Wulu kɔ nuhua edwɛkɛ ne azo

Wulu kɔ nuninyɛne ne azo

Adekpakyelɛma George Rollston nee Arthur Willis ɛlasa nzule agua bɛ kale ne anu.—Sɔlɔ Azɛlɛsinli, 1933

 YƐ TETEDWƐKƐ

“Adenle Biala Ɛnle Ɛkɛ Mɔɔ Zolɛ Ɛnle Kpalɛ Fee Anzɛɛ Ɔwale Somaa A”

“Adenle Biala Ɛnle Ɛkɛ Mɔɔ Zolɛ Ɛnle Kpalɛ Fee Anzɛɛ Ɔwale Somaa A”

WƆ MARCH 26, 1937, adenduvoma nwiɔ bie mɔɔ bɛvɛ la yɛle ye ngyikyingyikyi vale bɛ kale anwo evinli ne hɔle Sydney, Australia. Bɛvile suakpole ne azo la, ye ɛvolɛ ko ɛne, na ɛnee bɛpɛ adenle mɔɔ bo mayɛlɛ 12,000 (km 19,300) la bɛhɔ ɛleka moamoa mɔɔ adenle ne ɛnle kpalɛ la. Bɛnle menli mɔɔ bɛlɛkpɔsa bɛanleɛnlea maanle nu a. Arthur Willis nee Bill Newlands boka adekpakyelɛma mɔɔ bɛbɔ kpɔkɛ kɛ bɛkaha Nyamenle Belemgbunlililɛ edwɛkpa ne wɔ Australia namunamu dɔɔnwo ne mɔɔ wɔ moamoa kpalɛ azo la anwo.

Ɔkadwu 1928 ɛzonlenlɛ ɛvolɛ ne awieleɛ la, ɛnee Baebolo Sukoavoma * ekyi ne mɔɔ wɔ Australia la ɛha edwɛkɛ ne wɔ azua mɔɔ wɔ ɛnweanloa nee mɔɔ bikye bɛ la azo. Bɛnnyia nzule wɔ ɛleka ɛhye mɔɔ ye kpole bayɛ Ghana anwo zo fane 20 noko menli dɔɔnwo ɛnle ɛkɛ la. Noko, mediema ne mɔ ze ye wienyi kɛ, ɔwɔ kɛ Gyisɛse ɛdoavolɛma di ɔ nwo daselɛ kɔdwu “aleɛabo ɛleka biala” mɔɔ Australia namunamu ne mɔ boka nwo a. (Gyi. 1:8) Noko kɛ ɔkɛyɛ na bɛayɛ gyima kpole ɛhye ɛ? Kɛmɔ ɛnee bɛlɛ diedi kɛ Gyihova bayila bɛ mɔdenlebɔlɛ zo la ati, bɛbɔle kpɔkɛ kɛ bɛbayɛ mɔɔ bɛbahola la.

ADEKPAKYELƐMA BƆLE GYIMA NE ABO

Wɔ 1929, asafo mɔɔ bɛwɔ Queensland nee Western Australia la zieziele ahale mɔɔ bɛbava bɛayɛ namunamu mɔɔ wɔ bɛ azɛlɛsinli ne mɔ anu gyima la. Bɛvale ahale ne mɔ bɛwulale adekpakyelɛma mɔɔ anwo yɛ se na bɛkola bɛdi tɛnlabelɛ mɔɔ anu yɛ se anwo gyima, mɔɔ saa ahale ne mɔ sɛkye a bɛbahola bɛ boɛ yɛ la asa nu. Adekpakyelɛma ɛhye mɔ hɔle ɛleka dɔɔnwo mɔɔ bɛtɛkanle edwɛkɛ ne wɔ ɛkɛ ɛlɛ la.

Adekpakyelɛma mɔɔ bɛangola kale tɔ la vale basekɛ hɔle namunamu ne mɔ anu. Kɛ neazo la, wɔ 1932, Bennett Brickell mɔɔ ɛnee yeli ɛvolɛ 23 la vale basekɛ vile Rockhampton, Queensland, hɔhanle edwɛkɛ ne siane nnu wɔ namunamu mɔɔ wɔ maanle zɔhane sɔlɔ la azo. Ninyɛne mɔɔ ɔvale la bie a le kundu, adɛladeɛ, aleɛ yɛɛ mbuluku dɔɔnwo bie. Saa ye basekɛ ne taye sɛkye bɔbɔ a, ɔtoa zo, na ɔnyia anwodozo kɛ Gyihova bahile ye adenle. Ɔpianle ye basekɛ ne ɔpɛle adenle mayɛlɛ 200 (km 320) wɔ ɛleka mɔɔ nzuhɔne maanle menli bie mɔ  wule la. Wɔ ɛvolɛ 30 mɔɔ doa zo la, Adiema Brickell vale basekɛ, moto, nee kale dule adenle mayɛlɛ apenle dɔɔnwo wɔ Australia amuala. Ɔdaye a ɔlimoale ɔhanle edwɛkɛ ne ɔhilele Aboriginesema ne a, na ɔboale ɔmaanle bɛdele asafo dɔɔnwo, ɛnee menli dɔɔnwo ze ye na bɛbu ye kpalɛ.

BƐLILE NGYEGYELƐ ZO

Australia boka maanle mɔɔ nuhua menli anzo wɔ ewiade la anwo, titili menli mɔɔ wɔ ye namunamu ne mɔ azo la. Noko, Gyihova menli ɛlɛbɔ mɔdenle akpondɛ menli mɔɔ wɔ moamoa la.

Adekpakyelɛma Stuart Keltie nee William Torrington lale zɔhane mɔdenlebɔlɛ ne bie ali. Wɔ 1933, bɛpɛle Simpson Ɛsɛlɛ ne mɔɔ le kpole na ɛnwea mɔɔ ɛyɛ kɛ awoka wɔ zo la bɛhɔhanle edwɛkɛ ne wɔ Alice Springs sua ne mɔɔ wɔ maanle ne avinli la azo. Mekɛ mɔɔ bɛ kale ekyi ne zɛkyele na ɔwɔ kɛ bɛgyakyi ɔ nzi ɛlilɛ la, Adiema Keltie mɔɔ bɛva baka bɛwula ɔ gyakɛ la doale ye edwɛkɛhanlɛ gyima ne azo, noko kɛkala afunlumu a ɔfa ɔtu adenle a! Noko adekpakyelɛma ne mɔdenlebɔlɛ zole ma, bɛyiale William Creek mɔɔ nea hotɛle zo wɔ keteke agyinlaleɛ bie mɔɔ wɔ namule bie anu la. Nzinlii, Charles Bernhardt liele nɔhalɛ ne, ɔdɔnenle ye hotɛle ne, na ɔ ngome ɔvale ɛvolɛ 15 ɔyɛle adekpakyelɛ gyima wɔ Australia ɛleka mɔɔ nzule ɛndɔ na yede ɔ nwo kpalɛ la.

Arthur Willis ɛlɛsiezie ɔ nwo yeahɔha edwɛkɛ ne wɔ Australia namunamu ne mɔ anu.—Perth, Australia Sɛnzɛndɔleɛ, 1936

Ɛnee ɔwɔ kɛ alimoa adekpakyelɛma ne nyia akɛnrasesebɛ na bɛ nye yɛ se amaa bɛahola bɛali ngyegyelɛ ngakyile mɔɔ bɛbayia la anwo gyima. Wɔ edwɛkɛ ne mɔɔ Arthur Willis nee Bill Newlands mɔɔ yɛlimoa yɛha bɛ nwo edwɛkɛ hɔhanle ye wɔ Australia namunamu ne mɔ anu la anu, mekɛ bie bɛvale dapɛne nwiɔ bɛpɛle adenle mayɛlɛ 20 (km 32) ɔluakɛ ezule dɔle kpole maanle ɛsɛlɛ ne azo yɛle mɛtɛlɛmɛtɛlɛ ngome. Ɔyɛ a, wuluwulu maa ɛhɛlɛnra te bɛ, eza bɛfɛ wɔ mekɛ mɔɔ bɛlɛpia bɛ kale bɛapɛ ɛnwea mɔɔ ɛyɛ kɛ awoka mgbole la, bɛvale mbɔnza mɔɔ awolɛ wɔ nu nee nzule nu. Saa bɛ kale ne sɛkye a, bɛtia anzɛɛ bɛka basekɛ kenle dodo bie bɛkɔ sua mɔɔ bikye la azo na bɛkendɛ kɔkpula kɛ bɛ sa kɛha deɛ mɔɔ ɛzɛkye la bie. Ɛhye mɔ amuala anzi, bɛmaa bɛ nye die. Arthur Willis hanle edwɛkɛ bie wɔ The Golden Age magazine ne anu kɛ: “Adenle biala ɛnle ɛkɛ mɔɔ zolɛ ɛnle kpalɛ fee anzɛɛ ɔwale somaa ɔmaa Ye alasevolɛ a.”

Charles Harris mɔɔ vale ɛvolɛ dɔɔnwo yɛle adekpakyelɛ gyima ne la hanle kɛ anwongyelelɛ nee namunamu ne mɔ mɔɔ ɔhɔdɛnlanle nu la maanle ɔbikyele Gyihova kpalɛ. Ɔdoale zo kɛ: “Saa sonla kola adɛnla ngoane nu mɔɔ ɔ nwo ninyɛne anzo a, anrɛɛ ɔle kpalɛ kpole. Saa ɛnee Gyisɛse kulo kɛ ɔda alienwo a, ɛnee ɔwɔ kɛ yɛdayɛ noko yɛ nye die nwo saa yɛ gyimalilɛ ne ati ɔwɔ kɛ yɛyɛ bie a.” Na zɔhane a adekpakyelɛma dɔɔnwo ɛyɛ a. Bɛ mɔdenlebɔlɛ ne ɛmaa edwɛkpa ne ɛdwu ɛleka biala, na bɛlɛboa menli dɔɔnwo bɛamaa bɛagyinla Nyamenle Belemgbunlililɛ ne anzi.

^ ɛden. 4 Baebolo Sukoavoma ne vale duma Gyihova Alasevolɛ dole bɛ nwo zo wɔ 1931.Aye. 43:10.