Luku Edwɛkpa 20:1-47
20 Kenle ko bie mɔɔ ɛnee ɔlɛkilehile menli ne wɔ ɛzonlenlɛsua ne anu na ɔlɛbɔ edwɛkpa ne nolo la, ɛsɔfo mgbanyinli nee mɛla kilehilevolɛma nee mgbanyima ne mɔ rale ɛkɛ
2 na bɛbizale ye kɛ: “Ka kile yɛ, tumi boni a ɛfa ɛyɛ ninyɛne ɛhye mɔ a? Anzɛɛ nwane a maanle wɔ tumi ɛhye a?”+
3 Ɔbuale bɛ kɛ: “Medame noko mebiza bɛ edwɛkɛ ko, na bɛbua me:
4 Tumi ne mɔɔ Dwɔn vale zɔnenle la, ɔvi anwuma anzɛɛ ɔvi menli?”
5 Na bɛzuzule nwo kɛ: “Saa yɛka kɛ, ‘Ɔvi anwuma’ a, ɔbaha kɛ, ‘Ɛnee duzu ati a bɛanlie ye bɛanli ɛ?’
6 Noko saa yɛka kɛ, ‘Ɔvi menli’ a, menli ne amuala bazi yɛ awolɛ, ɔluakɛ bɛdie bɛdi kɛ Dwɔn le ngapezonli.”+
7 Yemɔti bɛbuale kɛ bɛnze ɛleka mɔɔ ɔvi a.
8 Gyisɛse zele bɛ kɛ: “Ɛnee medame noko menrɛha tumi ne mɔɔ mefa meyɛ ninyɛne ɛhye mɔ la menrɛhile bɛ.”
9 Akee ɔyɛle ndonwo ɛhye ɔhilele menli ne kɛ: “Nrenyia bie yɛle vanye egyinli+ na ɔvale ɔwulale ɛyazonlɛma asa anu na ɔdule adenle mekɛ tendenle.+
10 Mɔɔ ma ɛdelɛ mekɛ ne dwule la, ɔzoanle ye akɛlɛ bie kɛ ɔhɔ ɛyazonlɛma ne ɛkɛ amaa bɛava vanye egyinli ne anu ma ne bie bɛamaa ye. Noko ɛyazonlɛma ne bole ye, na bɛmaanle ɔvale ɔ sa mgbane ɔhɔle.+
11 Eza ɔzoanle akɛlɛ bieko. Ɔdaye noko bɛbole ye, bɛguale ɔ nyunlu aze na bɛmaanle ɔvale ɔ sa mgbane ɔhɔle.
12 Eza ɔzoanle mɔɔ tɔ zo nsa la; ɔdaye noko bɛbodale ye na bɛvuandinle ye bɛdole alienwo.
13 Akee vanye egyinli menle ne hanle kɛ, ‘Duzu a menyɛ a? Mebazoa me ra nrenyia mɔɔ mekulo ye la.+ Bie a bɛbabu ye.’
14 Mɔɔ ɛyazonlɛma ne nwunle ye la, bɛhanle bɛhilele bɛ nwo ngoko kɛ, ‘Koliagya ne ɛne. Bɛmaa yɛhu ye na agyapadeɛ ne ɛyɛ yɛ ɛdeɛ.’
15 Yemɔti bɛhwenle ye bɛhɔle vanye egyinli ne anzi lɔ na bɛhunle ye.+ Duzu a vanye egyinli menle ne bava ayɛ bɛ a?
16 Ɔbarahu ɛyazonlɛma ɛhye mɔ na yeava vanye egyinli ne yeamaa menli fofolɛ.”
Mɔɔ bɛdele ɛhye la, bɛhanle kɛ: “Ɔnrɛra ye zɔ ɛlɛ!”
17 Noko ɔnleanle bɛ koonwu na ɔhanle kɛ: “Ɛnee duzu a ɛhye mɔɔ bɛhɛlɛ la kile a: ‘Bolɛ ne mɔɔ suasivoma ne kpole la, ɛrayɛ mgbɛnezo bolɛ mɔɔ anwo hyia kpalɛ a’?+
18 Awie biala mɔɔ badɔ bolɛ zɔhane azo la batete.+ Yɛɛ awie biala mɔɔ bolɛ ne badɔ ɔ nwo zo la, ɔbadi ye.”
19 Akee mɛla kilehilevolɛma nee ɛsɔfo mgbanyinli ne mɔ bɔle mɔdenle kɛ bɛkye ye ɛkɛ ne ala, ɔluakɛ bɛnwunle kɛ bɛdabɛ ti a ɔyɛle ndonwo ne a, noko bɛzulole menli ne.+
20 Bɛnleanle ye koonwu na bɛbɔle awie mɔ ɛkpa wɔ ahane kɛ bɛyɛ bɛ nwo kɛ bɛle tenlenema la amaa bɛalua ye ɛdendɛlɛ zo bɛahye ye+ bɛava ye bɛahɔmaa arane ne nee amɛnlado ne.
21 Yemɔti bɛbizale ye kɛ: “Kilehilevolɛ, yɛze kɛ mɔɔ ɛka nee mɔɔ ɛkilehile la le nɔhalɛ na ɛnnea sonla nyunlu, na ɛkilehile Nyamenle adenle ne wɔ nɔhalɛ nu:
22 Asoo mɛla maa adenle kɛ yɛdua* adwule yɛmaa Siza anzɛɛ ɔmmaa adenle?”
23 Noko ɔnwunle bɛ mɛlɛbɛla ne na ɔzele bɛ kɛ:
24 “Bɛva denale* ne bie bɛrɛla bɛmaa menea. Nwane nvoninli nee ye ngɛlɛlera a wɔ zo la?” Bɛhanle kɛ: “Siza ɔ.”
25 Ɔzele bɛ kɛ: “Ɛnee bɛva Siza ɛdeɛ bɛmaa Siza,+ na bɛva Nyamenle ɛdeɛ bɛmaa Nyamenle.”+
26 Bɛangola bɛanlua ye ɛdendɛlɛ zo bɛangye ye, emomu ye mualɛ ne yɛle bɛ azibɛnwo na bɛandendɛ bieko.
27 Noko, Sadusiima mɔɔ bɛka kɛ ewudwazo ɛnle ɛkɛ+ ne la bie mɔ rale ɛkɛ na bɛbizale ye kɛ:+
28 “Kilehilevolɛ, Mosisi hɛlɛle maanle yɛ kɛ: ‘Saa nrenyia bie adiema wu gyakyi ɔ ye na ɔ nee ye anwo a, ɔwɔ kɛ ɔ diema nrenyia gya ɔ ye ne na ɔ nee ye wo mralɛ maa ɔ diema ne.’+
29 Ɛnee mediema mrenyia nsuu bie wɔ ɛkɛ. Mɔɔ limoa la gyale raalɛ na ɔ nee ye anwo yɛɛ ɔwule a.
30 Ɔti mɔɔ tɔ zo nwiɔ
31 nee mɔɔ tɔ zo nsa la noko gyale ye. Zɔhane ala a menli nsuu ne amuala yɛle a; bɛ nee ye anwo yɛɛ bɛwule a.
32 Nzinlii raalɛ ne noko wule.
33 Yemɔti ewudwazo ne anu, boni a raalɛ ne bayɛ ɔ ye a? Ɔluakɛ menli nsuu ne amuala gyale ye bie.”
34 Gyisɛse buale bɛ kɛ: “Ewiade ɛhye* anu amra gya yɛɛ bɛfa bɛ bɛmaa agyalɛ,
35 noko bɛdabɛ mɔɔ bɛbu bɛ kɛ bɛfɛta kɛ bɛnyia ewiade zɔhane na bɛbadwazo bɛ bɛavi mowuamra anu la, bɛnrɛgya anzɛɛ bɛnrɛva bɛ bɛnrɛmaa agyalɛ.+
36 Nɔhalɛ nu, bɛnrɛwu bieko, ɔluakɛ bɛbayɛ kɛ anwumabɔvolɛma la, na kɛmɔ bɛbadwazo bɛ bɛavi ewule nu la ati, bɛbayɛ Nyamenle amra.
37 Na mɔɔ fale mowuamra ɛdwazolɛ ne anwo la, Mosisi bɔbɔ maanle ɔlale ali wɔ kpɔkɛ ne anwo edwɛkɛ ne anu, wɔ mekɛ mɔɔ ɔvɛlɛle Gyihova* kɛ ‘Ebileham Nyamenle nee Ayezeke Nyamenle nee Gyekɔbo Nyamenle la.’+
38 Ɔnle mowuamra Nyamenle, emomu teasema Nyamenle, ɔluakɛ ɔ nye zo a bɛ muala bɛde aze.”+
39 Mɛla kilehilevolɛma ne bie mɔ buale ye kɛ: “Kilehilevolɛ, wɔdendɛ kɛnlɛma.”
40 Na bɛannyia akɛnrasesebɛ bɛambiza ye kpuya bieko.
41 Akee ɔbizale bɛ kɛ: “Kɛmɔti a bɛse Kelaese ne le Devidi ara ɛ?+
42 Ɔluakɛ Devidi mumua ne hanle ye wɔ Edwɛne buluku ne anu kɛ, ‘Gyihova* zele me Awulae kɛ: “Tɛnla me sa fema zo
43 kɔkpula kɛ mekɛva wɔ kpɔvolɛma mekɛyɛ ɛ gyakɛ abo ebia.”’+
44 Yemɔti saa Devidi vɛlɛle ye Awulae a, ɛnee kɛzi ɔyɛ ɔ ra ɛ?”
45 Akee mɔɔ menli ne amuala ɛlɛtie ye la, ɔzele ye ɛdoavolɛma ne kɛ:
46 “Bɛnlea boɛ wɔ mɛla kilehilevolɛma mɔɔ bɛkulo kɛ bɛwula adɛladeɛ ndendenle bɛkpɔsa na bɛkulo gua zo ahyebizalɛ nee nyianu azua nu mbia mɔɔ wɔ ɔ nyunlu* nee ɛleka mɔɔ menli titili tɛnla wɔ nɔsolɛ ɛkponledolɛ bo,+
47 na bɛbɔ ahunlanvolɛ awuke* na bɛkpati bɛyɛ asɔne ndendenle la anwo. Ɛhye mɔ banyia ndɛnebualɛ mɔɔ anu yɛ se kpalɛ la.”
Ɔbodwɛkɛ
^ Anzɛɛ “Asoo ɔle kpalɛ kɛ yɛtua.”
^ Anzɛɛ “Mekɛ ɛhye.” Nea Edwɛkɛbohilelɛ.
^ Anzɛɛ “mbia kpalɛ.”
^ Anzɛɛ “bɛsɛkye bɛ agyapadeɛ.”
