Wulu kɔ nuhua edwɛkɛ ne azo

Wulu kɔ nuninyɛne ne azo

Anyelielɛ​—Subane Mɔɔ Yɛnyia Yɛfi Nyamenle Ɛkɛ

Anyelielɛ​—Subane Mɔɔ Yɛnyia Yɛfi Nyamenle Ɛkɛ

MENLI kulo kɛ bɛ nye die. Noko wɔ awieleɛ mekɛ ɛhye anu, awie biala yia sɔnea “mɔɔ anu yɛ se.” (2 Tim. 3:1) Nzisi, anwodolɛ, gyima mɔɔ bɛnyia ye bɛnyɛ, alɔbɔlɛlilɛ nee ninyɛne gyɛne mɔɔ maa bɛdi nyane na bɛdwenle la bahola azɛkye bie mɔ anyelielɛ ngyikyingyikyi. Nyamenle azonvolɛ bɔbɔ asa nu bahola ado na bɛ anyelielɛ awie. Saa ɛhye bie ɛdo wɔ a, kɛ ɔkɛyɛ na ɛ nye alie bieko ɛ?

Amaa yɛabua kpuya zɔhane la, ɔwɔ kɛ yɛdimoa yɛte mɔɔ nɔhalɛ anyelielɛ kile la abo nee kɛzi awie mɔ ɛmaa bɛ nye ɛhɔ zo ɛlie ɔnva nwo kɛ bɛyia sɔnea la. Akee yɛbanwu mɔɔ yɛyɛ a yɛ anyelielɛ ɛnrɛzɛkye na bɔbɔ yeayɛ kpole la.

DUZU A LE ANYELIELƐ?

Anyelielɛ nee yɛ nyunlu mɔɔ yɛyɛ ye monvoo la ɛnle debie ko. Fa ɛhye kɛ neazo: Saa awie no nza dɔɔnwo na ɔbo a, ɔmaa ɔka ɛzelekɛ. Noko, saa ɔ nye zo tete ye a, ɔnzele bieko, na bie a ɔnwu kɛ alɔbɔlɛ mɔɔ ɛnee ɔlɛdi nee ngyegyelɛ ne tɛbɔ ɛkɛ. Ɛzelekɛ ekyi ne ɛngile kɛ ɔlɛ nɔhalɛ anyelielɛ.​—Mrɛ. 14:13.

Noko, anyelielɛ le subane mɔɔ vi ahonle nu. Bɛhilehile nu kɛ “debie kpalɛ mɔɔ yɛnyia anzɛɛ yɛ nye la zo la a maa yɛnyia zɔhane nganeɛdelɛ ne a.” Anyelielɛ le tɛnlabelɛ mɔɔ maa awie kɔ zo di fɛlɛko ɔnva nwo kɛ ɔ nwo ɛhyele ye anzɛɛ ɔ nwo ɛtɛkyelele ye la. (1 Tɛs. 1:6) Nɔhalɛ nu, debie bie bahola agyegye awie, noko mekɛ ko ne ala yeanyia anyelielɛ. Kɛ neazo la, bɛbilale ɛzoanvolɛma ne kɛ bɛhanle Kelaese anwo edwɛkɛ la. Noko, “bɛvale fɛlɛkolilɛ bɛvile Sanhedelin ne anyunlu ɛkɛ bɛhɔle, ɔluakɛ bɛbule bɛ kɛ ye duma ne ati ɔfɛta kɛ bɛgua bɛ nyunlu aze.” (Gyi. 5:41) Nɔhalɛ nu, tɛ ɛbilalɛ mɔɔ bɛbilale bɛ la a maanle bɛ nye liele a. Emomu, bɛ nye liele ɔluakɛ ɛnee bɛlɛdi nɔhalɛ bɛamaa Nyamenle kɛ ye azonvolɛ.

Bɛanva anyelielɛ ɛhye bɛanwo yɛ; yɛɛ ɔmba mgbane. Duzu ati ɔ? Ɔluakɛ nɔhalɛ anyelielɛ le Nyamenle sunsum nwuanzanwuanza ne ma. Nyamenle sunsum ne kola boa yɛ maa yɛnyia “subane fofolɛ ne” mɔɔ anyelielɛ boka nwo la. (Ɛfɛ. 4:24; Gal. 5:22) Saa yɛnyia anyelielɛ a, ɔbamaa yɛahola yɛagyinla ɛbɛlabɔlɛ nu ngyegyelɛ nloa kpalɛ.

NEAZO NGAKYILE MƆƆ YƐKULO KƐ YƐSUKOA

Gyihova bodane a le kɛ ɔmaa ninyɛne mgbalɛ ahɔ zo wɔ azɛlɛ ye azo, tɛ ninyɛne mɔɔ ɛnle kpalɛ mɔɔ yɛnwu ye ɛnɛ la. Noko, ninyɛndane mɔɔ awie mɔ yɛ la ɛnzɛkye Gyihova anyelielɛ. Nyamenle Edwɛkɛ ne ka kɛ: “Tumi nee anyelielɛ ɛyi ye Ɛzonlenlɛ Sua ne.” (1 Ek. 16:27) Bieko, ninyɛne mgbalɛ mɔɔ ye azonvolɛ yɛ la maa ‘Gyihova anye die.’​—Mrɛ. 27:11.

Saa ninyɛne angɔ boɛ kɛ mɔɔ yɛkpondɛ la a ɔnle kɛ yɛmaa ɔgyegye yɛ yɛfa yɛsukoa Gyihova. Amaa yɛ anyelielɛ anzɛkye la, yɛbahola yɛava yɛ adwenle yɛazie ninyɛne mgbalɛ mɔɔ yɛlɛ ye ɛnɛ la azo na yɛahendɛ ninyɛne mgbalɛ mɔɔ bara kenle bie la. *

 Menli mɔɔ maanle bɛ nye liele wɔ mekɛ mɔɔ ɛnee bɛlɛyia ngyegyelɛ la anwo neazo dɔɔnwo wɔ Baebolo ne anu. Ebileham gyinlanle tɛnlabelɛ mɔɔ vale ye ngoane dole esiane nu nee ngyegyelɛ mɔɔ awie mɔ vale rale ɔ nwo zo la anloa. (Mɔl. 12:10-20; 14:8-16; 16:4, 5; 20:1-18; 21:8, 9) Ɔnva nwo ngyegyelɛ mɔɔ Ebileham yiale la, ɔmaanle ɔ nye liele wɔ ye ahonle nu. Adenle boni azo? Ɔhakyele anyelazo mɔɔ ɔlɛ kɛ ɔbadɛnla ewiade fofolɛ nu wɔ Mɛzaya ne tumililɛ bo la. (Mɔl. 22:15-18; Hib. 11:10) Gyisɛse hanle kɛ: “Bɛ ze Ebileham lile fɛlɛko kpole kɛ ɔkɛnwu me mekɛ ne.” (Dwɔn 8:56) Yɛbahola yɛazukoa Ebileham ɔlua ninyɛne mɔɔ bamaa yɛ nye alie kenle bie mɔɔ yɛbadwenle nwo la azo.​—Wlo. 8:21.

Ɛzoanvolɛ Pɔɔlo nee ɔ gɔnwo Saelase vale bɛ adwenle ziele Nyamenle ɛwɔkɛ ne mɔ azo kɛ Ebileham la. Bɛnyianle diedi kpole, yɛɛ bɛmaanle bɛ nye liele ɔnva nwo kɛ bɛyiale ngyegyelɛ la. Kɛ neazo la, mɔɔ bɛbilale bɛ kpalɛ bɛwiele na bɛguale bɛ efiade “kɛyɛ nɔɔzo bulu nee nwiɔ [la], ɛnee [bɛlɛyɛ] asɔne na bɛlɛto edwɛne bɛaye Nyamenle ayɛlɛ.” (Gyi. 16:23-25) Anyelazo mɔɔ ɛnee Pɔɔlo nee Saelase lɛ la maanle bɛ anwosesebɛ, eza bɛ nye liele ɔluakɛ Kelaese duma ne ati a ɛnee bɛlɛnwu amaneɛ a. Yɛbahola yɛazukoa Pɔɔlo nee Saelase ɔlua ninyɛne mgbalɛ mɔɔ yɛsonle Nyamenle nɔhalɛ nu a ɔfi nu ɔba mɔɔ yɛbadwenle nwo la azo.​—Fel. 1:12-14.

Ɛnɛ, yɛlɛ mediema mɔɔ maanle bɛ nye liele wɔ sɔnea nu la anwo neazo ngɛnlɛma dɔɔnwo. Kɛ neazo la, wɔ November 2013, ahumuakyima bie mɔɔ bɛfɛlɛ ye Super Typhoon Haiyan dule wɔ Philippines na ɔzɛkyele Alasevolɛ mbusua mɔɔ bo 1,000 la azua. George mɔɔ ye sua wɔ suakpole Tacloban azo zɛkyele bɔkɔɔ la hanle kɛ: “Ɔnva nwo mɔɔ zile la, mediema ne mɔ anye die. Ɔyɛ se kɛ mebaha kɛzi yɛ nye ɛlie la.” Mekɛ biala mɔɔ yɛbayia ngyegyelɛ kpole la, yɛdwenledwenle mɔɔ Gyihova ɛyɛ ɛmaa yɛ la anwo a, ɔbamaa yɛ nye alie dahuu. Duzu bieko a Gyihova ɛyɛ ɛmaa yɛ mɔɔ ɔti ɔwɔ kɛ yɛmaa yɛ nye die a?

DEƐMƆTI YƐ NYE DIE LA

Debie mɔɔ maa yɛ nye die kpalɛ la a le agɔnwolɛvalɛ mɔɔ yɛ nee Nyamenle lɛ la. Dwenle nwolɛ nea: Yɛze Anwuma Nee Aze Belemgbunli ne. Ɔle yɛ Ze, yɛ Nyamenle nee yɛ Gɔnwo!​—Edw. 71:17, 18.

Eza yɛ nye sɔ ngoane ahyɛlɛdeɛ ne mɔɔ yɛlɛ la. (Nol. 3:12, 13) Kɛ abɔdeɛ mɔɔ yɛze nrɛlɛbɛ mɔɔ Gyihova ɛhwe yɛ ɛbikye ɔ nwo la, yɛze mɔɔ Nyamenle kulo kɛ yɛyɛ la. (Kɔl. 1:9, 10) Ɔti, yɛlɛ bodane nee adehilelɛ kpalɛ wɔ yɛ ɛbɛlabɔlɛ nu. Noko alesama dɔɔnwo ɛnlɛ bodane kpalɛ wɔ ɛbɛlabɔlɛ nu. Pɔɔlo kilehile ngakyile mɔɔ wɔ edwɛkɛ ɛhye anu la, ɔhɛlɛle kɛ: “‘Ninyɛne mɔɔ Nyamenle ɛziezie ɛmaa bɛdabɛ mɔɔ bɛkulo ye la, ɛnyelɛ ɛtɛnwunle ye yɛɛ ɛnzolɛ ɛtɛtele yɛɛ awie biala ɛtɛdwenlenle nwolɛ.’ Na yɛdayɛ a Nyamenle ɛlua ye sunsum ne azo ɛye ɛhile yɛ a.” (1 Kɔl. 2:9, 10) Asoo yɛ nye ɛnlie kɛ yɛde Gyihova ɛhulolɛdeɛ nee ye bodane ne abo ɔ?

Suzu debie bieko mɔɔ Gyihova ɛyɛ ɛmaa ye menli la anwo. Asoo yɛ nye ɛnlie kɛ bɛkola bɛfa yɛ ɛtane bɛkyɛ yɛ ɔ? (1 Dwɔn 2:12) Nyamenle anwunvɔnezelɛ ne ati, yɛlɛ anyelazo kɛ ɔnrɛhyɛ ewiade fofolɛ bara. (Wlo. 12:12) Kɛkala bɔbɔ, Gyihova ɛmaa yɛnyia mediema azonvolɛ mɔɔ koyɛlɛ wɔ yɛ avinli. (Edw. 133:1) Nyamenle Edwɛkɛ ne ɛmaa yɛnwu kɛ Gyihova bɔ ye menli nwo bane fi Seetan nee ye mbɔnsam ne mɔ anwo. (Edw. 91:11) Saa yɛdwenledwenle nyilalɛ ɛhye mɔ kɔsɔɔti mɔɔ vi Nyamenle ɛkɛ la anwo a, yɛbanwu kɛ yɛ anyelielɛ ne ɛlɛyɛ kpole.​—Fel. 4:4.

KƐ ƆKƐYƐ NA Ɛ NYE ALIE KPALƐ LA

Kilisienenli mɔɔ anye die la bahola amaa ye anyelielɛ ne ayɛ kpole ɔ? Gyisɛse hanle kɛ: “Meha ɛhye mehile bɛ amaa bɛanyia me anyelielɛ ne bie na bɛ anyelielɛ ne ali munli.” (Dwɔn 15:11) Asoo ɛhye ɛngile kɛ yɛ anyelielɛ  ne kola yɛ kpole ɔ? Ɛbahola wɔava mɔdenle mɔɔ ɛbabɔ kɛ ɛmaa wɔ anyelielɛ ayɛ kpole la wɔatoto senle mɔɔ ɛfa ɛyɛne wɔawula nu la anwo. Ɔwɔ kɛ ɛfa ɛyɛne ɛwula nu amaa yeazɔ kpole. Zɔhane ala a ɔwɔ kɛ ɛsukoa debie dɔɔnwo amaa wɔ anyelielɛ ne ayɛ kpole a. Kakye kɛ: Nyamenle sunsum ne a maa anyelielɛ yɛ kpole a. Ɔti, saa ɛsɛlɛ Gyihova dahuu kɛ ɔva ye sunsum ne ɔboa wɔ na ɛdua asɔneyɛlɛ zo ɛdwenledwenle ye Edwɛkɛ ne anwo a wɔ anyelielɛ bayɛ kpole.​—Edw. 1:1, 2; Luku 11:13.

Eza saa ɛbɔ mɔdenle ɛyɛ gyima mɔɔ sɔ Gyihova anye a wɔ anyelielɛ ne bayɛ kpole. (Edw. 35:27; 112:1) Duzu ati ɔ? Ɔluakɛ bɛbɔle yɛ kɛ ‘yɛzulo nɔhalɛ Nyamenle ne, na yɛli ye mɛla ne mɔ azo, ɔboalekɛ sonla gyima mɔɔ la ɔ nwo zo la ala ɛne.’ (Nol. 12:13) Wɔ adenle fofolɛ zo bɛbɔle yɛ kɛ yɛyɛ Nyamenle ɛhulolɛdeɛ. Ɔti, saa yɛsonle Gyihova a, ɔmaa yɛ nye die kpalɛ wɔ ɛbɛlabɔlɛ nu. *

NVASOƐ MƆƆ WƆ ANYELIELƐ ZO LA

Mekɛ mɔɔ yɛlɛnyia anyelielɛ mɔɔ vi Nyamenle ɛkɛ la, yɛbanyia nvasoɛ mɔɔ tɛla nganeɛ mɔɔ yɛte wɔ yɛ nu la. Kɛ neazo la, yɛ anwuma Selɛ ne anye balie yɛ nwo kpalɛ wɔ mekɛ mɔɔ yɛlɛfa anyelielɛ yɛahɔ zo yɛazonle ye ɔnva nwo ngyegyelɛ biala mɔɔ yɛbayia la. (Mɛla 16:15; 1 Tɛs. 5:16-18) Bieko, nɔhalɛ anyelielɛ bamaa yɛakpo anwonyia ɛhulolɛ na yɛabɔ mɔdenle kɛ yɛbabɔ afɔle mgbole ɔlua Nyamenle Belemgbunlililɛ ne ati. (Mat. 13:44) Saa yɛnwu ninyɛne mgbalɛ mɔɔ bavi ɛhye anu ara la a, yɛ anyelielɛ ne bayɛ kpole, yɛbade nganeɛ kɛ yɛlɛbɔ mɔdenle na ɔbamaa awie mɔ noko anye alie.​—Gyi. 20:35; Fel. 1:3-5.

“Saa ɛlɛ anyelielɛ nee ahunlundwolɛ wɔ ɛbɛlabɔlɛ nu kɛkala a, ɔbamaa wɔanyia kpɔkɛdelɛ kpalɛ kenle bie.” Mɔɔ neɛnleanuyɛlɛnli bie mɔɔ wɔ Nebraska Yunivɛsiti ne mɔɔ wɔ United States la hɛlɛle wɔ mekɛ mɔɔ ɔziale ɔzukoale kpɔkɛdelɛ nwo debie la ɛne. Ɛhye nee mɔɔ Baebolo ne ka la yia, ɔse: “Ɛzelekɛ le ayile kpalɛ.” (Mrɛ. 17:22) Nɔhalɛ nu, saa ɛmaa wɔ anyelielɛ ne yɛ kpole a, ɔbamaa wɔanyia kpɔkɛdelɛ kpalɛ.

Ɔti, ɔnva nwo kɛ yɛde ngyegyelɛ mekɛ nu la, yɛbahola yɛanyia nɔhalɛ anyelielɛ mɔɔ ɛnwie la wɔ mekɛ mɔɔ yɛlɛnyia sunsum nwuanzanwuanza ne ɔlua asɔneyɛlɛ, debiezukoalɛ nee Gyihova Edwɛkɛ ne mɔɔ yɛbadwenledwenle nwo la azo. Eza saa yɛdwenledwenle nyilalɛ mɔɔ yɛnyia ye ɛnɛ la anwo, yɛsukoa awie mɔ diedi na yɛyɛ Nyamenle ɛhulolɛdeɛ a, yɛ anyelielɛ ne bayɛ kpole. Wɔ ndenle ɛhye mɔ amuala anu, yɛbahola yɛava yɛ nwo yɛado nɔhalɛ edwɛkɛ mɔɔ wɔ Edwɛndolɛ 64:10 la azo, ɔse: “[Gyihova] ati bɛmaa tenlenema anye ɛlie, na bɛvea ye nu!”

^ ɛden. 10 Yɛbazuzu abotane nwo wɔ edwɛkɛ mɔɔ bara kenle bie wɔ edwɛkɛ ɛhye mɔɔ badoɔdoa zo mɔɔ bɛbahilehile “sunsum ne ma” ne anu la anwo.

^ ɛden. 20 Saa ɛkpondɛ ndenle bieko mɔɔ bamaa wɔ anyelielɛ ayɛ kpole a, nea ɛlɛka “Ndenle Gyɛne Mɔɔ Bamaa Wɔ Anyelielɛ Ayɛ Kpole La.”