Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Gyihova Kola Yɛ Debie Biala

Gyihova Kola Yɛ Debie Biala

“EWULE bavi ɛkɛ yɛɛ bɛbadwazo mowuamra bɔbɔ bara ngoane nu bieko.” Me ye Mairambubu dele edwɛkɛ ɛhye wɔ mekɛ mɔɔ ɔde kale nu ɔlɛtu adenle la. Edwɛkɛ ne yɛle ye fɛ, na ɛnee ɔkulo kɛ ɔsukoa dɔɔnwo. Mɔɔ kale ne gyinlanle na adendulɛma ne dwule aze la, ɔdoale raalɛ ne mɔɔ hanle zɔhane edwɛkɛ ne la. Ɛnee bɛfɛlɛ ye Apun Mambetsadykova, na ɔle Gyihova Dasevolɛ. Mekɛ zɔhane ɛnee ɔyɛ ɛzulolɛ kɛ ɛ nee Alasevolɛ ne mɔ badendɛ, noko mɔɔ nzinlii yɛzukoale yɛvile Apun ɛkɛ ne la hakyile yɛ ɛbɛlabɔlɛ.

YƐYƐLE GYIMA ALEƐBAHYE TOO ALEDWOLƐ

Bɛwole me 1937 wɔ kolkhoz, anzɛɛ arane ɛya nu mɔɔ bikye Tokmok, Kyrgyzstan la. Yɛle Kyrgyzma, na Kyrgyz aneɛ ne a yɛka a. Me awovolɛ le ɛya nu gyimayɛvoma, na ɛnee bɛyɛ gyima wɔ (kolkhoz) ɛya bie anu ɔvi aleɛbahye too aledwolɛ. Ɛnee bɛmaa gyimayɛvoma ne aleɛ dahuu, noko ɛnee ɛvolɛ biala a bɛtua bɛ kakɛ a. Me mame bɔle mɔdenle nleanle me nee me diema raalɛ ekyii ne. Mɔɔ mengɔle sukulu ɛvolɛ nnu pɛ la anzi, medame noko membɔle ɔ bo kɛ mefa me mekɛ kɔsɔɔti meayɛ gyima wɔ ɛya ne anu.

Teskey Ala-Too awoka ne

Bɛdi ehyia wɔ ɛleka mɔɔ ɛnee mede la na ɛnee ɔwɔ kɛ ɛyɛ gyima ɛsesebɛ na wɔahola wɔanlea ɛ nwo. Kɛ kpavolɛ la, meandwenle deɛmɔti yɛwɔ ɛke anzɛɛ kenle bie anwo kpalɛ. Meandwenle nwolɛ ɛlɛ kɛ nɔhalɛ mɔɔ fale Gyihova Nyamenle nee ye bodane nwo la bahakyi me ɛbɛlabɔlɛ. Kɛzi zɔhane edwɛkɛ ne dwule Kyrgyzstan na ɔdɛlɛle la yɛ azibɛnwo. Ɔ muala bɔle ɔ bo wɔ me sua zo Kyrgyzstan sɔlɔ.

MENLI MƆƆ BƐGUALE BƐ EFIADE LA VALE NƆHALƐ NE RALE KYRGYZSTAN

Gyihova Nyamenle anwo nɔhalɛ ne zɔle ndinli wɔ Kyrgyzstan wɔ 1950 anu. Amaa bɛayɛ ɛhye la ɛnee ɔwɔ kɛ bɛkilehile menli nɔhalɛ ne. Duzu ati ɔ? Mɔɔ ɛnɛ bɛfɛlɛ ye Kyrgyzstan la ɛnee boka Union of Soviet Socialist Republics (USSR) anwo. Gyihova Alasevolɛ mɔɔ wɔ USSR amuala la angyinla afoa biala wɔ maanyɛlɛ edwɛkɛ nu. (Dwɔn 18:36) Ɔti, Komunis arane ne kpɔle bɛ kɛ bɛle agbɔvolɛ. Noko, ewiade nrɛlɛbɛ biala angola  anzi ahonlekpalɛma adenle kɛ bɛkɛde Nyamenle Edwɛkɛ ne. Nɔhalɛ nu, ɛzukoalɛdeɛ ko mɔɔ menyia mɔɔ anwo hyia la a le kɛ, Gyihova “kola yɛ debie biala.”​—Maake 10:27.

Emil Yantzen

Gyihova Alasevolɛ mɔɔ bɛkpɔle bɛ la maanle bɛ nwo razonle wɔ Kyrgyzstan. Duzu ati ɔ? Siberia boka USSR ne anwo, na ɛkɛ ne a bɛ nee agbɔvolɛ mɔɔ wɔ Maanle ne anu la kɔ a. Mɔɔ bɛgyakyile menli mɔɔ bɛguale bɛ efiade la, bɛ nuhua dɔɔnwo vale nɔhalɛ ne rale Kyrgyzstan. Bɛ nuhua ko a le Emil Yantzen mɔɔ bɛwole ye wɔ Kyrgyzstan wɔ 1919 la. Bɛdole Emil efiade bɛmaanle ɔyɛle gyima ɛsesebɛ, na ɔyiale Alasevolɛ ne mɔ wɔ ɛkɛ. Ɔvale nɔhalɛ ne na ɔziale ɔrale ye sua zo wɔ 1956. Emil radɛnlanle Sokuluk mɔɔ bikye me sua zo la. Sokuluk ɛkɛ a bɛdele asafo mɔɔ limoa wɔ Kyrgyzstan wɔ 1958 a.

Victor Vinter

Kɛyɛ ɛvolɛ ko anzi, Victor Vinter dule hɔle Sokuluk. Nɔhavonli ɛhye yiale ngyegyelɛ fane dɔɔnwo. Bɛdole ye efiade ɛvolɛ nsa fane nwiɔ ɔluakɛ yeangyinla afoa biala, akee bɛdole ye efiade ɛvolɛ bulu bieko eza bɛdole ye efiade ɛvolɛ nnu. Noko, kpɔdekpɔdeyɛlɛ ne annzi nɔhalɛ ɛzonlenlɛ adenle kɛ ɔbadɛlɛ.

NƆHALƐ NE BIKYELE SUA NU

Eduard Varter

Ɔkadwu ɛvolɛ 1963 la, ɛnee Alasevolɛ kɛyɛ 160 a wɔ Kyrgyzstan a, bɛ nuhua dɔɔnwo vi Germany, Ukraine nee Russia. Eduard Varter boka menli mɔɔ bɛdole bɛ efiade la anwo, bɛzɔnenle ye wɔ Germany wɔ 1924. Wɔ ɛvolɛ 1940 ne anu, Nazima ne dole ye efiade, ɛvolɛ ekyii pɛle nu la, Komunisma mɔɔ wɔ USSR la nee Eduard hɔle nlɔnu. Wɔ 1961, adiema nrenyia ɛhye mɔɔ di nɔhalɛ la dule hɔle Kant mɔɔ bikye me sua zo la.

Elizabeth Fot; Aksamai Sultanalieva

Ɛnee Elizabeth Fot mɔɔ le Gyihova nɔhalɛ sonvolɛ la noko de Kant. Ɛnee ɔkpomgba ninyɛne ɔfa ɔnea ɔ nwo. Kɛmɔ ɔze gyima kpalɛ la ati, dɔketama nee kilehilevolɛma maa ɔkpomgba bɛ ninyɛne. Raalɛ ko mɔɔ bɛfɛlɛ ye Aksamai Sultanalieva mɔɔ ɔ hu yɛ gyima wɔ kɔɔto la boka menli mɔɔ ɔyɛ bɛ gyima la anwo. Aksamai hɔle Elizabeth ɛkɛ ne kɛ ɔkalie adɛladeɛ bie mɔ, noko ɔbizale deɛmɔti yɛwɔ azɛlɛ ye azo nee tɛnlabelɛ mɔɔ mowuamra wɔ nu la anwo kpuya dɔɔnwo. Elizabeth gyinlanle Baebolo ne azo buale ye kpuya ne mɔ. Aksamai rayɛle edwɛkpa ne nolobɔlɛnli mɔɔ bɔ mɔdenle.

Nikolai Chimpoesh

Mekɛ zɔhane, bɛkpale Nikolai Chimpoesh mɔɔ vi Moldova la kɛ maangyebakyi zo neavolɛ, na ɔzonlenle kɛyɛ ɛvolɛ 30. Nikolai kpɔlale asafo ne mɔ, eza ɔyɛle mbuluku mɔɔ bɛyɛ ye dɔɔnwo mɔɔ bɛbahyɛ la anwo ngyehyɛleɛ. Arane mgbanyima ne mɔ nwunle mɔɔ ɛnee ɔlɛyɛ la. Ɔti, Eduard Varter dule Nikolai folɛ kɛ: “Saa arane mgbanyima ne mɔ biza wɔ nwolɛ edwɛkɛ a, ka kile bɛ wienyi kɛ bɛ nee yɛ mbuluku ne mɔ vi ewiade amuala gyima ne ati mɔɔ wɔ Brooklyn la. Nea KGB kpanyinli ne anyunlu. Mmasulo debie biala.”​—Mat. 10:19.

Bɛbɔle adawu ɛhye la yeangyɛ bɛvɛlɛle Nikolai wɔ KGB gyima ne ati mɔɔ wɔ Kant la. Ɔhanle mɔɔ zile bieko la: “Kpanyinli ne bizale me ɛleka mɔɔ yɛnyia yɛ buluku ne mɔ yɛfi la. Mengale mengilele ye kɛ yɛnyia yɛfi Brooklyn. Ɛnee ɔnnwu mɔɔ ɔka a. Ɔmaanle mengɔle na yeanvɛlɛ me bieko. Alasevolɛ ɛhye mɔ mɔɔ lɛ akɛnrasesebɛ la luale nrɛlɛbɛ adenle zo bɔle edwɛkpa ne nolo wɔ me sua zo Kyrgyzstan sɔlɔ. Me ye Mairambubu a limoa dele Gyihova anwo nɔhalɛ ne mɔɔ sonle bolɛ la wɔ 1980 ne anu wɔ me abusua ne anu a.

 ME YE NWUNLE NƆHALƐ NE NDƐNDƐ

Mairambubu vi Naryn mɔɔ wɔ Kyrgyzstan Maanzinli nu la. Ɔrale me diema raalɛ ne sua nu kenle ko wɔ August 1974, na ɛkɛ ne a yɛlimoa yɛyiale a. Mengulole Mairambubu ɛkɛ ne ala. Yɛgyale kenle ko zɔhane ala.

Apun Mambetsadykova

Mɔɔ Mairambubu de kale nu ɔlɛkɔ gua wɔ January 1981 la yɛɛ ɔdele adawubɔlɛ ne mɔɔ melimoa meha nwolɛ edwɛkɛ la. Ɛnee me ye kulo kɛ ɔte dɔɔnwo, ɔti ɔbizale raalɛ ne duma nee ye adelɛse. Ɔhanle kɛ bɛfɛlɛ ye, Apun, noko ɔmaanle ɔ nye lale ɛkɛ, ɔluakɛ wɔ 1980 ɛvolɛ ne anu ɛnee bɛva bɛ sa bɛdo Alasevolɛ ne mɔ gyima ne azo. Apun anva ye adelɛse ammaa me ye, emomu ɔliele yɛ ɛdeɛ ne. Me ye vale anyelielɛ rale sua nu.

Mairambubu hanle kɛ, “Mede anyelielɛ edwɛkɛ bie. Raalɛ bie ɛha ɛhile me kɛ ɔnrɛhyɛ menli ɛnrɛwu bieko. Nane mɔɔ anwo yɛ ɛzulolɛ bɔbɔ la bayɛ bɛtɛɛ.” Membuale ye kɛ, me deɛ, ɔyɛ me kɛ ɛlalɛ bie la. “Maa yɛhendɛ na ɔba a yeahilehile nu yeahile yɛ.”

Ye siane nsa anzi, Apun rakpɔlale yɛ. Ɔziale ɔrale fane dɔɔnwo, ɛhye maanle yɛyiale Alasevolɛ bie mɔ mɔɔ bɛle Kyrgyzma la. Mraalɛ ɛhye mɔ maanle yɛnwunle nɔhalɛ mɔɔ fale Gyihova nee bodane mɔɔ ɔlɛ ɔmaa alesama la anwo edwɛkɛ dɔɔnwo. Bɛgengale buluku ne mɔɔ bɛfɛlɛ ye From Paradise Lost to Paradise Regained * la bɛhilele yɛ. Kɛ mɔɔ ɛnee bɛlɛ buluku ɛhye ko ala wɔ Tokmok nu la ati, yɛvale yɛ sa yɛhɛlɛle bie.

Ninyɛne mɔɔ yɛlimoa yɛzukoale la ko a le ngapezo edwɛkɛ mɔɔ wɔ Mɔlebɛbo 3:15 la. Gyisɛse mɔɔ le Nyamenle Mɛzaya Belemgbunli ne la a bamaa ngapezo ɛhye ara nu a. Ɛhye le edwɛkɛ mɔɔ anwo hyia mɔɔ ɔwɔ kɛ awie biala te a! Ɛhye ati, ɛnee ɔwɔ kɛ yɛfa yɛ nwo yɛwula edwɛkɛhanlɛ gyima ne anu. (Mat. 24:14) Yeangyɛ, Baebolo nu nɔhalɛ ne bɔle ɔ bo kɛ ɔkakyi yɛ ɛbɛlabɔlɛ.

BƐVALE BƐ SA BƐDOLE AYIA NEE ƐZƆNENLƐ ZO

Adiema nrenyia bie mɔɔ wɔ Tokmok la dole ɛsalɛ vɛlɛle yɛ wɔ atɔfolɛlielɛ bie abo. Yeangyɛ, me nee me ye nwunle kɛ Alasevolɛ ne mɔ le ngakyile. Bɛanva nza mɔɔ bo la bɛamba atɔfolɛlielɛ ne abo, yɛɛ debie biala hɔle zo pɛpɛɛpɛ. Ɛhye le ngakyile fi atɔfolɛlielɛ gyɛne mɔɔ menli mɔɔ kɔ ɔ bo la bo, bɛyɛ basabasa na bɛtendɛ ɛtane mɔɔ yɛhɔ la anwo.

 Eza yɛhɔle debiezukoalɛ wɔ Tokmok asafo ne anu. Ɛnee bɛyɛ ye wɔ kpɔkɛmile nu, saa tɛnlabelɛ ne maa adenle a. Ɛnee mediema ne mɔ ze ye kɛ kpolisima ne anye wɔ bɛ nwo kpalɛ, ɔti ɛnee bɛmaa adiema ko sinza. Wɔ ɛyɛlɛ mekɛ nu, yɛyɛ ye wɔ sua nu. Ɔyɛ a kpolisima bafinde yɛ nwo zo wɔ sua nu na bɛbiza yɛ mɔɔ yɛlɛyɛ la. Mɔɔ bɛzɔnenle me nee Mairambubu wɔ July 1982 wɔ Azule Chüy ne anu la, ɛnee ɔwɔ kɛ yɛmaa yɛ nye da ɛkɛ. (Mat. 10:16) Mediema rayiale kpɔkɛ ne anu ngyikyingyikyi. Yɛdole Belemgbunlililɛ edwɛne na yɛdiele ɛzɔnenlɛ ɛdendɛlɛ ne.

YƐVALE NWOLƐ ADENLE NE YƐDƐLƐLE YƐ ƐZONLENLƐ GYIMA NE ANU

Wɔ ɛvolɛ 1987, adiema nrenyia bie zele me kɛ mengɔkpɔla anyelielɛnli bie mɔɔ de sua Balykchy azo la. Ɛnee ɔwɔ kɛ mefa keteke metu adenle dɔnehwele nna na meadwu ye ɛkɛ. Mɔɔ yɛdule adenle yɛhɔhanle edwɛkɛ ne wɔ Balykchy fane dɔɔnwo la, yɛnwunle kɛ menli dɔɔnwo anye die nwo. Ɛnee ɛhye le nwolɛ adenle mɔɔ ɔwɔ kɛ yɛfa yɛtɛlɛ yɛ ɛzonlenlɛ gyima ne anu a.

Ɛnee me nee Mairambubu ta kɔ Balykchy. Wɔ dapɛne awieleɛ, yɛta yɛda, yɛkɔ daselɛlilɛ na yɛyɛ debiezukoalɛ. Menli mɔɔ die yɛ mbuluku ne mɔ la anwo razonle kpalɛ. Ɛnee yɛfa mbuluku ne mɔ yɛgua kodoku bie mɔɔ bɛfɛlɛ ye mishok mɔɔ bɛfa nrɛlɛbɛta bɛgua nu la yɛfi Tokmok yɛkɔ ɛkɛ. Ɛnee mbuluku ahodoku nwiɔ ne mɔɔ yɛfa yɛkɔ siane biala la ɛnza. Yɛde keteke nu yɛlɛkɔ Balykchy yɛɛ yɛlɛsia a, yɛdi adenduvoma ne daselɛ.

Wɔ yɛ ɛkpɔlalɛ mɔɔ limoa la anzi ɛvolɛ mɔtwɛ wɔ 1995, bɛdele asafo wɔ Balykchy sua ne azo. Yɛbɔle kakɛ kpalɛ wɔ ɛvolɛ zɔhane mɔɔ ɛnee yɛtu adenle yɛfi Tokmok yɛkɔ Balykchy la. Ɛnee yɛnlɛ ezukoa dɔɔnwo, ɔti kɛzi yɛyɛle ye ɛ? Ɛnee adiema nrenyia bie ta maa yɛ ezukoa maa yɛfa yɛtua yɛ nwo kakɛ ne bie. Gyihova nwunle ɛhulolɛ mɔɔ yɛlɛ kɛ yɛbadɛlɛ yɛ ɛzonlenlɛ gyima ne anu la, na ɔbukele “anwuma nlenkɛ” ne mɔ ɔmaanle yɛ. (Mal. 3:10) Nɔhalɛ nu, Gyihova kola yɛ debie biala amgba!

ƐNEE YƐNLƐ ALAGYE FEE WƆ YƐ ABUSUA NE NEE DASELƐLILƐ NU

Wɔ 1992 bɛkpale me kɛ asafo nu kpanyinli mɔɔ limoa mɔɔ le Kyrgyznli wɔ maanle ne anu. Ɛzonlenlɛ nu nwo adenle fofolɛ dɔɔnwo bukele wɔ asafo ne mɔɔ wɔ yɛ sua zo Tokmok la anu. Ɛnee yɛ nee ngakula mɔɔ bɛle Kyrgyzma mɔɔ bɛkɔ sukulu la dɔɔnwo sukoa Baebolo ne. Ngakula ɛhye mɔ mɔɔ ɛnee yɛ nee bɛ sukoa la anu ko kɛkala boka Ɔfese Kɔmatii ne anwo yɛɛ nwiɔ noko le adekpakyelɛ titilima. Eza yɛvile yɛ ɛhulolɛ nu yɛboale awie mɔ wɔ debiezukoalɛ bo. Wɔ 1990 mɔlebɛbo, ɛnee yɛyɛ yɛ debiezukoalɛ ne mɔ nee yɛ mbuluku ne mɔ wɔ Russia aneɛ nu. Noko menli dɔɔnwo mɔɔ ɛnee wɔ asafo ne anu la ka Kyrgyz. Ɔti, mengilele ɔ bo memaanle bɛ, na ɛhye boale bɛ maanle bɛdele nɔhalɛ ne abo kpalɛ.

Me nee me ye yɛɛ yɛ mra mɔtwɛ wɔ 1989

Me nee Mairambubu eza yɛle gyima ɛsesebɛ nleanle yɛ abusua ne mɔɔ ɛnee ɔlɛyɛ kpole la. Yɛ nee yɛ mra ne mɔ hɔle daselɛlilɛ nee debiezukoalɛ. Ɛnee yɛ ra raalɛ Gulsayra mɔɔ ɛnee yenyia ɛvolɛ 12 pɛ la anye die kɛ ɔbaha Baebolo ne anu edwɛkɛ  yeahile menli mɔɔ lua awɔdenle ne mɔ azo la. Ɛnee eza yɛ mra ne mɔ anye die kɛ bɛbahye Baebolo tɛkese bɛagua bɛ ti anu. Yɛ mra ne mɔ yɛɛ nzinlii yɛ nlɔnra amuala bɔle nu vale bɛ nwo wulale asafo gyimayɛlɛ ngakyile nu wɔ adenle ɛhye azo. Wɔ ngakula 9 nee nlɔnra 11 mɔɔ kɛkala de aze la anu, bɛ nuhua 16 sonle Gyihova anzɛɛ nee bɛ awovolɛ kɔ debiezukoalɛ.

NZENZALEƐ MƆƆ YƐ AZIBƐNWO

Saa mediema mɔɔ bɔle Gyihova gyima ne abo wɔ yɛ sua zo wɔ 1950 la nwu anyuhɔlɛ mɔɔ yɛnyia la a, ɔbayɛ bɛ azibɛnwo. Mɔɔ ɔde a le kɛ ɔvi 1990 mɔɔ ba la, yɛnyia fanwodi dɔɔnwo yɛlɛbɔ edwɛkpa ne nolo na yɛayɛ nyianu mgbole.

Me nee me ye lua daselɛlilɛ nu

Wɔ 1991, me nee me ye hɔle yɛ nyianu mɔɔ limoa la wɔ Alma-Ata mɔɔ kɛkala bɛfɛlɛ ye Almaty mɔɔ wɔ Kazakhstan la. Na wɔ 1993, mediema mɔɔ wɔ Kyrgyzstan la yɛle nyianu mɔɔ limoa wɔ Spartak Nwɔhoalilɛleka mɔɔ wɔ Bishkek la. Nolobɔlɛma limoa vale dapɛne ko zieziele nwɔhoalilɛleka ne. Kpanyinli ne mɔɔ nea ɛkɛ la anye liele kpalɛ, ɔti ɔmaanle yɛyɛle nyianu ne wɔ ɛkɛ mɔɔ yɛanlie ezukoa a.

Wɔ 1994, yɛnyianle anyuhɔlɛ bieko wɔ mekɛ mɔɔ bɛpelentele yɛ buluku mɔɔ limoa wɔ Kyrgyz aneɛ nu la. Kɛkala, Kyrgyz edwɛbohilelɛ ekpunli ne mɔɔ wɔ Bishkek Bɛtɛle ɛkɛ la kile yɛ mbuluku ne mɔ abo dahuu. Nɔhalɛ nu, wɔ 1998, bɛliele Alasevolɛ ne mɔ gyima ne bɛdole nu wɔ Kyrgyzstan mɛla nu. Ahyehyɛdeɛ ne ɛyɛ kpole, na kɛkala nolobɔlɛma ne dodo bo 5,000. Ɛnɛ, yɛlɛ asafo 83 yɛɛ ekpunli ngakyile 25 wɔ Chinese, Nrelenza, Kyrgyz, Russian, Russian Sign Language, Turkish, Uighur nee Uzbek aneɛ nu. Mediema mrenyia nee mraalɛ ɛhye mɔ mɔɔ bɛvi maanle ngakyile nu la ɛlɛbɔ nu azonle Gyihova wɔ koyɛlɛ nu. Gyihova a maanle yɛnyianle anyuhɔlɛ ɛhye mɔ mɔɔ yɛ azibɛnwo la a.

Eza Gyihova ɛhakyi me ɛbɛlabɔlɛ. Menyinle wɔ abusua mɔɔ bɛle ɛya nu gyimayɛvoma la anu yɛɛ mengɔle sukulu ɛvolɛ nnu pɛ. Noko Gyihova maanle menzonlenle kɛ asafo nu kpanyinli na mengilele menli mɔɔ ze nwoma tɛla me la Baebolo nu nɔhalɛ ne mɔɔ sonle bolɛ la. Nɔhalɛ nu, Gyihova maa edwɛkɛ mɔɔ yɛ azibɛnwo la si. Me anwubielɛ maa mekɔ zo mefa nɔhalɛlilɛ medi Gyihova mɔɔ “kola yɛ debie biala” la anwo daselɛ.​—Mat. 19:26.

^ ɛden. 21 Gyihova Alasevolɛ a yɛle a, na ɛnɛ bɛnyɛ ye bieko.