Wulu kɔ nuhua edwɛkɛ ne azo

Wulu kɔ nuninyɛne ne azo

Kpuya Mɔɔ Vi Kengavolɛma Ɛkɛ

Kpuya Mɔɔ Vi Kengavolɛma Ɛkɛ

Duzu ati a Mateyu nee Luku kɛlɛtokɛ ne mɔɔ fale Gyisɛse ngakula nu anwo la le ngakyile a?

Mateyu kɛlɛtokɛ ne mɔɔ fale Gyisɛse awolɛ nee ye ngakula nu anwo la le ngakyile fi Luku ɛdeɛ ne anwo, ɔluakɛ asolo kɛzi Edwɛkpa kɛlɛvoma ne hanle nwolɛ edwɛkɛ la.

Mateyu kɛlɛtokɛ ne gyi Dwosefi anwo zo. Ɔka mɔɔ Dwosefi yɛle wɔ mekɛ mɔɔ ɔdele kɛ Mɛle ɛlɛnrenzɛ, ɛlalɛ mɔɔ ɔhanle mɔɔ anwumabɔvolɛ ne hilehilele nu hilele ye nee kɛzi ɔlile ye adehilelɛ zo la anwo edwɛkɛ. (Mat. 1:19-25) Ɔka kɛzi anwumabɔvolɛ ne bɔle Dwosefi kɔkɔ wɔ ɛlalɛ nu kɛ ɔ nee ye abusua ne ɛdu ɛhɔ Yigyibiti, na ɔdiele la anwo edwɛkɛ. Eza Mateyu ka kile yɛ kɛ Dwosefi hanle ɛlalɛ bieko, na anwumabɔvolɛ ne zele ye kɛ ɔzia ɔhɔ Yizilayɛ, ɔhɔle na ɔzile kpɔkɛ kɛ ɔ nee ye abusua ne badɛnla Nazalɛte. (Mat. 2:13, 14, 19-23) Wɔ Mateyu Edwɛkpa ne adile mɔɔ limoa la anu, bɛbɔle Dwosefi duma fane mɔtwɛ, noko bɛbɔle Mɛle duma fane nna pɛ.

Noko, Luku kɛlɛtokɛ ne ka Mɛle anwo edwɛkɛ dɔɔnwo. Ɔka anwumabɔvolɛ Geebeleɛle mɔɔ ɔhɔkpɔlale ye, Mɛle busuanli Ɛlezabɛte mɔɔ ɔhɔkpɔlale ye, yɛɛ kɛzi ɔyele Gyihova ayɛlɛ la anwo edwɛkɛ. (Luku 1:26-56) Eza Luku ka mɔɔ Saemɔn hanle hilele Mɛle mɔɔ fale amaneɛ mɔɔ Gyisɛse banwu ye kenle bie la anwo edwɛkɛ. Akee Luku hanle mekɛ mɔɔ Gyisɛse nyianle ɛvolɛ 12 na ɔ nee ye abusua ne hɔle ɛzonlenlɛ sua ne anu la anwo edwɛkɛ. Wɔ edwɛkɛ ɛhye anu bɔbɔ, Luku hwenle adwenle hɔle edwɛkɛ mɔɔ Mɛle hanle la azo, tɛ mɔɔ Dwosefi hanle la, na ɔka kɛ mɔɔ zile la nyianle Mɛle anwo zo tumi kpole. (Luku 2:19, 34, 35, 48, 51) Wɔ Luku Edwɛkpa ne adile nwiɔ mɔɔ limoa la anu, bɛbɔle Mɛle duma fane 12, noko bɛbɔle Dwosefi duma fane 3 ala. Ɔti, Mateyu hanle mɔɔ ɛnee gyegye Dwosefi nee mɔɔ ɔyɛle la anwo edwɛkɛ dɔɔnwo yɛɛ Luku hanle mɔɔ Mɛle dwenlenle nwo nee ye anwubielɛ nwo edwɛkɛ dɔɔnwo.

Gyisɛse abusua ekpunli ne mɔɔ Edwɛkpa kɛlɛvolɛma nwiɔ ne hanle nwolɛ edwɛkɛ la noko le ngakyile. Mateyu hanle abusua mɔɔ Dwosefi vi nu la anwo edwɛkɛ, na ɔhilele kɛ Gyisɛse mɔɔ le Dwosefi dɔmaba la di Belemgbunli Devidi agya wɔ mɛla adenle zo. Duzu ati ɔ? Ɔluakɛ Dwosefi vi Belemgbunli Devidi abusua ekpunli ne anu ɔlua Devidi ara Sɔlɔmɔn anwo zo. (Mat. 1:6, 16) Noko, Luku hanle abusua mɔɔ Mɛle vi nu la anwo edwɛkɛ na ɔhilele kɛ Gyisɛse lɛ adenle di Belemgbunli Devidi agya wɔ “nwonane nu.” (Wlo. 1:3) Duzu ati ɔ? Ɔluakɛ Mɛle vi Belemgbunli Devidi abusua ekpunli ne anu ɔlua Devidi ara Neetan anwo zo. (Luku 3:31) Noko duzu ati a Luku ambɔ Mɛle duma amboka menli mɔɔ wɔ abusua ekpunli ne anu la anwo kɛ ɔle Hilae ara raalɛ ɛ? Ɔluakɛ wɔ mɛla nu saa bɛkpondɛ abusua ekpunli mɔɔ awie vi nu la abo a, bɛfa mrenyia. Ɔti, mekɛ mɔɔ Luku bɔle Dwosefi duma na ɔhilele nu kɛ ɔ ze a le Hilae la, bɛdele ɔ bo kɛ, Dwosefi gyale Hilae ara raalɛ.​—Luku 3:23.

Abusua ekpunli ne mɔɔ Gyisɛse vi nu mɔɔ Mateyu nee Luku yɛle nwolɛ kɛlɛtokɛ la maa ɔda ali kɛ ɔdaye a ɔle Mɛzaya ne a. Nɔhalɛ nu, ɛnee menli dɔɔnwo ze abusua ekpunli mɔɔ Gyisɛse vi nu la anwo nɔhalɛ edwɛkɛ ne, na Falasiima nee Sadusiima bɔbɔ angola anzu nwolɛ kpolera. Gyisɛse Abusua ekpunli ne mɔɔ Mateyu nee Luku yɛle nwolɛ kɛlɛtokɛ la maa yɛ diedi nu mia na ɔmaa yɛnyia anwodozo kɛ Nyamenle ɛwɔkɛ ne mɔ bara nu.