Wulu kɔ nuhua edwɛkɛ ne azo

Wulu kɔ nuninyɛne ne azo

Bɛmaa Yɛmaa Yɛ Nwo Anwosesebɛ “Titili”

Bɛmaa Yɛmaa Yɛ Nwo Anwosesebɛ “Titili”

“Bɛmaa yɛzuzu yɛ nwo ngoko . . . , yɛmaa yɛ nwo anwosesebɛ, titili mekɛ mɔɔ bɛkɛnwu kɛ awieleɛ ne ɛlɛbikye la.”—HIB. 10:24, 25.

EDWƐNE: 90, 87

1. Duzu ati a ɛzoanvolɛ Pɔɔlo dule alimoa Hibulu Kilisienema ne folɛ kɛ bɛmaa bɛ nwo anwosesebɛ “titili” ɛ?

KƐMƆTI a ɔwɔ kɛ yɛbɔ mɔdenle kpalɛ kɛ yɛbamaa anwosesebɛ a? Ɛzoanvolɛ Pɔɔlo hilehilele nu wɔ ye kɛlata mɔɔ ɔhɛlɛle Hibulu Kilisienema ne la anu. Ɔzele bɛ kɛ: “Bɛmaa yɛzuzu yɛ nwo ngoko, yɛmaa yɛ nwo anwosesebɛ yɛhɔ ɛlɔlɛ nee gyima kpalɛ ɛyɛlɛ nu, bɛmmamaa yɛgyakyi kɛ yɛkɛhɔ yɛ nyianu ne mɔ, kɛ mɔɔ yeyɛ bie mɔ subane la, emomu bɛmaa yɛmaa yɛ nwo anwosesebɛ, titili mekɛ mɔɔ bɛkɛnwu kɛ awieleɛ ne ɛlɛbikye la.” (Hib. 10:24, 25) Ɛnee yeha ɛvolɛ nnu pɛ na Dwuuma mɔɔ de Gyɛlusalɛm la anwu “Gyihova kenle kpole ne” mɔɔ ɛbikye nee sɛkɛlɛneɛ mɔɔ Gyisɛse hanle nwolɛ edwɛkɛ hilele bɛ kɛ saa bɛnwu ye a bɛvi suakpole ne azo amaa bɛanyia ngoane la. (Gyi. 2:19, 20; Luku 21:20-22) Gyihova kenle ne rale wɔ 70 Y.M. wɔ mekɛ mɔɔ Wulomuma zɛkyele Gyɛlusalɛm la.

2. Duzu ati a ɔwɔ kɛ yɛmaa anwosesebɛ mɔɔ yɛmaa yɛ nwo la kyia yɛ kpalɛ ɛnɛ a?

2 Ɛnɛ, yɛlɛ ndelebɛbo kpalɛ mɔɔ ɔti yɛdie yɛdi kɛ Gyihova ‘kenle kpole’ ne ɛbikye la. (Dww. 2:11) Ngapezonli Zɛfanaya hanle  kɛ: “[Gyihova] kenle kpole ne ɛbikye. Ɔnrɛhyɛ biala, yebikye kpalɛ.” (Zɛf. 1:14) Zɔhane ngapezo ne mɔɔ ɔle kɔkɔbɔlɛ la noko fale yɛ nwo ɛnɛ. Kɛmɔ Gyihova kenle ne ɛbikye la ati, Pɔɔlo zele yɛ kɛ, “bɛmaa yɛdwenle yɛ nwo ngoko, yɛmaa yɛ nwo anwosesebɛ yɛhɔ ɛlɔlɛ nee gyima kpalɛ ɛyɛlɛ nu.” (Hib. 10:24, ɔbdw.) Ɔti, ɔwɔ kɛ yɛkile yɛ mediema nwo anyelielɛ amaa yɛahola yɛamaa bɛ anwosesebɛ wɔ mekɛ mɔɔ bɛhyia nwo la.

NWANE A HYIA ANWOSESEBƐMAANLƐ A?

3. Boni a ɛzoanvolɛ Pɔɔlo hanle ye wɔ anwosesebɛmaanlɛ nwo a? (Nea mɔlebɛbo nvoninli ne.)

3 “Adwenleadwenle maa sonla yɛ basaa, na edwɛkɛ kpalɛ maa sonla di fɛlɛko.” (Mrɛ. 12:25) Ɛhye le nɔhalɛ wɔ yɛ muala afoa nu. Yɛ muala yɛhyia anwosesebɛmaanlɛ ɔvi mekɛ mɔɔ kɔ mekɛ la. Pɔɔlo hilele kɛ awie mɔɔ ɔle ye ɛzonlelilɛ kɛ ɔbamaa awie mɔ anwosesebɛ la noko hyia anwosesebɛmaanlɛ. Ɔhɛlɛle Kilisienema mɔɔ ɛnee wɔ Wulomu la kɛ: “Me kunlu anu a anrɛɛ menwu bɛ na meboa bɛ wɔ sunsum nu, amaa bɛ nwo ayɛ se; mɔɔ mekpondɛ meaha la a le kɛ bɛ diedi bɛamaa me anwosesebɛ na medame noko me ɛdeɛ amaa bɛ anwosesebɛ.” (Wlo. 1:11, 12) Nɔhalɛ nu, Pɔɔlo mɔɔ maanle awie mɔ anwosesebɛ la noko hyianle anwosesebɛmaanlɛ wɔ mekɛ bie mɔ anu.​—Kenga Wulomuma 15:30-32.

4, 5. Nwane mɔ a yɛbahola yɛamaa bɛ anwosesebɛ ɛnɛ a, na duzu ati ɔ?

4 Ɔwɔ kɛ bɛkanvo bɛdabɛ mɔɔ bɛtu bɛ nwo bɛmaa la. Bɛ nuhua bie mɔ a le adekpakyelɛma mɔɔ di nɔhalɛ la. Bɛ nuhua dɔɔnwo ɛbɔ afɔle mgbole amaa bɛahola bɛayɛ adekpakyelɛ gyima ne bie. Zɔhane a ɔde wɔ edwɛkpatɛlɛvolɛma, Bɛtɛlema, maangyebakyi zo neavolɛma nee bɛ ye mɔ yɛɛ bɛdabɛ mɔɔ bɛyɛ gyima wɔ ɔfese mɔɔ bɛkile edwɛkɛ bo wɔ ɛkɛ la afoa nu a. Bɛ muala bɛfa ninyɛne bɛbɔ afɔle wɔ bɛ ɛbɛlabɔlɛ nu amaa bɛahola bɛayɛ dɔɔnwo wɔ ɛzonlenlɛ gyima nwuanzanwuanza ne anu. Ɔti, ɔwɔ kɛ yɛmaa bɛ anwosesebɛ. Bɛdabɛ mɔɔ bɛ ahonle tɛbɔ dahuu ɛzonlenlɛ gyima ne anu, noko ɔlua tɛnlabelɛ bie ati bɛngola bɛnyɛ dɔɔnwo la anye balie nwo kɛ bɛbamaa bɛ anwosesebɛ.

5 Mediema mrenyia nee mraalɛ mɔɔ bɛle mbelazinli ɔluakɛ bɛkulo kɛ bɛdi folɛdulɛ mɔɔ se, bɛgya “Awulae anu ala” azo la noko hyia anwosesebɛmaanlɛ. (1 Kɔl. 7:39) Yelɛma mɔɔ yɛ gyima ɛsesebɛ la noko anye balie nwo kɛ bɛbade edwɛkɛ mɔɔ maa anwosesebɛ la bɛavi bɛ hu mɔ ɛkɛ. (Mrɛ. 31:28, 31) Bieko, Kilisienema mɔɔ kɔ zo di nɔhalɛ wɔ ɛkpɔlɛ anzɛɛ anwonyane nu la hyia anwosesebɛmaanlɛ. (2 Tɛs. 1:3-5) Gyihova nee Gyisɛse kyekye azonvolɛ nɔhavoma ɛhye mɔ amuala arɛle.​—Kenga 2 Tɛsalonaekama 2:16, 17.

MGBANYIMA BƆ MƆDENLE MAA YƐ ANWOSESEBƐ

6. Duzu gyima a Ayezaya 32:1, 2 ka kɛ ɔwɔ kɛ asafo nu mgbanyima yɛ a?

6 Kenga Ayezaya 32:1, 2. Gyisɛse Kelaese dua ɔ mediema mɔɔ bɛkpokpa bɛ yɛɛ “maanle mgbanyima” mɔɔ wɔ mboane gyɛne ne anu la anwo zo fa anwosesebɛmaanlɛ nee adehilelɛ maa bɛdabɛ mɔɔ bɛnlɛ anyelielɛ na bɛ sa nu ɛdo wɔ ngyegyelɛ mekɛ ɛhye anu la. Asafo nu mgbanyima ɛhye mɔ ɛnli “tumi” wɔ awie mɔ diedi zo, emomu, bɛle “gyimayɛvoma” mɔɔ maa bɛ mediema nye die a.​—2 Kɔl. 1:24.

7, 8. Saa ɛye edwɛkɛ mɔɔ yɛbaha yɛamaa awie mɔ anwosesebɛ la ɛsie ahane a, kɛzi mgbanyima bahola aboa ɛ?

7 Ɛzoanvolɛ Pɔɔlo yɛle neazo mɔɔ ɔwɔ kɛ yɛsukoa a. Ɔhɛlɛle Tɛsalonaeka Kilisienema mɔɔ ɛnee bɛlɛkpɔ bɛ la kɛ: “Kɛmɔ yɛlɛ bɛ nwo ɛlɔlɛ la ati, yɛbɔle kpɔkɛ kɛ yɛnrɛva Nyamenle edwɛkpa ne angome yɛnrɛmaa bɛ, emomu yɛbava yɛ nwo noko  yɛamaa bɛ, ɔluakɛ bɛrayɛle yɛ alɔvolɛ.”​—1 Tɛs. 2:8.

8 Saa mgbanyima dua bɛ edwɛkɛhanlɛ zo maa awie mɔ anwosesebɛ a, ɛnee yewie ɔ? Pɔɔlo zele mgbanyima mɔɔ wɔ Ɛfɛsɛse la kɛ: “Ɔwɔ kɛ bɛyɛ gyima ɛsesebɛ zɛhae bɛfa bɛboa bɛdabɛ mɔɔ bɛle bɛtɛɛ la, na ɔwɔ kɛ bɛkakye Awulae Gyisɛse edwɛkɛ ne mɔɔ ɔhanle la, ɔse: ‘Anyelielɛ dɔɔnwo wɔ ɛmaanlɛ nu tɛla ɛlielɛ.’” (Gyi. 20:35) Ɛnee tɛ kɛ Pɔɔlo lɛ ɛhulolɛ kɛ ɔbamaa ɔ mediema ne mɔ anwosesebɛ ala, emomu eza ‘ɔvale ɔ nwo ninyɛne nee ɔ nwo amuala ɔmaanle bɛ.’ (2 Kɔl. 12:15) Zɔhane ala a, saa mgbanyima dua bɛ edwɛkɛ zo maa bɛ mediema anwosesebɛ na bɛkyekye bɛ rɛle a ɛnee ɔtɛwiele a, ɔwɔ kɛ bɛboa bɛ ɔlua bɛ nwo anyelielɛ mɔɔ bɛbahile la azo.​—1 Kɔl. 14:3.

9. Kɛ ɔkɛyɛ na mgbanyima folɛdulɛ amaa anwosesebɛ ɛ?

9 Ɔdwu mekɛ ne bie a mgbanyima dua folɛdulɛ zo maa awie mɔ anwosesebɛ. Mgbanyima bahola azukoa kɛzi bɛmaa awie mɔ anwosesebɛ wɔ adenle kpalɛ zo la avi Baebolo ne anu. Gyisɛse yɛle ɛhye anwo neazo kpalɛ maanle yɛ wɔ ye ewule nee ye ewudwazo ne anzi. Ɛnee ɔlɛ folɛdulɛ fɔɔnwo ɔmaa asafo bie mɔ mɔɔ wɔ Ehyea Ekyi la, noko yɛ kɛzi ɔyɛle ye la nzonlɛ. Kolaa na yeadu asafo mɔɔ wɔ Ɛfɛsɛse, Pɛgamɛm nee Tayataela folɛ la, ɔlimoale ɔhanvole bɛ. (Yek. 2:1-5, 12, 13, 18, 19) Ɔzele Lawodesea asafo ne kɛ: “Bɛdabɛ mɔɔ mekulo bɛ edwɛkɛ la amuala, metwi bɛ nyunlu na metea bɛ. Ɔti bɔ mɔdenle na nu ɛ nwo.” (Yek. 3:19) Ɔwɔ kɛ mgbanyima bɔ mɔdenle sukoa Kelaese neazo ne wɔ mekɛ mɔɔ bɛlɛtu awie folɛ la.

ƆNLE MGBANYIMA NE MƆ ANGOMEKYE GYIMA

Awovolɛ, bɛlɛtete bɛ mra amaa bɛamaa awie mɔ anwosesebɛ ɔ? (Nea ɛdendɛkpunli 10)

10. Kɛ ɔkɛyɛ na yɛahola yɛamaa yɛ nwo anwosesebɛ ɛ?

10 Anwosesebɛmaanlɛ ɛnle mgbanyima ne mɔ angome gyima. Pɔɔlo dule Kilisienema kɔsɔɔti folɛ kɛ bɛha “edwɛkɛ kpalɛ mɔɔ hyia na ɔmaa anwosesebɛ” la bɛhile awie mɔ. (Ɛfɛ. 4:29) Ɔwɔ kɛ yɛ nuhua ko biala nwu  “mɔɔ hyia” awie mɔ la. Pɔɔlo dule Hibulu Kilisienema folɛ kɛ: “Bɛmiemia ɛsalɛ mɔɔ anu ɛdo nee egyakɛ mɔɔ ɛtuto la anu, na bɛhɔ zo bɛmaa bɛ gyakɛ abo zo adenle ɛyɛ fɔɔnwo, amaa mɔɔ le abubura la ngyegyelɛ anyɛ kpole, emomu bɛayɛ ye ayile.” (Hib. 12:12, 13) Yɛ muala mɔɔ ngakula boka nwo la bahola alua yɛ edwɛkɛ zo amaa yɛ nwo anwosesebɛ.

11. Mɔɔ Marthe nyianle adwenle nu ngyegyelɛ la, moalɛ boni a ɔnyianle a?

11 Marthe, * adiema raalɛ bie mɔɔ nyianle adwenle nu ngyegyelɛ la hɛlɛle kɛ: “Kenle ko bie mɔɔ ɛnee melɛyɛ asɔne kɛ awie ɛramaa me anwosesebɛ la, menyiale adiema raalɛ kpanyinli bie, na ɔlale ɛlɔlɛ nee anwunvɔnezelɛ mɔɔ ɛnee mehyia nwo kpalɛ wɔ mekɛ zɔhane anu la ali ɔhilele me. Eza ɔhanle ngyegyelɛ mɔɔ ɔyiale ye mɔɔ ɔle kɛ me ɛdeɛ ne la, na ɔmaanle mendele nganeɛ kɛ ɔtɛkale me ngome.” Bie a adiema raalɛ kpanyinli ne annwu kɛzi ye edwɛkɛ ne baboa Marthe la.

12, 13. Ndenle mgbalɛ boni mɔ azo a yɛbahola yɛalua yɛava folɛdulɛ mɔɔ wɔ Felepaema 2:1-4 la yɛali gyima ɛ?

12 Pɔɔlo dule Felepae asafo ne anu amra kɔsɔɔti folɛ kɛ: “Yemɔti, saa Kelaese anu anwosesebɛmaanlɛ bie wɔ ɛkɛ a, saa ɛlɔlɛ nu arɛlekyekyelɛ bie wɔ ɛkɛ a, saa sunsum nu agɔnwolɛvalɛ bie wɔ ɛkɛ a, saa ahunluyelɛyelalɛ nee anwunvɔnezelɛ bie wɔ ɛkɛ a, bɛnyia adwenle ko na bɛnyia ɛlɔlɛ ko, bɛyɛ ko wɔ debie biala anu, bɛnyia nzuzulɛ ko na bɛmaa me fɛlɛkolilɛ ne ɛli munli. Bɛmmafa manzonlehwenlɛ anzɛɛ anwomemaazo bɛyɛ debie biala, emomu bɛbɛlɛ bɛ nwo aze na bɛbu bɛ gɔnwo mɔ bɛdɛla bɛ nwo, bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”​—Fel. 2:1-4.

13 Ɔwɔ kɛ yɛ muala yɛbɔ mɔdenle kɛ yɛbakpondɛ awie mɔ boɛyɛlɛ, yɛava “ɛlɔlɛ nu arɛlekyekyelɛ,” “sunsum nu agɔnwolɛvalɛ,” yɛɛ “ahunluyelɛyelalɛ nee anwunvɔnezelɛ” yɛaboa yɛ mediema mrenyia nee mraalɛ.

NINYƐNE MƆƆ MAA ANWOSESEBƐ LA

14. Duzu a bahola ayɛ anwosesebɛmaanlɛ amaa yɛ a?

14 Saa yɛte kɛ bɛdabɛ mɔɔ yɛboale bɛ mekɛ bie la ɛlɛkɔ zo ali nɔhalɛ a, ɔmaa yɛ anwosesebɛ. Ɛzoanvolɛ Dwɔn hɛlɛle kɛ: “Debie biala ɛnyɛ me anyelielɛ ɛndɛla ɛhye: kɛ mekɛde kɛ me mra ne mɔ lua nɔhalɛ ne anu.” (3 Dwɔn 4) Adekpakyelɛma dɔɔnwo kola di daselɛ wɔ kɛzi bɛnyianle anwosesebɛ, mekɛ mɔɔ bɛnwunle kɛ menli mɔɔ bɛboale bɛ bɛmaanle bɛrale nɔhalɛ ne anu mekɛ bie la ɛlɛkɔ zo ali nɔhalɛ na bɔbɔ bɛlɛsonle kɛ adekpakyelɛma la. Ɔti, saa adekpakyelɛma asa nu to a, yɛbahola yɛahakye bɛ ninyɛne mgbalɛ mɔɔ bɛyɛ bɛboa awie mɔ la.

15. Duzu a yɛbahola yɛayɛ yɛamaa bɛdabɛ mɔɔ bɛlɛfa nɔhalɛlilɛ bɛazonle la anwosesebɛ a?

15 Maangyebakyi zo neavolɛma ɛha kɛ saa bɛkɔkpɔla asafo bie na bɛkɛlɛ bɛ kɛlata ekyi bɛkile anyezɔlɛ a, ɔmaa bɛ nee bɛ ye mɔ anwosesebɛ. Zɔhane ala a ɔde ye wɔ mgbanyima, edwɛkpatɛlɛvolɛma, adekpakyelɛma nee Bɛtɛle abusua ne anu amra mɔɔ awie mɔ kile bɛ gyima mɔɔ bɛlɛfa nɔhalɛlilɛ bɛayɛ la anwo anyezɔlɛ la afoa nu a.

KƐZI YƐ KƆSƆƆTI YƐBAHOLA YƐAMAA YƐ NWO ANWOSESEBƐ LA

16. Kɛ ɔkɛyɛ na yeamaa awie anwosesebɛ ɛ?

16 Saa yɛnyia adwenle kɛ kɛmɔ yɛnze adawu bɔ la ati, yɛnrɛhola yɛnrɛmaa awie mɔ anwosesebɛ a, ɛnee yɛvo kpole. Ɔngyia debie kpole na yɛahola yɛamaa awie anwosesebɛ​—ɛbahola wɔava ɛzelekɛ wɔabiza awie ahye. Saa ahenle noko anzele a, ɔbahola yeara ye kɛ ɔlɛyia ngyegyelɛ bie, na saa ɛtie ye edwɛkɛ a ɔbahola yeakyekye ɔ rɛle.​—Gye. 1:19.

17. Moalɛ boni a adiema kakula nrenyia ko nyianle ye wɔ ngyegyelɛ mekɛ nu a?

 17 Henri adiema nrenyia bie arɛle bɔle kpole wɔ mekɛ mɔɔ ye mbusuafoɔ, mɔɔ ye papa mɔɔ ɛnee le asafo nu kpanyinli mɔɔ bɛbu ye boka nwo la vile nɔhalɛ ne anu la. Maangyebakyi zo neavolɛ bie nee Henri hɔle ɛleka bie mɔɔ bɛtɔne kafe la, ɔdɔle bie ɔmaanle ye na ɔmaanle ɔhanle mɔɔ gyegye ye la amuala ɔhilele ye. Henri nwunle kɛ adenle mɔɔ ɔbahola yealua zo yeaboa ye abusua ne yeamaa bɛazia bɛara nɔhalɛ ne anu la ala a le kɛ ɔbali nɔhalɛ. Ɔ rɛle kyekyele kpole wɔ mekɛ mɔɔ ɔgengale Edwɛndolɛ 46; Zɛfanaya 3:17; nee Maake 10:29, 30 la.

Yɛ kɔsɔɔti yɛbahola yɛaboa na yɛamaa yɛ nwo anwosesebɛ (Nea ɛdendɛkpunli 18)

18. (a) Duzu a Belemgbunli Sɔlɔmɔn nwunle ye a? (b) Nzuzulɛ boni a ɛzoanvolɛ Pɔɔlo vale maanle a?

18 Marthe nee Henri neazo ne maa yɛnwu kɛ yɛbahola yɛamaa adiema raalɛ anzɛɛ adiema nrenyia bie mɔɔ hyia arɛlekyekyelɛ la anwosesebɛ. Belemgbunli Sɔlɔmɔn hɛlɛle kɛ: “Edwɛkɛ kpalɛ wɔ ye mekɛ nloa le kpalɛ somaa! Fɛlɛkolilɛ maa sonla nyunlu yɛ ɛzelekɛzelekɛ, yɛɛ amaneɛ fɛlɛko maa sonla te kpɔkɛ.” (Mrɛ. 15:23, 30) Bieko, debie mɔɔ yɛbagenga ye wɔ Ɛzinzalɛ Arane ne anu anzɛɛ yɛ wɛbsaete ne azo la bahola amaa awie mɔɔ asa nu ɛdo la anyia anwosesebɛ. Pɔɔlo hilele kɛ Belemgbunlililɛ edwɛne mɔɔ yɛbabɔ nu yɛado la kola maa yɛ anwosesebɛ. Ɔhɛlɛle kɛ: “Bɛhɔ zo bɛva edwɛne, ayɛlɛyelɛ, nee sunsum nu moyɛlɛ edwɛne bɛhilehile bɛ nwo na bɛmaa bɛ nwo anwosesebɛ, na bɛdo edwɛne wɔ bɛ ahonle nu bɛmaa Gyihova.”​—Kɔl. 3:16; Gyi. 16:25.

19. Duzu ati a anwosesebɛmaanlɛ nwo bahyia kpole kpalɛ kenle bie a? Na duzu a ɔwɔ kɛ yɛyɛ a?

19 Mekɛ mɔɔ Gyihova kenle ne “ɛlɛbikye la,” ɔbahyia kɛ yɛmaa yɛ nwo anwosesebɛ kpalɛ. (Hib. 10:25) Kɛmɔ Pɔɔlo zele ye mekɛ zo Kilisienema la, “bɛhɔ zo bɛmaa bɛ nwo anwosesebɛ na bɛboa bɛ nwo ngoko kɛ mɔɔ bɛlɛyɛ ye ala la.”​—1 Tɛs. 5:11.

^ ɛden. 11 Bɛhakyi bɛ aluma.