Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Nyamenle Lole Yɛ Wɔ Ndenle Dɔɔnwo Azo

Nyamenle Lole Yɛ Wɔ Ndenle Dɔɔnwo Azo

ƐNEE me papa Arthur le kpavolɛ mɔɔ kulo Nyamenle ɛzonlenlɛ, yemɔti ɛnee ɔkulo kɛ ɔyɛ Metɔdise ɛsɔfo. Noko mekɛ mɔɔ ɔbɔle ɔ bo kɛ ɔkenga Baebolo Sukoavoma ne mbuluku na ɔ nee bɛ ahɔ debiezukoalɛ la, ye bodane hakyile. Bɛzɔnenle ye wɔ 1914 na ɛnee yeli ɛvolɛ 17. Ɛnee Ewiade Konle I ɛlɛkɔ zo, na bɛvɛlɛle ye kɛ ɔhɔ sogya. Kɛmɔ ɛnee ɔngulo kɛ ɔkɔ konle la ati, bɛdole ye efiade siane bulu wɔ Kingston mɔɔ wɔ Ontario, Canada la. Mɔɔ bɛyele me Papa la, ɔvale ɔ nwo ɔwulale dahuu adekpakyelɛ gyima ne anu.

Wɔ 1926, Arthur Guest gyale Hazel Wilkinson mɔɔ ye mame nwunle nɔhalɛ ne wɔ 1908 la. Bɛwole me wɔ April 24, 1931. Yɛle ngakula nna na metɔ zo nwiɔ. Ɛnee Gyihova ɛzonlenlɛ hyia yɛ abusua ne kpalɛ, na kɛzi me Papa bu Baebolo ne la maanle yɛ nye liele Nyamenle Edwɛkɛ ne anwo. Ɛnee yɛbɔ nu kɛ abusua la yɛyɛ azua nu daselɛlilɛ.Gyi. 20:20.

MEANGYINLA AFOA BIALA YƐƐ MENYƐLE ADEKPAKYELƐNLI KƐ ME PAPA LA

Ewiade Konle II bɔle ɔ bo wɔ 1939, na ye ɛvolɛ ko anzi arane vale ɔ sa dole Gyihova Alasevolɛ gyima ne azo wɔ Canada. Ɛnee bɛmaa sukulu ngakula di maanle nwo ɛhulolɛ nwo ɛvoyia, bɛbiza fɛlɛnra ahye, na bɛto maanle edwɛne wɔ sukulu. Saa bɛlɛyɛ ninyɛne ɛhye mɔ a, bɛfoa me nee me diema raalɛ kpanyinli Dorothy bɛfi sukulu sua ne anu. Ɔzinle me nwo kɛ kenle ko bie ɛnee me kilehilevolɛ ne kpondɛ kɛ ɔgua me nyunlu aze na ɔhanle kɛ mele bobonyia la. Yɛkpɔnenle sukulu la, me gɔnwo mɔ dɔɔnwo bole me na bɛzuhunle me bɛdole aze. Ɛhye maanle kpɔkɛ mɔɔ ɛnee mebɔ kɛ ‘mebadie Nyamenle kɛ tumivolɛ meadɛla sonla’ la anu yɛle se.Gyi. 5:29.

 Bɛzɔnenle me wɔ angola bie anu wɔ ɛbɔ nu wɔ July 1942, ɛnee meli ɛvolɛ 11. Ɛnee saa yɛmaa adenle a meyɛ ademanlɛ adekpakyelɛ, (ɛnɛ bɛfɛlɛ ye adekpakyelɛ boavolɛ). Wɔ ɛvolɛ ko anu, me nee mediema nsa bie hanle edwɛkɛ ne hilele menli mɔɔ bu mbaka mɔɔ bɛde azɛlɛsinli bie mɔɔ bɛnda bɛnyɛ nu gyima anu la wɔ Ontario sɔlɔ.

Membɔle dahuu adekpakyelɛ gyima ne abo wɔ May 1, 1949. Kɛmɔ ɛnee bɛlɛbuke Canada Bɛtɛle ne anu la ati, bɛvɛlɛle me kɛ mengɔmoa na nzinlii membokale Bɛtɛle abusua ne anwo wɔ December 1. Bɛmaanle menyɛle gyima wɔ ɛleka mɔɔ bɛpelente ninyɛne la. Menyɛle gyima nɔsolɛ nu dapɛne dɔɔnwo, mempelentele trate mɔɔ ka ɛkpɔlɛ mɔɔ ɛnee Gyihova menli mɔɔ wɔ Canada ɛlɛyia ye la.

Nzinlii mɔɔ ɛnee melɛyɛ gyima wɔ Ɛzonlenlɛ Nwo Gyimalilɛleka ne la, membizembizale adekpakyelɛma bie mɔ mɔɔ ɛlɛkɔ ahɔzonle wɔ Quebec, ɛleka mɔɔ ɛnee ɛkpɔlɛ ne anu yɛ se kpalɛ na bɛra kɛ bɛbanleɛnlea Bɛtɛle la edwɛkɛ. Mary Zazula mɔɔ vi Edmonton, Alberta la, boka bɛ nwo. Kɛmɔ ɔ nee ɔ diema kpanyinli Joe hanle kɛ bɛnrɛgyakyi Baebolo ne ɛzukoalɛ la ati, bɛ awovolɛ mɔɔ bɛkɔ Orthodox asɔne la voanle bɛ vile sua nu. Bɛzɔnenle bɛ mu nwiɔ wɔ June 1951, na ye siane nsia anzi bɛbɔle adekpakyelɛ gyima ne abo. Mekɛ mɔɔ melɛbizebiza bɛ edwɛkɛ ne la, me nye liele Mary mɔdenlebɔlɛ ne anwo. Menganle ye me ti anu kɛ, ‘Saa edwɛkɛ ɛtane biala anzi a, ɔzɔho kɛ raalɛ ɛhye a mebagya ye a.’ Yɛgyale wɔ ye siane ngɔnla anzi, January 30, 1954. Ye dapɛne ko anzi, bɛmaanle yɛ maangyebakyi gyima nwo ndetelɛ, na ɛvolɛ nwiɔ mɔɔ doa zo la, yɛzonlenle maangyebakyi bie mɔɔ wɔ Ontario sɔlɔ la.

Ewiade amuala daselɛlilɛ gyima ne yɛle kpole yemɔti ɛnee bɛhyia edwɛkpatɛlɛvolɛma dɔɔnwo. Yɛhanle kɛ saa yɛkola yɛsɔ Cananda ɛyɛyɛlɛ kpole ne na yɛgyinla wawaa nu nretenrete ne mɔ anloa a, ɛnee yɛbahola yɛadɛnla ɛleka biala. Yɛhɔle Geleade Sukulu ne mɔɔ tɔ zo 27 la bie na yɛwiele wɔ July 1956, mɔɔ ɔkadwu November la ɛnee yɛwɔ ɛleka mɔɔ yɛbazonle la—Brazil.

EDWƐKPATƐLƐVOLƐ WƆ BRAZIL

Yɛdwule Brazil Bɛtɛle la, yɛbɔle ɔ bo kɛ yɛsukoa Portuguese. Mɔɔ yɛnwunle kɛzi bɛbiza ahye nee kɛzi yɛbava magazine ne mɔ yɛamaa wɔ mitini ko anu la, yɛbɔle daselɛlilɛ bo. Bɛhanle kɛ saa suamenle bie kile anyelielɛ a, yɛgenga Ngɛlɛlera mɔɔ ka kɛzi tɛnlabelɛ ne bayɛ wɔ Nyamenle Belemgbunlililɛ ne abo la yɛhile ye. Kenle mɔɔ limoa mɔɔ yɛhɔle daselɛlilɛ la, raalɛ bie diele yɛ kpalɛ, yemɔti mengengale Yekile 21:3, 4, akee me nye zo  bulule me! Ɛnee ewia ne anloa yɛ se maa me, na ɛhye hɔle zo gyegyele me.

Ɛnee yɛle edwɛkpatɛlɛvolɛma wɔ suakpole Campos, mɔɔ kɛkala asafo 15 a wɔ ɛkɛ la azo. Mɔɔ yɛdwule ɛkɛ ne la, ɛnee ekpunli ko pɛ mɔɔ ɛde ɔ nwo la nee mediema mraalɛ nna bie mɔɔ bɛle edwɛkpatɛlɛvolɛma la a wɔ sua ne azo a: Esther Tracy, Ramona Bauer, Luiza Schwarz, nee Lorraine Brookes (kɛkala Wallen). Ɛnee me sua nu gyima a le kɛ mebakpo ninyɛne na meakpondɛ ɛyɛne mɔɔ yɛbava yɛado aleɛ la. Kenlenzile nɔsolɛ bie mɔɔ yɛwiele Ɛzinzalɛ Arane Ɛzukoalɛ ne la, yɛnyianle ɛyɛvolɛ bie mɔɔ yɛ nye ɛnla ye la. Ɛnee me ye la ebia bie anu na yɛdayɛ mɔɔ yɛha la yɛlɛbɔ adawu. Mɔɔ ɔmaanle ɔ ti zo ɔvile esumi ne azo la, ɛwɔlɛ bie vi ɔ bo vindele maanle ɛkɛ ne yɛle dede kɔkpula kɛ mengunle ye la!

Menzukoale Portuguese la anzi ɛvolɛ ko, bɛkpale me kɛ maangyebakyi zo neavolɛ. Yeamkpondɛ ninyɛne mgbole wɔ namunamu ne mɔ anu, ɛnee yɛnlɛ laete, yɛlale manra ɛkpa zo yɛɛ yɛvale ehwili anzɛɛ ɛkpɔnwɔ yɛdule adenle. Yɛvale keteke yɛdule adenle yɛhɔhanle edwɛkɛ ne wɔ azɛlɛsinli mɔɔ bɛnda bɛnyɛ nu gyima la anu, na yɛhayele sua ekpumgbunli ko wɔ sua bie mɔɔ awie mɔ haye bie la anu. Ɔfese ne maanle yɛ magazine 800 kɛ yɛva yɛhɔ daselɛlilɛ. Ɛnee ɔwɔ kɛ yɛkɔ posuɔfese fane dɔɔnwo yɛkɔsesa magazine ne yɛkɔ sua nu.

Wɔ 1962, bɛyɛle Belemgbunlililɛ Gyima Sukulu wɔ Brazil bɛmaanle mediema mrenyia nee mediema mraalɛ mɔɔ bɛle edwɛkpatɛlɛvolɛma la. Mendule adenle siane nsia mengɔnyɛle sukulu dɔɔnwo na ɛnee Mary ɛmboka nwo. Menyɛle sukulu ne bie wɔ Manaus, Belém, Fortaleza, Recife, yɛɛ Salvador. Menyɛle maanzinli nyianu wɔ Manaus, nwɔhoalilɛ ɛleka ne mɔɔ ɛlie duma la. Ezule dɔle kpole zɛkyele nzule mɔɔ yɛno la, na ɛnee yɛnnyia ɛleka kpalɛ mɔɔ yɛbali aleɛ wɔ nyianu ne abo a. (Zɔhane mekɛ ne, ɛnee bɛmaa yɛ aleɛ wɔ nyianu bo.) Mengɔnwunle sogyama ne, na kpanyinli ko vile atiakunlukɛnlɛma nu maanle yɛ nzule yɛyɛle nyianu ne, na ɔmaanle sogyama rabɔle kpɔda maanle yɛyɛle yɛ egyaade nee ɛleka mɔɔ yɛbali aleɛ la.

Mendule adenle la, Mary lile daselɛ wɔ ɛleka mɔɔ Portuguesema di gua mɔɔ ezukoa ala a bɛdwenle nwo la. Yeangola yeanga edwɛkɛ ne yeangile awie biala, yemɔti ɔzele Bɛtɛlema bie kɛ, “Ɛleka mɔɔ memkpondɛ kɛ mekɔtɛnla la a le Portugal.” Azibɛnwo edwɛkɛ bie zile! Yeangyɛ yɛnyianle kɛlata kɛ yɛhɔzonle wɔ Portugal. Zɔhane mekɛ ne, ɛnee bɛva bɛ sa bɛdo yɛ gyima ne azo wɔ ɛkɛ, noko yɛliele yɛdole nu ɔnva nwo kɛ alimoa ne ɛnee ɔyɛ Mary azibɛnwo la.

 YƐZONLENLE WƆ PORTUGAL

Yɛhɔdwule Lisbon, Portugal, wɔ August 1964. Ɛnee Portugal feabo kpolisima (PIDE) ne ɛlɛyɛ yɛ mediema ne mɔ kpɔdekpɔde kpalɛ. Ɛhye ati, ɛnee ɔnle kɛ yɛmaa awie bayia yɛ adenle, yɛɛ yɛamkpondɛ Alasevolɛ mɔɔ bɛwɔ ɛkɛ la. Yɛdɛnlanle nyɛvolɛ sua nu hɔkpulale kɛ yɛ sa hanle yɛ ngɛlata. Mɔɔ yɛ sa hanle yɛ ngɛlata ne mɔ la, yɛhayele sua. Wɔ January 1965, akee yɛhɔle Bɛtɛle. Yɛ nye liele kpalɛ wɔ mekɛ mɔɔ yɛhɔle yɛ debiezukoalɛ mɔɔ limoa wɔ siane nnu anu la!

Yɛdele kɛ alehyenlɛ biala kpolisima kɔ yɛ mediema ne mɔ anwo zo wɔ bɛ azua nu. Ɛnee bɛlɛtoto Belemgbunlililɛ Asalo ne mɔ anu yemɔti yɛyɛle debiezukoalɛ ne mɔ wɔ mediema azua nu. Kpolisima hyele mediema dɔɔnwo na bɛbizebizale bɛ edwɛkɛ. Bɛyɛle mediema mrenyia asa amaa bɛabobɔ mediema mɔɔ nea debiezukoalɛ ne mɔ azo la aluma. Ɛhye ati, mediema ne mɔ anva bɛ aluma kpalɛ anvɛlɛ bɛ nwo, emomu bɛvale aluma le kɛ José anzɛɛ Paulo a bɛvɛlɛle bɛ nwo a. Ɔti yɛdayɛ noko yɛyɛle bie.

Yɛ mediema ne mɔ mɔɔ yɛkilehile bɛ la a ɛnee hyia yɛ kpalɛ a. Ɛnee Mary gyima a le kɛ ɔbataepe Ɛzinzalɛ Arane, debiezukoalɛ ɛdeɛ ne nee mbuluku gyɛne wɔ kɛlata zo na bɛava milahyinli bɛapelente ye dɔɔnwo.

MENGYINLANLE EDWƐKPA NE ANZI WƆ KƆƆTO

Wɔ June 1966, bɛlile edwɛkɛ bie wɔ Lisbon. Bɛ nee Feijó Asafo ne mɔɔ bɛ dodo le 49 la hɔle kɔɔto kɛ bɛyɛ ayia mɔɔ mɛla ɛmmaa adenle la wɔ awie sua nu. Menyɛle me nwo lɔya membizebizale bɛ kpuya kɛ mɔɔ bɛyɛ ye wɔ kɔɔto la, menvale menzieziele bɛ memaanle sɔnea ne. Ɛnee yɛze kɛ yɛnrɛli konim, noko yɛnwunle kɛ ɔbayɛ daselɛlilɛ kpole. Mɔɔ yɛ lɔya ne dwula ye edwɛkɛ ne la, ɔvale akɛnrasesebɛ ɔhanle Gameeleɛle mɔɔ dɛnlanle aze wɔ ɛvoyia mɔɔ limoa anu la edwɛkɛ ne. (Gyi. 5:33-39) Adwelie kɛlɛvoma hanle nwolɛ edwɛkɛ, na bɛguale mediema mrenyia nee mraalɛ 49 efiade, ɔvi kenle 45 kɔdwu siane nnu nee foa. Ɔyɛ yɛ fɛ kɛ yɛ lɔya akɛnrasesebɛ ne bɔle Baebolo ɛzukoalɛ nee debiezukoalɛ ɛhɔlɛ bo kolaa na yeawu la.

Wɔ December 1966, bɛkpale me kɛ Bɛtɛle zo neavolɛ, na menvale mekɛ dɔɔnwo menlile kɔɔto edwɛkɛ nwo gyima. Bɛliele bɛdole nu kɛ Gyihova Alasevolɛ lɛ ɛzonlenlɛ nu fanwodi. (Fel. 1:7) Bɛliele yɛ bɛdole nu bɔkɔɔ wɔ mɛla nu wɔ December 18, 1974. Mediema Nathan Knorr nee Frederick Franz, vi ewiade amuala gyima ne ati rale Portugal, na bɛrabokale yɛ nwo wɔ ayia titili mɔɔ yɛyɛle wɔ Oporto nee Lisbon la, na menli dodo mɔɔ rale la le 46,870.

 Eza Gyihova maanle edwɛkɛhanlɛ gyima ne nyianle anyuhɔlɛ wɔ mbɔra mɔɔ bɛka Portuguese wɔ ɛkɛ mɔɔ Azores, Cape Verde, Madeira, nee São Tomé yɛɛ Príncipe boka nwo la azo. Bɛdɛlɛle Bɛtɛle ne noko anu wɔ 1988. Wɔ April 23 wɔ zɔhane ɛvolɛ ne anu, Adiema Milton Henschel maanle ɛdendɛlɛ mɔɔ bɛvale bɛbukele Bɛtɛle ne la, na menli 45,522 a diele a. Ɔyɛ anyelielɛ kɛ mediema mrenyia nee mraalɛ 20 mɔɔ ɛnee le edwɛkpatɛlɛvolɛma wɔ Portugal la rale ayia titili zɔhane bie la.

NƆHAVOMA NEAZO BOALE YƐ

Nɔhavoma mɔɔ yɛ nee bɛ dule ɛvolɛ dɔɔnwo la ɛboa yɛ kpalɛ. Menyianle ɛzukoalɛdeɛ kɛnlɛma menvile Adiema Theodore Jaracz mɔɔ me nee ye hɔkpɔlale Bɛtɛle bie la ɛkɛ. Ɛnee Bɛtɛle zɔhane ɛlɛyia ngyegyelɛ kpole bie, na Ɔfese Kɔmatii ne anu amra ɛyɛ debie biala mɔɔ bɛbahola la. Amaa bɛ ahonle adɔ bɛ azule nu la, Adiema Jaracz hanle kɛ: “Akee ɔwɔ kɛ yɛmaa sunsum nwuanzanwuanza ne adenle ɔyɛ gyima.” Mekɛ bie, yɛhɔnleɛnleanle Brooklyn Bɛtɛle, na me nee me ye Mary nee mediema bie hɔkpɔlale Adiema Franz wɔ nɔsolɛ nu. Mɔɔ yɛhanle kɛ ɔha ɛvolɛ dɔɔnwo ne mɔɔ yeva yezonle Gyihova la anwo edwɛkɛ ɔmaa yɛva yɛkpɔne la, Adiema Franz hanle kɛ: “Bɛ nee Gyihova ahyehyɛdeɛ ne foa mɔɔ wɔ azɛlɛ ye azo la ɛlua wɔ mekɛ kpalɛ nee ɛtane nu. Yemɔ ala a ɔlɛyɛ gyima mɔɔ Gyisɛse zele ye ɛdoavolɛma kɛ bɛyɛ la a—bɛbɔ Nyamenle Belemgbunlililɛ ne anwo edwɛkpa ne nolo!”

Me nee me ye yɛ nye die kpalɛ kɛ yɛlɛyɛ zɔhane la. Yɛkakye Bɛtɛle ngakyile mɔɔ yɛhɔkpɔlale bɛ la kpalɛ. Ɛhye maanle yɛnyianle adenle yɛhilele gyima mɔɔ mediema mgbavolɛ nee mgbanyima kɔsɔɔti ɛlɛfa nɔhalɛlilɛ ayɛ la anwo anyezɔlɛ, na yɛmaanle bɛ anwosesebɛ kɛ nwolɛ adenle titili mɔɔ bɛnyia bɛlɛsonle Gyihova la bɛdoa zo.

Ɛvolɛ dɔɔnwo ɛpɛ nu, na yɛ mu nwiɔ yɛbo ɛvolɛ 80. Anwodolɛ ɛlɛgyegye Mary. (2 Kɔl. 12:9) Sɔnea ɛmaa yɛ diedi nee kpɔkɛ mɔɔ yɛbɔ kɛ yɛbagyinla yɛ munlililɛ nu la anu ɛmia. Saa yɛdwenledwenle yɛ ɛbɛlabɔlɛ nwo a, yɛnwu kɛ Gyihova ɛlo yɛ wɔ ndenle dɔɔnwo azo. *

^ ɛden. 29 Douglas Guest lile Gyihova nɔhalɛ hɔle ewule nu wɔ October 25, 2015 wɔ mekɛ mɔɔ bɛlɛyɛ magazine ɛhye anwo ngyehyɛleɛ la.