Wulu kɔ nuhua edwɛkɛ ne azo

Wulu kɔ nuninyɛne ne azo

Kɛzi Yɛwula Subane Fofolɛ Ne Dahuu La

Kɛzi Yɛwula Subane Fofolɛ Ne Dahuu La

“Bɛva subane fofolɛ ne . . . bɛwula.”​—KƆL. 3:10.

EDWƐNE: 126, 28

1, 2. (a) Kɛmɔti a yɛbahola yɛala subane fofolɛ ne ali ɛ? (b) Subane fofolɛ ne foa boni mɔ a wɔ Kɔlɔsaema 3:10-14 a?

“SUBANE fofolɛ ne.” Zɔhane edwɛkɛ ne finde fane nwiɔ wɔ New World Translation of the Holy Scriptures ne anu. (Ɛfɛ. 4:24; Kɔl. 3:10) Ɔkile subane ne mɔɔ “bɛbɔle ye wɔ Nyamenle ɛhulolɛ zo” la. Yɛbahola yɛala subane fofolɛ ɛhye ali. Duzu ati ɔ? Ɔluakɛ Gyihova bɔle alesama kɛ ye ɛsaso, ɔti yɛbahola yɛala ye subane ngɛnlɛma ne mɔ ali.​—Mɔl. 1:26, 27; Ɛfɛ. 5:1.

2 Kɛmɔ yɛnyia sinlidɔlɛ yɛvi yɛ awovolɛ mɔɔ limoa ɛkɛ la ati, atiakunluwɔzo ɛtane gyegye yɛ. Ɛleka mɔɔ yɛde la noko kola nyia yɛ nwo zo tumi. Noko, Gyihova anwunvɔnezelɛ nee ye moalɛ ti, yɛbahola yɛayɛ menli mɔɔ ɔkpondɛ kɛ yɛyɛ la. Amaa yɛahola yɛayɛ zɔ la, yɛbazuzu subane fofolɛ ne foa ngakyile mɔɔ sunsum ne maanle ɛzoanvolɛ Pɔɔlo hɛlɛle nwolɛ edwɛkɛ la anwo. (Kenga Kɔlɔsaema 3:10-14.) Eza yɛbazuzu kɛzi yɛbahola yɛala subane ɛhye mɔ ali wɔ yɛ ɛzonlenlɛ gyima ne anu la anwo.

“BƐ MUALA BƐLE MENLI KO”

3. Debie ko mɔɔ maa yɛnwu subane fofolɛ ne la a le boni?

3 Mɔɔ Pɔɔlo maanle yɛ anwosesebɛ kɛ yɛwula subane fofolɛ  ne la, eza ɔhanle kɛ nyeyenu mɔɔ yɛnyɛ la le debie ko mɔɔ ɔmaa bɛnwu kɛ yɛwula subane fofolɛ ne a. Ɔhanle kɛ: “Gilikinli anzɛɛ Dwuunli, mrenyia zo mɔɔ bɛpɛ anzɛɛ bɛtɛpɛle, ɛyɛvolɛ, Siteanenli, akɛlɛ anzɛɛ dehelɛ ɛnle ɛkɛ.” * Duzu atia a ɔnle kɛ yɛmaa abusua mɔɔ yɛvi nu nee yɛ maanle anzɛɛ gyinlabelɛ mɔɔ yɛlɛ la fa mgbakyemgbakyenu ba asafo ne anu ɛ? Ɔluakɛ Kelaese nɔhalɛ ɛdoavolɛma ‘amuala le menli ko.’​—Kɔl. 3:11; Gal. 3:28.

4. (a) Kɛzi ɔwɔ kɛ Gyihova azonvolɛ nee awie mɔ di ɛ? (b) Duzu a bahola azɛkye yɛ Kilisiene koyɛlɛ ne a?

4 Menli mɔɔ wula subane fofolɛ ne la bu bɛ mediema diedima nee menli mɔɔ ɛnle diedima, ɔnva nwo maanle anzɛɛ abusua mɔɔ bɛvi nu la. (Wlo. 2:11) Ɛhye kola yɛ ngyegyelɛ wɔ ewiade ne ɛleka bie mɔ. Kɛ neazo la, mekɛ bie, wɔ South Africa, arane ne maanle menli mɔɔ ka aneɛ ngakyile la dɛnlanle ɛleka bie mɔ. Menli dɔɔnwo mɔɔ de ɛkɛ mɔɔ Alasevolɛ boka nwo la tɛte zɔhane ɛleka ne mɔ. Ɛnee Neazo Eku ne kulo kɛ ɔmaa mediema ne mɔ anwosesebɛ kɛ “bɛbuke bɛ ahonle nu.” Ɔti wɔ October 2013, bɛyɛle ngyehyɛleɛ titili bie mɔɔ bamaa mediema mɔɔ ka aneɛ ngakyile la anwu bɛ nwo kpalɛ la. (2 Kɔl. 6:13, ɔbdw.) Duzu a ɛnee ɔwɔ kɛ bɛyɛ a?

5, 6. (a) Amaa koyɛlɛ mɔɔ wɔ Nyamenle menli avinli la adɛnla ɛkɛ la, ngyehyɛleɛ boni a bɛyɛle a? (Nea mɔlebɛbo nvoninli ne.) (b) Duzu a ɛvi nu ɛra a?

5 Bɛyɛle ngyehyɛleɛ amaa asafo nwiɔ anu amra mɔɔ bɛka aneɛ ngakyile anzɛɛ bɛvi maanle gyɛne zo la ahola ayia wɔ dapɛne awieleɛ bie mɔ. Mediema mɔɔ wɔ asafo nwiɔ ɛhye mɔ anu la bɔle nu hɔle daselɛlilɛ, debiezukoalɛ na bɛhɔkpɔlale bɛ nwo ngoko wɔ bɛ azua nu. Asafo dɔɔnwo yɛle bie, na ɔfese ne asa hanle ngyehyɛleɛ ɛhye anwo amaneɛbɔlɛ ngɛnlɛma dɔɔnwo vile menli bɔbɔ mɔɔ ɛnle Alasevolɛ la ɛkɛ. Kɛ neazo la, ɛsɔfo ko hanle kɛ, “Menle Dasevolɛ, noko mebaha kɛ bɛlɛ ngyehyɛleɛ kpalɛ mɔɔ bɛfa bɛyɛ edwɛkɛhanlɛ gyima ne a, yɛɛ koyɛlɛ wɔ bɛ avinli.” Kɛzi ngyehyɛleɛ ne hanle Alasevolɛ ne mɔ ɛ?

6 Alimoa ne, ɛnee adiema raalɛ Noma mɔɔ ka Xhosa aneɛ la ɛngulo kɛ ɔto ɛsalɛ ɔfɛlɛ alɔfolɛ mɔɔ bɛwɔ Nrelenza asafo nu la ɔmaa bɛba ye sua nu. Noko mɔɔ ɔ nee Alasevolɛ mɔɔ bɛle alɔfolɛ hɔle daselɛlilɛ na ɔhɔkpɔlale bɛ wɔ bɛ azua nu la, ɔhanle kɛ, “Bɛle menli kɛ yɛdayɛ ala la!” Mɔɔ ɔdwule ye asafo mɔɔ bɛka Xhosa aneɛ anwo zo kɛ bɛbalie asafo mɔɔ bɛka Nrelenza ɛyɛvolɛ la, ɔdonle aleɛ na ɔdole ɛsalɛ ɔvɛlɛle nyɛvolɛ bie mɔ. Ɛnee kpanyinli ko mɔɔ ɔle bolɔfolɛ la boka ye nyɛvolɛ ne mɔ anwo. Noma hanle kɛ, “Me nye liele kɛ ɛnee ɔkulo kɛ ɔtɛnla wolɔba ebia bie mɔɔ wɔ aze azo la.” Ɔlua ngyehyɛleɛ ɛhye mɔɔ bɛyɛle la azo, mediema dɔɔnwo ɛlɛnyia agɔnwolɛma fofolɛ mɔɔ bɛvi maanle ngakyile zo la.

“ANWUNVƆNEZELƐ, ATIAKUNLUKƐNLƐMA”

7. Duzu ati a ɔwɔ kɛ yɛkɔ zo yɛda anwunvɔnezelɛ ali a?

7 Saa Seetan ewiade ne ɛtɛkɔle awieleɛ a, yɛbahɔ zo yɛayia sɔnea dɔɔnwo. Gyima mɔɔ yɛnnyia ye yɛnyɛ, anwodolɛ mɔɔ anu yɛ se, ɛkpɔlɛ, esiane, yɛ ninyɛne mɔɔ nwule wua anzɛɛ ninyɛne dɔɔnwo gyegye yɛ. Amaa yɛahola yɛaboa yɛ nwo wɔ yɛ amaneɛnwunlɛ anzɛɛ ngyegyelɛ nu la ɔwɔ kɛ yɛse anwunvɔne. Anwunvɔnezelɛ baha yɛ amaa yɛala atiakunlukɛnlɛma ali. (Ɛfɛ. 4:32) Subane fofolɛ ne  foa ɛhye mɔ bamaa yɛazukoa Nyamenle na yɛakyekye awie mɔ arɛle.​—2 Kɔl. 1:3, 4.

8. Saa yɛda anwunvɔnezelɛ nee atiakunlukɛnlɛma ali wɔ asafo ne anu a duzu a fi nu ba a? Maa neazo.

8 Kɛzi yɛbahola yɛala anwunvɔnezelɛ ali yɛahile nyɛvolɛ anzɛɛ menli mɔɔ esiane ɛdo bɛ wɔ yɛ asafo ne anu la ɛ? Ɔwɔ kɛ yɛfa bɛ agɔnwolɛ na yɛmaa bɛte nganeɛ kɛ bɛ nwo hyia wɔ asafo ne anu. (1 Kɔl. 12:22, 25) Fa mɔɔ dole Dannykarl mɔɔ vi Philippines hɔle Japan la kɛ neazo. Wɔ ye gyima nu, bɛ nee ye anli kɛ gyimayɛvoma mɔɔ vi ɛkɛ ne la. Akee ɔhɔle Gyihova Alasevolɛ ne mɔ debiezukoalɛ ne bie. Dannykarl ka kɛ, “Asɛɛ awie biala le Japanli, noko bɛliele me kɛnlɛma kɛ asɛɛ bɛze me dɛba.” Bɛlale atiakunlukɛnlɛma ali bɛhile ye dahuu, ɛhye maanle ɔnyianle anyuhɔlɛ wɔ sunsum nu. Bɛzɔnenle ye, na kɛkala ɔlɛsonle kɛ asafo nu kpanyinli. Asafo mgbanyima mɔɔ nee Dannykarl nee ɔ ye Jennifer ɛlɛsonle la bu bɛ kɛ bɛle nyilalɛ bɛmaa asafo ne. Mgbanyima ne mɔ ka bɛ nwo edwɛkɛ kɛ, “Kɛ adekpakyelɛma la, bɛmkpondɛ ninyɛne mgbole yɛɛ bɛyɛ neazo kɛnlɛma kɛ bɛlɛfa Belemgbunlililɛ ne bɛalimoa la.”​—Luku 12:31.

9, 10. Maa neazo mɔɔ kile kɛ saa yɛda anwunvɔnezelɛ ali wɔ daselɛlilɛ nu a debie kpalɛ fi nu ba la.

9 Saa yɛlɛka Belemgbunlililɛ edwɛkɛ ne yɛahile awie mɔ a, yɛnyia adenle yɛyɛ “kpalɛ yɛmaa menli kɔsɔɔti.” (Gal. 6:10) Kɛmɔ Alasevolɛ dɔɔnwo se nyɛvolɛ anwunvɔne la ati bɛbɔ mɔdenle bɛsukoa aneɛ fofolɛ. (1 Kɔl. 9:23) Nyilalɛ dɔɔnwo vi ɛhye anu ɛra. Kɛ neazo la adiema raalɛ ko mɔɔ le adekpakyelɛnli mɔɔ bɛfɛlɛ ye Tiffany mɔɔ vi Australia la zukoale Swahili amaa yeaboa asafo ko mɔɔ bɛfa Swahili aneɛ bɛdi gyima wɔ sua Brisbane azo la. Tiffany vɛle na yeahola yeazukoa aneɛ ne, noko yenyia nyilalɛ dɔɔnwo. Ɔka kɛ: “Saa ɛkulo kɛ ɛ nye die wɔ ɛzonlenlɛ gyima ne anu a, ɔwɔ kɛ ɛkɔ asafo mɔɔ bɛka aneɛ gyɛne la anu. Ɔle kɛ wɔdu adenle noko ɛde wɔ sua ne azo la. Ɔmaa ɛnwu yɛ ewiade amuala mediemayɛlɛ ne nee koyɛlɛ mɔɔ wɔ yɛ avinli la kpalɛ.”

Duzu a maa Kilisiene azonvolɛ boa nyɛvolɛ a? Nea ɛdendɛkpunli 10)

10 Fa abusua bie mɔɔ wɔ Japan la noko kɛ neazo. Bɛ ra raalɛ Sakiko ka kɛ: “Wɔ ɛvolɛ 1990 ne anu, ɛnee yɛta yɛyia nyɛvolɛ mɔɔ bɛle Brazilma la wɔ daselɛlilɛ nu. Saa yɛkenga ngɛlɛlera le kɛ Yekile 21:3, 4 anzɛɛ Edwɛndolɛ 37:10, 11, 29, yɛfi bɛ Portuguese Baebolo ne anu yɛkile bɛ a, bɛtie ye kpalɛ na ɔyɛ a bɛsu.” Noko abusua ne anwunvɔnezelɛ ne anga ɛkɛ ne ala. Sakiko ka kɛ, “Mɔɔ yɛ abusua ne nwunle  kɛ bɛkulo kɛ bɛsukoa ninyɛne dɔɔnwo la, yɛbɔle ɔ bo kɛ yɛsukoa Portuguese.” Nzinlii, abusua ne boale maanle bɛdele Portuguese asafo. Abusua ne ɛboa nyɛvolɛ dɔɔnwo yemaa bɛrayɛ Gyihova azonvolɛ wɔ ɛvolɛ dɔɔnwo anu. Sakiko toa zo kɛ, “Yɛvɛle kpalɛ na yɛahola yɛazukoa Portuguese, noko nyilalɛ ne tɛla mɔdenle mɔɔ yɛbɔle la. Yɛda Gyihova ase somaa.”​—Kenga Gyima ne 10:34, 35.

“BƐWULA MƐLƐBƐNWOAZE”

11, 12. (a) Duzu ati a adwenle kpalɛ mɔɔ yɛbava yɛawula subane fofolɛ ne la anwo hyia ɛ? (b) Duzu a baboa yɛ amaa yɛabɛlɛ yɛ nwo aze dahuu a?

11 Deɛmɔti yɛkulo kɛ yɛwula subane fofolɛ ne la a le kɛ yɛfa yɛawula Gyihova anyunlunyia, tɛ kɛ yɛmaa bɛahanvo yɛ. Kakye kɛ, anwumabɔvolɛ mɔɔ di munli bɔbɔ la yɛle ɛtane ɔluakɛ ɔyɛle anwomemaazo. (Fa to Yizikeɛle 28:17 anwo.) Yɛnli munli, ɔti ɔyɛ se kɛ yɛbahoati anwomemaazo. Noko, yɛbahola yɛawula mɛlɛbɛnwoaze. Duzu a baboa yɛ yeamaa yɛayɛ zɔ a?

12 Amaa yɛabɛlɛ yɛ nwo aze la, ɔwɔ kɛ yɛnyia mekɛ yɛdwenledwenle mɔɔ yɛkenga yɛfi Nyamenle Edwɛkɛ ne anu dahuu la anwo. (Mɛla 17:18-20) Ɔwɔ kɛ yɛdwenledwenle Gyisɛse ngilehilelɛ nee mɛlɛbɛnwoaze nwo neazo mɔɔ ɔyɛle la anwo kpalɛ. (Mat. 20:28) Gyisɛse wowole ye ɛzoanvolɛ ne mɔ bɔbɔ agyakɛ anwo. (Dwɔn 13:12-17) Eza ɔwɔ kɛ yɛsɛlɛ Nyamenle sunsum ne kɛ ɔboa yɛ ɔmaa yɛkpo subane biala mɔɔ maa yɛte nganeɛ kɛ yɛle kpalɛ yɛtɛla awie mɔ la.​—Gal. 6:3, 4; Fel. 2:3.

13. Saa yɛbɛlɛ yɛ nwo aze a, nyilalɛ boni mɔ a yɛbanyia a?

13 Kenga Mrɛlɛbulɛ 22:4. Ɔwɔ kɛ nɔhalɛ azonvolɛ kɔsɔɔti bɛlɛ bɛ nwo aze, amaa bɛanyia nyilalɛ dɔɔnwo. Saa yɛbɛlɛ yɛ nwo aze a, ɔbamaa anzodwolɛ nee koyɛlɛ adɛnla asafo ne anu. Eza saa sukoa kɛ yɛbabɛlɛ yɛ nwo aze a, ɔbamaa yɛanyia Nyamenle anyunlu ɛlolɛ. Ɛzoanvolɛ Pita hanle kɛ: “Bɛ muala bɛwula mɛlɛbɛnwoaze wɔ kɛzi bɛ nee bɛ gɔnwo mɔ di la anu, ɔluakɛ Nyamenle kyi menli mɔɔ memaa bɛ nwo zo la na ɔdo menli mɔɔ bɛlɛ bɛ nwo aze la.”​—1 Pita 5:5.

“BƐWULA MƐLƐBƐNWOAZE . . . NEE ABOTANE”

14. Nwane a yɛle neazo kɛnlɛma wɔ kɛzi bɛda mɛlɛbɛnwoaze nee abotane ali la anu a?

14 Wɔ ewiade ɛhye anu, bɛbu menli mɔɔ lɛ abotane na bɛbɛlɛ bɛ nwo aze la kɛ bɛ nye ɛnyɛ se. Noko ɛhye ɛnle nɔhalɛ! Subane ɛhye mɔ vi Ahenle mɔɔ lɛ tumi kpole kpalɛ wɔ ewiade la ɛkɛ. Gyihova Nyamenle ɛyɛ neazo kpalɛ wɔ kɛzi bɛda mɛlɛbɛnwoaze nee abotane ali la anu. (2 Pita 3:9) Fa kɛzi ɔluale anwumabɔvolɛma anwo zo ɔbuale kpuya mɔɔ Ebileham nee Lɔɔto bizebizale ye la kɛ neazo. (Mɔl. 18:22-33; 19:18-21) Bieko, Gyihova nyianle Yizilayɛ maanle ne mɔɔ dele atua la anwo abotane wɔ ɛvolɛ mɔɔ bo 1,500 la anu.​—Yiz. 33:11.

15. Kɛzi Gyisɛse yɛle mɛlɛbɛnwoaze nee abotane nwo neazo kɛnlɛma ɛ?

15 Ɛnee Gyisɛse le “bɛtɛɛ” anzɛɛ ɔbɛlɛ ɔ nwo aze. (Mat. 11:29) Ɔnyianle ye ɛdoavolɛma mɔɔ tɔ sinli la anwo abotane. Mɔɔ Gyisɛse yɛ ye ɛzonlenlɛ gyima ne wɔ azɛlɛ ye azo la, bɛdendɛle bɛtiale ye yɛɛ bɛdonle ye ɛzonle. Noko ɔlale mɛlɛbɛnwoaze nee abotane ali too ɔhɔle ewule nu. Mɔɔ ɛnee ɔlɛnwu amaneɛ wɔ baka ne azo la, Gyisɛse zɛlɛle ɔ Ze kɛ ɔva menli mɔɔ ɛlɛku ye la ɛtane ɔhyɛ bɛ ɔluakɛ  “bɛnze mɔɔ bɛlɛyɛ a.” (Luku 23:34) Nea mɛlɛbɛnwoaze nee abotane nwo neazo kɛnlɛma mɔɔ Gyisɛse yɛle wɔ mekɛ bɔbɔ mɔɔ ɔlɛnwu amaneɛ la!​—Kenga 1 Pita 2:21-23.

16. Kɛzi yɛbahola yɛala mɛlɛbɛnwoaze nee abotane ali ɛ?

16 Kɛzi yɛbahola yɛala mɛlɛbɛnwoaze nee abotane ali ɛ? Pɔɔlo hilele adenle ko wɔ mekɛ mɔɔ ɔhɛlɛle ɔ gɔnwo mɔ diedima kɛ: “Saa bɛ nuhua bie lɛ edwɛkɛ tia ɔ gɔnwo bɔbɔ a, bɛhɔ zo bɛnyia abotane na bɛva bɛhyɛ bɛ nwo bɔkɔɔ. Kɛ mɔɔ Gyihova ɛva bɛ ɛtane ɛhyɛ bɛ la, bɛdabɛ noko bɛyɛ ye zɔhane ala.” (Kɔl. 3:13) Nɔhalɛ nu, ɔhyia mɛlɛbɛnwoaze nee abotane na yɛahola yɛali mɛla ɛhye azo. Noko saa yɛfa ɛtane yɛkyɛ a, yɛbamaa koyɛlɛ adɛnla asafo ne anu.

17. Duzu ati a mɛlɛbɛnwoaze nee abotane nwo hyia ɛ?

17 Mɛlɛbɛnwoaze nee abotane mɔɔ yɛwula la, ɛnle debie mɔɔ Kilisienenli bie kulo a yɛɛ ɔbayɛ a. Ɔluakɛ yɛ ngoane gyi zo. (Mat. 5:5; Gye. 1:21) Mɔɔ hyia kpalɛ la, subane ɛhye mɔ maa yɛwula Gyihova anyunlunyia, na ɔboa awie mɔ ɔmaa bɛfa Baebolo nu folɛdulɛ bɛyɛ gyima.​—Gal. 6:1; 2 Tim. 2:24, 25.

“BƐWULA ƐLƆLƐ”

18. Koyɛlɛ boni a wɔ ɛlɔlɛ nee nyeyenu mɔɔ yɛnyɛ la avinli a?

18 Subane ɛhye mɔ mɔɔ yɛzuzu nwo la amuala boka ɛlɔlɛ anwo. Kɛ neazo la, ɛdoavolɛ Gyemise dule ɔ mediema folɛ, ɔluakɛ bɛbule sukoavolɛma bɛdɛlale ehyianvolɛma. Ɔhilele kɛ subane ɛhye tia mɛla kpalɛ ne: “Kulo ɛ gɔnwo kɛ ɛ nwo.” Akee ɔdoale zo kɛ: “Saa bɛkɔ zo bɛnea menli nyunlu a, ɛnee bɛlɛyɛ ɛtane.” (Gye. 2:8, 9) Saa yɛkulo menli a, yɛnrɛyɛ nyeyenu ɔlua bɛ nwomazukoalɛ, abusua mɔɔ bɛvi nu anzɛɛ bɛ gyinlabelɛ ti. Nɔhalɛ nu, ɔnle kɛ nyeyenu mɔɔ yɛnyɛ la yɛ ɛnyelɛ zo. Ɔwɔ kɛ ɔyɛ yɛ subane.

19. Duzu ati a ɔhyia kɛ yɛwula ɛlɔlɛ a?

19 Eza “ɛlɔlɛ lɛ abotane” yɛɛ “ɔmmemaa ɔ nwo zo.” (1 Kɔl. 13:4) Ɔhyia abotane, atiakunlukɛnlɛma nee mɛlɛbɛnwoaze na yɛahola yɛaha Belemgbunlililɛ edwɛkɛ ne yɛahile yɛ gɔnwo mɔ. (Mat. 28:19) Subane ɛhye mɔ noko ɛmmaa ɔnyɛ se kɛ yɛ nee mediema kɔsɔɔti mɔɔ wɔ asafo ne anu la badu. Saa yɛda ɛlɔlɛ zɛhae ali a, nyilalɛ boni a yɛbanyia a? Ɔmaa koyɛlɛ ba asafo ne mɔ anu, ɔwula Gyihova anyunlunyia yɛɛ ɔmaa anyelielɛma anye die asafo ne anwo. Ɔti Baebolo ne hanle ɛhye dwulale subane fofolɛ ne anwo edwɛkɛ ne kɛ: “Ɛhye mɔ amuala anzi, bɛwula ɛlɔlɛ, ɔluakɛ ɔmaa menli koyɛlɛ di munli.”​—Kɔl. 3:14.

“BƐKƆ ZO BƐYƐ BƐ FOFOLƐ”

20. (a) Kpuya boni mɔ a ɔwɔ kɛ yɛbiza yɛ nwo a, na duzu ati ɔ? (b) Mekɛ boni a yɛ nye la ye ade a?

20 Ɔwɔ kɛ yɛ nuhua ko biala biza ɔ nwo kɛ, ‘Duzu bieko a mebahola meayɛ amaa meaye subane dɛba ne meagua bɔkɔɔ a?’ Ɔwɔ kɛ yɛsɛlɛ Nyamenle ɛsesebɛ kɛ ɔboa yɛ na yɛbɔ mɔdenle kɛ yɛbagyakyi subane anzɛɛ nyɛleɛ biala mɔɔ ɔnrɛmaa yɛnrɛnyia Nyamenle Belemgbunlililɛ ne la bɔkɔɔ. (Gal. 5:19-21) Eza ɔwɔ kɛ yɛbiza yɛ nwo kɛ, ‘Asoo memaa bɛkɔ zo bɛyɛ me fofolɛ wɔ tumi ne mɔɔ kile me adwenle ne adenle la anu ɔ?’ (Ɛfɛ. 4:23, 24) Yɛnli munli, ɔti ɔwɔ kɛ yɛbɔ mɔdenle kɛ yɛbawula subane fofolɛ ne dahuu. Nea kɛzi ɛbɛlabɔlɛ bayɛ anyelielɛ wɔ mekɛ mɔɔ awie biala ɛwula subane fofolɛ ne na ɔlɛda Gyihova subane mgbalɛ ne mɔ ali bɔkɔɔ la!

^ ɛden. 3 Wɔ Baebolo mekɛ nu, ɛnee bɛbu Siteanenma kɛ bɛ nwo ɛngyia yɛɛ bɛ nye ɛtɛtele.