Obadaya 1:1-21
1 Obadaya* ɛnyelɛzodeɛnwunlɛ ne:
Edwɛkɛ mɔɔ Tumivolɛ Awulae Gyihova ɛha wɔ Yidɔm anwo la ɛne:+
“Yɛde amaneɛ bie yɛvi Gyihova ɛkɛ,Yezoa awie wɔ maanle maanle ne mɔ anu kɛ:
‘Bɛdwazo bɛmaa yɛziezie yɛ nwo yɛ nee ye ɛhɔho.’”+
2 “Nea! Memaa wɔyɛ ekyi kpalɛ wɔ maanle maanle ne mɔ anu;Na bɛmbu wɔ bie fee.+
3 Wɔ ahonle nu anwomemaazo* ne ɛbɛlɛbɛla wɔ,+Wɔmɔ mɔɔ ɛde bodane zo la,Ɛde anwuma na ɛka ye wɔ wɔ ahonle nu kɛ,‘Nwane a bahwe me ado aze a?’
4 Saa ɛyɛ wɔ sua wɔ anwuma* kɛ kɔleɛ bɔbɔ,Anzɛɛ ɛyɛ wɔ aloma sane wɔ nwɔlɔra ne mɔ avinli a,Mebahwe wɔ meade aze,” kɛ Gyihova se la ɛne.
5 “Saa nwule a rale wɔ ɛkɛ nɔɔzo a,Asoo anrɛɛ bɛnrɛwua ninyɛne mɔɔ bɛkulo la ala?
Anzɛɛ saa menli mɔɔ tete vanye ma la a rale wɔ ɛkɛ a,Asoo anrɛɛ bɛnrɛgyakyi bie mɔɔ awie mɔ batete ɔ?+
(Na wɔmɔ bɛbazɛkye wɔ bɔkɔɔ!)*
6 O, nea kɛzi bɛvedevede Yisɔ ninyɛne nu la!
Nea kɛzi bɛsesa ye anwonyia mɔɔ vea la!
7 Bɛ nee wɔ ɛhɔ ɛweɛne ne azo.
Menli mɔɔ nee wɔ yɛle ngyekyeleɛ la amuala ɛbɛlɛbɛla wɔ.
Menli mɔɔ ɛ nee bɛ de anzodwolɛ nu la ɛli ɛ nwo zo konim.
Menli mɔɔ nee wɔ di aleɛ la ɛva avonle ɛzua wɔ ɛhane,Noko ɛnrɛnwu ye.
8 Wɔ kenle zɔhane,” kɛ Gyihova se la ɛne,“Asoo menrɛzɛkye nrɛlɛbɛvolɛma mɔɔ wɔ Yidɔm la+Na menrɛzɛkye nwunu mɔɔ wɔ Yisɔ awoka ne mɔ azo la ɔ?
9 O Timan,+ ɛzulolɛ baha wɔ kovolɛma,+Ɔluakɛ bɛbahu awie biala mɔɔ wɔ Yisɔ awoka ne mɔ azo la.+
10 Kɛmɔ ɛyɛle ɛ diema Gyekɔbo basabasa la ati,+Anyiemgba baheda ɛ nwo zo,+Na ɛ bo zo baminli bɔkɔɔ.+
11 Wɔ kenle ne mɔɔ ɛgyinlanle ahane la,Wɔ kenle ne mɔɔ nyɛvolɛ vale ye ɛlɔne ne hɔle akɛlɛzonlenlɛ nu la,+Mekɛ mɔɔ nyɛvolɛ wolole ye anlenkɛ kpole ne anu na bɛguale Gyɛlusalɛm anwo ma* la,+Ɛyɛle ɛ nwo kɛ bɛ nuhua ko la.
12 Ɔnle kɛ ɛmaa ɛ nye die wɔ ɛ diema ne anwubɛnyunlu kenle ne,+Ɔnle kɛ ɛdi fɛlɛko wɔ kenle mɔɔ menli mɔɔ wɔ Dwuda la abo zo ɛlɛminli la,+Yɛɛ ɔnle kɛ ɛtendɛ anwomemaazo nu wɔ bɛ amaneɛnwunlɛ kenle ne.
13 Ɔnle kɛ ɛwolo me menli ne anlenkɛ kpole ne anu wɔ bɛ amaneɛnwunlɛ kenle ne,+Ɔnle kɛ ɛmaa ɛ nye die ye ngyegyelɛ nwo wɔ ye amaneɛnwunlɛ kenle ne,Yɛɛ ɔnle kɛ ɛfa ɛ sa ɛka ye anwonyia wɔ ye amaneɛnwunlɛ kenle ne.+
14 Ɔnle kɛ ɛgyinla nwɔnda ne mɔ azo ɛkuhu ye menli mɔɔ ɛlɛnriandi la,+Yɛɛ ɔnle kɛ ɛye ye menli mɔɔ bɛnyia bɛ ti la ɛmaa bɛ agbɔvolɛ wɔ amaneɛnwunlɛ kenle ne.+
15 Ɔluakɛ Gyihova kenle ne mɔɔ tia maanle maanle ne mɔ kɔsɔɔti la ɛbikye.+
Mɔɔ ɛyɛle la, bɛbava bie bɛayɛ wɔ.+
Mɔɔ ɛvale ɛyɛle awie mɔ la bazia aragua ɛ ti zo.
16 Ɔluakɛ kɛzi bɛnlonle nza wɔ me boka nwuanzanwuanza ne azo la,Zɔhane ala a maanle maanle ne mɔ kɔsɔɔti banlo ye a.+
Bɛbanlo bɛadu ɔ bo,Na bɛ bo zo baminli kɛ asɛɛ bɛandɛnla aze ɛlɛ la.
17 Noko menli mɔɔ banriandi la bahɔ Zayɔn Boka ne azo,+Na ɔbayɛ nwuanzanwuanza;+Yɛɛ Gyekɔbo abozoamra bava bɛ ninyɛne ne ayɛ bɛ ɛdeɛ.+
18 Gyekɔbo sua nu bayɛ senle,Dwosefi sua nu bayɛ sendɔlɔra,Yɛɛ Yisɔ sua nu bayɛ kɛ ndile mɔɔ bɛpɛ la abo zo;Bɛbado senle wɔ nu bɛayela bɛ,Na awie biala ɛnrɛnyia ɔ ti wɔ Yisɔ sua nu,+Ɔluakɛ Gyihova mumua ne a ɛha a.
19 Bɛbava Nɛgɛbe nee Yisɔ awoka ne mɔ azo,+Hyifɛla nee Filisitiama azɛlɛ ne bayɛ bɛ ɛdeɛ.+
Bɛbava Yifelaem nee Samɛlea azɛlɛ ne mɔ bɛayɛ bɛ ɛdeɛ,+Yɛɛ Bɛngyaman bava Geleade ayɛ ye ɛdeɛ.
20 Menli mɔɔ wɔ akɛlɛzonlenlɛ nu wɔ tawa* ɛhye anzi la,+Keenama azɛlɛ ne too mɔɔ kɔdwu Zalefate la bayɛ menli mɔɔ wɔ Yizilayɛ la ɛdeɛ.+
Yɛɛ Gyɛlusalɛmma mɔɔ hɔle akɛlɛzonlenlɛ nu wɔ Sefalade la bava Nɛgɛbe azuamgbole ne mɔ ayɛ bɛ ɛdeɛ.+
21 Na dievolɛma bahɔ Zayɔn Boka ne azoKɛ bɛkabua Yisɔ awoka ne mɔ azo ndɛne,+Na belemgbunlililɛ ne bayɛ Gyihova ɛdeɛ.”+
Ɔbodwɛkɛ
^ Ɔ bo kile “Gyihova Sonvolɛ.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ ɔkola ɔkile, “ɛtu ɛkɔ anwuma.”
^ Anzɛɛ ɔkola ɔkile, “Duzu ninyɛne a bɛbazɛkye bɛ a?”
^ Nea Edwɛkɛbohilelɛ.
^ Anzɛɛ “aranemgbole.”
