Mateyu Edwɛkpa 13:1-58

  • BELEMGBUNLILILƐ NDONWO (1-52)

    • Ɛyazonlɛnli ne (1-9)

    • Deɛmɔti Gyisɛse yɛle ndonwo la (10-17)

    • Ɛyazonlɛnli ne anwo ndonwo ne ngilenu (18-23)

    • Hwiiti nee ndile ne (24-30)

    • Mɛsetade ma nee mgbɔvonle ne (31-33)

    • Ndonwo maanle ngapezo rale nu (34, 35)

    • Hwiiti nee ndile ne anwo ndonwo ne ngilenu (36-43)

    • Agudeɛ mɔɔ vea nee avikpa (44-46)

    • Avonle ne (47-50)

    • Ninyɛne fofolɛ nee dɛba (51, 52)

  • Bɛkpole Gyisɛse wɔ ye sua zo (53-58)

13  Kenle zɔhane, Gyisɛse vile sua nu ɛkɛ na ɔhɔdɛnlanle nyevile ne anloa.  Na menli dɔɔnwo rabɔle yiale ye, yemɔti ɔhɔvole ɛlɛne bie na ɔdɛnlanle nu, na menli ne gyinlegyinlanle nyevile ne anloa.+  Akee ɔvale ndonwo* ɔhanle edwɛkɛ dɔɔnwo+ ɔhilele bɛ kɛ: “Nea! Ɛyazonlɛnli bie hɔle kɛ ɔkagua ma.+  Mɔɔ ɔlɛgua ma ne la, bie hɔguale adenle nloa, na nloma rasusole.+  Bie hɔguale awolɛ nu, ɛleka mɔɔ ɛnwea ne anzo la, na kɛmɔ ɛnwea ne anzo la ati ɔfifile ndɛndɛ.+  Noko mɔɔ ewia ne bɔle la, bɛnwosonle, na kɛmɔ bɛnlɛ ndinli la ati, bɛwule.  Bie hɔguale mbowule nu, na mbowule ne nyinle na ɔmianle bɛ.+  Bie noko hɔguale azɛlɛ kpalɛ zo, na bɛbɔle ɔ bo bɛzole ma, bie zole mɔnwo 100, bie mɔnwo 60, yɛɛ bie noko mɔnwo 30.+  Bɛmaa mɔɔ lɛ ɛnzolɛ la ɛdie.”+ 10  Yemɔti ɛdoavolɛma ne rabizale ye kɛ: “Duzu ati a ɛfa ndonwo a ɛtendɛ ɛkile bɛ ɛ?”+ 11  Ɔbuale bɛ kɛ: “Bɛmɛ bɛmaa bɛ adenle kɛ bɛde anwuma Belemgbunlililɛ ne anwo fealeranu edwɛkɛ nwuanzanwuanza+ ne abo, noko menli mɔɔ ɛha la ɛdeɛ bɛtɛmaanle bɛ adenle. 12  Ɔluakɛ awie mɔɔ lɛ bie la, bɛbamaa ye bie bɛaboka nwo, bɛamaa yeabo zo; na mɔɔ ɛnlɛ bie la, bɛbalie mɔɔ ɔlɛ bɔbɔ la bɛavi ɔ sa nu.+ 13  Ɛhye ati a mefa ndonwo metendɛ mekile bɛ a; ɔluakɛ bɛnea noko bɛnea ye mgbane, bɛtie noko bɛtie ye mgbane, yɛɛ bɛnde ɔ bo.+ 14  Na Ayezaya ngapezo ne ɛra nu wɔ bɛ nwo zo. Ɔse: ‘Nɔhalɛ nu, bɛbadie noko bɛnrɛde ɔ bo, yɛɛ bɛbanlea noko bɛnrɛnwu ɛhwee.+ 15  Ɔluakɛ menli ɛhye mɔ ahonle ɛsolo, bɛfa bɛ nzo bɛtie ye mgbane, yɛɛ bɛmuomua bɛ nye, amaa bɛanva bɛ nye bɛannwu debie, bɛanva bɛ nzo bɛande edwɛkɛ, bɛande ɔ bo wɔ bɛ ahonle nu na bɛahakyi, na meayɛ bɛ ayile.’+ 16  “Noko anyelielɛ a le bɛ ɔluakɛ bɛ nye nwu debie yɛɛ bɛ nzo te edwɛkɛ.+ 17  Nɔhalɛ nu meka meahile bɛ kɛ, ngapezoma nee tenlenema dɔɔnwo hulole kɛ bɛkɛnwu ninyɛne mɔɔ bɛnwu ye la noko bɛannwu ye,+ na bɛkɛde mɔɔ bɛde la noko bɛande. 18  “Akee bɛdie mɔɔ ndonwo ne kile la.+ 19  Saa awie te Belemgbunlililɛ ne anwo edwɛkɛ ne na yeande ɔ bo a, amumuyɛnli ne+ baye mɔɔ bɛgua la fi ye ahonle nu; ɛhye a le mɔɔ bɛguale ye wɔ adenle ne anloa la.+ 20  Na mɔɔ guale awolɛ zo la a le mɔɔ te edwɛkɛ ne na ɛkɛ ne ala ɔfa anyelielɛ ɔdie ɔto nu la.+ 21  Noko ɔnzɔ ndinli wɔ ye nu na ɔgyinla mekɛ ekyi, na saa anwongyelelɛ ba anzɛɛ bɛyɛ ye kpɔdekpɔde wɔ edwɛkɛ ne anwo a, ɛkɛ ne ala ɔnlie edwɛkɛ ne ɔnli bieko. 22  Mɔɔ guale mbowule nu la a le mɔɔ ɔte edwɛkɛ ne noko mekɛ ɛhye* anu adwenleadwenle+ nee anwonyia mɛlɛbɛla mia edwɛkɛ ne na ɔnzo ma la.+ 23  Na mɔɔ guale azɛlɛ kpalɛ zo la a le mɔɔ te edwɛkɛ ne na ɔte ɔ bo, na ɔso ma la, bie mɔnwo 100, bie 60 yɛɛ bie noko 30.”+ 24  Ɔmaanle bɛ ndonwo bieko kɛ: “Anwuma Belemgbunlililɛ ne le kɛ nrenyia bie mɔɔ luale ma kpalɛ wɔ ye ɛya nu la. 25  Mekɛ mɔɔ ɛnee menli ɛdeda la, ye kpɔvolɛ raluale ndile wɔ hwiiti ne anu na ɔhɔle. 26  Mɔɔ bɛfifile na bɛvieviale mralɛ la, ndile ne noko yele ɔ nwo. 27  Yemɔti suamenle ne ngɛkɛlɛ ne mɔ razele ye kɛ, ‘Yɛmenle, asoo tɛ ma kpalɛ a ɛluale ye wɔ ɛya ne anu a? Na kɛ ɔyɛle mɔɔ ndile ɛra nu ɛ?’ 28  Ɔhanle ɔhilele bɛ kɛ, ‘Kpɔvolɛ bie a ɛrayɛ ɛhye a.’+ Ngɛkɛlɛ ne mɔ zele ye kɛ, ‘Ɛnee ɛkulo kɛ yɛkɔtudu ɔ?’ 29  Ɔhanle kɛ, ‘Kyɛkyɛ, wɔannea a bɛlɛtudu ndile ne a, bɛbadudu hwiiti ne bɛaboka nwo. 30  Bɛmaa bɛbɔ nu bɛnyi ɔhɔdwu ma ɛdelɛ mekɛ ne, na zɔhane mekɛ ne, mebaha meahile menli mɔɔ bade la kɛ: Bɛlimoa bɛdudu ndile ne na bɛkyekye bɛ avile bɛyela bɛ; na akee bɛboɔboa hwiiti ne anloa bɛgua ɛleka mɔɔ mesie me ninyɛne la.’”+ 31  Ɔmaanle bɛ ndonwo bieko kɛ: “Anwuma Belemgbunlililɛ ne le kɛ mɛsetade ma mɔɔ nrenyia bie hɔluale ye wɔ ye ɛya nu la.+ 32  Nɔhalɛ nu, ɔle ma kɔsɔɔti anu nretee kpalɛ, noko saa ɔnyi a ɔyɛ baka kpole ɔtɛla mbaka dɔɔnwo, yemɔti anwomanyunlu nloma batɛnla ye ngane ne mɔ azo.” 33  Ɔmaanle bɛ ndonwo bieko kɛ: “Anwuma Belemgbunlililɛ ne le kɛ mgbɔvonle* mɔɔ raalɛ bie vale wulale esamo ɛzuzudeɛ mgbole nsa anu ɔmaanle ɔ muala dule la.”+ 34  Gyisɛse vale ndonwo hanle ɛhye mɔ amuala hilele menli ne. Nɔhalɛ nu, yeandendɛ yeangile bɛ mɔɔ ndonwo ɛnle nu a,+ 35  amaa mɔɔ bɛluale ngapezonli ne anwo zo bɛhanle la ara nu kɛ: “Mebabuke me nloa wɔ ndonwo nu; mebabɔ ninyɛne mɔɔ sumunli mɔlebɛbo* ne ɔvea la nolo meahile.”+ 36  Akee ɔgyakyile menli dɔɔnwo ne ɔmaanle bɛhɔle na ɔhɔle sua nu. Ye ɛdoavolɛma ne razele ye kɛ: “Kilehile ɛya ne anu ndile ne anwo ndonwo ne anu kile yɛ.” 37  Ɔbuale bɛ kɛ: “Ɛyazonlɛnli ne mɔɔ luale ma kpalɛ ne la a le sonla Ra ne; 38  ɛya ne a le ewiade.+ Ma kpalɛ ne a le Belemgbunlililɛ ne amra ne mɔ, ndile ne a le amumuyɛnli ne amra ne mɔ,+ 39  yɛɛ kpɔvolɛ ne mɔɔ luale la a le Abɔnsam. Ma ɛdelɛ mekɛ ne a le mekɛ ɛhye awieleɛ ne,* na menli mɔɔ bade la a le anwumabɔvolɛ ne mɔ. 40  Yemɔti kɛ mɔɔ bɛtudu ndile na bɛfa senle bɛyela ye la, zɔhane ala a mekɛ ɛhye awieleɛ ne* bayɛ a.+ 41  Sonla Ra ne bazoa ye anwumabɔvolɛma, na bɛbaboɔboa ninyɛne kɔsɔɔti mɔɔ maa awie mɔ tɔ aze nee menli mɔɔ yɛ ninyɛndane la anloa bɛavi ye Belemgbunlililɛ ne anu, 42  na bɛbavuandi bɛ bɛagua fonlomo ne mɔɔ senle ɛlɛsɔ nu la anu.+ Ɛkɛ ne a bɛbazu na bɛali nyane a. 43  Mekɛ zɔhane, tenlenema bada wienyi kɛ sɛnzɛne+ la wɔ bɛ Ze Belemgbunlililɛ ne anu. Bɛmaa mɔɔ lɛ ɛnzolɛ la ɛdie. 44  “Anwuma Belemgbunlililɛ ne le kɛ agudeɛ bie mɔɔ vea ɛya nu mɔɔ nrenyia bie nwunle ye na ɔvale ɔveale la; kɛmɔ ɔ nye liele la ati, ɔhɔdɔnenle debie biala mɔɔ ɔlɛ la na ɔhɔdɔle zɔhane azɛlɛ ne.+ 45  “Bieko, anwuma Belemgbunlililɛ ne le kɛ gualilɛnli bie mɔɔ ɛlɛkpondɛ avikpa adɔ la. 46  Mekɛ mɔɔ ɔnwunle avikpa ko mɔɔ ye bolɛ yɛ se la, ɔhɔle na ndɛndɛ ne ala ɔdɔnenle debie biala mɔɔ ɔlɛ la na ɔhɔdɔle.+ 47  “Bieko, anwuma Belemgbunlililɛ ne le kɛ avonle mɔɔ bɛdo ye nyevile nu amaa yeahye fɛlɛ ngakyile la. 48  Mekɛ mɔɔ ɔyile la, bɛhwenle bɛrale aze, na bɛdɛnlanle aze bɛkpale fɛlɛ kpalɛ+ ne bɛguale debie nu, na bɛvuandinle mɔɔ ɛnle kpalɛ la+ bɛguale ye lɔ. 49  Zɔhane ala a mekɛ ɛhye awieleɛ ne* bayɛ a. Anwumabɔvolɛma barakpa ɛtanevolɛma avi tenlenema anu 50  na bɛavuandi bɛ bɛagua fonlomo ne mɔɔ senle ɛlɛsɔ nu la anu. Ɛkɛ ne a bɛbazu na bɛali nyane a. 51  Ɔbizale bɛ kɛ: “Asoo bɛdele ninyɛne ɛhye mɔ amuala abo?” Bɛbuale ye kɛ: “Ɛhɛe.” 52  Akee ɔzele bɛ kɛ: “Saa zɔhane a ɔde a, ɛnee kilehilevolɛ biala mɔɔ bɛhilehile ye anwuma Belemgbunlililɛ ne anwo debie la le kɛ suamenle bie mɔɔ ye ninyɛne fofolɛ nee dɛba fi ɛleka mɔɔ ɔfa ye ninyɛne ɔsie la.” 53  Mɔɔ Gyisɛse yɛle ndonwo ɛhye mɔ wiele la, ɔvile ɛkɛ. 54  Mekɛ mɔɔ ɔhɔle ye sua zo la,+ ɔbɔle ɔ bo ɔhilehilele bɛ wɔ bɛ nyianusua ne anu, yemɔti ɔzinle bɛ nwo na bɛhanle kɛ: “Nienwu a nrenyia ɛhye nyianle nrɛlɛbɛ ɛhye nee tumi mɔɔ ɔfa ɔyɛ nwanwane gyima ɛhye mɔ la vile a?+ 55  Tɛ kapentanli ne ara ne ɛ?+ Tɛ ye mame a bɛfɛlɛ ye Mɛle la, yɛɛ tɛ ɔ mediema mrenyia a le Gyemise nee Dwosefi nee Saemɔn nee Dwudase?+ 56  Na tɛ ɔ mediema mraalɛ ne mɔ amuala a yɛ nee bɛ wɔ ɛke la? Ɛnee akee, nienwu a ɔzukoale ɛhye mɔ amuala ɔvile a?”+ 57  Ɔti bɛanlie ye bɛanli.+ Noko Gyisɛse zele bɛ kɛ: “Bɛdi ngapezonli eni wɔ ɛleka biala kyesɛ ye sua zo nee ye sua nu ala.”+ 58  Na kɛmɔ bɛnlɛ diedi la ati, yeanyɛ nwanwane gyima dɔɔnwo wɔ ɛkɛ.

Ɔbodwɛkɛ

Anzɛɛ “mrɛlɛ.”
Anzɛɛ “yiisi.”
Anzɛɛ ɔkola ɔkile, “ewiade ne mɔlebɛbo.”