Wulu kɔ nuhua edwɛkɛ ne azo

Wulu kɔ nuninyɛne ne azo

Diedi—Subane Mɔɔ Maa Yɛ Nwo Yɛ Se

Diedi—Subane Mɔɔ Maa Yɛ Nwo Yɛ Se

DIEDI maa yɛnyia anwosesebɛ kpole! Kɛ neazo la, Seetan kulo kɛ ɔku yɛ wɔ sunsum nu, noko diedi boa yɛ maa ‘yɛnua amumuyɛnli ne ɛda ne mɔ mɔɔ ɛlɛsɔ la amuala.’ (Ɛfɛ. 6:16) Saa yɛlɛ diedi a, yɛbahola yɛagyinla ngyegyelɛ mɔɔ ye kpole le kɛ boka la anloa. Gyisɛse zele ye ɛdoavolɛma kɛ: “Saa bɛlɛ diedi mɔɔ ye kpole le kɛ mɛsetade ma bɔbɔ a, anrɛɛ bɛbahola bɛaha bɛahile boka ɛhye kɛ, ‘Tu kɔ nehane,’ na ɔkɛhɔ.” (Mat. 17:20) Kɛmɔ diedi kola maa yɛ nwo yɛ se wɔ sunsum nu la ati, yɛkulo kɛ yɛsuzu kpuya ɛhye mɔ anwo: Duzu a le diedi? Adenle boni azo a kɛzi yɛde wɔ yɛ ahonle nu la bahola aha yɛ diedi ɛ? Kɛ ɔkɛyɛ na yɛamaa yɛ diedi nu amia ɛ? Yɛɛ nwane a ɔwɔ kɛ yɛnyia ye nu diedi a?​—Wlo. 4:3.

DUZU A LE DIEDI?

Diedi kɔ moa tɛla kɛ awie balie mɔɔ Baebolo ne ka la ali, ɔluakɛ “sunsum ɛtane ne mɔ noko die di [kɛ Nyamenle wɔ ɛkɛ] na bɛ nwo woso bɛ.” (Gye. 2:19) Yemɔti, duzu a le diedi?

Kɛ mɔɔ yɛlɛ anwodozo kɛ alehyenlɛ nee aledwolɛ bara dahuu la, yɛlɛ anwodozo noko kɛ Nyamenle edwɛkɛ ne bara nu dahuu

Baebolo ne kilehile diedi nu wɔ ndenle nwiɔ azo. Mɔɔ limoa, “diedi a le anwodozo mɔɔ yɛfa yɛkendɛ debie mɔɔ yɛ nye la zo” la. (Hib. 11:1a) Saa ɛlɛ diedi a, ɛbalie wɔali kɛ debie biala mɔɔ Gyihova ka la le nɔhalɛ yɛɛ mɔɔ yeha yedo ɛkɛ la bara nu. Kɛ neazo la, Gyihova zele Yizilayɛma kɛ: “Saa ɛkɛhola ɛkɛzɛkye ngyekyeleɛ mɔɔ wɔ me nee alehyenlɛ nee aledwolɛ avinli na mekɛ dwu a aleɛ ɛnrɛhye yɛɛ aleɛ ɛnrɛdwo a, ɛnee noko awie kola sɛkye ngyekyeleɛ mɔɔ wɔ me nee me sonvolɛ Devidi avinli la.” (Gyɛ. 33:20, 21) Asoo wɔdwenle nwolɛ ɛlɛ kɛ ewia ne ɛnrɛvi anzɛɛ ɛnrɛhɔdɔ, na yemɔti alehyenlɛ nee aledwolɛ ɛnrɛra bieko ɔ? Saa ɛdie ɛdi kɛ azɛlɛ ne bahɔ zo abɔ ewia ne anwo mgbɔlɔka ayia a, ɛnea a Bɔvolɛ ne mɔɔ ɔhyehyɛle ninyɛne ɛhye mɔ la ɛnrɛli ye ɛwɔkɛ zo ɔ? Ɔbali zo somaa!​—Aye. 55:10, 11; Mat. 5:18.

Mɔɔ tɔ zo nwiɔ, diedi a le “ninyɛne mɔɔ yɛnnwu bɛ noko nwolɛ daselɛ da ali wienyi la.” Bɛha diedi nwo edwɛkɛ kɛ “ninyɛne mɔɔ yɛnnwu bɛ” na yɛdi “nwolɛ daselɛ kpalɛ” la. (Hib. 11:1b; ɔbdw.) Adenle boni azo? Fa ye kɛ kakula bie ɛbiza wɔ kɛ, ‘Kɛzi ɛkola ɛnwu ye kɛ anwoma wɔ ɛkɛ ɛ?’ Ɔwɔ nuhua kɛ ɛtɛnwunle anwoma ɛlɛ, noko ɛbabɔ mɔdenle wɔaboa kakula ne wɔamaa yeadwenledwenle daselɛ mɔɔ wɔ ɛkɛ la anwo​—le kɛ ɛnwomenle mɔɔ yɛdie, ninyɛne mɔɔ anwoma yɛ nee mɔɔ bokɛboka nwo la. Saa kakula ne die daselɛ ɛhye mɔ to nu a, ɔbalie yeali kɛ ninyɛne mɔɔ ɛnyelɛ ɛnnwu bɛ la wɔ ɛkɛ. Zɔhane ala a, diedi gyi daselɛ mɔɔ wɔ ɛkɛ la azo a.​—Wlo. 1:20.

AHONLE KPALƐ NWO HYIA

Kɛmɔ diedi gyi daselɛ kpalɛ zo la ati, amaa wɔanyia diedi la, ɔwɔ kɛ ɛnyia “nɔhalɛ ne anwo nɔhalɛ ndelebɛbo.” (1 Tim. 2:4) Noko yɛnyia ɛhye a, ɔtɛwiele. Ɛzoanvolɛ Pɔɔlo hɛlɛle kɛ: ‘Ɔwɔ kɛ awie nyia diedi wɔ ye ahonle nu.’ (Wlo. 10:10) Ɔnle kɛ awie die nɔhalɛ ne to nu ala, eza ɔwɔ kɛ ɔbu ye kɛ ɔsonle bolɛ. Ɛhye a baha ye yeamaa yeala ye diedi ali na yeayɛ mɔɔ sɔ Nyamenle anye a. (Gye. 2:20) Awie mɔɔ ɔmbu nɔhalɛ ne kɛ ɔsonle bolɛ la babu ɔ nye agua daselɛ kpalɛ  zo ɔlua ye adwenle bie mɔɔ ɔlɛ la ti anzɛɛ ye atiakunluwɔzo ɛtane bie ati. (2 Pita 3:3, 4; Dwu. 18) Ɛhye ati a wɔ tete ne, tɛ menli mɔɔ nwunle nwanwane ninyɛne la amuala a nyianle diedi la. (Ɛdi. 14:11; Dwɔn 12:37) Nyamenle sunsum nwuanzanwuanza ne maa menli mɔɔ anye die nɔhalɛ ne anwo tɛla adalɛ ne la nyia diedi.​—Gal. 5:22; 2 Tɛs. 2:10, 11.

KƐZI DEVIDI NYIANLE DIEDI KPOLE LA

Menli mɔɔ ɛnee bɛ diedi gyi ye pi la ko a le Belemgbunli Devidi. (Hib. 11:32, 33) Noko akee, tɛ awie biala mɔɔ wɔ Devidi abusua nu la a ɛnee lɛ diedi zɔhane bie a. Kɛ neazo, mekɛ bie Yilayabe mɔɔ le Devidi adiema nrenyia kpanyinli la anla diedi ali. Mɔɔ Devidi hanle kɛ ɔ nee Golayate kaho la, ɔvale ɔ nwo ɛya na ɔdeanle ye. (1 Sa. 17:26-28) Bɛnva diedi bɛnwo, ɔti ɛnee Devidi diedi ne gyi ɔ nee Nyamenle agɔnwolɛvalɛ ne azo.

Edwɛndolɛ 27, Devidi hanle kɛzi ɔnyianle diedi kpole ɛhye la anwo edwɛkɛ. (Ngy. 1) Devidi dwenledwenlenle anwubielɛ mɔɔ ɔnyianle ye dɛba nee kɛzi Gyihova nee ye agbɔvolɛ lile la anwo kpalɛ. (Ngy. 2, 3) Ɔ nye zɔle ngyehyɛleɛ mɔɔ bɛfa bɛsonle Gyihova la kpalɛ. (Ngy. 4) Devidi nee ɔ gɔnwo mɔ diedima zonlenle Nyamenle wɔ ndanlɛsua ne anu. (Ngy. 6) Ɔzɛlɛle Gyihova ɛsesebɛ wɔ asɔneyɛlɛ nu. (Ngy. 7, 8) Ɛnee eza Devidi kulo kɛ bɛkilehile ye Nyamenle adenle ne. (Ngy. 11) Ɛnee Diedi le subane bie mɔɔ ɔhyia Devidi kpalɛ, ɔti ɔhanle kɛ: ‘Saa menlɛ diedi a, anrɛɛ nienwu a mewɔ a?’​—Ngy. 13.

KƐZI ƐBAMIA WƆ DIEDI NE ANU LA

Ɛbahola wɔanyia diedi kɛ Devidi la, saa ɛsukoa kɛ ɛbanyia ye adwenle nee ye subane mɔɔ bɛha nwolɛ edwɛkɛ wɔ Edwɛndolɛ 27 la bie a. Kɛmɔ diedi gyi nɔhalɛ ndelebɛbo zo la ati, mekɛ mɔɔ yɛlɛsukoa Nyamenle Edwɛkɛ ne nee Baebolo nwo mbuluku fane dɔɔnwo la, ɔnrɛyɛ se kɛ yɛbala Nyamenle sunsum ne ma ɛhye ali. (Edw. 1:2, 3) Nyia mekɛ dwenledwenle mɔɔ ɛbazukoa la anwo. Saa yɛdwenledwenle mɔɔ yɛsukoa la anwo a, ɔmaa anyezɔlɛ mɔɔ yɛlɛ yɛmaa Gyihova la yɛ kpole. Ɛhye bamaa yɛala diedi kpole ali ɔlua debiezukoalɛ nee daselɛlilɛ mɔɔ yɛbahɔ ye dahuu la azo. (Hib. 10:23-25) Eza saa ‘yɛyɛ asɔne dahuu na yɛ sa nu ando’ a, ɛnee yɛlɛkile kɛ yɛlɛ diedi. (Luku 18:1-8) Ɛhye ati, “yɛ asɔne dahuu” na nyia anwodozo bɔkɔɔ wɔ Gyihova anu kɛ “ɔdwenle [ɛ] nwo.” (1 Tɛs. 5:17; 1 Pita 5:7) Diedi ka yɛ ɔmaa yɛyɛ mɔɔ le kpalɛ, yɛɛ mekɛ mɔɔ yɛlɛyɛ mɔɔ le kpalɛ la yɛ diedi ne yɛ kpole.​—Gye. 2:22.

NYIA GYISƐSE ANU DIEDI

Nɔe ne mɔɔ aleɛ kye a Gyisɛse bawu la, ɔzele ye ɛdoavolɛma kɛ: “Bɛnyia diedi wɔ Nyamenle anu; bɛnyia diedi wɔ medame noko me nu.” (Dwɔn 14:1) Yemɔti, ɔwɔ kɛ yɛnyia Gyihova nee  Gyisɛse anu diedi. Kɛ ɔkɛyɛ na wɔanyia Gyisɛse anu diedi ɛ? Bɛmaa yɛzuzu ndenle nsa anwo.

Gyisɛse mɔɔ yɛnyia ye nuhua diedi la kile duzu?

Mɔɔ limoa, bu ɛkpɔnedeɛ ne kɛ ɔle ahyɛlɛdeɛ mɔɔ Nyamenle ɛva ɛmaa wɔ. Ɛzoanvolɛ Pɔɔlo hanle kɛ: “Mede [aze] wɔ Nyamenle Ara ne mɔɔ hulole me na ɔvale ɔ nwo ɔmaanle me la anu diedi nu.” (Gal. 2:20) Saa ɛnyia Gyisɛse anu diedi a, ɔkile kɛ ɛdie ɛdi bɔkɔɔ kɛ ɛkpɔnedeɛ ne le wɔ ɛdeɛ. Yemɔ a bɛlua zo bɛva wɔ ɛtane bɛhyɛ wɔ na yemaa wɔnyia anyelazo kɛ ɛbadɛnla aze dahuu a. Ɔda ali bɔkɔɔ kɛ, ɛlɔlɛ mɔɔ Nyamenle lɛ maa wɔ la le kpole kpalɛ. (Wlo. 8:32, 38, 39; Ɛfɛ. 1:7) Ɛhye baboa wɔ yeamaa wɔaye adwenle ɛtane mɔɔ ɛlɛ wɔ ɛ nwo la wɔavi ɛ ti anu.​—2 Tɛs. 2:16, 17.

Mɔɔ tɔ zo nwiɔ, dua Gyisɛse afɔlebɔlɛ ne azo bikye Gyihova wɔ asɔneyɛlɛ nu. Ɔlua ɛkpɔnedeɛ ne ati, yɛbahola yɛazɛlɛ Gyihova na ‘yɛava akɛnrasesebɛ yɛabikye ɛlolɛ belemgbunli ebia ne, amaa bɛanwu yɛ anwunvɔne na yɛanwu ɛlolɛ ne mɔɔ baboa yɛ wɔ mekɛ kpalɛ nu la.’ (Hib. 4:15, 16; 10:19-22) Asɔneyɛlɛ maa kpɔkɛ mɔɔ yɛbɔ kɛ yɛbakpo ɛtaneyɛlɛ la yɛ kpole.​—Luku 22:40.

Mɔɔ tɔ zo nsa, tie Gyisɛse. Ɛzoanvolɛ Dwɔn hɛlɛle kɛ: “Awie biala mɔɔ die Ralɛ ne di la lɛ dahuu ngoane; mɔɔ ɛndie Ralɛ ne la ɛnrɛnyia ngoane, emomu Nyamenle ɛyavalɛ wɔ ɔ nwo zo.” (Dwɔn 3:36) Yɛ ye nzonlɛ kɛ Dwɔn hanle kɛ saa awie ɛnlɛ diedi a ɔkile kɛ ɔnyɛ tieyɛ. Ɛhye ati, saa yɛtie Gyisɛse a ɔkile kɛ yɛlɛ diedi wɔ ye nu. Saa yɛdi “Kelaese mɛla ne” mɔɔ le Gyisɛse ngilehilelɛ nee ye mɛla ne mɔ amuala azo a, ɛnee yɛlɛtie ye. (Gal. 6:2) Eza yɛtie Gyisɛse ɔlua adehilelɛ mɔɔ ɔdua “akɛlɛ nɔhavo nee nrɛlɛbɛvolɛ ne” anwo zo ɔfa ɔmaa yɛ mɔɔ yɛbali zo la azo. (Mat. 24:45) Saa yɛtie Gyisɛse a, yɛbanyia anwosesebɛ yɛagyinla ngyegyelɛ mɔɔ le kɛ ahumu la anloa.​—Luku 6:47, 48.

“BƐNYI WƆ BƐ DIEDI NWUANZANWUANZA NE ANU”

Mekɛ bie, nrenyia ko deanle nu hanle hilele Gyisɛse kɛ: “Melɛ diedi! Ɛleka mɔɔ mehyia diedi la boa me!” (Maake 9:24) Ɛnee nrenyia ɛhye mɔɔ ɔbɛlɛ ɔ nwo aze la lɛ diedi ekyi, noko ɔliele ɔdole nu kɛ ɔhyia diedi kpole. Le kɛ nrenyia ɛhye la, ɔdwu mekɛ ne bie a yɛhyia diedi kpole. Na yɛ muala yɛbahola yɛamia yɛ diedi nu ɛnɛ. Kɛ mɔɔ yɛnwu ye la, saa yɛsukoa Nyamenle Edwɛkɛ ne na yɛdwenledwenle nwolɛ a, ɔmaa yɛ diedi nu mia, na ɔmaa anyezɔlɛ mɔɔ yɛlɛ yɛmaa Gyihova la yɛ kpole. Eza saa yɛ nee yɛ mediema diedima bɔ nu sonle Gyihova, yɛka yɛ diedi ne anwo edwɛkɛ yɛkile awie mɔ na yɛyɛ asɔne dahuu a, yɛ diedi bayɛ kpole. Mɔɔ tɛla biala la, saa yɛmaa yɛ diedi yɛ kpole a, yɛbanyia ahatualɛ mɔɔ tɛla biala. Nyamenle Edwɛkɛ ne tu yɛ folɛ kɛ: “Alɔvolɛ, bɛnyi wɔ bɛ diedi nwuanzanwuanza ne anu . . . na bɛva bɛ nwo bɛzie Nyamenle ɛlɔlɛ ne anu.”​—Dwu. 20, 21.