Wulu kɔ nuhua edwɛkɛ ne azo

Wulu kɔ nuninyɛne ne azo

 YƐ TETEDWƐKƐ

Kɛzi Bɛlimoale Bɛluale Belemgbunlililɛ Ma Ne Wɔ Portugal La

Kɛzi Bɛlimoale Bɛluale Belemgbunlililɛ Ma Ne Wɔ Portugal La

MƆƆ Atlantic nyevile azɛlɛkye ne ɛlɛbɔ meli ne mɔɔ ɛlɛkɔ Europe la, ɛnee adendulɛma ne anu ko, George Young, ɛlɛfa anyelielɛ adwenle Belemgbunlililɛ ma ne mɔɔ ɔluale ye wɔ Brazil la anwo. * Noko, eza Adiema Young dwenlenle ye gyimalilɛ fofolɛ ne anwo​—azɛlɛsinli ngakyile mɔɔ bɛtɛyɛle nuhua gyima ɛlɛ mɔɔ wɔ Spain nee Portugal la. Ɛnee ɔ nye la kɛ saa ɔkɔdwu a, ɔbahyehyɛ trate 300,000 na yeayɛ ngyehyɛleɛ yeamaa Adiema J. F. Rutherford amaa ɛdendɛlɛ!

George Young vale nyevile zo fane dɔɔnwo dule adenle bɔle edwɛkpa nolo

Mɔɔ Adiema Young hɔdwule Lisbon wɔ nyenyesuo mekɛ nu wɔ 1925 la, ɛnee tɛnlabelɛ ne ɛnle kpalɛ fee. Mɔɔ republican maanyɛlɛ eku ne maanle sonla ko tumililɛ rale awieleɛ wɔ 1910 la, ɔmaanle tumi mɔɔ ɛnee Kateleke Asɔne ne lɛ la hanle aze kpalɛ. Menli ne nyianle fanwodi dɔɔnwo, noko basabasayɛlɛ hɔle zo wɔ maanle ne anu.

Mɔɔ Adiema Young yɛle Adiema Rutherford ɛdendɛlɛ ne anwo ngyehyɛleɛ wiele la, arane ne lile mɛla kyengye bie ɔluakɛ awie mɔ bɔle mɔdenle kɛ bɛtu ye. British and Foreign Bible Society kɛlɛhɛlɛvolɛ ne zele Adiema Young kɛ, ye biala anu ɔbayia dwazotia dɔɔnwo. Noko, Adiema Young hɛlɛle kɛlata bizale Camões Secondary School ne ɛleka mɔɔ bɛkpundikpundi bɛ agbɔkɛ nu la, na bɛvale bɛmaanle ye!

Akee May 13​—kenle mɔɔ Adiema Rutherford bamaa ye ɛdendɛlɛ ne la dwule. Anyelielɛ ne yɛle kpole! Bɛluale ngɛlata mɔɔ bɛva bɛbetɛbeta azua nwo nee adwelie ngɛlata zo bɛbɔle bagua nu ɛdendɛlɛ mɔɔ ati se, “How to Live on the Earth Forever” la nolo. Ɛkɛ ne ala ɛzonlenlɛ nu dwazotiama hɛlɛle edwɛkɛ wɔ bɛ adwelie kɛlata ne anu bɔle bɛ kengavolɛma kɔkɔ kɛ “adalɛ ngapezoma” fofolɛ bie mɔ ɛra. Dwazotiama ne eza hyehyɛle brohyua apenle dɔɔnwo mɔɔ nuhua edwɛkɛ ne tia Adiema Rutherford ngilehilelɛ ne la wɔ agbɔkɛ nu ɛkpundinlɛ sua ne anyunlu.

Noko, menli kɛyɛ 2,000 yile ayia ɛleka ne, yɛɛ bɛammaa menli kɛyɛ apenle nwiɔ anwolo ɔluakɛ ɛnee ɛkɛ ne ɛyi. Tievolɛma bie mɔ vole kpolike mɔɔ bɛva nyɛma bɛyɛ mɔɔ wɔ sua ne anu yɛɛ bie mɔ dɛnlanle agbɔkɛ nu ɛkpundinlɛ milahyinli ne mɔ azo.

Noko bɛyiale ngyegyelɛ. Dwazotiama ne deɛdeanle nu na bɛbubule mbia ne mɔ. Noko, Adiema Rutherford ziele ɔ nwo dii na ɔyɛle bɛtɛɛ ɔvole ɛkponle bie azo amaa bɛade ɔ ne kpalɛ. Mɔɔ ɔwiele kɛyɛ nɔɔzo bulu nee nwiɔ la, anyelielɛma mɔɔ bo 1,200 la vale bɛ aluma nee adelɛse maanle bɛ amaa bɛamaa bɛ Baebolo nwo mbuluku. Aleɛ hyenle la, bɛhɛlɛle Adiema Rutherford ɛdendɛlɛ ne anwo edwɛkɛ wɔ O Século adwelie kɛlata ne anu.

Ɔkadwu September 1925 la, bɛbɔle ɔ bo kɛ bɛyɛ The Watch Tower ne wɔ Portuguese nu wɔ Portugal. (Ɛnee bɛlimoa bɛyɛ Portuguese ɛdeɛ ne  dɛbadɛba wɔ Brazil.) Mekɛ zɔhane, Baebolo Sukoavo Virgílio Ferguson mɔɔ wɔ Brazil la yɛle ngyehyɛleɛ kɛ ɔtu yeahɔ Portugal yeahɔboa Belemgbunlililɛ gyima ne. Ɛnee yelimoa ɔ nee Adiema Young ɛyɛ gyima wɔ Baebolo Sukoavoma Bɛtɛle ekyi ne mɔɔ wɔ Brazil la anu. Yeangyɛ Virgílio nee ɔ ye Lizzie dule adenle hɔbokale Adiema Young anwo bieko. Adiema Ferguson rale mekɛ kpalɛ nu ɔluakɛ, ɛnee ɔnrɛhyɛ Adiema Young bahɔha edwɛkɛ ne wɔ ɛleka ngakyile mɔɔ Soviet Union boka nwo la.

Lizzie nee Virgilio Furguson tumi kɛlata, 1928

Mɔɔ sogyama dule arane ne na bɛmaanle bɛ nuhua ko ralile tumi wɔ Portugal la, ɔmaanle dwazotia ne yɛle kpole. Adiema Ferguson nyianle akɛnrasesebɛ boale Baebolo Sukoavoma ekyi mɔɔ wɔ ɛkɛ la ɔmaanle bɛyɛle bɛ gyima ne. Ɔzɛlɛle adenle amaa bɛayɛ debiezukoalɛ wɔ ye sua nu dahuu. Wɔ October 1927, bɛliele ye ademizalɛ ne bɛdole nu.

Mɔɔ arane ne yɛle kyengye wɔ ɛvolɛ mɔɔ limoa bɔbɔ anu la, menli kɛyɛ 450 mɔɔ bɛwɔ Portugal la ɛnee kɛla The Watch Tower ne bie. Bieko, bɛluale trate nee mbuluku ngyikyi zo bɛmaanle nɔhalɛ ne dɛlɛle wɔ Portugal Belemgbunlimaanle ne anu​—Angola, Azores, Cape Verde, East Timor, Goa, Madeira, yɛɛ Mozambique.

Wɔ 1920 awieleɛ, Manuel da Silva Jordão, tola zo neavolɛ bɛlɛvo bie mɔɔ vi Portugal la rale Lisbon. Ɔdiele ɛdendɛlɛ mɔɔ Adiema Young maanle ye wɔ mekɛ mɔɔ ɛnee ɔwɔ Brazil la. Ndɛndɛ ne ala ɔnwunle kɛ nɔhalɛ ne ɛne na ɔbɔle mɔdenle kɛ ɔboa Adiema Ferguson amaa yeadɛlɛ edwɛkɛhanlɛ gyima ne anu. Amaa Manuel ayɛ zɔ la, ɔbɔle ɔ bo kɛ ɔsonle kɛ adekpakyelɛnli. Ninyɛne ɛpelentelɛ nee Baebolo nwo mbuluku ɛhyehyɛlɛ nwo ngyehyɛleɛ kpalɛ mɔɔ bɛyɛle la ati, Lisbon asafo fofolɛ ne nyinli!

Ɛnee ɔwɔ kɛ Adiema Ferguson nee ɔ ye sia kɔ Brazil wɔ 1934. Noko ɛnee bɛlua nɔhalɛ ma ne. Mɔɔ ɛnee basabasayɛlɛ ɛlɛkɔ zo wɔ Europe wɔ mekɛ mɔɔ Spain Maanle Konle ne nee Ewiade Konle II gyi nu kpalɛ la, mediema ekpunli bie mɔɔ wɔ Portugal mɔɔ bɛdi nɔhalɛ la bɔle mɔdenle nyianle anyuhɔlɛ wɔ sunsum nu. Mekɛ bie, ɛnee bɛle kɛ senle mɔɔ ɛlɛnu la, noko mɔɔ John Cooke, edwɛkpatɛlɛvolɛ mɔɔ hɔle Geleade sukulu limoa rale wɔ 1947 la, ekpunli ne nyianle anwosesebɛ bieko. Yemɔ anzi, Belemgbunlililɛ nolobɔlɛma dodo hɔle ɔ nyunlu ndɛndɛ. Mɔɔ arane ne vale ɔ sa dole Gyihova Alasevolɛ gyima ne azo wɔ 1962 bɔbɔ la, bɛ dodo ne hɔle ɔ nyunlu. Mɔɔ bɛliele Gyihova Alasevolɛ bɛdole nu wɔ mɛla nu wɔ December 1974 la, ɛnee nolobɔlɛma mɔɔ wɔ maanle ne anu la bo 13,000.

Ɛnɛ, Belemgbunlililɛ nolobɔlɛma mɔɔ ɛlɛbɔ Nyamenle Belemgbunlililɛ ne anwo edwɛkpa ne nolo wɔ Portugal nee mbɔra ngakyile mɔɔ bɛka Portuguese mɔɔ Azores nee Madeira boka nwo la bo 50,000. Menli mɔɔ hɔdiele Adiema Rutherford ɛdendɛlɛ kɛnlɛma ne bie wɔ 1925 la bie mɔ nlɔnra boka nolobɔlɛma mɔɔ wɔ ɛkɛ ne ɛnɛ la anwo.

Yɛyɛ Gyihova nee mediema mrenyia nee mraalɛ ɛhye mɔ mɔɔ vale akɛnrasesebɛ lile gyima ne anyunlu wɔ tete ne la mo kɛ bɛyɛle ‘sonvolɛma bɛmaanle Kelaese Gyisɛse wɔ maanle maanle ne anu’ la.​—Wlo. 15:15, 16.​—Yɛ tetedwɛkɛ mɔɔ vi Portugal.

^ ɛden. 3 Nea edwɛkɛ “Bɛyɔba Gyima Ne Dɔɔnwo Wɔ Ɛkɛ Mɔɔ Ɔwɔ Kɛ Bɛyɛ A” mɔɔ wɔ May 15, 2014, Ɛzinzalɛ Arane ne m. 31-32 la.