Wulu kɔ nuhua edwɛkɛ ne azo

Wulu kɔ nuninyɛne ne azo

 YƐ KILISIENE ƐBƐLABƆLƐ

Sɔ Gyihova Ɛbɛlabɔlɛ Nwo Ngyinlazo Ne Anu

Sɔ Gyihova Ɛbɛlabɔlɛ Nwo Ngyinlazo Ne Anu

Gyihova Nyamenle ɛva ɛbɛlabɔlɛ nwo ngyinlazo ɛmaa alesama. Kɛ neazo la, yehyehyɛ kɛ ɔwɔ kɛ agyalɛ yɛ nrenyia nee raalɛ avinli ngyehyɛleɛ mɔɔ bɛmpɛ nu ɛlɛ a. (Mt 19:4-6, 9) Ɔkyi adwɔmane ɛbɛla biala. (1Kɔ 6:9, 10) Yeva adɛladeɛ nee anwoziezielɛ nwo ngyinlazo bɔbɔ yemaa ye menli amaa bɛayɛ ngakyile.Mɛl 22:5; 1Ti 2:9, 10.

Wɔ ɛnɛ ewiade ne anu, menli dɔɔnwo ɛnva Gyihova ngyinlazo ɛnyɛ gyima. (Wlo 1:18-32) Bɛmaa sonla nzuzulɛ mɔɔ ɛlie duma la ɛha bɛ adɛladeɛ ɛwulalɛ, kɛzi bɛsiezie bɛ nwo nee bɛ subane. Menli dɔɔnwo fa ninyɛndane mɔɔ bɛyɛ la tu bɛ nloa nu na bɛtendɛ bɛtia menli mɔɔ ɛnyɛ bie la.1Pi 4:3, 4.

Kɛ Gyihova Alasevolɛ la, ɔwɔ kɛ yɛfa akɛnrasesebɛ yɛsɔ Nyamenle ɛbɛlabɔlɛ nwo ngyinlazo ne anu. (Wlo 12:9) Wɔ adenle boni azo? Ɔwɔ kɛ yɛdua nrɛlɛbɛ adenle zo yɛmaa bɛnwu mɔɔ Gyihova die to nu la. Noko eza ɔwɔ kɛ yɛdayɛ mumua ne yɛkɔ zo yɛfa ɛbɛlabɔlɛ nwo ngyinlazo mɔɔ kpogya la yɛdi gyima. Kɛ neazo la, saa yɛlɛkpa adɛladeɛ nee anwoziezielɛ bie a, ɔwɔ kɛ yɛbiza yɛ nwo kɛ: ‘Asoo mɔɔ me nye die nwo la nee Gyihova ngyinlazo anzɛɛ ewiade ne ɛdeɛ le ko ɔ? Asoo me adɛladeɛ nee me anwoziezielɛ maa bɛnwu me kɛ mele nɔhalɛ Kilisienenli?’ Yɛɛ saa yɛkulo kɛ yɛnea TV zo gyimalilɛ anzɛɛ vidio bie a, yɛbahola yɛabiza yɛ nwo kɛ: ‘Asoo Gyihova anye balie gyimalilɛ ɛhye anwo ɔ? Nwane ngyinlazo a ɔkanvo ɔkile a? Asoo ninyɛne mɔɔ mefa medielie me nye la maa ɔyɛ se kɛ mebabɔ ɛbɛla kpalɛ ɔ? (Ed 101:3) Asoo ɔbahola yeadenda me mbusuafoɔ anzɛɛ awie mɔ agyakɛ anu ɔ?’1Kɔ 10:31-33.

Duzu ati a ɔhyia kɛ yɛsɔ ɛbɛlabɔlɛ nwo ngyinlazo mɔɔ Gyihova ɛva ɛmaa yɛ la anu a? Ɔnrɛhyɛ Kelaese Gyisɛse bazɛkye maanle maanle ne mɔ nee amumuyɛma. (Yi 9:4-7) Menli mɔɔ ɛlɛyɛ Nyamenle ɛhulolɛdeɛ la angome a bɛadɛnla aze dahuu a. (1Dw 2:15-17) Yemɔti bɛmaa yɛzɔ Gyihova ɛbɛlabɔlɛ ngyinlazo ne anu kpalɛ amaa menli mɔɔ banwu yɛ ɛbɛlabɔlɛ kpalɛ ne la aye Nyamenle ayɛlɛ.1Pi 2:11, 12.

Nzɔne a me adɛladeɛ nee me anwoziezielɛ ka ye wɔ me ɛbɛlabɔlɛ ngyinlazo nwo a?

BƐNLEA BAYƐ GYIHOVA AGƆNWONRENYIA KO, RAALƐ KO VIDIO NE NA BƐBUA KPUYA ƐHYE MƆƆ WƆ Ɔ BO ƐKE LA:

  • Nzɔne ati a nrɛlɛbɛ wɔ nu kɛ yɛbava Gyihova ngyinlazo yɛali gyima a?

  • Nzɔne ati a ɔwɔ kɛ awovolɛ kilehile bɛ mra Gyihova ɛbɛlabɔlɛ nwo ngyinlazo wɔ bɛ ngakula nu a?

  • Kɛzi ngakula nee mgbanyinli bahola aboa awie mɔ amaa bɛanyia Nyamenle kpalɛyɛlɛ ne azo nvasoɛ ɛ?