Luku Edwɛkpa 9:1-62
-
Bɛmaanle Bulu Nee Nwiɔ ne daselɛlilɛ nwo adehilelɛ (1-6)
-
Gyisɛse anwo edwɛkɛ gyegyele Hɛlɔdo (7-9)
-
Gyisɛse maa menli 5,000 aleɛ (10-17)
-
Pita nwu Kelaese ne (18-20)
-
Bɛhanle Gyisɛse ewule ne bɛdole ɛkɛ (21, 22)
-
Nɔhalɛ ɛdoavolɛyɛlɛ (23-27)
-
Gyisɛse hakyile (28-36)
-
Kakula nrenyia mɔɔ sunsum ɛtane wɔ ɔ nwo la ayileyɛlɛ (37-43a)
-
Bɛhanle Gyisɛse ewule ne bɛdole ɛkɛ bieko (43b-45)
-
Ɛdoavolɛma su kpoleyɛlɛ nwo kpolera (46-48)
-
Mɔɔ ɛndwazo ɛntia yɛ la wɔ yɛ afoa (49, 50)
-
Samɛlea namule bie kpo Gyisɛse (51-56)
-
Kɛzi bɛtoa Gyisɛse la (57-62)
9 Akee ɔvɛlɛle Bulu Nee Nwiɔ ne na ɔmaanle bɛ tumi mɔɔ bɛbava bɛadu sunsum ɛtane+ nee mɔɔ bɛbava bɛayɛ ewule ngakyile ayile la.+
2 Na ɔzoanle bɛ kɛ bɛhɔha Nyamenle Belemgbunlililɛ ne anwo edwɛkɛ na bɛyɛ ayile,
3 na ɔhanle ɔhilele bɛ kɛ: “Bɛmmafa debie biala bɛtu adenle ne, bɛmmafa kpɔma anzɛɛ aleɛ kodoku anzɛɛ paano anzɛɛ ezukoa;* yɛɛ bɛmmafa adɛladeɛ nwiɔ nwiɔ.+
4 Bɛkɔ awuke bie anu wɔ ɛleka biala a, bɛdɛnla ɛkɛ kɔkpula kɛ bɛkɛvi ɛkɛ.+
5 Na ɛleka biala mɔɔ menli anlie bɛ la, saa bɛlɛfi suakpole ne azo bɛahɔ a, bɛkpokpo bɛ gyakɛ abo munlutu bɛmaa ɔyɛ daselɛ ɔtia bɛ.”+
6 Bɛhɔle namunamu ne mɔ azo bɛhɔbɔle edwɛkpa ne nolo na bɛyɛle ayile wɔ ɛleka biala.+
7 Mɔɔ Hɛlɔdo* mɔɔ nea maangyeba ne azo la dele mɔɔ ɛlɛkɔ zo amuala la, ɔgyegyele ye kpole ɔluakɛ ɛnee bie mɔ ɛlɛkeha kɛ bɛdwazo Dwɔn bɛvi mowuamra anu,+
8 noko bie mɔ se Yilaegya ɛra, yɛɛ bie mɔ noko se tete ngapezoma ne mɔ anu ko a ɛdwazo a.+
9 Hɛlɔdo hanle kɛ: “Memaanle bɛpɛle Dwɔn ati.+ Ɛnee nwane a le sonla ɛhye mɔɔ bɛlɛkeha ɔ nwo edwɛkɛ zɛhae la?” Yemɔti ɛnee ɔlɛbɔ mɔdenle kɛ ɔkɛnwu ye.+
10 Mekɛ mɔɔ ɛzoanvolɛma ne ziale rale la, bɛhanle mɔɔ bɛyɛle la amuala bɛhilele Gyisɛse.+ Yemɔti ɔyele bɛ ɔvile menli ne anu na ɔ nee bɛ hɔle sua bie mɔɔ bɛfɛlɛ ye Bɛteseeyeda la azo.+
11 Noko mɔɔ menli ne nwunle ɛhye la, bɛdoale ye. Na ɔliele bɛ kɛnlɛma na ɔbɔle ɔ bo ɔhanle Nyamenle Belemgbunlililɛ ne anwo edwɛkɛ ɔhilele bɛ, na ɔyɛle bɛdabɛ mɔɔ bɛnde kpɔkɛ la ayile.+
12 Ɛnee akee aleɛ ɛlɛdwo. Bulu Nee Nwiɔ ne razele ye kɛ: “Maa menli ne ɛhɔ amaa bɛahola bɛahɔ namunamu nee azua mɔɔ zuozua ɛke la azo bɛahɔkpondɛ dabelɛ nee aleɛ, ɔluakɛ ɛke ɛmbikye sua zo.”+
13 Noko ɔzele bɛ kɛ: “Bɛdabɛ bɛmaa bɛ debie bɛli.”+ Bɛhanle kɛ: “Yɛnlɛ debie biala kɛ paano nnu yɛɛ fɛlɛ nwiɔ ala, kyesɛ bie a yɛkɔtɔ aleɛ yɛmaa menli ɛhye mɔ amuala.”
14 Nɔhalɛ nu, ɛnee bɛle mrenyia kɛyɛ 5,000. Na ɔzele ye ɛdoavolɛma ne kɛ: “Bɛmaa bɛdɛnla ye ekpunli ekpunli mɔɔ ko biala kɛyɛ 50 la.”
15 Na bɛyɛle ye zɔ na bɛmaanle bɛ muala bɛdɛnlanle aze.
16 Akee ɔvale paano nnu ne yɛɛ fɛlɛ nwiɔ ne, ɔnleanle anwuma na ɔyilale zo. Na ɔbubule nu na ɔvale ɔmaanle ɛdoavolɛma ne kɛ bɛva bɛmaa menli ne.
17 Yemɔti bɛ muala bɛlile na bɛ ko yile, na bɛsesale ɔ bo zo mɔɔ hale la ahɛndɛne 12.+
18 Nzinlii mɔɔ ɔ ngome ɔlɛyɛ asɔne la, ɛdoavolɛma ne rale ɔ nwo ɛkɛ, na ɔbizale bɛ kɛ: “Menli ne se mele nwane?”+
19 Bɛbuale ye kɛ: “Dwɔn Sɔnevolɛ ne, noko bie mɔ se Yilaegya, yɛɛ bie mɔ noko se tete ngapezoma ne anu ko a ɛdwazo a.”+
20 Akee ɔbizale bɛ kɛ: “Na bɛdabɛ noko ɛ, bɛse mele nwane?” Pita buale kɛ: “Wɔmɔ a ɛle Kelaese ne mɔɔ Nyamenle ɛzoa ye la.”+
21 Akee ɔbɔle bɛ kɔkɔ ɛsesebɛ kɛ bɛmmaka ɛhye bɛkile awie biala,+
22 noko ɔhanle kɛ: “Ɔwɔ kɛ sonla Ra ne nwu amaneɛ dɔɔnwo na mgbanyima nee ɛsɔfo mgbanyinli nee mɛla kilehilevolɛma ne mɔ kpo ye na bɛku ye+ na ye kenle nsa ne azo badwazo ye.”+
23 Akee ɔdoale zo ɔzele bɛ muala kɛ: “Saa awie kulo kɛ ɔtoa me a, maa ɔkpo ɔ nwo+ na ɔva ye amaneɛnwunlɛ baka* ne alehyenlɛ biala na ɔhɔ zo ɔdoa me.+
24 Ɔluakɛ awie biala mɔɔ kulo kɛ ɔbɔ ye ngoane* nwo bane la ɔbavi ɔ sa, noko awie biala mɔɔ medame ti ye ngoane* kɛvi ɔ sa la, yemɔ yɛɛ ɔ sa baha ye a.+
25 Nɔhalɛ nu, saa sonla nyia ewiade ye amuala na ɔminli ye ngoane anzɛɛ debie biala a, nvasoɛ boni a ɔbanyia a?+
26 Na awie biala mɔɔ medame nee me edwɛkɛ ne anwo kɛyɛ ye nyiane la, ahenle zɔhane anwo bayɛ sonla Ra ne noko nyiane wɔ mekɛ mɔɔ ɔbara ɔdaye nee ɔ Ze yɛɛ anwumabɔvolɛma nwuanzanwuanza ne anyunlunyia nu la.+
27 Noko nɔhalɛ nu meka meahile bɛ kɛ, bɛdabɛ mɔɔ bɛgyigyi ɛke la anu bie mɔ ɛnrɛwu kɔkpula kɛ bɛkɛnwu Nyamenle Belemgbunlililɛ ne la.”+
28 Nɔhalɛ nu, ɔhanle edwɛkɛ ɛhye la kɛyɛ kenle mɔtwɛ anzi, ɔvale Pita, Dwɔn nee Gyemise ɔhɔle boka tendenle bie azo kɛ ɔkayɛ asɔne.+
29 Mɔɔ ɔlɛyɛ asɔne la, ɔ nyunlu hakyile na ye tɛladeɛ ne yɛle fufule nwohyee.
30 Na nea! ɛnee mrenyia nwiɔ nee ye ɛlɛtendɛ; bɛmɛ a le Mosisi nee Yilaegya.
31 Menli ɛhye mɔ rale anyunlunyia nu na bɛbɔle ɔ bo bɛhanle ye ɛhɔlɛ ne mɔɔ ɔnrɛhyɛ ɔbamaa yeara nu wɔ Gyɛlusalɛm la anwo edwɛkɛ.+
32 Ɛnee nafelɛ ɛzi Pita nee ɛdoavolɛma nwiɔ ne anye, na mɔɔ bɛ nye zo tetele bɛ la bɛnwunle ye anyunlunyia ne+ nee mrenyia nwiɔ ne kɛ bɛgyi ɔ nwo ɛkɛ.
33 Mekɛ mɔɔ mrenyia nwiɔ ne ɛlɛkɔ la, Pita zele Gyisɛse kɛ: “Kilehilevolɛ, ɔle kpalɛ kɛ yɛwɔ ɛke a. Yemɔti maa yɛzi ɛdanlɛ azua nsa wɔ ɛke, wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.” Ɛnee ɔnze mɔɔ ɔlɛka la.
34 Mɔɔ ɔ nloa wɔ zo ɔlɛtendɛ la, amungu rahedale bɛ nwo zo na bɛ ahonle dule.
35 Ɛnelɛ bie+ vi amungu ne anu hanle kɛ: “Ɛhye a le me Ra mɔɔ mekpa ye la.+ Bɛdie ye.”+
36 Mɔɔ bɛdele ɛnelɛ ne la, bɛnwunle Gyisɛse angome. Noko bɛyɛle koonwu na bɛanga ninyɛne mɔɔ bɛnwunle ye la anwo edwɛkɛ bɛangile awie biala wɔ mekɛ ne anu.+
37 Aleɛ hyenle mɔɔ bɛvi boka ne azo bɛdwule la, menli dɔɔnwo bie rayiale ye.+
38 Na nea! nrenyia bie deanle nu wɔ menli ne anu kɛ: “Kilehilevolɛ, mesɛlɛ wɔ nea me ra ne maa me, ɔluakɛ ɔle me ra kokye.+
39 Na nea! sunsum bie ba ɔ nwo zo maa ɔteɛdea nu arɛlevilɛ nu, ɔpɛ ye ɔto aze ɔmaa ɔ nloa wu awubue, na ɔboda ye bɔbɔ a ɔyɛ se na yeagyakyi ye.
40 Menzɛlɛle wɔ ɛdoavolɛma ne kɛ bɛdu ye noko bɛangola.”
41 Gyisɛse buale kɛ: “O awolɛndoazo mɔɔ bɛnlɛ diedi na bɛzɛkye a,+ me nee bɛ ɛdɛnla na menyia bɛ nwo abotane ɔhɔdwu kenlenzu? Fa ɛ ra ne bɛla ɛke.”+
42 Noko mɔɔ kakula ne ɛlɛba la, sunsum ɛtane ne pɛle ye dole aze na ɔkpusule ye kpole kpalɛ.* Noko Gyisɛse deanle sunsum ɛtane ne na ɔyɛle kakula ne ayile na ɔvale ye ɔmaanle ye papa.
43 Na Nyamenle tumi kpole ne zinle bɛ muala bɛ nwo.
Mekɛ mɔɔ ninyɛne mɔɔ ɔlɛyɛ la zinle bɛ muala bɛ nwo la, ɔzele ye ɛdoavolɛma ne kɛ:
44 “Bɛdie edwɛkɛ ɛhye kpalɛ na bɛhakye, ɔluakɛ bɛbaye sonla Ra ne bɛawula menli sa nu.”+
45 Noko bɛande mɔɔ ɔlɛka la abo. Nɔhalɛ nu, bɛvale bɛveale bɛ amaa bɛande ɔ bo, yɛɛ ɛnee bɛsulo kɛ bɛkɛbiza ye nwolɛ edwɛkɛ.
46 Akee bɛzule mɔɔ le kpole wɔ bɛ avinli la anwo kpolera.+
47 Gyisɛse nwunle mɔɔ wɔ bɛ ahonle nu la, yemɔti ɔvale kakula ekyi bie ɔziele ɔ nwo ɛkɛ,
48 na ɔzele bɛ kɛ: “Awie biala mɔɔ kɛlie kakula ekyi ɛhye wɔ me duma nu la ɛlie medame noko; na awie biala mɔɔ kɛlie me la ɛlie Ahenle mɔɔ zoanle me la.+ Awie biala mɔɔ kɛbu ɔ nwo kɛ ɔle ekyi wɔ bɛ nu la a le kpole a.”+
49 Dwɔn zele ye kɛ: “Kilehilevolɛ, yɛnwunle awie kɛ ɔlɛfa wɔ duma yeadu sunsum ɛtane, na yɛbɔle mɔdenle kɛ yɛsi ye adenle ɔluakɛ ɔndoa yɛ.”+
50 Gyisɛse zele ye kɛ: “Bɛmmabɔ mɔdenle kɛ bɛsi ye adenle, ɔluakɛ awie biala mɔɔ ɛndwazo ɛntia bɛ la wɔ bɛ afoa.”
51 Mɔɔ mekɛ ne ɛlɛbikye* kɛ bɛbava ye bɛahɔ anwuma la,+ ɔvale ɔziele ɔ nye zo kɛ ɔkɔ Gyɛlusalɛm.
52 Yemɔti ɔzoanle ye ɛdoavolɛma bie mɔ ɔmaanle bɛlimoale ɔ nyunlu. Na bɛhɔle Samɛlea namule bie azo kɛ bɛkaziezie ɛkɛ ne bɛamaa ye.
53 Noko bɛanlie ye+ ɔluakɛ ɛnee yebɔ kpɔkɛ* kɛ ɔkɔ Gyɛlusalɛm.
54 Mɔɔ Gyemise nee Dwɔn+ nwunle ɛhye la, bɛhanle kɛ: “Awulae, ɛkulo kɛ yɛmaa senle fi anwuma bayela bɛ ɔ?”+
55 Noko ɔhakyile ɔ nwo na ɔdeanle bɛ.
56 Yemɔti bɛhɔle namule fofolɛ zo.
57 Mɔɔ bɛlua adenle ne azo bɛlɛkɔ la, awie zele ye kɛ: “Ɛleka biala mɔɔ ɛkɔ la mebadoa wɔ.”
58 Noko Gyisɛse zele ye kɛ: “Ɛzonlɛ lɛ bɛ mbɔne yɛɛ anwomanyunlu nloma lɛ bɛ sane, noko sonla Ra ne ɛnlɛ ɛleka mɔɔ ɔbava ɔ ti yeado a.”+
59 Akee ɔzele awie ko noko kɛ: “Bɛla badoa me.” Nrenyia ne hanle kɛ: “Awulae, maa me adenle maa menlimoa mengɔnzie me papa.”+
60 Noko ɔzele ye kɛ: “Maa mowuamra+ ɛzie bɛ avunli, na wɔmɔ kɔbɔ Nyamenle Belemgbunlililɛ ne nolo.”+
61 Eza ko noko hanle kɛ: “Awulae, mebadoa wɔ, emomu maa me adenle maa menlimoa mengɔngɛla me sua nu amra.”
62 Gyisɛse zele ye kɛ: “Awie biala mɔɔ kɛva ɔ sa kɛzɔ debie mɔɔ bɛfa bɛfundu azɛlɛ na ɔkɛdo ɔ nye ɔ nzi la+ ɛnfɛta Nyamenle Belemgbunlililɛ ne.”+
Ɔbodwɛkɛ
^ Giliki aneɛ nu, “dwɛtɛ fufule.”
^ Ɛhye kile, Hɛlɔdo Antepase. Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “ɛkɛla.”
^ Anzɛɛ “ɛkɛla.”
^ Giliki aneɛ nu, “na ɔmaanle ɔpɛle mgbutike.”
^ Giliki aneɛ nu, “ɔka ekyii mekɛ dwu.”
^ Giliki aneɛ nu, “yeva yezie ɔ nye zo.”
