Wulu kɔ nuhua edwɛkɛ ne azo

Wulu kɔ nuninyɛne ne azo

 YƐ TETEDWƐKƐ

“Mekɛ Boni A Yɛbahɔ Nyianu Bieko A?”

“Mekɛ Boni A Yɛbahɔ Nyianu Bieko A?”

ƆLE November 1932 awieleɛ wɔ Mexico City. Dapɛne ne mɔɔ pɛle nu la anu a bɛlimoa bɛyɛle traffic lights wɔ suakpole ɛhye mɔɔ menli mɔɔ bo mgbe ko wɔ zo la anu a. Noko kɛkala traffic lights ne mɔɔ bɛyɛle la ɛyɛ edwɛkɛ dɛba. Edwɛkɛ bie ɛmaa menli ne anye ɛlie. Adwelie kɛlɛvoma ɛva bɛ kamera ɛhɔ keteke agyinlaleɛ bɛlɛkendɛ ɛyɛvolɛ titili bie. Nwane ɔ? Joseph F. Rutherford mɔɔ ɛnee le Watch Tower Society ebianutɛnlavolɛ la ɔ. Alasevolɛ mɔɔ wɔ sua ne azo la noko ɛlɛkendɛ Adiema Rutherford mɔɔ ɛlɛba bɛ kenle nsa nyianu ne bie la na bɛayɛ ye akoaba.

The Golden Age ne hanle kɛ, “Nɔhalɛ nu, nyianu ɛhye bayɛ debie mɔɔ anwo hyia kpalɛ wɔ tetedwɛkɛ nu wɔ mɔdenle mɔɔ bɛlɛbɔ kɛ bɛmaa menli dɔɔnwo ade Nɔhalɛ ne wɔ Mexico la.” Noko duzu a maa nyianu ɛhye mɔɔ menli kɛyɛ 150 pɛ hɔle la yɛ titili a?

Kolaa na bɛayɛ nyianu zɔhane la, ɛnee nɔhalɛ ne ɛtɛtɛlɛle kpalɛ wɔ Mexico. Ɔvi 1919, bɛyɛle nyianu ngyikyi, noko mekɛ ɛlɛkɔ la asafo ne mɔ azo dele. Mɔɔ bɛbukele Bɛtɛle wɔ Mexico City wɔ 1929 la, ɛnee ɔzɔho kɛ ninyɛne bayɛ boɛ, noko ɛnee ngyegyelɛ bie wɔ ɛkɛ mɔɔ ɔwɔ kɛ bɛdi nwolɛ gyima a. Mɔɔ ahyehyɛdeɛ ne hanle kɛ bɛmmafa gualilɛ bɛboka edwɛkɛhanlɛ gyima ne anwo la, adekpakyelɛnli bie mɔɔ vale ɛya la gyakyile na ɔdele ye Baebolo ɛzukoalɛ ekpunli ɛdeɛ. Mekɛ ɛhye anu, Bɛtɛle neavolɛ ne yɛle debie mɔɔ ngɛlɛlera ne tendɛ tia la na ɛnee ɔwɔ bɛkakyi ye. Ɛnee Alasevolɛ mɔɔ wɔ Mexico la hyia sunsum nu anwosesebɛmaanlɛ.

Adiema Rutherford luale ɛdendɛlɛ nwiɔ mɔɔ ɔmaanle ye wɔ nyianu ne abo yɛɛ riledio zo ɛdendɛlɛ nnu mɔɔ ɔmaanle la azo ɔmaanle nɔhavoma ɛhye mɔ anwosesebɛ kpole. Ɛhye a le mekɛ mɔɔ limoa mɔɔ mediema ne mɔ luale riledio gyimalilɛ zo bɔle edwɛkpa ne nolo wɔ Mexico a. Bɛwiele nyianu ne la, bɛkpale Bɛtɛle neavolɛ fofolɛ bɛmaanle ɔnleanle gyima ne azo, na Alasevolɛ ne mɔ yɛle gyima ne ɛsesebɛ yɛɛ Gyihova yilale zo.

Ɛvolɛ 1941 nyianu, Mexico City

Ye ɛvolɛ bieko, bɛyɛle nyianu nwiɔ wɔ maanle ne anu, bɛyɛle ko wɔ Veracruz yɛɛ bɛyɛle ko noko wɔ Mexico City. Gyima ɛsesebɛ mɔɔ bɛyɛle ye wɔ azɛlɛsinli ne anu la bɔle ɔ bo kɛ ɔso ma. Wɔ 1931, ɛnee nolobɔlɛma 82 a wɔ ɛkɛ a. Ɔkadwu ɛvolɛ bulu la, ɔyɛle mɔnwo bulu! Menli kɛyɛ 1,000 rale 1941 Theocratic Assembly nyianu ne mɔɔ bɛyɛle ye wɔ Mexico City la bie.

“BƐYILE AWƆDENLE NE MƆ AZO”

Wɔ 1943, Alasevolɛ ne mɔ vale bɔɔdo mɔɔ bɛhɛlɛ ɔ nyunlu nee ɔ nzi la hendanle bɛ nwo vale bɔle “Free Nation’s” Theocratic Assembly ne mɔɔ  bɛbayɛ ye wɔ Mexico azuamgbole 12 azo la nolo. * Bɛvale kɛlata nwiɔ mɔɔ bɛhɛlɛ ɔ nyunlu nee ɔ nzi la bɛhendanle bɛ nwo bɛbɔle nolo ne kɛ mɔɔ Alasevolɛ ne mɔ vale lile gyima ɔvi ɛvolɛ 1936 mɔɔ ba la.

Ɛvolɛ 1944 magazine bie mɔɔ kile Alasevolɛ mɔɔ bɛva bɔɔdo mɔɔ bɛhɛlɛ ɔ nyunlu nee ɔ nzi bɛhenda bɛ nwo wɔ Mexico City la

La Nación magazine ne hanle nolobɔlɛ ne mɔɔ bɛyɛle ye wɔ Mexico City la anwo edwɛkɛ kɛ: “Wɔ nyianu ne kenle mɔɔ limoa la anu, bɛzele Alasevolɛ ne mɔ kɛ bɛdo ɛsalɛ bɛvɛlɛ menli dɔɔnwo. Aleɛ hyenle la, menli dɔɔnwo rale nyianu ne abo.” Kateleke Asɔne ne anye anlie mɔɔ vi nolobɔlɛ ɛhye mɔ anu rale la anwo. Bɛdwazole bɛtiale mediema ne mɔ, noko bɛvale akɛnrasesebɛ bɛbɔle nyianu ne anwo nolo. La Nación eza bɔle amaneɛ kɛ: “Sua ne azo amra kɔsɔɔti nwunle kɛ Alasevolɛ ne mɔ ɛva ‘bɔɔdo mɔɔ bɛhɛlɛ ɔ nyunlu nee ɔ nzi la ɛhenda bɛ nwo ɛlɛbɔ nolo.’” Mediema mɔɔ bɛlɛbɔ nolo wɔ Mexico City awɔdenle ne mɔ azo la nvoninli mɔɔ bɛhɛlɛ edwɛkɛ: “Bɛyile awɔdenle ne mɔ azo” wɔ ɔ bo la wɔ magazine ne azo.

“ƐKPA MƆƆ ZOLƐ ƐNLE KETEKETE”

Wɔ ɛvolɛ zɔhane mɔ anu, ɛnee ɔwɔ kɛ Alasevolɛ dɔɔnwo bɔ afɔle na bɛahola bɛahɔ nyianu ekyi mɔɔ bɛyɛle ye wɔ Mexico la bie. Nyianuma dɔɔnwo vi namunamu mɔɔ keteke anzɛɛ kale adenle ɛnle ɛkɛ la hɔle nyianu ne. Asafo ko hɛlɛle kɛ, “Keteke biala ɛnva ɛke.” Ɔti, ɛnee ɔwɔ kɛ nyianuma ne mɔ tɛnla afunlumu zo anzɛɛ tia kenle dɔɔnwo na bɛahola bɛanyia keteke bɛahɔ nyianu ne.

Alasevolɛ ne mɔ dɔɔnwo le ehyianvolɛma, ɔti bɛnlɛ ezukoa mɔɔ bɛbava bɛahɔ nyianu ne bie a. Saa bɛkɔdwu a, bɛ mediema Alasevolɛ bie mɔ fi bɛ ɛhulolɛ nu die bɛ kɛnlɛma. Bie mɔ da Belemgbunlililɛ Asalo. Mekɛ bie, bɛzokoɛle nyianuma kɛyɛ 90 wɔ Bɛtɛle, na bɛlale nlɛka mɔɔ bɛfa mbuluku bɛgua nu la azo. Yearbook ne hanle kɛ mediema ne mɔ anye liele nwo, ɔluakɛ “nlɛka ne mɔ azo ɛnle ketekete.”

Alasevolɛ zɔhane mɔ anye liele kɛ bɛbɔle afɔle bɛ nee bɛ mediema yiale la. Ɛnɛ, nolobɔlɛma mɔɔ asɛɛ bɛdwu mgbe ko mɔɔ bɛwɔ Mexico la da anyezɔlɛ ko ne ala ali. * Amaneɛbɔlɛ bie mɔɔ wɔ 1949 Yearbook ne anu la hanle kɛ, “Afɔle mɔɔ mediema ne mɔ bɔle la ammaa bɛ mɔdenlebɔlɛ anga aze wɔ Gyihova ɛzonlenlɛ nu. Nyianu biala mɔɔ bɛbahɔ la anzi, “bɛbɔ nwolɛ adawu bɛkyɛ.” Kpuya mɔɔ mediema ne mɔ ta biza la a le kɛ, “Mekɛ boni a yɛbahɔ nyianu bieko a?”​—Yɛ tetedwɛkɛ mɔɔ vi Central America.

^ ɛden. 9 Ɛvolɛ 1944 Yearbook ne hanle kɛ nyianu ɛhye “ɛmaa bɛnwu Gyihova Alasevolɛ kpalɛ wɔ Mexico.”

^ ɛden. 14 Menli 2,262,646 a hɔle ɛvolɛ 2016 Ngakyelɛlilɛ ne wɔ Mexico a.