Wulu kɔ nuhua edwɛkɛ ne azo

Wulu kɔ nuninyɛne ne azo

 A3

Kɛ Ɔyɛle Mɔɔ Yɛnyianle Baebolo Ne La

Baebolo ne Kɛlɛvolɛ nee Ahenle mɔɔ ɔvi ye ɛkɛ la a eza bɔ nwolɛ bane a. Ɔdaye a ɔmaanle bɛhɛlɛle edwɛkɛ ɛhye a:

“Yɛ Nyamenle ne edwɛkɛ ne wɔ ɛkɛ dahuu.”Ayezaya 40:8.

Edwɛkɛ ɛhye le nɔhalɛ ɔnva nwo kɛ mɔlebɛbo bɛsanloangɛlɛlera Baebolo ne mɔɔ le Hibulu nee Elam Aneɛ Ngɛlɛlera ne * anzɛɛ Kilisiene Giliki Ngɛlɛlera ne la bie ɛnle ɛkɛ wɔ yɛ mekɛ ye anu la. Ɔti kɛ ɔkɛyɛ na yɛanwu kɛ Baebolo ne mɔɔ yɛlɛ ye ɛnɛ la anu edwɛkɛ ne amgba nee mɔlebɛbo ngɛlɛlera ne mɔɔ vi sunsum nu la le ko ɛ?

KƐLƐHƐLƐVOLƐMA BƆ NYAMENLE EDWƐKƐ NE ANWO BANE

Mɔɔ fale Hibulu Ngɛlɛlera ne anwo la, mualɛ ne bie wɔ tete amaamuo bie mɔɔ Nyamenle vale ziele ɛkɛ la anu, ɔhanle kɛ bɛnlea edwɛkɛ ne azo bɛhɛlɛ bie. * Kɛ neazo la, Gyihova zele Yizilayɛ arelemgbunli kɛ bɛdabɛ mumua ne bɛhɛlɛ Mɛla ne bie bɛzie. (Ditilɔnomi 17:18) Bieko, Nyamenle maanle Livaema gyima kɛ bɛbɔ Mɛla ne anwo bane na bɛhilehile menli ne. (Ditilɔnomi 31:26; Nihɛmaya 8:7) Mekɛ mɔɔ Dwuuma vi Babelɔn akɛlɛzonlenlɛ nu rale la, bɛnyianle kɛlɛhɛlɛvolɛma ekpunli bie anzɛɛ mɛla kilehilevolɛma (Sopherim). (Ɛzela 7:6, ɔbodwɛkɛ) Mekɛ guale nu la, zɔhane mɛla kilehilevolɛma ne nleanle Hibulu Ngɛlɛlera ne anu mbuluku 39 ne azo hɛlɛle bie dɔɔnwo.

Wɔ ɛvoya dɔɔnwo anu, mɛla kilehilevolɛma dole bɛ rɛle aze hɛlɛle mbuluku ɛhye mɔ bie. Wɔ ɛvolɛ 500-1500 Y.M., Dwuuma mɛla kilehilevolɛ ekpunli bie mɔɔ bɛfɛlɛ bɛ Masoretema la doale zɔhane amaamuo ne azo. Masoretema bɛsanloangɛlɛlera mɔɔ bɛhɛlɛle ɔ muala bɛwiele la ɛhyɛ kpalɛ la a le Leningrad Codex ne, bɛyɛle ye wɔ ɛvolɛ 1008/1009 Y.M. Noko wɔ ɛvoya 20 ne avinli,  bɛnwunle Baebolo bɛsanloangɛlɛlera 220 anzɛɛ ye azinli wɔ Nyevile Wulera Nwomamobɔleɛ ne mɔ anu. Ɛnee bɛsanloangɛlɛlera Baebolo zɔhane mɔ ɛhyɛ ɛdɛla Leningrad Codex ne ɛvolɛ apenle ko nee ɔ nzi. Mɔɔ bɛvale Nyevile Wulera Nwomamobɔleɛ ne mɔ bɛtotole Leningrad Codex ne anwo la, edwɛkɛ titili bie lale ali: Kɛzi bɛhɛlɛle Nyevile Wulera Nwomamobɔleɛ ne mɔ anu edwɛkɛ bie mɔ la le ngakyile, noko ngakyile zɔhane mɔ ɛngakyi nuhua edwɛkɛ mumua ne.

Na Kilisiene Giliki Ngɛlɛlera ne anu mbuluku 27 ne noko ɛ? Gyisɛse Kelaese ɛzoanvolɛ ne mɔ bie nee alimoa ɛdoavolɛma ne anu ekyi a hɛlɛle mbuluku zɔhane ne mɔ a. Alimoa Kilisienema lile Dwuu mɛla kilehilevolɛma amaamuo ne anzi na bɛnleanle zɔhane mbuluku ne mɔ azo bɛhɛlɛle bie. (Kɔlɔsaema 4:16) Bɛbɔ tete nwoma azinli nee bɛsanloangɛlɛlera apenle dɔɔnwo anwo bane too badwu yɛ mekɛ ye ɔnva nwo mɔdenle mɔɔ Wulomu Amɛnlado Diocletian nee awie mɔ gyɛne bɔle kɛ bɛsɛkye alimoa Kilisiene mbuluku kɔsɔɔti la.

Eza bɛhilele Kilisiene mbuluku dɔɔnwo abo bɛhɔle aneɛ gyɛne dɔɔnwo anu. Aneɛ mɔɔ bɛlimoale bɛhilele Baebolo ne abo bɛhɔle nu la bie mɔ a le Armenia, Copma, Ethiopia, Georgia, Latin nee Syria aneɛ nu.

KƐZI BƐNYIANLE HIBULU NEE GILIKI EDWƐKƐ NE BƐHILELE Ɔ BO LA

Tɛ tete bɛsanloangɛlɛlera Baebolo ne kɔsɔɔti a nuhua edwɛkɛ le ko a. Ɛnee kɛ ɔkɛyɛ na yɛanwu edwɛkɛ mɔɔ wɔ mɔlebɛbo ɛdeɛ ne anu la ɛ?

Yɛbahola yɛava edwɛkɛ ne yɛatoto kilehilevolɛ mɔɔ yeha yehile ye sukoavoma 100 kɛ bɛnlea buluku bie tile ko anu edwɛkɛ ne azo bɛhɛlɛ bie la anwo. Saa nzinlii mɔlebɛbo buluku tile ne minli bɔbɔ na bɛfa menli 100 ne ɛdeɛ ne bɛtoto nwolɛ a, bɛbanwu mɔlebɛbo edwɛkɛ ne. Sukoavo ko biala bahola ayɛ nvonleɛ ɛdeɛ, noko ɔnrɛra ye kɛ sukoavoma ne kɔsɔɔti bayɛ nvonleɛ ko ne ala. Zɔhane ala a saa nwomama fa nwoma azinli apenle dɔɔnwo ne nee tete Baebolo mbuluku mɔɔ bɛlɛ la toto nwo a, bɛkola bɛnwu nvonleɛ mɔɔ kɛlɛhɛlɛvolɛma yɛle la na bɛnwu mɔlebɛbo edwɛkɛ ne a.

“Yɛbahola yɛaha ye bɔkɔɔ kɛ tete mekɛ nu buluku biala ɛnle ɛkɛ mɔɔ bɛhile ɔ bo pɛpɛɛpɛ zɛhae a”

Kɛzi yɛbahola yɛanyia anwodozo kɛ adwenle mɔɔ wɔ mɔlebɛbo Baebolo ne anu la ala a bɛhile nu bɛmaa yɛ ɛnɛ ɛ? Mekɛ mɔɔ nwomanli William H. Green ka Hibulu Ngɛlɛlera ne anwo edwɛkɛ la, ɔhanle kɛ: “Yɛbahola yɛaha ye bɔkɔɔ kɛ tete mekɛ nu buluku biala ɛnle ɛkɛ mɔɔ bɛhile ɔ bo pɛpɛɛpɛ zɛhae a.” Mɔɔ fale Kilisiene  Giliki Ngɛlɛlera ne anzɛɛ mɔɔ bɛfɛlɛ ye Ngyekyeleɛ Fofolɛ ne anwo la, Baebolo nwomanli F. F. Bruce hanle kɛ: “Daselɛ mɔɔ yɛlɛ wɔ yɛ Ngyekyeleɛ Fofolɛ ne anu edwɛkɛ ne anwo la zonle tɛla daselɛ mɔɔ yɛlɛ wɔ tete ninyɛne dɔɔnwo mɔɔ kɛlɛvolɛma ɛhɛlɛ la anwo, awie biala ɛnzu kɛzi nuhua edwɛkɛ le nɔhalɛ la anwo kpolera.” Eza ɔhanle kɛ: “Saa Ngyekyeleɛ Fofolɛ ne le awie mɔ mbuluku ngakyile mɔɔ bɛha bɛbɔ nu la a, anrɛɛ kɛzi nuhua edwɛkɛ ne le nɔhalɛ la le mɔɔ bɛngola bɛnzu nwolɛ kpolera.”

Ayezaya buluku ne tile 40 mɔɔ wɔ Nyevile Wulera Nwomamobɔleɛ ne anu la (ɔvi ɛvolɛ 125 kɔdwu 100 K.Y.M.)

Mɔɔ bɛvale bɛtotole Hibulu bɛsanloangɛlɛlera ne mɔɔ bɛhɛlɛle ye kɛyɛ ɛvolɛ apenle anzi la anwo la, ngakyile ngyikyi bie ala a bɛnwunle ye wɔ edwɛkɛ agbɔkɛ ne mɔ ɛhɛlɛlɛ nu a

Ayezaya buluku ne tile 40 mɔɔ wɔ Aleppo Codex ne anu, Hibulu Masorete bɛsanloangɛlɛlera titili ɔvi kɛyɛ ɛvolɛ 930 Y.M.

Hibulu Ngɛlɛlera: Bɛgyinlanle Rudolf Kittel Biblia Hebraica ne azo a bɛhilele New World Translation of the Hebrew Scriptures ne (1953-1960) abo a. Ɔvi mekɛ zɔhane mɔɔ ba la, bɛva neɛnleanu mɔɔ bɛyɛle ye kenlensa ye wɔ Nyevile Wulera Nwomamobɔleɛ ne mɔ nee tete bɛsanloangɛlɛlera gyɛne nu la bɛboka Biblia Hebraica Stuttgartensia nee Biblia Hebraica Quinta ne, mɔɔ le Hibulu edwɛkɛ ne mɔɔ bɛyɛ nzenzaleɛ wɔ nu la anwo. Wɔ gyima ɛhye anu, bɛvale Leningrad Codex ne anu edwɛkɛ bɛyɛle na bɛvale edwɛkɛ mɔɔ wɔ mbuluku gyɛne mɔɔ le kɛ Samaleama Pentateuch, Nyevile Wulera Nwomamobɔleɛ ne mɔ, Giliki Septuagint, Elam Aneɛ Targums, Latin Vulgate nee Selea Peshitta ne anu la bɛawula ɔbodwɛkɛ nu. Bɛnleanle Biblia Hebraica Stuttgartensia nee Biblia Hebraica Quinta ne azo a bɛyɛle Ewiade Fofolɛ Ngilebɛbo ɛhye a.

Giliki Ngɛlɛlera: Ɛvoya 19 ne ɛlɛkɔ ye awieleɛ la, nwomama B. F. Westcott nee F.J.A. Hort vale bɛsanloangɛlɛlera Baebolo nee ngɛlata azinli mɔɔ wɔ ɛkɛ ɛnɛ la totole nwo wɔ mekɛ mɔɔ bɛlɛyɛ Giliki ngɛlɛlera titili ne na bɛdele nganeɛ kɛ ɔ nee mɔlebɛbo ngɛlɛlera ne asɛɛ le ko. Wɔ ɛvoya 20 ne avinli, Ewiade Fofolɛ Baebolo Ngilebɛbo Kɔmatii ne gyinlanle ngɛlɛlera titili ne azo a bɛhilele edwɛkɛ ne abo a. Bɛvale alimoa ndɔ nwomamobɔleɛ gyɛne mɔɔ bɛsuzu kɛ bɛhɛlɛle ye wɔ ɛvoya nwiɔ nee nsa Y.M. anu la noko bɛlile gyima. Ɔvi mekɛ zɔhane, bɛnyia ndɔ nwomamobɔleɛ dɔɔnwo ne ala. Bieko, ngɛlɛlera titili mɔɔ Nestle nee Aland yɛɛ United Bible Societies ɛyɛ ye kenlensa ye la boka nwo. Ninyɛne mɔɔ bɛnwunle wɔ bɛ neɛnleanu ne anu la, bɛvale bie bɛbokale Baebolo ɛhye anwo.

Mekɛ mɔɔ bɛlɛnea ngɛlɛlera titili ne anu la, bɛnwunle kɛ Kilisiene Giliki Ngɛlɛlera ne anu ngyehyɛnu bie mɔ mɔɔ wɔ Baebolo dɛba bie mɔ le kɛ King James Version ne anu la le mɔɔ nzinlii kɛlɛhɛlɛvolɛma vale bokale nwolɛ la na ɛnee ɔmboka Ngɛlɛlera ne mɔɔ vi sunsum nu la anwo fee. Noko kɛmɔ ɛnee bɛlie ngyehyɛnu ne mɔ mɔɔ bɛyɛ wɔ Baebolo dɔɔnwo anu la bɛdo nu wɔ ɛvoya ne mɔɔ tɔ zo 16 la anu la ati, ngyehyɛnu ɛhye mɔ mɔɔ bɛye bɛvi nu la ɛgyakyi adenle wɔ Baebolo ngyehyɛnu dɔɔnwo anu. Ngyehyɛnu ne mɔ a le Mateyu 17:21; 18:11; 23:14; Maake 7:16; 9:44, 46;  11:26; 15:28; Luku 17:36; 23:17; Dwɔn 5:4; Gyima ne 8:37; 15:34; 24:7; 28:29 yɛɛ Wulomuma 16:24. Wɔ Baebolo ɛhye anu, bɛva ɔbodwɛkɛ sɛkɛlɛneɛ bɛdo ɛleka mɔɔ bɛyele ngyehyɛnu ɛhye mɔ bɛvile la.

Mɔɔ fale Maake 16 adwulaleɛ tendenle ne (ngyehyɛnu 9-20), Maake 16 adwulaleɛ ezinra ne yɛɛ edwɛkɛ ne mɔɔ wɔ Dwɔn 7:53–8:11 anwo la, ɔda ali kɛ ngyehyɛnu ɛhye mɔ biala ɛmboka mɔlebɛbo bɛsanloangɛlɛlera ne mɔ anwo. Yemɔti, bɛanva adalɛ edwɛkɛ zɔhane mɔ bɛamboka Baebolo ɛhye anwo. *

Bɛyɛ nzenzaleɛ wɔ edwɛkɛ bie mɔ anu bɛmaa ɔ nee mɔɔ nwomama ɛlie ɛdo nu kɛ zɔhane a ɔde wɔ mɔlebɛbo ngɛlɛlera ne anu la ɛyɛ ko. Kɛ neazo la, kɛ mɔɔ bɛsanloangɛlɛlera bie mɔ ka la, Mateyu 7:13 kenga kɛ: “Bɛva anlenkɛ ekyi ne anu, ɔluakɛ anlenkɛ kpole ne nee adenle tɛtɛlɛ ne kɔ ɛzɛkyelɛ nu.” Wɔ Nrelenza Ewiade Fofolɛ Ngilebɛbo dɛba ne anu, bɛanva “anlenkɛ” bɛamboka nwo. Noko neɛnleanu mɔɔ bɛyɛ wɔ bɛsanloangɛlɛlera ne anu la ɛla ye ali kɛ ɛnee “anlenkɛ” boka mɔlebɛbo edwɛkɛ ne anwo. Ɔti bɛvale bɛwulale fofolɛ ne anu. Bɛyɛ nzenzaleɛ dɔɔnwo mɔɔ le kɛ ɛhye la wɔ nu. Noko nzenzaleɛ ɛhye mɔ le ngyikyi bie, na bɛ nuhua biala ɛngakyi edwɛkɛ titili mɔɔ wɔ Nyamenle Edwɛkɛ ne anu la.

Ndɔ bɛsanloangɛlɛlera mɔɔ 2 Kɔlentema 4:13–5:4 wɔ zo ɔvi kɛyɛ 200 Y.M.

^ ɛden. 5 Bɛha nwolɛ edwɛkɛ sikalɛ kɛ Hibulu Ngɛlɛlera ne ɔvi ɛke mɔɔ kɔ la.

^ ɛden. 7 Debie ko mɔɔ ɔti ɛnee ɔwɔ kɛ bɛkɛlɛ bɛsanloangɛlɛlera ne bie la a le kɛ bɛhɛlɛle mɔlebɛbo ɛdeɛ ne wɔ ninyɛne mɔɔ ɛngyɛ na yeazɛkye la azo.

^ ɛden. 18 Deɛmɔti bɛbule ngyehyɛnu ɛhye mɔ kɛ bɛle adalɛ la anwo edwɛkɛ dɔɔnwo ɔbodwɛkɛ ne mɔɔ wɔ New World Translation of the Holy Scriptures—With References mɔɔ bɛyɛle ye 1984 anu la.