Wulu kɔ nuhua edwɛkɛ ne azo

Wulu kɔ nuninyɛne ne azo

Di “Mɔɔ Nyamenle Ɛha Ɛbɔ Nu La” Eni

Di “Mɔɔ Nyamenle Ɛha Ɛbɔ Nu La” Eni

“Mɔɔ Nyamenle ɛha ɛbɔ nu la, mmamaa awie biala kpakye nu.”​—MAAKE 10:9.

EDWƐNE: 131, 132

1, 2. Duzu a ɔwɔ kɛ Hibuluma 13:4 ka yɛ maa yɛyɛ a?

Ɛ NYE die kɛ ɛbali Gyihova eni ɔ? Ɔda ali kɛ ɛkulo! Ɔfɛta kɛ ɛdi ye eni, na yebɔ ɛwɔkɛ kɛ ɔdaye noko ɔbali wɔ eni. (1 Sa. 2:30; Mrɛ. 3:9; Yek. 4:11) Ɔkulo kɛ ɛdi menli le kɛ maanle mgbanyima noko eni. (Wlo. 12:10; 13:7) Noko debie bie wɔ ɛkɛ mɔɔ ɔwɔ kɛ yɛdi ye eni kpalɛ a. Yemɔ a le agyalɛ.

2 Ɛzoanvolɛ Pɔɔlo hɛlɛle kɛ: “Bɛli agyalɛ eni, na bɛmmagua agyalɛ ɛkpa ne anwo evinli.” (Hib. 13:4) Tɛ agyalɛ nwo edwɛkɛ bie ala a ɛnee Pɔɔlo ɛlɛka a. Emomu, tɛkese zɔhane ɛlɛmaa Kilisienenli biala anwosesebɛ kɛ, ɔbu agyalɛ kɛ ɔsonle bolɛ. Asoo kɛ ɛbu agyalɛ la ɛne, titili wɔ agyalɛ ne, saa wɔgya a?

3. Agyalɛ nwo folɛdulɛ kpalɛ boni a Gyisɛse vale maanle a? (Nea mɔlebɛbo nvoninli ne.)

3 Saa ɛbu agyalɛ kɛ ɔsonle bolɛ a, ɛnee ɛlɛdi neazo kpalɛ bie anzi. Gyisɛse bule agyalɛ bie. Mɔɔ Falasiima ne bizale Gyisɛse ewolebɔlɛ nwo edwɛkɛ la, ɔhwenle bɛ adwenle ɔhɔle mɔɔ Nyamenle hanle vanenle agyalɛ mɔɔ limoa anwo la azo: “Ɛhye ati nrenyia bagyakyi ye papa nee ye mame ɛkɛ, na bɛ mu nwiɔ bɛayɛ nwonane ko.” Gyisɛse doale zo kɛ: “Mɔɔ Nyamenle ɛha ɛbɔ nu la, mmamaa awie biala kpakye nu.”​—Kenga Maake 10:2-12; Mɔl. 2:24.

4. Agyalɛ nwo neazo boni a Gyihova yɛle a?

 4 Gyisɛse liele dole nu kɛ Nyamenle a hyehyɛle agyalɛ a, ɔti ɔzile zo kɛ ɔwɔ kɛ ɔtɛnla ɛkɛ dahuu. Nyamenle anga angile Adam nee Yive kɛ bɛbahola bɛabɔ ewole. Nrenyia ko nee raalɛ ko agyalɛ nwo neazo a Nyamenle yɛle ye wɔ Yidɛn a, “bɛ mu nwiɔ” bɛbabɔ nu bɛadɛnla dahuu.

NINYƐNE MƆƆ VALE NZENZALEƐ RALE AGYALƐ NU LA

5. Kɛzi ewule ka agyalɛ ngyehyɛleɛ ne ɛ?

5 Noko, ɛze ɔ, Adam ɛtane ne vale nzenzaleɛ rale. Ko a le ewule mɔɔ ka agyalɛ la. Yɛkola yɛnwu ɛhye wɔ mɔɔ ɛzoanvolɛ Pɔɔlo hanle wɔ mekɛ mɔɔ ɔkilehile nu kɛ Kilisienema ɛnle Mosisi Mɛla ne abo la. Ɔhanle kɛ ewule a pɛ agyalɛ ne azo a, na nrenyia anzɛɛ raalɛ ne bahola agya bieko nzinlii.​—Wlo. 7:1-3.

6. Kɛzi Mosisi Mɛla ne lale adwenle mɔɔ Nyamenle lɛ ye wɔ agyalɛ nwo la ali ɛ?

6 Mɛla mɔɔ Nyamenle vale maanle Yizilayɛma la hanle agyalɛ nwo edwɛkɛ dɔɔnwo. Mɛla ne maanle mraalɛ dɔɔnwo agyalɛ nwo adenle, nyɛleɛ zɔhane hɔle zo kolaa na Nyamenle ava Mɛla ne amaa Yizilayɛma. Noko, bɛvale nwolɛ mɛla bɛmaanle, amaa bɛanva bɛanli gyima wɔ adenle ɛtane zo. Kɛ neazo la, saa Yizilayɛnli gya akɛlɛ bie na nzinlii ɔgya raalɛ bieko a, ɔnle kɛ ɔbu ɔ nye ɔgua aleɛ nee adɛladeɛ mɔɔ ɔ ye kpanyinli ne hyia yɛɛ mɔɔ ɔfɛta kɛ ɔfa ɔmaa ye wɔ nla nu la azo. Ɛnee Nyamenle kulo kɛ ɔbɔ ɔ nwo bane na ɔnea ye. (Ade. 21:9, 10) Yɛnle Mɛla ne abo, noko ɔmaa yɛnwu Gyihova adwenle wɔ agyalɛ nwo. Asoo yemɔ ɛmmaa ɛnnwu kɛ ɔwɔ kɛ ɛbu agyalɛ ɔ?

7, 8. (a) Duzu a Mɛla ne 24:1, hanle vanenle ewolebɔlɛ nwo a? (b) Kɛzi Gyihova bu ewolebɔlɛ ɛ?

7 Duzu a Mɛla ne hanle ye wɔ ewolebɔlɛ nwo a? Nyamenle bu agyalɛ kɛ ɔsonle bolɛ kpalɛ; noko ɔmaanle ewolebɔlɛ nwo adenle. (Kenga Mɛla ne 24:1.) Ɛnee Yizilayɛnli nrenyia bahola abɔ ɔ ye ewole, saa “ɔnwu kɛ raalɛ ne ɛnli ɔ nwo eni a.” Mɛla ne angile ‘ɔ nwo eni mɔɔ ɔnli’ la anu. Ɔbayɛ debie mɔɔ yɛ anyiemgba anzɛɛ anyebolo wɔ nu, tɛ edwɛkɛ biala. (Mɛla 23:14) Ɔyɛ alɔbɔlɛ kɛ, wɔ Gyisɛse mekɛ zo ɛnee Dwuuma dɔɔnwo bɔ bɛ ye mɔ ewole “wɔ edwɛkɛ biala anwo.” (Mat. 19:3) Yɛngulo kɛ yɛsukoa bɛ.

8 Ngapezonli Malakae lale adwenle mɔɔ Nyamenle lɛ ye wɔ ewolebɔlɛ nwo la ali. Mekɛ zɔhane ɛnee mrenyia fa anyebolo bɔ “mraalɛ mɔɔ bɛgyale bɛ bɛ mgbavolɛ nu” ewole, amaa bɛagya awozonlezonlenlɛ mraalɛ mɔɔ le mbɛlɛra la. Malakae lale adwenle mɔɔ Nyamenle lɛ wɔ ɛhye anwo la ali kɛ: “Mekyi ewolebɔlɛ.” (Mal. 2:14-16) Ɛhye nee mɔɔ Baebolo ne ka ye wɔ agyalɛ mɔɔ limoa anwo la yia: ‘Nrenyia bava ɔ nwo abɔ ɔ ye anwo kyengye, na bɛ mu nwiɔ bɛabɔ nu bɛayɛ nwonane ko.’ (Mɔl. 2:24) Gyisɛse zile adwenle mɔɔ ɔ Ze lɛ wɔ agyalɛ nwo la azo kɛ: “Mɔɔ Nyamenle ɛha ɛbɔ nu la, mmamaa awie biala kpakye nu.”​—Mat. 19:6.

DEBIE KO ALA A BƐKOLA BƐGYINLA ZO BƐBƆ EWOLE A

9. Kɛzi ɔwɔ kɛ yɛte Gyisɛse edwɛkɛ mɔɔ wɔ Maake 10:11, 12 la abo ɛ?

9 Bie a awie babiza kɛ, ‘Asoo debie wɔ ɛkɛ mɔɔ Kilisienenli bahola agyinla zo abɔ ewole na yeagya fofolɛ ɔ?’ Gyisɛse hanle ewolebɔlɛ nwo edwɛkɛ kɛ: “Awie biala mɔɔ kɛbɔ ɔ ye ewole na ɔkɛgya fofolɛ la ɛzɛkye agyalɛ, yeyɛ ɛtane yetia ɔ ye, na saa raalɛ bɔ ɔ hu ewole na nzinlii ɔkɔ agyalɛ fofolɛ a, ɛnee yezɛkye agyalɛ.” (Maake 10:11, 12; Luku 16:18) Nɔhalɛ nu, ɛnee Gyisɛse bu agyalɛ, na ɔkulo  kɛ awie mɔ noko yɛ zɔ. Nrenyia anzɛɛ raalɛ mɔɔ ɔ nye fuu ɔkɛbɔ ɔ ye anzɛɛ ɔ hu mɔɔ di nɔhalɛ ewole na ɔkɛgya fofolɛ la ɛzɛkye agyalɛ. Ɛhye le zɔ, ɔluakɛ saa awie bɔ ɔ ye anzɛɛ ɔ hu ewole a, ɔngile kɛ amgba bɛpɛ agyalɛ ne anu. Wɔ Nyamenle anye zo, bɛtɛde “nwonane ko.” Bieko, Gyisɛse hanle kɛ, nrenyia mɔɔ kɛbɔ ɔ ye mɔɔ di nɔhalɛ ewole la bahola amaa yeazɛkye agyalɛ. Adenle boni azo? Mekɛ zɔhane, raalɛ mɔɔ bɛkɛbɔ ye ewole la banyia ɛhulolɛ kɛ ɔgya fofolɛ amaa yeanyia moalɛ wɔ ezukoa afoa nu. Ɛhye noko le agyalɛzɛkyelɛ.

10. Duzu a Kilisienenli bahola agyinla zo abɔ ewole na yeagya fofolɛ a?

10 Gyisɛse hanle debie mɔɔ awie bahola agyinla zo abɔ ewole la anwo edwɛkɛ kɛ: “Meka meahile bɛ kɛ, awie biala mɔɔ tɛ adwɔmane ɛbɛla ti [Giliki aneɛ nu, por·neiʹa], ɔkɛbɔ ɔ ye ewole na ɔkɛgya fofolɛ la ɛzɛkye agyalɛ.” (Mat. 19:9) Ɔhanle edwɛkɛ ko ne ala wɔ ye Boka Zo Ɛdendɛlɛ ne anu. (Mat. 5:31, 32) Wɔ tɛkese nwiɔ ɛhye anu, Gyisɛse hanle “adwɔmane ɛbɛla” nwo edwɛkɛ. Zɔhane edwɛkɛ ne fale nla nu ɛbɛlatane ngakyile mɔɔ kɔ zo wɔ agyalɛ nzi la anwo: agyalɛzɛkyelɛ, tuutuulilɛ, nla nu ngitanwolilɛ mɔɔ kɔ zo wɔ menli mɔɔ bɛtɛgyale avinli, menli mɔɔ bɛ awodeɛ le ko nla yɛɛ menli mɔɔ nee nane da la. Kɛ neazo la, saa agyalɛ nrenyia fa ɔ nwo wula nla nu ɛbɛlatane nu a, ɔ ye bahola azi kpɔkɛ kɛ ɔbɔ ewole anzɛɛ ɔnrɛyɛ zɔ. Saa raalɛ ne bɔ ɔ hu ewole a, agyalɛ ne bara awieleɛ wɔ Nyamenle anye zo.

11. Kɛmɔti a Kilisienenli mɔɔ ɔ hu anzɛɛ ɔ ye ɛbɔ nla nu ɛbɛlatane la bahola azi kpɔkɛ kɛ ɔnrɛbɔ ewole ɛ?

11 Noko Gyisɛse anga kɛ saa awie ɔ hu anzɛɛ ɔ ye bɔ nla nu ɛbɛlatane (por·neiʹa) a, kɛ ɔde ye biala la ɔwɔ kɛ bɛbɔ ewole. Kɛ neazo la, raalɛ ne bahola azi kpɔkɛ kɛ ɔtɛnla agyalɛ ne anwo, ɔnva nwo kɛ ɔ hu ɛbɔ ɛbɛlatane la. Bie a ɛnee ɔtɛkulo ye; ɔkulo kɛ ɔfa ɔkyɛ ye na bɛ mu nwiɔ bɛbɔ mɔdenle kɛ bɛmaa agyalɛ ne ayɛ boɛ. Nɔhalɛ nu, saa ɔbɔ ewole na ɔtɛgyale bieko a, ɔbayia ngyegyelɛ bie  mɔ. Kɛ neazo la, ye nwonane afoa nu nee ye nla nu ngyianlɛ bahola ayɛ ngyegyelɛ, ɔ nwo bahola ayɛ ye koonwu, ngakula mɔɔ wɔ abusua ne anu la noko ɛ, ɔ ngomekye ɔbahola yeatete bɛ wɔ nɔhalɛ ne anu ɔ? (1 Kɔl. 7:14) Nɔhalɛ nu, nrenyia anzɛɛ raalɛ ne mɔɔ ɛnze nwolɛ bie la bayia ngyegyelɛ kpole.

12, 13. (a) Duzu a hɔle zo wɔ Hozia agyalɛ ne anu a? (b) Kɛmɔti a Hozia hɔvale Gomɛ bieko ɛ, na duzu a yɛsukoa yɛfi ɛhye anu wɔ agyalɛ nwo a?

12 Ɛzukoalɛdeɛ kɛnlɛma wɔ ngapezonli Hozia edwɛkɛ ne anu. Nyamenle zele Hozia kɛ ɔgya raalɛ Gomɛ mɔɔ bayɛ ‘tuutuu raalɛ la na ɔwo tuutuu mralɛ.’ Gomɛ “nrenzɛle na ɔwole ralɛ nrenyia” ɔmaanle Hozia. (Hozia 1:2, 3) Nzinlii, ɔwole ralɛ raalɛ nee nrenyia, ɔbayɛ kɛ bɛle tuutuu mralɛ. Ɔnva nwo kɛ Gomɛ zɛkyele agyalɛ fane dɔɔnwo la, Hozia ambɔ ye ewole. Nzinlii, ɔgyakyile Hozia na ɔhɔyɛle akɛlɛ. Noko, eza Hozia hɔvale ye. (Hozia 3:1, 2) Ɛnee Gyihova ɛlɛfa Hozia ayɛ neazo ahile kɛzi Ɔvale Yizilayɛma mɔɔ zɛkyele agyalɛ ɛtane ɔhyɛle bɛ fane dɔɔnwo la. Duzu a yɛsukoa yɛfi ɛhye anu a?

13 Saa Kilisienenli bie ahu anzɛɛ aye bɔ nla nu ɛbɛlatane a, ɔwɔ kɛ Kilisienenli ne mɔɔ anwo ɛnlɛ edwɛkɛ la si kpɔkɛ. Gyisɛse hanle kɛ, mɔɔ anwo ɛnlɛ edwɛkɛ la bahola abɔ ewole na yeagya fofolɛ. Noko, eza ɔbahola yeava yeahyɛ ye. Ɛhye ɛnle ɛtane. Hozia hɔvale Gomɛ bieko. Mɔɔ Gomɛ ziale rale Hozia ɛkɛ la, ɛnee ɔnle kɛ ɔ nee nrenyia fofolɛ nyia nla nu ngitanwolilɛ. Hozia nee Gomɛ annyia nla nu ngitanwolilɛ wɔ mekɛ bie anu. (Hozia 3:3) Noko nzinlii, ɔbayɛ kɛ Hozia nee ye nyianle nla nu ngitanwolilɛ, ɛhye kile kɛ ɛnee Nyamenle kulo kɛ ɔfa ye menli ne ɛtane ɔkyɛ bɛ na ɔ nee bɛ bɔ nu bieko. (Hozia 1:11; 3:3-5) Kɛzi ɛhye fale agyalɛ nwo ɛnɛ ɛ? Saa Kilisienenli ne mɔɔ anwo ɛnlɛ edwɛkɛ la ambɔ ewole na ɔ nee ɔ hu anzɛɛ ɔ ye nyia nla nu ngitanwolilɛ a, ɔkile kɛ yeva yehyɛ ye. (1 Kɔl. 7:3, 5) Ɛhye bapɛ mɔɔ bɛkola bɛgyinla zo bɛbɔ ewole la anu. Yemɔ anzi, ɔwɔ kɛ agyalɛma ne bɔ mɔdenle kɛ bɛbanyia Nyamenle adwenle wɔ agyalɛ nwo.

DI AGYALƐ ENI SAA BƆBƆ NGYEGYELƐ WƆ NU A

14. Kɛ mɔɔ 1 Kɔlentema 7:10, 11 ka la, duzu a bahola azi wɔ agyalɛ nu a?

14 Ɔwɔ kɛ Kilisienema kɔsɔɔti bɔ mɔdenle bu agyalɛ bie kpalɛ, kɛ mɔɔ Gyisɛse nee Gyihova bu ye la. Noko bie mɔ ɛnyɛ zɔ, ɔluakɛ alesama ɛnli munli. (Wlo. 7:18-23) Ɔti ɔnle kɛ ɔsi yɛ nwo kɛ ɛvoya mɔɔ limoa Kilisienema bie mɔ yiale ngyegyelɛ wɔ bɛ agyalɛ nu la. Pɔɔlo hɛlɛle kɛ, “yelɛ mmagyakyi ɔ hu” anzɛɛ tete agyalɛ nu; noko wɔ tɛnlabelɛ bie mɔ anu, ɛhye si.​—Kenga 1 Kɔlentema 7:10, 11.

Kɛzi agyalɛma bahola amaa bɛ agyalɛ agyinla ɛ? (Nea ɛdendɛkpunli 15)

15, 16. (a) Saa agyalɛma ɛlɛyia ngyegyelɛ a, duzu a ɔwɔ kɛ bɛfa bɛyɛ bɛ bodane a, na duzu ati ɔ? (b) Kɛzi ɛhye fale awie mɔɔ ɔ hu anzɛɛ ɔ ye ɛnle diedinli la anwo ɛ?

15 Pɔɔlo angilehile mɔɔ fa agyalɛ nu ɛtetelɛ zɛhae ba la anu. Kɛ neazo la, tɛ ngyegyelɛ ne a le kɛ kunli ne bɔle nla nu ɛbɛlatane na ɔmaanle ɔ ye nyianle mɔɔ ɔbagyinla zo yeabɔ ewole na yeagya fofolɛ a. Pɔɔlo hɛlɛle kɛ yelɛ mɔɔ kɛtete agyalɛ ne anu la ‘mmakɔ agyalɛ bieko, saa tɛ ye zɔhane a ɔ nee ɔ hu ɛhɔbɔ nu bieko.’ Ɔti wɔ Nyamenle anye zo, bɛtɛde agyalɛma. Pɔɔlo dule folɛ kɛ, ɔnva nwo mɔɔ vale ngyegyelɛ ne rale la, saa tɛ nla nu ɛbɛlatane a, ɔwɔ kɛ bɛbɔ kpɔkɛ kɛ bɛbabɔ nu bieko. Bɛbahola bɛamaa asafo nu mgbanyima aboa bɛ. Ɔwɔ kɛ mgbanyima ne mɔ gyinla Ngɛlɛlera ne azo tu bɛ folɛ mɔɔ bɛngyinla afoa biala a.

 16 Noko saa nuhua ko ala a le diedinli a, ɔbayia ngyegyelɛ wɔ mekɛ mɔɔ ɔlɛfa Baebolo ngyinlazo yeayɛ gyima la. Saa bɛlɛyia ngyegyelɛ a, agyalɛ nu ɛtetelɛ le ye sɔbelɛ ɔ? Kɛ mɔɔ yɛnwu ye la, Ngɛlɛlera ne ka kɛ nla nu ɛbɛlatane a awie bahola agyinla azo abɔ ewole a, noko ɔnga mɔɔ awie bahola gyinla zo atete agyalɛ nu la anwo edwɛkɛ. Pɔɔlo hɛlɛle kɛ: “Saa raalɛ ɔ hu ɛnle diedinli na ɔkponle zo kɛ ɔ nee ye badɛnla a, ɔmmagyakyi ɔ hu ne.” (1 Kɔl. 7:12, 13) Ɛhye fale yɛ nwo ɛnɛ.

17, 18. Duzu ati a Kilisienema bie mɔ ɛbɔ mɔdenle ɛdɛnla agyalɛ mɔɔ ngyegyelɛ wɔ nu la anwo a?

17 Nɔhalɛ nu, wɔ tɛnlabelɛ bie mɔ anu kunli mɔɔ “ɛnle diedinli” la ɛhile kɛ ‘ɔmkponle zo kɛ ɔ nee ɔ ye badɛnla.’ Bie a kunli ne yɛ ɔ ye basabasa dedee ɔmaa ɔte nganeɛ kɛ ye kpɔkɛdelɛ anzɛɛ ye ngoane la esiane nu. Bie a ɔkpo kɛ ɔbanlea ɔ ye nee abusua ne anzɛɛ ɔfa ɔ ye sunsum nu gyinlabelɛ ɔto esiane nu. Wɔ tɛnlabelɛ zɛhae anu, bie a Kilisienenli yelɛ bie bazi kpɔkɛ atete agyalɛ ne anu. Ɔluakɛ, ɔnva nwo biala mɔɔ ɔ hu baha la, ɔ hu ‘ɛmkponle zo kɛ ɔ nee ye badɛnla.’ Noko Kilisienema gyɛne mɔɔ lɛ ngyegyelɛ mɔɔ le kɛ ɛhye bie la ɛnyɛ zɔ; bɛgyinla nu na bɛbɔ mɔdenle kɛ bɛmaa ninyɛne ayɛ boɛ. Duzu ati ɔ?

18 Saa bɛtete nu bɔbɔ a, bɛtɛde agyalɛma. Ɛhye bamaa bɛ nuhua ko biala ayia ngyegyelɛ, kɛ mɔɔ yɛlimoa yɛha la. Ɛzoanvolɛ Pɔɔlo hanle debie bieko mɔɔ ɔti ɔwɔ kɛ bɛbɔ nu la. Ɔhɛlɛle kɛ: “Kunli mɔɔ ɔnle diedinli la anwo te wɔ ɔ ye anu, yɛɛ yelɛ mɔɔ ɔnle diedinli la anwo te wɔ adiema nrenyia ne anu; tɛ ye zɔhane a, bɛ mra nwo ɛnrɛde, noko kɛkala bɛyɛ nwuanzanwuanza.” (1 Kɔl. 7:14) Kilisienema dɔɔnwo mɔɔ di nɔhalɛ la nee bɛ ye anzɛɛ bɛ hu mɔ mɔɔ bɛnle diedima la ɛdɛnla wɔ tɛnlabelɛ mɔɔ anu yɛ se kpalɛ bɔbɔ la anu. Bɛkola bɛka kɛ, nvasoɛ kpole wɔ zo kɛ bɛyɛle zɔ la, ɔluakɛ bɛ ye anzɛɛ bɛ hu ne rayɛle adiema.​—Kenga 1 Kɔlentema 7:16; 1 Pita 3:1, 2.

19. Duzu ati a agyalɛ mɔɔ anyelielɛ wɔ nu la dɔɔnwo wɔ Kilisiene asafo ne anu a?

19 Gyisɛse hanle ewolebɔlɛ nwo edwɛkɛ bie mɔ yɛɛ ɛzoanvolɛ Pɔɔlo vale agyalɛ nu ɛtetelɛ nwo folɛdulɛ maanle. Bɛkulo kɛ Nyamenle azonvolɛ di agyalɛ eni. Wɔ ewiade amuala, agyalɛ mɔɔ anyelielɛ wɔ nu la dɔɔnwo wɔ Kilisiene asafo ne anu ɛnɛ. Ɔda ali kɛ ɛbahola wɔanwu bie wɔ wɔ asafo ne anu. Bɛle mediema mrenyia mɔɔ di nɔhalɛ na bɛkulo bɛ ye mɔ yɛɛ mraalɛ mɔɔ bɔ mɔdenle na bɛkile kɛ bɛkulo bɛ hu mɔ. Bɛyɛ ɛhye bɛkile kɛ bɛdi agyalɛ eni. Yɛ nye die kɛ menli mgbe dɔɔnwo ɛmaa Nyamenle edwɛkɛ ɛhye ɛyɛ nɔhalɛ la: “Ɛhye ati a nrenyia bagyakyi ye papa nee ye mame na yeahɔbeta ɔ ye anwo na bɛ mu nwiɔ bɛayɛ nwonane ko la.”​—Ɛfɛ. 5:31, 33.