ wɔ Edwɛndolɛ 139:23, 24 kile la, duzu a yɛbahola yɛayɛ nwolɛ asɔne a?

17 Saa yɛyɛ mɔɔ le kpalɛ na yɛnwu nvasoɛ mɔɔ wɔ zo la a, ɔmaa yɛ diedi nu mia. (Gye. 1:2, 3) Yɛ nye die ɔluakɛ yɛmaa Gyihova ɛli fɛlɛko kɛ amgba ɔ mra a le yɛ,  na ɔmaa yɛnyia ɛhulolɛ kɛ yɛhɔ zo yɛyɛ mɔɔ ɔ nye die nwo la. (Mrɛ. 27:11) Sɔnea biala maa yɛnyia adenle yɛkile kɛ ɛzonlenlɛ mɔɔ yɛlɛfa yɛamaa yɛ Ze ne mɔɔ dwenle yɛ nwo la ɛnle nabalaba. (Edw. 119:113) Emomu, yɛkile kɛ yɛfa yɛ ahonle muala, ahonle mɔɔ ɛziezie ɔ nwo kɛ ɔbali ye mɛla ne mɔ azo na yeayɛ ye ɛhulolɛdeɛ la yɛsonle ye.​—Kenga 1 Arelemgbunli 8:61.

18 Asoo yɛbayɛ nvonleɛ? Ɛhɛe; yɛnli munli. Saa yɛtɔ aze a, bɛmaa yɛhakye Belemgbunli Hɛzikaya neazo ne. Ɔyɛle nvonleɛ. Noko ɔnlunle ɔ nwo na ɔhɔle zo ‘ɔyeyele ye ahonle nu ɔzonlenle Gyihova.’ (Aye. 38:3-6; 2 Ek. 29:1, 2; 32:25, 26) Ɔti bɛmaa yɛkpo Seetan mɔɔ ɔkulo kɛ ɔsɛkye yɛ adwenle ne la. Bɛmaa yɛyɛ asɔne amaa yɛanyia “ahonle mɔɔ yɛ tieyɛ” la. (1 Arl. 3:9; kenga Edwɛndolɛ 139:23, 24.) Saa yɛbɔ yɛ ahonle ne anwo bane yɛtɛla debie biala a, yɛbahola yɛali nɔhalɛ yɛamaa Gyihova.

EDWƐNE 54 “Adenle Ne Ɛne”

^ ɛden. 5 Yɛbahɔ zo yɛali nɔhalɛ yɛamaa Gyihova anzɛɛ yɛbamaa Seetan ahwe yɛ avi yɛ Nyamenle ne anwo? Mualɛ ne ɛngyi sɔnea mɔɔ anu yɛ se mɔɔ yɛbayia ye la azo emomu, ɔgyi kɛzi yɛbɔ yɛ ahonle ne anwo bane la azo. Edwɛkɛkpɔkɛ “ahonle” kile duzu? Kɛzi Seetan bɔ mɔdenle kɛ ɔsɛkye yɛ ahonle ne ɛ? Na kɛzi yɛbabɔ nwolɛ bane ɛ? Edwɛkɛ ɛhye babua kpuya ɛhye mɔ mɔɔ anwo hyia la.

^ ɛden. 11 EDWƐKƐ MƆƆ BƐHILEHILE NU: Gyihova ɛbɔ yɛ mɔɔ yɛkola yɛneɛnlea yɛ adwenle, yɛ nganeɛdelɛ nee yɛ nyɛleɛ nu na yɛbua yɛ nwo ndɛne a. Baebolo ne fɛlɛ tumi zɔhane kɛ adwenle. (Wlo. 2:15; 9:1) Adwenle mɔɔ bɛva Baebolo ne bɛtete ye la a le mɔɔ fa Gyihova ngyinlazo mɔɔ wɔ Baebolo ne anu la ɔsi ninyɛne mɔɔ yɛdwenle nwo, yɛyɛ anzɛɛ yɛka la anwo kpɔkɛ kɛ ɔle kpalɛ anzɛɛ ɔnle kpalɛ.

^ ɛden. 56 NVONINLI NWO EDWƐKƐ: Adiema nrenyia mɔɔ bɛzɔne ye la ɛlɛnea TV na nla nwo ɛbɛlatane ɛvinde zo. Ɔwɔ kɛ ɔsi mɔɔ ɔbayɛ la anwo kpɔkɛ.

^ ɛden. 58 NVONINLI NWO EDWƐKƐ: Sinzavolɛ bie ɛnwu esiane wɔ suakpole ne bane ne anzi. Ɔlɛtea nu yeabɔ nlenkɛ sinzavolɛma mɔɔ wɔ aze la amaneɛ, na bɛtoto suakpole ne nlenkɛ ne mɔ anu ndɛndɛ.