Mateyu Edwɛkpa 3:1-17
3 Mekɛ ne anu Dwɔn+ Sɔnevolɛ ne rabɔle nolo+ wɔ Dwudiya fienemgbole ne anu
2 kɛ: “Bɛnlu bɛ nwo, ɔluakɛ anwuma Belemgbunlililɛ ne ɛbikye.”+
3 Nɔhalɛ nu, Dwɔn ɛhye a bɛluale ngapezonli Ayezaya+ anwo zo bɛhanle ɔ nwo edwɛkɛ ɛhye la: “Ɛnelɛ bie ɛlɛtea nu wɔ fienemgbole ne anu kɛ: ‘Bɛziezie Gyihova* adenle ne! Bɛmaa ye ndenle ɛdenrɛ.’”+
4 Ɛnee Dwɔn wula tɛladeɛ mɔɔ bɛva afunlumu enrinli bɛnwo la yɛɛ nane nwoma bɛlɛte hye ɔ nze zo.+ Ye aleɛ a le abɛbɛ nee ɛbɔ nu wolɛ.+
5 Akee menli mɔɔ wɔ Gyɛlusalɛm nee Dwudiya amuala yɛɛ maanzinli mɔɔ wɔ Dwɔdan ne anloa la amuala hɔle ye ɛkɛ,+
6 na ɔzɔnenle* bɛ wɔ Azule Dwɔdan ne anu,+ na bɛhanle bɛ ɛtane ne mɔ wɔ bagua nu.
7 Mekɛ mɔɔ ɔnwunle Falasiima nee Sadusiima+ dɔɔnwo kɛ bɛlɛba ɛleka mɔɔ ɔlɛsɔne menli la, ɔzele bɛ kɛ: “Nwɔlɛ mralɛ,+ nwane a ɛbɔ bɛ kɔkɔ kɛ bɛnriandi ɛyavalɛ ne mɔɔ ɛlɛba la ɛ?+
8 Yemɔti, bɛbɔ ɛbɛla mɔɔ kile kɛ bɛnlu bɛ nwo la.
9 Bɛmmaka ye bɛ ahonle nu kɛ, ‘Yɛ papa a le Ebileham.’+ Na meka meahile bɛ kɛ, Nyamenle kola maa Ebileham nyia mralɛ fi awolɛ ɛhye mɔ anu.
10 Akuma ne la baka ne abo dɛbadɛba. Yemɔti baka biala mɔɔ ɛnzo ma kpalɛ la, bɛbapɛ na bɛavuandi bɛado senle nu.+
11 Mame, kɛmɔ bɛnlu bɛ nwo la ati a mesɔne* bɛ wɔ nzule nu a,+ noko mɔɔ li me nzi ɛlɛba la lɛ tumi tɛla me, ye mgbɔlaboa bɔbɔ menfɛta kɛ meye.+ Yemɔ ɔbava sunsum nwuanzanwuanza+ nee senle+ a yeazɔne* bɛ a.
12 Ɔlɛ ye ma ɛkpogyalɛ sofi ɔ sa nu mɔɔ ɔbava yeaziezie ye ma ɛwosolɛ ɛleka ne kɛnlɛma na yeaboɔboa ye hwiiti ne anloa wɔ bonwolo ne azo, noko ɔbayela abonle ne wɔ senle+ mɔɔ ɛnnu ɛlɛ la anu.”
13 Akee Gyisɛse vi Galeli rale Dwɔn ɛkɛ wɔ Dwɔdan ne anloa amaa yeazɔne* ye.+
14 Noko Dwɔn bɔle mɔdenle kɛ ɔsi ye adenle, na ɔhanle kɛ: “Mame a ɔwɔ kɛ ɛsɔne me a, ɛnee duzu ati a wɔmɔ ɛlɛba me nwo ɛke a?”
15 Gyisɛse buale ye kɛ: “Mmasi me adenle kɛkala, ɔluakɛ ɛhye a le adenle kpalɛ mɔɔ yɛbalua zo yɛayɛ mɔɔ tenrɛ la amuala a.” Akee yeanzi ye adenle bieko.
16 Mɔɔ bɛzɔnenle Gyisɛse bɛwiele ala la, ɔvi nzule ne anu ɔvindele; na nea! anwuma bukele,+ na Dwɔn nwunle kɛ Nyamenle sunsum ne ɛlɛdwu kɛ abubule la ara ɔ nwo zo.+
17 Akee nea! Ɛnelɛ bie vi anwuma+ hanle kɛ: “Ɛhye a le me Ra+ mɔɔ mekulo ye, na melie ye medo nu a.”+
