Maake Edwɛkpa 4:1-41

  • BELEMGBUNLILILƐ NE ANWO NDONWO (1-34)

    • Ɛyazonlɛnli ne (1-9)

    • Deɛmɔti Gyisɛse yɛle ndonwo la (10-12)

    • Ɛyazonlɛnli ne anwo ndonwo ne ngilenu (13-20)

    • Bɛnva kɛnlaneɛ bɛnzie kɛndɛne bo (21-23)

    • Mɔɔ ɛfa ɛsuzu la (24, 25)

    • Ɛyazonlɛnli ne mɔɔ lale la (26-29)

    • Mɛsetade ma ne (30-32)

    • Ɔyɛle ndonwo (33, 34)

  • Gyisɛse maa ahumu bie gua dii (35-41)

4  Na ɔbɔle ɔ bo ɔhilehilele bieko wɔ nyevile ne anloa, na menli dɔɔnwo bie rayiale ɔ nwo ɛkɛ. Yemɔti ɔhɔvole ɛlɛne bie na ɔdɛnlanle nu wɔ nyevile ne anye, na ɛnee menli dɔɔnwo wɔ nyevile ne anloa.+  Na ɔbɔle ɔ bo ɔvale ndonwo ɔhilehilele bɛ ninyɛne dɔɔnwo,+ na wɔ ye ngilehilelɛ ne anu ɔzele bɛ kɛ:+  “Bɛdie. Nea! Ɛyazonlɛnli bie hɔle kɛ ɔkagua ma.+  Mɔɔ ɔlɛgua ma ne la, bie hɔguale adenle nloa, na nloma rasusole.  Bie hɔguale awolɛ nu, ɛleka mɔɔ ɛnwea ne anzo la, na kɛmɔ ɛnwea ne anzo la ati, ɔfifile ndɛndɛ.+  Noko mɔɔ ewia ne bɔle la bɛnwosonle, na kɛmɔ bɛnlɛ ndinli la ati, bɛwule.  Ma ne bie guale mbowule nu, na mbowule ne nyinle na ɔmianle bɛ, na bɛanzo ma.+  Bie noko hɔguale azɛlɛ kpalɛ zo, na bɛfifile na bɛnyinle, na bɛbɔle ɔ bo bɛzole ma, bie zole mɔnwo 30, 60, yɛɛ 100.”+  Akee ɔvale ɔzɔle zo kɛ: “Bɛmaa mɔɔ lɛ ɛnzolɛ kɛva kɛdie la ɛdie.”+ 10  Akee mɔɔ menli dɔɔnwo ne hɔle la, bɛdabɛ mɔɔ bɛwɔ ɔ nwo ɛkɛ la nee Bulu Nee Nwiɔ ne bɔle ɔ bo bizebizale ye ndonwo ne anwo edwɛkɛ.+ 11  Ɔzele bɛ kɛ: “Bɛmɛ bɛla Nyamenle Belemgbunlililɛ ne anwo fealeranu edwɛkɛ nwuanzanwuanza+ ne ali wienyi bɛhile bɛ, na bɛdabɛ mɔɔ bɛha la, bɛte ye wɔ ndonwo nu,+ 12  amaa bɛnea, bɛnea a, bɛanlea ye mgbane, bɛtie, bɛtie a, bɛande ɔ bo; na bɛahakyi na bɛava bɛ ɛtane bɛahyɛ bɛ.”+ 13  Akee ɔzele bɛ kɛ: “Bɛnde ndonwo ɛhye abo, ɛnee kɛ ɔkɛyɛ na bɛade ndonwo mɔɔ ɛha la amuala abo ɛ? 14  “Ɛyazonlɛnli ne dua edwɛkɛ ne.+ 15  Menli ne bie mɔ le kɛ ma ne mɔɔ guale adenle ne anloa la; bɛte edwɛkɛ ne a ndɛndɛ ne ala Seetan baye edwɛkɛ ne mɔɔ bɛlua la fi bɛ ahonle nu.+ 16  Bie mɔ noko le kɛ mɔɔ guale awolɛ nu la; bɛte edwɛkɛ ne ala a bɛfa anyelielɛ bɛdie bɛto nu.+ 17  Noko bɛ ndinli ɛngɔ moa, na bɛtɛnla ɛkɛ ne ekyii; akee saa edwɛkɛ ne ati anwongyelelɛ ba anzɛɛ bɛyɛ bɛ kpɔdekpɔde a, bɛnlie edwɛkɛ ne bɛnli bieko. 18  Bie mɔ noko guale mbowule nu. Ɛhye mɔ a le bɛdabɛ mɔɔ bɛte edwɛkɛ ne,+ 19  noko mekɛ ɛhye* anu adwenleadwenle+ nee anwonyia mɛlɛbɛla+ nee atiakunluwɔzo ngakyile+ mia edwɛkɛ ne, na ɔnzo ma. 20  Akee mɔɔ guale azɛlɛ kpalɛ zo la a le bɛdabɛ mɔɔ bɛtie edwɛkɛ ne na bɛfa fɛlɛkolilɛ bɛdie bɛto nu na bɛso ma mɔnwo—30, 60 yɛɛ 100 la.”+ 21  Eza ɔzele bɛ kɛ: “Asoo kɛndɛne* anzɛɛ ɛkpa bo a bɛfa kɛnlaneɛ bɛsie a? Asoo bɛnva bɛnzie kɛnlaneɛbaka zo ɔ?+ 22  Ɔluakɛ debie biala ɛnle ɛkɛ mɔɔ vea mɔɔ ɔnrɛla ali a; debie biala ɛnle ɛkɛ mɔɔ bɛheda zo mɔɔ ɔnrɛla ali wienyi a.+ 23  Awie biala mɔɔ lɛ ɛnzolɛ kɛva kɛdie la, bɛmaa ɔdie.”+ 24  Ɔdoale zo ɔzele bɛ kɛ: “Bɛdie edwɛkɛ ɛhye boɛ.+ Debie mɔɔ bɛlɛfa bɛazuzu bɛamaa la, bɛbava bɛazuzu bɛamaa bɛ, ɛhɛe, bɛbava dɔɔnwo bɛaboka nwo bɛamaa bɛ. 25  Ɔluakɛ mɔɔ lɛ bie la, bɛbamaa ye bie dɔɔnwo bɛaboka nwo,+ na mɔɔ ɛnlɛ bie la, mɔɔ ɔlɛ bɔbɔ la bɛbalie bɛavi ɔ sa nu.”+ 26  Akee ɔdoale zo ɔhanle kɛ: “Yemɔti Nyamenle Belemgbunlililɛ ne le kɛ mekɛ mɔɔ nrenyia bie gua ma wɔ ɛya nu la. 27  Ɔda nɔɔzo na ɔdwazo nwonlomɔ, na ma ne mɔ fifi na bɛyɛ ndendenle—ɔnze adenle mɔɔ bɛdua zo bɛyɛ zɔ a. 28  Azɛlɛ mumua ne yɛ ye ngyikyi ngyikyi maa ɔso; ɔdimoa ɔwɔlɔ, akee ma ba zo, na nzinlii ma ne abolo. 29  Na saa ma ne bolo ala a, ɔfa ɛdedadeɛ ɔkɔte, ɔluakɛ ma ɛdelɛ mekɛ ne ɛdwu.” 30  Na ɔdoale zo ɔhanle kɛ: “Duzu a yɛbahola yɛava Nyamenle Belemgbunlililɛ ne yɛado nwo a, anzɛɛ ndonwo boni a yɛbahola yɛava yɛahile nu a? 31  Ɔle kɛ mɛsetade ma la, mekɛ mɔɔ bɛluale ye wɔ ɛya nu la ɛnee ɔle azɛlɛ ye azo ma kɔsɔɔti anu nretee kpalɛ.+ 32  Noko saa bɛdua a, ɔnyi ɔyɛ baka kpole ɔtɛla mbaka dɔɔnwo na ɔkpakye ngane mgbole, yemɔti anwomanyunlu nloma nyia ye alubo ne abo tɛnla.” 33  Ɔluale ndonwo+ mɔɔ le kɛ ɛhye mɔ la dɔɔnwo azo ɔhanle edwɛkɛ ne ɔhilele bɛ, amaa bɛade ɔ bo. 34  Nɔhalɛ nu, yeandendɛ yeangile bɛ mɔɔ ndonwo ɛnle nu a, noko saa ɔka ɔdaye nee ye ɛdoavolɛma ne angome a, ɔkilehile debie biala anu.+ 35  Kenle zɔhane nɔsolɛ nu, ɔzele bɛ kɛ: “Bɛmaa yɛpɛ yɛhɔ nyevile ne anzi lɔ.”+ 36  Ɔti mɔɔ bɛmaanle menli dɔɔnwo ne hɔle la, bɛvale ye wɔ ɛlɛne nu bɛhɔle, na ɛnee ɛlɛne dɔɔnwo noko wɔ ɛkɛ.+ 37  Akee ahumu kpole bie dule, na azɛlɛkye ne bɔle rale ɛlɛne ne anu, yemɔti ɔhale ekyii na yeanloma.+ 38  Noko ɛnee ɔwɔ ɛlɛne ne abo lɔ, ɔ ti zɔ esumi na yelafe. Yemɔti bɛdunwuele ye na bɛzele ye kɛ: “Kilehilevolɛ, ɔnvale ɛ nwo kɛ asɛɛ yɛwu ɔ?” 39  Akee ɔdwazole ɔdeanle anwoma ne na ɔhanle ɔhilele nyevile ne kɛ: “Gyinla! Yɛ koonwu!”+ Na anwoma ne ɛdulɛ ne hanle aze na ɔguale dii. 40  Yemɔti ɔzele bɛ kɛ: “Duzu ati a bɛ ahonle ɛdu zɛhae ɛ? Bɛnlɛ diedi ɔ?” 41  Na ɛzulolɛ kpole hanle bɛ na bɛzele bɛ nwo ngoko kɛ: “Duzu sonla a le ɛhye? Anwoma nee nyevile bɔbɔ tie ye.”+

Ɔbodwɛkɛ

Anzɛɛ “kɛndɛne mɔɔ bɛfa bɛsuzu debie.”