Mateyu Edwɛkpa 15:1-39
15 Akee Falasiima nee mɛla kilehilevolɛma+ bie vi Gyɛlusalɛm rale Gyisɛse anwo ɛkɛ na bɛhanle kɛ:
2 “Duzu ati a wɔ ɛdoavolɛma ɛnli yɛ nenyia mɔ amaamuo ne azo ɛ? Kɛ neazo la, saa bɛdi aleɛ a bɛnnrinzi* bɛ sa anwo.”+
3 Ɔbuale bɛ kɛ: “Kɛmɔti a bɛ amaamuo ne ati bɛnli Nyamenle mɛla zo ɛ?+
4 Kɛ neazo la, Nyamenle hanle kɛ, ‘Di wɔ papa nee wɔ mame eni,’+ na ‘Awie biala mɔɔ kɛha edwɛkɛ ɛtane kɛhile ye papa anzɛɛ ye mame* la bɛhu ye.’+
5 Noko bɛmɛ bɛse, ‘Awie biala mɔɔ kɛha kɛhile ye papa anzɛɛ ye mame kɛ: “Debie biala mɔɔ melɛ mɔɔ anrɛɛ ɛbanyia zolɛ nvasoɛ la le ahyɛlɛdeɛ mɔɔ bɛyila zo bɛmaa Nyamenle” a,+
6 ɔngyia kɛ ɔdi ye papa anzɛɛ ye mame eni fee.’ Yemɔti bɛva bɛ amaamuo bɛzɛkye Nyamenle edwɛkɛ ne.+
7 Nabalabama, Ayezaya nwunle ye a ɔhanle bɛ nwo ngapezo kɛ:+
8 ‘Menli ɛhye mɔ fa bɛ nloa di me eni, na bɛ ahonle ɛdeɛ ɔmbikye me fee.
9 Bɛsonle me mgbane, ɔluakɛ bɛkilehile mɔɔ menli ka la.’”+
10 Akee ɔvɛlɛle menli dɔɔnwo ne ɔrale ɔ nwo ɛkɛ na ɔzele bɛ kɛ: “Bɛdie na bɛde ɔ bo:+
11 Tɛ mɔɔ kɔ sonla nloa anu la a gua ɔ nwo evinli a, emomu, mɔɔ vi ɔ nloa anu finde la a gua ɔ nwo evinli a.”+
12 Akee ɛdoavolɛma ne razele ye kɛ: “Ɛze kɛ mɔɔ ɛhanle la maanle Falasiima ne vale ɛya ɔ?”+
13 Ɔbuale bɛ kɛ: “Baka biala mɔɔ tɛ me Ze mɔɔ wɔ anwuma la a luale la, bɛbadu.
14 Bɛgyakyi bɛ. Bɛle adekilevolɛma anyenzinliravolɛma. Na saa anyezinliravolɛ kile anyezinliravolɛ adenle a, bɛ mu nwiɔ bɛgua kuma nu.”+
15 Pita buale kɛ: “Kilehile ndonwo ne anu kile yɛ.”
16 Na ɔhanle kɛ: “Bɛdabɛ noko bɛtɛtele ɔ bo ɔ?+
17 Asoo bɛnze kɛ debie biala mɔɔ kɔ sonla nloa anu la kɔ ɔ kunlu na ɔfa ye aze ɔse?
18 Noko debie biala mɔɔ vi sonla nloa anu finde la vi ye ahonle nu, na ninyɛne ɛhye mɔ a gua sonla nwo evinli a.+
19 Kɛ neazo la, ahonle ne anu a nzuzulɛ ɛtane:+ kodiawuyɛlɛ, agyalɛzɛkyelɛ, adwɔmane ɛbɛla,* awuleyɛlɛ, daselɛ adalɛ ɛlilɛ, munzule edwɛkɛ vi ba a.
20 Ninyɛne ɛhye mɔ a gua sonla nwo evinli a; na saa awie annrinzi ɔ sa anwo* na ɔdi aleɛ a, ɔngua ɔ nwo evinli.”
21 Akee Gyisɛse vile ɛkɛ ne na ɔhɔle Taya nee Saedɛn maanzinli nu.+
22 Na nea! Fonehyea raalɛ bie mɔɔ vi maanzinli ne anu la rale na ɔdeanle nu kɛ: “Awulae, Devidi Ara, nwu me anwunvɔne. Sunsum ɛtane ɛlɛgyegye me ra raalɛ ne kpalɛ.”+
23 Noko yeanga ɛhwee yeangile ye. Yemɔti ye ɛdoavolɛma ne razɛlɛle ye kɛ: “Maa ɔhɔ, ɔluakɛ ɔlɛteɛdea nu yeali yɛ nzi.”
24 Ɔbuale kɛ: “Bɛanzoa me wɔ awie biala ɛkɛ ne kɛ Yizilayɛ sua nu mboane mɔɔ bɛminli la ala ɛkɛ.”+
25 Na raalɛ ne rahotole ye* hanle kɛ: “Awulae, boa me!”
26 Ɔbuale ye kɛ: “Ɔnle kpalɛ kɛ bɛkɛvuandi paano mɔɔ le ngakula ne mɔ ɛdeɛ la bɛkɛmaa ahwea mralɛ.”
27 Ɔhanle kɛ: “Ɔle zɔ, Awulae, noko ahwea mralɛ ne mɔ di mgbokpoloka mɔɔ vi bɛ menle mɔ ɛkponle ne azo gua aze la.”+
28 Akee Gyisɛse buale ye kɛ: “O raalɛ, wɔ diedi le kpole; mɔɔ ɛkulo la ɛyɛ zɔ ɛmaa wɔ.” Na ɔ ra raalɛ ne dele kpɔkɛ ɛkɛ ne ala.
29 Gyisɛse vile ɛkɛ ne la, ɔrale Galeli Nyevile ne anloa,+ na mɔɔ ɔvole boka ne la, ɔdɛnlanle aze.
30 Na menli dɔɔnwo bikyele ye, na bɛvale abuburama, menli mɔɔ bɛ ɛleka bie ɛdwe, anyenzinliravolɛma, mumulema nee bɛdabɛ mɔɔ ewule ngakyile ɛha bɛ la bɛraguale ɔ gyakɛ anu, na ɔyɛle bɛ ayile.+
31 Mɔɔ menli ne nwunle kɛ mumule ɛlɛtendɛ, mɔɔ ye ɛleka bie ɛdwe la ɛde kpɔkɛ, abubura ɛlɛtia na anyenzinliravolɛ nwu debie la, ɔzinle bɛ nwo na bɛwulale Yizilayɛ Nyamenle ne anyunlunyia.+
32 Na Gyisɛse vɛlɛle ye ɛdoavolɛma ne rale ɔ nwo ɛkɛ na ɔzele bɛ kɛ: “Menli ye anwo yɛ me alɔbɔlɛ,+ ɔluakɛ bɛdɛnla me nwo ɛke kenle nsa yɛɛ bɛnlɛ debie biala mɔɔ bɛbali a. Mengulo kɛ bɛfa ɛhɔne* bɛkɔ, ɔluakɛ wɔannea a bɛ nye zo kɛbulu bɛ wɔ adenle nu.”+
33 Noko ɛdoavolɛma ne zele ye kɛ: “Nienwu a yɛbanyia paano dɔɔnwo wɔ fienemgbole ye anu mɔɔ ɔbamaa menli dɔɔnwo ɛhye ako ayi a?”+
34 Ɛhye ati Gyisɛse bizale bɛ kɛ: “Paano nyɛ a bɛlɛ a?” Bɛhanle kɛ: “Nsuu yɛɛ fɛlɛ ekyi bie.”
35 Yemɔti mɔɔ ɔmaanle menli dɔɔnwo ne dɛnlanle aze la,
36 ɔvale paano nsuu ne nee fɛlɛ ne, na mɔɔ ɔlale ase ɔwiele la, ɔbubule nu na ɔbɔle ɔ bo ɔvale ɔmaanle ɛdoavolɛma ne, na ɛdoavolɛma ne vale maanle menli ne.+
37 Bɛ muala bɛlile na bɛ ko yile, na bɛsesale ɔ bo zo mɔɔ hale la ahɛndɛne mgbole nsuu tetɛkɛɛ.+
38 Na bɛdabɛ mɔɔ bɛlile la le mrenyia 4,000 yɛɛ mraalɛ nee ngakula.
39 Akee ɔmaanle menli ne hɔle, na ɔvole ɛlɛne nu ɔrale Magadan maanzinli nu.+
Ɔbodwɛkɛ
^ Ɛhye ɛngile bɛ sa anwo evinli mɔɔ bɛwowo la, ɔkile Dwuuma amaamuo mɔɔ bɛdua zo bɛwowo bɛ sa anwo la.
^ Anzɛɛ “kɛbɔ bɛ aholoba.”
^ Giliki, por·nei′a. Nea Edwɛkɛbohilelɛ.
^ Ɛhye ɛngile Dwuuma amaamuo mɔɔ bɛdua zo bɛwowo bɛ sa anwo la.
^ Anzɛɛ “rabɔle ɔ ti aze maanle ye.”
^ Anzɛɛ “kɛ bɛkye ɛhɔne.”
