Luku Edwɛkpa 23:1-56

  • Gyisɛse wɔ Paelɛte nee Hɛlɔdo anyunlu (1-25)

  • Bɛhenda Gyisɛse nee ɛtanevolɛma nwiɔ wɔ mbaka zo (26-43)

    • “Ɛbaboka me nwo wɔ Paladaese” (43)

  • Gyisɛse ewule (44-49)

  • Gyisɛse ɛzielɛ (50-56)

23  Ɔti menli ne amuala dwazole na bɛvale ye bɛhɔmaanle Paelɛte.+  Akee bɛbɔle ɔ bo bɛdole ye ɛzonle+ kɛ: “Yɛhyele nrenyia ɛhye kɛ ɔlɛte atua yeatia yɛ maanle ne kɛ bɛmmatua adwule bɛmaa Siza,+ yɛɛ ɔse ɔdaye mumua ne ɔle belemgbunli Kelaese.”+  Na Paelɛte bizale ye kɛ: “Wɔmɔ a ɛle Dwuuma Belemgbunli ne la ɔ?” Ɔbuale ye kɛ: “Yemɔ a ɛdawɔ mumua ne wɔha la.”+  Akee Paelɛte zele ɛsɔfo mgbanyinli nee menli dɔɔnwo ne kɛ: “Mennwu ɛtane biala wɔ nrenyia ɛhye anwo.”+  Noko bɛhanle ye ɛsesebɛ kɛ: “Mɔɔ ɔkilehile wɔ Dwudiya amuala la fa ngyegyelɛ ba, ɔbɔle ɔ bo bɔbɔ wɔ Galeli yɛɛ yeradwu ɛke a.”  Mɔɔ Paelɛte dele ɛhye la, ɔbizale saa ɔle Galelinli a.  Mɔɔ ɔnwunle kɛ ɔwɔ Hɛlɔdo tumililɛ bo la,+ ɔmaanle bɛvale ye bɛhɔmaanle Hɛlɔdo mɔɔ ɛnee mekɛ ne anu wɔ Gyɛlusalɛm la.  Mɔɔ Hɛlɔdo nwunle Gyisɛse la, ɔ nye liele kpole. Ɔluakɛ ɛnee yeva mekɛ tendenle yehendɛ kɛ ɔbanwu Gyisɛse kɛmɔ yede ɔ nwo edwɛkɛ dɔɔnwo la ati,+ na ɛnee ɔ nye la kɛ ɔbayɛ nwanwane debie yeamaa yeanlea.  Yemɔti ɔbizebizale ye edwɛkɛ dɔɔnwo, noko yeambua ye.+ 10  Noko, ɛsɔfo mgbanyinli nee mɛla kilehilevolɛma ne mɔ hɔle zo gyinlanle na bɛvale ɛya bɛdole ye ɛzonle. 11  Akee Hɛlɔdo nee ye sogyama ne amuala bɔle ye aholoba,+ bɛwulale ye tɛladeɛ kɛnlɛma na bɛgolole ɔ nwo+ na bɛziale bɛvale ye bɛhɔmaanle Paelɛte. 12  Hɛlɔdo nee Paelɛte yɛle agɔnwolɛ kenle ko ne ala, dɛba ne ɛnee bɛ mu nwiɔ bɛnga. 13  Akee Paelɛte vɛlɛle ɛsɔfo mgbanyinli, mgbanyima ne mɔ nee menli ne 14  na ɔzele bɛ kɛ: “Bɛvale nrenyia ɛhye bɛrɛlɛle me kɛ ɔlɛmaa menli ade atua. Noko nea! menleɛnlea ye edwɛkɛ ne anu wɔ bɛ nyunlu ɛke na meannwu debie wɔ nrenyia ɛhye anwo mɔɔ bɛlɛdua zo bɛado ye ɛzonle a.+ 15  Nɔhalɛ nu, Hɛlɔdo noko annwu debie biala wɔ ɔ nwo, ɔluakɛ yezia yeva ye yerɛlɛ yɛ, na nea! ɔtɛyɛle debie biala mɔɔ fɛta ewule a. 16  Yemɔti mebahwe ɔ nzo+ na meagyakyi ye.” 17 * —— 18  Noko menli ne amuala deɛdeanle nu kɛ: “Ku nrenyia ɛhye* na ye Balabase maa yɛ!”+ 19  (Ɛnee bɛdo nrenyia ɛhye efiade ɔlua atuadelɛ mɔɔ zile sua ne azo nee kodiawuyɛlɛ ti.) 20  Paelɛte dendɛle hilele bɛ bieko ɔluakɛ ɛnee ɔkulo kɛ ɔgyakyi Gyisɛse.+ 21  Akee bɛbɔle ɔ bo bɛdeɛdeanle nu kɛ: “Bɔ ye baka nu! Bɔ ye baka nu!”*+ 22  Ɔzele bɛ fane nsa ne azo kɛ: “Kɛmɔti ɛ? Ɛtane boni a nrenyia ɛhye ɛyɛ a? Mennwu debie biala wɔ ɔ nwo mɔɔ fɛta ewule a; yemɔti mebahwe ɔ nzo na meagyakyi ye.” 23  Akee bɛ nye bolole na bɛdeɛdeanle nu kɛ ɔhu ye,* na ɔdiele bɛ.+ 24  Yemɔti Paelɛte buale ndɛne kɛ mɔɔ bɛkulo la. 25  Ɔyele nrenyia ne mɔɔ atuadelɛ nee kodiawuyɛlɛ ti bɛdo ye efiade na bɛse bɛkulo ye la ɔmaanle bɛ, na ɔvale Gyisɛse ɔmaanle bɛ kɛ bɛyɛ ye mɔɔ bɛkulo la. 26  Mɔɔ bɛ nee ye ɛlɛkɔ la, bɛhyele Saemɔn mɔɔ vi Saelini, mɔɔ ɛnee ɔvi namule nu ɔlɛba sua zo la, na bɛvale amaneɛnwunlɛ baka* ne bɛzoale ye kɛ ɔli Gyisɛse anzi.+ 27  Ɛnee menli dɔɔnwo nee mraalɛ mɔɔ ɛlɛfa nyanelilɛ azu abobɔ bɛ kɛnra azo la doa ye. 28  Gyisɛse hakyile ɔ nye wɔ mraalɛ ne mɔ anwo na ɔhanle kɛ: “Gyɛlusalɛm mraalɛ, bɛmmasu me. Emomu, bɛzu bɛ nwo nee bɛ mra;+ 29  ɔluakɛ nea! mekɛ ɛlɛba mɔɔ menli baha kɛ, ‘Anyelielɛ a le mraalɛ mɔɔ le mota, bɛdabɛ mɔɔ bɛanwo mralɛ yɛɛ bɛdabɛ mɔɔ bɛammaa ngakula nyɛfonlɛ la!’+ 30  Akee bɛbabɔ ɔ bo bɛaha bɛahile awoka mgbole kɛ, ‘Bɛragua yɛ nwo zo!’ nee awoka ngyikyi ne mɔ kɛ, ‘Bɛheda yɛ nwo zo!’+ 31  Saa bɛyɛ ninyɛne ɛhye mɔ wɔ mekɛ mɔɔ baka ne le amolɛ la a, ɛnee saa ɔwu a duzu a bazi a?” 32  Ɛnee ɛtanevolɛma nwiɔ noko boka ɔ nwo a bɛ nee bɛ ɛlɛkɔ kɛ bɛkahu bɛ a.+ 33  Na mɔɔ bɛdwule ɛleka bie mɔɔ bɛfɛlɛ ye Etile Kanrɛlɛ la,+ bɛbɔle ye nee ɛtanevolɛma ne baka nu wɔ ɛkɛ, ko wɔ ye fema zo yɛɛ ko wɔ ye bɛne zo.+ 34  Na Gyisɛse hanle kɛ: “Egya, fa kyɛ bɛ ɔluakɛ bɛnze mɔɔ bɛlɛyɛ a.” Eza bɛguale ma* bɛvale bɛhyɛle ye tɛladeɛ ne.+ 35  Na menli ne gyinlanle ɛkɛ nleanle mɔɔ ɛlɛkɔ zo la. Noko mgbanyima ne mɔ golole ɔ nwo hanle kɛ: “Ɔliele awie mɔ; yemɔti saa ɔdaye a ɔle Kelaese ne mɔɔ Nyamenle kpale ye na ɔzoanle ye la a, maa ɔlie ɔ nwo.”+ 36  Sogyama ne bɔbɔ golole ɔ nwo, bɛrale ɔ nwo ɛkɛ na bɛmaanle ye nza mɔɔ nyinyia la+ 37  na bɛhanle kɛ: “Saa wɔmɔ a ɛle Dwuuma Belemgbunli ne a, ɛnee die ɛ nwo.” 38  Bɛhɛlɛle debie bɛbɔle ɔ ti zo anwuma kɛ: “Ɛhye a le Dwuuma Belemgbunli ne a.”+ 39  Akee ɛtanevolɛma ne mɔɔ bɛhenda ɛkɛ ne la ko bɔle ɔ bo dendɛle tiale ye+ kɛ: “Se wɔmɔ a ɛle Kelaese ne a, ɔnle zɔ ɔ? Die ɛ nwo na die yɛdayɛ noko ɛ!” 40  Na ko ne hwile ɔ nyunlu kɛ: “Ɛnzulo Nyamenle fee ɔ, kɛkala mɔɔ bɛbua wɔ ndɛne ko ne ala la? 41  Yɛmɛ yɛ ɛdeɛ ne fɛta yɛ, ɔluakɛ ninyɛne mɔɔ yɛyɛle la a bɛlɛtua yɛ nwolɛ kakɛ a; noko nrenyia ɛhye ɛtɛyɛle ɛtane biala.” 42  Akee ɔhanle kɛ: “Gyisɛse, ɛba wɔ Belemgbunlililɛ ne anu a kakye me.”+ 43  Na ɔzele ye kɛ: “Nɔhalɛ nu meka meahile wɔ ɛnɛ kɛ, ɛbaboka me nwo wɔ Paladaese.”+ 44  Ɛnee ɔle kɛyɛ ewiazo bulu nee nwiɔ,* noko awozinli hedale azɛlɛ ne kɔsɔɔti azo too dɔne nsa,*+ 45  ɔluakɛ ewia ambɔ; akee ɛzonlenlɛsua ne anu mgbɛnudanlɛ ne+ anu dele sinli nwiɔ wɔ ye avinli.+ 46  Na Gyisɛse vale ɛnelɛ kpole deanle nu hanle kɛ: “Egya, me ngoane* wɔ ɛ sa nu.”+ Ɔhanle ɛhye la, ɔwule.*+ 47  Kɛmɔ sogya kpanyinli ne nwunle mɔɔ ɛzi la ati, ɔbɔle ɔ bo ɔwulale Nyamenle anyunlunyia na ɔhanle kɛ: “Amgba, nrenyia ɛhye le tenlenenli.”+ 48  Mekɛ mɔɔ menli dɔɔnwo ne mɔɔ rayiale ɛkɛ ne kɛ bɛnea mɔɔ ɛlɛkɔ zo nwunle ninyɛne ɛhye mɔ mɔɔ ɛzi la, bɛvale nyanelilɛ bɛbobɔle bɛ kɛnra azo na bɛhɔle sua nu. 49  Menli mɔɔ ze ye la amuala gyinlanle moamoa. Ɛnee eza mraalɛ mɔɔ bɛ nee ye vi Galeli rale la wɔ ɛkɛ na bɛnwunle ninyɛne ɛhye mɔ.+ 50  Na nea! ɛnee nrenyia bie mɔɔ bɛfɛlɛ ye Dwosefi, mɔɔ le Ayiama ne anu sonla la wɔ ɛkɛ, ɔle sonlakpalɛ yɛɛ ɔle tenlenenli.+ 51  (Nrenyia ɛhye anlie bɛ kpɔkɛbɔlɛ ne nee mɔɔ bɛyɛle la ando nu.) Ɔvi Dwudama suakpole Arelematia azo na ɛnee ɔlɛkendɛ Nyamenle Belemgbunlililɛ ne. 52  Nrenyia ɛhye hɔle Paelɛte ɛkɛ hɔzɛlɛle Gyisɛse funli ne. 53  Ɔyele ye ɔdole ɛkɛ+ na ɔvale lenen kpalɛ ɔkyekyele ye na ɔdole ye wɔ nla* mɔɔ bɛpɛ ye wɔ bolɛ nu,+ na bɛtɛsiele awie biala wɔ nu ɛlɛ la anu. 54  Ɛnee ɔle Anwoziezielɛ kenle,+ na ɔka ekyii na Ɛnwomenlelielɛ+ ne abɔ ɔ bo. 55  Na mraalɛ mɔɔ nee ye vi Galeli rale la doale bɛ hɔnleanle nla* ne nee kɛzi bɛziele ye la,+ 56  na bɛziale bɛhɔzieziele ayile ngakyile nee nwole evuanlɛ. Noko bɛliele bɛ menle wɔ Ɛnwomenlelielɛ kenle ne+ kɛ mɔɔ mɛla ne kile la.

Ɔbodwɛkɛ

Giliki aneɛ nu, “Fa ɛhye kɔ.”
Anzɛɛ “Ku ye wɔ baka zo! Ku ye wɔ baka zo!”
Anzɛɛ “ɔhu ye wɔ baka zo.”
Giliki aneɛ nu, kɛyɛ dɔnehwele nsia ne azo.
Giliki aneɛ nu, kɛyɛ dɔnehwele ngɔnla ne azo.
Anzɛɛ “sunsum.”
Anzɛɛ “ɔgule ye ɛnwomenle mɔɔ li awieleɛ.”
Anzɛɛ “ngakyelɛ nla.”
Anzɛɛ “ngakyelɛ nla.”