Wulu kɔ nuhua edwɛkɛ ne azo

Wulu kɔ nuninyɛne ne azo

Ɛlɛ Gyihova Pɛlepɛlelilɛ Adwenle Ne Bie Ɔ?

Ɛlɛ Gyihova Pɛlepɛlelilɛ Adwenle Ne Bie Ɔ?

‘Mebabɔ Gyihova duma ne nolo. Ɔle Nyamenle mɔɔ di nɔhalɛ, ɔnle amumuyɛ.’MƐLA 32:3, 4.

EDWƐNE: 110, 2

1, 2. (a) Kɛzi bɛsisile Neebɔto nee ɔ mra mrenyia ne mɔ ɛ? (b) Subane nwiɔ boni mɔ a yɛbazuzu nwo wɔ edwɛkɛ ɛhye anu a?

PƐ YE nvoninli nea. Bɛdo nrenyia bie ɛzonle kɛ yeyɛ ɛtane kpole bie. Ɔyɛle ye mbusuafoɔ nee ɔ gɔnwo mɔ azibɛnwo kɛ bɛgyinlanle menli mɔɔ bɛmbu bɛ bie la ɛzonledolɛ zo bɛbuale ye ewule fɔlɛ la. Menli mɔɔ kulo pɛlepɛlelilɛ la anwo bubule bɛ wɔ mekɛ mɔɔ bɛku nrenyia zɔhane mɔɔ edwɛkɛ ɛnle ɔ nwo nee ɔ mra mrenyia la. Ɛhye ɛnle edwɛkɛ mɔɔ bɛbɔle bɛ ti anu a bɛhanle a. Ɔle edwɛkɛ mɔɔ dole Gyihova nɔhalɛ sonvolɛ Neebɔto mɔɔ dɛnlanle aze wɔ Yizilayɛ Belemgbunli Ehabe mekɛ zo a.1 Arl. 21:11-13; 2 Arl. 9:26.

2 Yɛbazuzu mɔɔ dole Neebɔto nee ɛvoya mɔɔ limoa Kilisiene asafo ne anu kpanyinli bie mɔɔ yeambua ndɛne fɔɔnwo la anwo wɔ edwɛkɛ ɛhye anu. Mekɛ mɔɔ yɛlɛsuzu Baebolo nu neazo ɛhye mɔ anwo la, yɛbanwu kɛ mɛlɛbɛnwoaze nwo hyia amaa yɛanyia Gyihova pɛlepɛlelilɛ adwenle ne bie. Eza yɛbanwu kɛ saa yɛnyia ɛhulolɛ kɛ yɛbava ɛtane yɛahyɛ wɔ mekɛ mɔɔ nzisi bie ɛlɛkɔ zo wɔ asafo ne anu la a, ɔbamaa yɛala Gyihova pɛlepɛlelilɛ adwenle ne bie ali.

 BƐANLI PƐLEPƐLE

3, 4. Nwane a le Neebɔto, na duzu ati a yeandɔne ye vanye egyinli ne yeammaa Belemgbunli Ehabe ɛ?

3 Neebɔto lile nɔhalɛ maanle Gyihova wɔ mekɛ mɔɔ ɛnee Yizilayɛma dɔɔnwo li Belemgbunli Ehabe nee ɔ ye Belemgbunli Raalɛ Gyɛzɛbɛle atisesebɛ anzi la. Ɛnee Beeyale azonvolɛ zɔhane mɔ ɛmbu Gyihova anzɛɛ ɛnli ye ngyinlazo ne mɔ azo. Noko, ɛnee Neebɔto bu agɔnwolɛvalɛ mɔɔ ɔ nee Gyihova lɛ la kpalɛ, kɛ nwolɛ hyia tɛla ngoane bɔbɔ.

4 Kenga 1 Arelemgbunli 21:1-3. Mɔɔ Ehabe hanle kɛ ɔtɔ Neebɔto vanye egyinli ne anzɛɛ ɔmaa ye bie mɔɔ le kpalɛ la, Neebɔto anyɛ. Duzu ati ɔ? Ɔvile ɛbulɛ nu ɔhilehilele nu kɛ: “Menlile me mgbanyinli agya a menvale ɛya ne a; ɔle me mgbanyinli debie, yemɔti saa meminli ɔ bo zo a ɔnrɛyɛ boɛ. Nyamenle ɛkpa ɛhye ɛgua!” Neebɔto anyɛ ɔluakɛ Gyihova maanle Yizilayɛma mɛla mɔɔ tua abusua agyapadeɛ mɔɔ awie badɔne ye la. (Sɛl. 25:23; Ɛdi. 36:7) Ɔda ali kɛ ɛnee Neebɔto lɛ Gyihova adwenle wɔ ninyɛne nwo.

5. Kɛzi Gyɛzɛbɛle boale maanle bɛhunle Neebɔto ɛ?

5 Ɔyɛ alɔbɔlɛ kɛ Neebɔto nyɛleɛ ne maanle ɔnwunle amaneɛ dɔɔnwo wɔ Belemgbunli Ehabe nee ɔ ye asa anu la. Amaa ɔ sa aha vanye egyinli ne yeamaa ɔ hu la, Gyɛzɛbɛle yɛle ngyehyɛleɛ maanle bɛdole Neebɔto ɛzonle na ɛhye maanle bɛhunle ye nee ɔ mra mrenyia ne mɔ. Duzu a Gyihova yɛle ye wɔ nzisi nyɛleɛ kpole ɛhye anwo a?

NYAMENLE BUALE NDƐNE FƆƆNWO

6, 7. Kɛzi Gyihova hilele kɛ ɔkulo pɛlepɛlelilɛ ɛ, na duzu ati a ɛhye kyekyele Neebɔto mbusuafoɔ nee ɔ gɔnwo mɔ arɛle a?

6 Ɛkɛ ne ala, Gyihova zoanle Yilaegya wɔ Ehabe ɛkɛ. Yilaegya buale Ehabe ndɛne kɛ ɔle kodiawu nee awule. Kɛzi Gyihova buale edwɛkɛ ne ɛ? Mɔɔ dole Neebɔto nee ɔ mra mrenyia ne mɔ la bie a bado Ehabe, ɔ ye nee ɔ mra mrenyia ne mɔ a.1 Arl. 21:17-25.

7 Neebɔto abusua ne nee ɔ gɔnwo mɔ lile Ehabe kodiawu nyɛleɛ ne mɔɔ maanle bɛhunle bɛ la anwo nyane ɛdeɛ, noko Gyihova mɔɔ bɛze kɛ yenwu nzisi ɛbɛla ne na yeyɛ nwolɛ debie ndɛndɛ la kyekyele bɛ rɛle. Noko, bɛzɔle bɛ mɛlɛbɛnwoaze nee Gyihova anu anwodozo mɔɔ bɛlɛ la bɛnleanle wɔ edwɛkɛ fofolɛ mɔɔ zile la anu.

8. Duzu a Ehabe yɛle ye wɔ Gyihova ndɛnebualɛ ne anwo a, na duzu a vi nu rale a?

8 Mɔɔ Ehabe dele Gyihova ndɛnebualɛ ne la, ɔsuosuanle “ye adɛladeɛ mɔɔ ɔwula la anu na ɔvale ɛrele ɔhedale, ɔhyele ɛhɔne, ɔvale ɛrele ɔlale na ɔluale ye alɔbɔlɛ alɔbɔlɛ nu.” Ehabe bɛlɛle ɔ nwo aze! Duzu a vi nu rale a? Gyihova zele Yilaegya kɛ: “Wɔnwu kɛ Ehabe ɛzi ɛdo ɔ nwo aze bɛtɛɛ ɛmaa me la ɔ? Kɛmɔ yevu ɔ nwo la, me nee ye ɛnrɛli kɛkala wɔ ye mekɛ zo; kenle bie, wɔ ɔ ra ne mekɛ zo yɛɛ mebabɔ ye awuke ne a.” (1 Arl. 21:27-29; 2 Arl. 10:10, 11, 17) Gyihova ‘mɔɔ sɔ ahonle kɔsɔɔti nea’ la zele Ehabe anwunvɔne.Mrɛ. 17:3.

MƐLƐBƐNWOAZE BƆ YƐ NWO BANE

9. Duzu ati a mɛlɛbɛnwoaze bɔle Neebɔto abusua ne nee ɔ gɔnwo mɔ anwo bane ɛ?

9 Kɛzi kpɔkɛzilɛ ɛhye hanle bɛdabɛ mɔɔ bɛze amumuyɛ ɛbɛla ne mɔɔ Ehabe bɔle la ɛ? Ɔbayɛ kɛ ɛhye zɔle Neebɔto abusua ne nee ɔ gɔnwo mɔ diedi nleanle. Saa ɔle zɔ a, bie a mɛlɛbɛnwoaze bɔle bɛ nwo bane ɔmaanle bɛhɔle zo bɛvale nɔhalɛlilɛ bɛzonlenle Gyihova na bɛnyianle anwodozo kɛ Nyamenle ɛnli nzisi. (Kenga Mɛla ne 32:3, 4.) Neebɔto, ɔ mra, nee bɛ mbusua banyia Gyihova pɛlepɛlelilɛ  ne azo nvasoɛ wɔ mekɛ mɔɔ ɔbadwazo tenlenema la. (Dwobu 14:14, 15; Dwɔn 5:28, 29) Bieko, awie mɔɔ bɛlɛ ɔ nwo aze la kakye kɛ: “Nyamenle babua debie biala mɔɔ yɛyɛ, nee awozinli nu nyɛleɛ biala anwo ndɛne, kpalɛ o, ɛtane o.” (Nol. 12:14) Nɔhalɛ nu, saa Gyihova ɛlɛbua ndɛne a, ɔsuzu ninyɛne mɔɔ yɛnze la amuala anwo. Ɛhye ati, mɛlɛbɛnwoaze bɔ diedi mɔɔ yɛlɛ ye Gyihova anu la anwo bane.

10, 11. (a) Tɛnlabelɛ boni mɔ a bahola azɔ yɛ pɛlepɛlelilɛ anlea a? (b) Ndenle boni mɔ azo a mɛlɛbɛnwoaze bɔ yɛ nwo bane a?

10 Saa mgbanyima ne mɔ si kpɔkɛ bie mɔɔ ɛnde ɔ bo anzɛɛ ɛnlie ɛndo nu la a, duzu a ɛbayɛ a? Kɛ neazo la, saa nwolɛ adenle bie mɔɔ ɛ nye die nwo la fi ɛdawɔ anzɛɛ wɔ kulovolɛ bie asa a, duzu a ɛbayɛ a? Na saa bɛtu ɛ ye anzɛɛ ɛ hu, ɛ ra anzɛɛ ɛ gɔnwo kpalɛ bie na ɛnlie ɛndo nu ɛ? Saa wɔ adwenle yɛ wɔ kɛ bɛze ɛtanevolɛ bie mɔɔ ɔnle kɛ bɛse ye anwunvɔne la anwunvɔne noko ɛ? Tɛnlabelɛ ɛhye mɔ bahola azɔ yɛ diedi wɔ Gyihova nee ye ahyehyɛdeɛ ne anu anlea. Saa ɛyia sɔnea zɛhae bie a, kɛzi mɛlɛbɛnwoaze babɔ ɛ nwo bane ɛ? Yɛnlea ndenle nwiɔ ɛhye mɔ.

Saa mgbanyima ne mɔ bɔ kpɔkɛ bie mɔɔ bɛzi la nolo na ɛnlie ɛndo nu a, duzu a ɛbayɛ a?

11 Mɔɔ limoa, mɛlɛbɛnwoaze bamaa yɛanwu kɛ yɛnze edwɛkɛ ne amuala.  Ɔnva nwo mɔɔ yɛze ye wɔ tɛnlabelɛ bie anwo la, Gyihova ala a kola nwu awie ahonle nu a. (1 Sa. 16:7) Saa yɛkakye nɔhalɛ edwɛkɛ ɛhye a, ɔbamaa yɛabɛlɛ yɛ nwo aze, yɛanwu kɛ yɛlɛ sinlidɔlɛ, na ɔbaboa yeamaa yɛahakyi adwenle mɔɔ yɛlɛ ye wɔ edwɛkɛ bie anwo la. Mɔɔ tɔ zo nwiɔ, mɛlɛbɛnwoaze bamaa yɛayɛ tieyɛ na yɛazi abotane wɔ mekɛ mɔɔ yɛlɛkendɛ kɛ Gyihova bali edwɛkɛ bie anwo gyima bɔkɔɔ la. Nrɛlɛbɛvolɛ ne hɛlɛle kɛ: “Ɔbayɛ boɛ yeamaa menli mɔɔ sulo Nyamenle la . . . , na amumuyɛma ɛdeɛ, ɔnrɛyɛ boɛ ɔnrɛmaa bɛ, yɛɛ bɛ ngoane ɛnrɛwa.” (Nol. 8:12, 13) Saa yɛbɛlɛ yɛ nwo aze a, ɔbaboa yɛ nee awie biala.Kenga 1 Pita 5:5.

NABALABA NYƐLEƐ BIE

12. Edwɛkɛ boni a yɛbazuzu nwo kɛkala a, na duzu ati ɔ?

12 Edwɛkɛ bie mɔɔ zile la zɔle ɛvoya mɔɔ limoa Kilisienema mɔɔ wɔ Anteɔko mɔɔ wɔ Selea la mɛlɛbɛnwoaze nee fakyɛ nleanle. Bɛmaa yɛzuzu zɔhane edwɛkɛ ne anwo na yɛnlea kɛzi ɔbaboa yɛ yeamaa yɛanleɛnlea yɛ subane wɔ ɛtanefakyɛ nwo la anu na yɛade kɛzi ɛtanefakyɛ fale Gyihova pɛlepɛlelilɛ adwenle ne anwo la abo.

13, 14. Nwolɛ adenle boni mɔ a ɛzoanvolɛ Pita nyianle a, na kɛzi ɔlale akɛnrasesebɛ ali ɛ?

13 Ɛnee ɛzoanvolɛ Pita le asafo nu kpanyinli mɔɔ bɛze ye kpalɛ wɔ Kilisiene asafo ne anu. Ɛnee ɔle Gyisɛse agɔnwo na ɔnyianle ɛzonlelilɛ mɔɔ anwo hyia la. (Mat. 16:19) Kɛ neazo la, wɔ ɛvolɛ 36 Y.M., Pita nyianle nwolɛ adenle bɔle edwɛkpa ne nolo hilele Kɔnileɛse nee ye sua nu amra. Ɛhye le nwolɛ adenle titili ɔluakɛ ɛnee Kɔnileɛse le maanle maanle ne anu sonla mɔɔ bɛtɛpɛle ye mrenyia zo a. Mɔɔ sunsum nwuanzanwuanza ne rale Kɔnileɛse nee ye sua nu amra anwo zo la, Pita hanle kɛ: “Menli ɛhye mɔ ɛnyia sunsum nwuanzanwuanza kɛ yɛdayɛ la, asoo awie bahola aha kɛ ɔnle kɛ yɛfa nzule yɛsɔne bɛ ɔ?”Gyi. 10:47.

14 Wɔ ɛvolɛ 49 Y.M., ɛzoanvolɛma ne nee mgbanyima mɔɔ bɛwɔ Gyɛlusalɛm la yiale kɛ bɛsuzu nwo saa ɔwɔ kɛ maanle maanle ne anu amra mɔɔ bɛrayɛ Kilisienema la maa bɛpɛ bɛ mrenyia zo a. Wɔ ayia ɛhye abo, Pita vale akɛnrasesebɛ dendɛle hakyele mediema ne mɔ kɛ ɛvolɛ dɔɔnwo mɔɔ ɛze ɛhɔ la maanle maanle ne anu amra mɔɔ ɛnee bɛtɛpɛle bɛ mrenyia zo la nyianle sunsum nwuanzanwuanza ahyɛlɛdeɛ ne. Edwɛkɛ mɔɔ Pita hanle la boale ɛvoya mɔɔ limoa neazo eku ne kpalɛ ɔmaanle bɛzile kpɔkɛ. (Gyi. 15:6-11, 13, 14, 28, 29) Ɔbayɛ kɛ Dwuuma nee bɛdabɛ mɔɔ bɛrayɛ Kilisienema amuala anye liele akɛnrasesebɛ mɔɔ Pita vale dendɛle la anwo kpalɛ. Yeanyɛ se kɛ bɛbanyia anwodozo wɔ nrenyia ɛhye mɔɔ bɔ mɔdenle la anu.Hib. 13:7.

15. Mɔɔ Pita wɔ Anteɔko mɔɔ wɔ Selea la, duzu nvonleɛ a ɔyɛle a? (Nea mɔlebɛbo nvoninli ne.)

15 Mɔɔ bɛyɛle ayia ne wɔ ɛvolɛ 49 Y.M. la, yeangyɛ Pita hɔle Anteɔko mɔɔ wɔ Selea la. Mɔɔ ɔwɔ ɛkɛ ne la, ɔ nee ɔ mediema mɔɔ bɛvi maanle maanle ne anu la bɔle nu yɛle ninyɛne. Nɔhalɛ, bɛnyianle Pita ndelebɛbo nee ye anwubielɛ ne azo nvasoɛ. Yɛkola yɛnwu kɛ ɔbayɛ bɛ azibɛnwo yɛɛ bɛ rɛle babɔ kɛ arɛlevilɛ nu ala akee Pita nee bɛ ɛnli debie bieko la. Pita nyɛleɛ ne nyianle Dwuuma gyɛne mɔɔ bɛwɔ asafo ne anu la nee Baanabase bɔbɔ anwo zo tumi na bɛyɛle mɔɔ Pita yɛle la bie. Duzu a maanle Kilisiene asafo kpanyinli mɔɔ lɛ anwubielɛ zɛhae la nyianle adwenle zɛhae mɔɔ anrɛɛ ɔbahola  yeava mgbakyemgbakyenu yeara asafo ne anu la ɛ? Mɔɔ hyia kpalɛ la, duzu a yɛsukoa yɛfi Pita nvonleɛ ne anu mɔɔ baboa yɛ saa asafo kpanyinli bie edwɛkɛ anzɛɛ ye nyɛleɛ gyegye yɛ a?

16. Kɛzi bɛdenrɛle Pita ɛ, na kpuya boni mɔ a yɛbahola yɛabiza a?

16 Kenga Galeehyeama 2:11-14. Pita maanle sonla nwo ɛzulolɛ nyianle ɔ nwo zo tumi. (Mrɛ. 29:25) Ɛnee Pita ze Gyihova adwenle wɔ edwɛkɛ ne anwo ɛdeɛ, noko ɔzulole Dwuuma mɔɔ bɛpɛ bɛ mrenyia zo mɔɔ bɛwɔ Gyɛlusalɛm asafo ne anu la. Ɛzoanvolɛ Pɔɔlo mɔɔ ɛnee ɔdaye noko ɔwɔ zɔhane ayia ne abo wɔ Gyɛlusalɛm wɔ ɛvolɛ 49 Y.M. anu la, hanle ye wɔ Pita anyunlu ɛkɛ wɔ Anteɔko ɔmaanle ɔnwunle ye nabalaba nyɛleɛ ne. (Gyi. 15:12; Gal. 2:13) Duzu a maanle maanle ne anu amra mɔɔ bɛrayɛ Kilisienema mɔɔ Pita nyɛleɛ ne hanle bɛ la bayɛ ye wɔ nabalaba nyɛleɛ ɛhye anwo a? Asoo bɛbamaa yeado bɛ sa nu? Asoo Pita nvonleɛ ne maanle nwolɛ adenle mɔɔ ɔlɛ la vile ɔ sa?

FA ƐTANE KYƐ

17. Kɛzi Pita nyianle Gyihova ɛtanefakyɛ ne azo nvasoɛ ɛ?

17 Ɔda ali kɛ Pita bɛlɛle ɔ nwo aze liele Pɔɔlo ɛdenrɛdenrɛlɛ ne dole nu. Debie biala ɛnle Ngɛlɛlera ne anu mɔɔ kile kɛ nwolɛ adenle mɔɔ ɔlɛ la vile ɔ sa a. Nzinlii sunsum ne maanle ɔhɛlɛle ngɛlata nwiɔ na bɛva bɛboka Baebolo ne anwo. Wɔ ye kɛlata ne mɔɔ tɔ zo nwiɔ la anu, Pita vɛlɛle Pɔɔlo kɛ “yɛ diema kulovolɛ.” (2 Pita 3:15) Pita nvonleɛ ne yɛle maanle maanle ne anu amra mɔɔ bɛwɔ asafo ne anu la nyane ɛdeɛ, noko Gyisɛse mɔɔ le asafo ne ati la hɔle zo vale ye lile gyima. (Ɛfɛ. 1:22) Ɔti ɛnee ɔwɔ kɛ asafo ne anu amra sukoa Gyisɛse nee ɔ Ze bɛfa ɛtane bɛkyɛ. Ɔwɔ kɛ yɛnyia anyelazo kɛ sonla mɔɔ ɛnli munli la sinlidɔlɛ ammaa bɛ nuhua bie asa nu ando.

18. Tɛnlabelɛ boni mɔ anu a ɔwɔ kɛ yɛda Gyihova pɛlepɛlelilɛ adwenle ne bie ali a?

18 Kɛ mɔɔ ɛnee ɔde ye wɔ ɛvoya mɔɔ limoa la, Kilisiene asafo ne anu mgbanyima ɛnli munli, “ɔluakɛ yɛ muala yɛfo fane dɔɔnwo.” (Gye. 3:2) Bie a yɛze nɔhalɛ edwɛkɛ ɛhye, noko mɔɔ gyegye la a le mekɛ mɔɔ adiema bie kɛha yɛ la. Wɔ tɛnlabelɛ zɛhae anu, yɛbala Gyihova pɛlepɛlelilɛ adwenle ne bie ali ɔ? Kɛ neazo la, saa asafo kpanyinli bie ka edwɛkɛ mɔɔ zɔho kɛ ɔlɛ menli bie anwo adwenle ɛtane a, duzu a ɛbayɛ a? Asoo ɛbamaa kpanyinli bie edwɛkɛ mɔɔ yɛ nyane anzɛɛ ɔgyegye wɔ la ado ɛ sa nu? Kɛ anrɛɛ ɛbapele ɛ nwo wɔaha kɛ adiema ne ɛnfɛta kɛ ɔyɛ kpanyinli bieko la, asoo ɛbahendɛ Gyisɛse mɔɔ le asafo ne ati la? Asoo ɛbabɔ mɔdenle kɛ ɛbanwu edwɛkɛ ne amuala bɔbɔ wɔadwenledwenle ɛvolɛ dɔɔnwo mɔɔ adiema ne ɛzonle nɔhalɛ nu la anwo ɔ? Saa adiema mɔɔ ɛvo wɔ la kɔ zo sonle kɛ asafo nu kpanyinli anzɛɛ ɔnyia nwolɛ adenle bieko a, ɔbayɛ wɔ fɛ ɔ? Ɛhulolɛ mɔɔ ɛbanyia kɛ ɛfa ɛtane wɔahyɛ la bahile kɛ ɛlɛ Gyihova pɛlepɛlelilɛ adwenle ne bie.Kenga Mateyu 6:14, 15.

19. Duzu a ɔwɔ kɛ yɛbɔ kpɔkɛ kɛ yɛbayɛ a?

19 Menli mɔɔ kulo pɛlepɛlelilɛ la anye la mekɛ mɔɔ Gyihova baye nyanelilɛ mɔɔ Seetan nee ye ɛtane ewiade ne ɛva ɛra alesama anwo zo ɛkɛ bɔkɔɔ la. (Aye. 65:17) Kɔkpula mekɛ zɔhane, ɔrɛla ye kɛ yɛ nuhua ko biala babɔ mɔdenle kɛ ɔbala Gyihova pɛlepɛlelilɛ adwenle ne bie ali, na yeabɛlɛ ɔ nwo aze yeanwu kɛ ɔlɛ ye sinlidɔlɛ na yeanyia ɛhulolɛ kɛ ɔbava menli mɔɔ kɛvo ye la ɛtane yeahyɛ bɛ.