Luku Edwɛkpa 18:1-43
18 Akee ɔdoale zo ɔmaanle bɛ ndonwo bie mɔɔ fale kɛzi ɔhyia kɛ bɛyɛ asɔne dahuu na ɔnle kɛ bɛgyakyi la anwo+
2 kɛ: “Ɛnee ndɛnebuavolɛ bie mɔɔ ɔnzulo Nyamenle yɛɛ ɔmbu awie biala la wɔ suakpole bie azo.
3 Ɛnee kunlavolɛ bie noko wɔ suakpole ne azo. Ɛnee ɔta ɔkɔ ye ɛkɛ ɔkɔka kɛ, ‘Me nee awie lɛ edwɛkɛ na nea di me edwɛkɛ ne maa me.’
4 Mekɛ dɔɔnwo anu, ɛnee ɔngulo kɛ ɔkɛboa raalɛ ne, noko nzinlii ɔhanle ye ɔ ti anu kɛ, ‘Menzulo Nyamenle yɛɛ membu sonla bɔbɔ ɛdeɛ,
5 noko kɛmɔ kunlavolɛ ɛhye ɛlɛgyegye me la ati, mebanlea meali ye edwɛkɛ ne meamaa ye na yeanva yeangyegye me bieko.’”*+
6 Akee Awulae hanle kɛ: “Ndɛnebuavolɛ ne le ɛtanevolɛ ɛdeɛ, noko bɛdie mɔɔ ɔhanle a!
7 Nɔhalɛ nu, asoo Nyamenle ɛnrɛli pɛlepɛle ɛnrɛmaa bɛdabɛ mɔɔ yekpa bɛ mɔɔ bɛsu bɛfɛlɛ ye alehyenlɛ nee aledwolɛ+ la wɔ mekɛ mɔɔ ɔlɛ bɛ nwo abotane la ɔ?+
8 Meka meahile bɛ kɛ, ɔbali bɛ edwɛkɛ yeamaa bɛ ndɛndɛ. Noko saa sonla Ra ne ba a, asoo ɔbanwu diedi zɛhae* wɔ azɛlɛ ye azo?”
9 Eza ɔyɛle ndonwo ɛhye ɔhilele bɛdabɛ mɔɔ bɛdie bɛ nwo bɛdi kɛ bɛle tenlenema na bɛmbu awie mɔ la:
10 “Menli nwiɔ hɔle ɛzonlenlɛsua ne anu kɛ bɛkayɛ asɔne, ɛnee ko le Falasiinli yɛɛ ko ne noko le adwuledievolɛ.
11 Falasiinli ne dwazole gyinlanle na ɔyɛle asɔne wɔ ɔ ti anu kɛ, ‘O Nyamenle, meda wɔ ase kɛ menle kɛ menli mɔɔ ɛha—nzisima, ɛtanevolɛma, agyalɛzɛkyelɛma—anzɛɛ kɛ adwuledievolɛ ɛhye bɔbɔ la.
12 Dapɛne biala mekye ɛhɔne fane nwiɔ; mekyɛ ninyɛne mɔɔ menyia ye la kɔsɔɔti anu bulu mefa ko memaa.’+
13 Noko adwuledievolɛ ne gyinlanle moamoa, yeangulo bɔbɔ kɛ ɔkɛmaa ɔ ti zo ɔkɛnlea anwuma, emomu ɔvale ɔ sa ɔbobɔle ɔ kɛnra azo na ɔhanle kɛ, ‘O Nyamenle, nwu me anwunvɔne, mele ɛtanevolɛ.’+
14 Meka meahile bɛ, nrenyia ɛhye hɔle ye sua nu na bɛbule ye tenlenenli bɛdɛlale Falasiinli ne.+ Ɔluakɛ awie biala mɔɔ kɛmemaa ɔ nwo zo la, bɛkɛha ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo.”+
15 Akee menli vale bɛ mra ngakula rɛlɛle ye kɛ ɔva ɔ sa ɔgua bɛ nwo zo, noko mɔɔ ɛdoavolɛma ne nwunle ɛhye la, bɛdeanle bɛ.+
16 Noko Gyisɛse vɛlɛle ngakula ne mɔ ɔ nwo ɛkɛ na ɔhanle kɛ: “Bɛmaa ngakula ne mɔ ɛrɛla me nwo, bɛmmasi bɛ adenle, ɔluakɛ Nyamenle Belemgbunlililɛ ne le bɛdabɛ mɔɔ bɛle kɛ ɛhye mɔ zɛhae la ɛdeɛ.+
17 Nɔhalɛ nu meka meahile bɛ kɛ, awie biala mɔɔ ɛnlie Nyamenle Belemgbunlililɛ ne kɛ kakula ekyi la ɛnrɛhɔ nu ɛlɛ.”+
18 Na mgbanyima ne mɔ ko bizale ye kɛ: “Kilehilevolɛ Kpalɛ, duzu a ɔwɔ kɛ meyɛ na meanyia dahuu ngoane a?”+
19 Gyisɛse zele ye kɛ: “Duzu ati a ɛfɛlɛ me kpalɛ ɛ? Awie biala ɛnle kpalɛ kɛ Nyamenle angomekye.+
20 Ɛze mɛla ne mɔ: ‘Mmasɛkye agyalɛ,+ mmayɛ kodiawu,+ mmawua,+ mmadi daselɛ adalɛ,+ di wɔ papa nee wɔ mame eni.’”+
21 Na ɔhanle kɛ: “Meli ɛhye mɔ amuala azo sumunli me ngakula nu.”
22 Mɔɔ Gyisɛse dele ɛhye la, ɔzele ye kɛ: “Yeha wɔ debie ko: Tɔne ninyɛne mɔɔ ɛlɛ la na fa ezukoa ne maa ehyiavolɛma, na ɛbanyia anwonyia wɔ anwuma; na bɛla badoa me.”+
23 Mɔɔ ɔdele ɛhye la, alɔbɔlɛ hunle ye kpalɛ, ɔluakɛ ɛnee ɔle sukoavolɛ kpole.+
24 Gyisɛse nleanle ye na ɔhanle kɛ: “Nea kɛzi ɔbayɛ se yeamaa bɛdabɛ mɔɔ bɛlɛ ezukoa la kɛ bɛbahɔ Nyamenle Belemgbunlililɛ ne anu a!+
25 Nɔhalɛ nu, ɔla aze ɔmaa afunlumu kɛ ɔkɛwolo agbuyia mɔɔ bɛfa bɛkpomgba ninyɛne la nye* nu tɛla kɛ sukoavolɛ kɛhɔ Nyamenle Belemgbunlililɛ ne anu.”+
26 Bɛdabɛ mɔɔ bɛdele ɛhye la hanle kɛ: “Ɛnee akee nwane a kɛnyia ngoane a?”+
27 Ɔhanle kɛ: “Mɔɔ sonla ɛngola ye yɛ la, Nyamenle ɛdeɛ ɔkola ɔyɛ.”+
28 Noko Pita zele kɛ: “Nea! Yɛgyakyi yɛ debie biala yɛɛ yɛdoa wɔ a.”+
29 Ɔzele bɛ kɛ: “Nɔhalɛ nu meka meahile bɛ kɛ, awie biala ɛnle ɛkɛ mɔɔ yegyakyi sua anzɛɛ yelɛ anzɛɛ mediema mrenyia anzɛɛ awovolɛ anzɛɛ mralɛ ɔlua Nyamenle Belemgbunlililɛ ne ati+
30 mɔɔ ɔnrɛnyia ye mɔnwo dɔɔnwo wɔ mekɛ ɛhye anu nee dahuu ngoane wɔ mekɛ ne* mɔɔ ɛlɛba la anu a.”+
31 Akee ɔvale Bulu Nee Nwiɔ ne ɔhɔle ahane na ɔzele bɛ kɛ: “Nea! Yɛlɛkɔ Gyɛlusalɛm, na debie biala mɔɔ bɛluale ngapezoma ne anwo azo bɛhɛlɛle ye wɔ sonla Ra ne anwo la bara nu.*+
32 Kɛ neazo la, bɛbava ye bɛawula maanle maanle ne anu amra asa anu,+ bɛbagolo ɔ nwo,+ bɛbabɔ ye aholoba na bɛatoto nyɛlɛ wɔ ɔ nwo.+
33 Bɛbila ye empele bɛwie a, bɛbahu ye,+ noko ye kenle nsa ne azo ɔbadwazo.”+
34 Noko, bɛannwu mɔɔ ninyɛne ɛhye mɔ biala kile la, ɔluakɛ bɛvale bɛveale bɛ, yɛɛ bɛande mɔɔ ɔhanle la abo.
35 Mɔɔ Gyisɛse ɛlɛbikye Gyɛleko la, ɛnee nrenyia anyenzinliravolɛ bie de adenle ne anloa ɛlɛsɛlɛzɛlɛ debie.+
36 Kɛmɔ ɔdele kɛ menli dɔɔnwo ɛlɛpɛ nu la ati, ɔbizale mɔɔ ɛlɛkɔ zo la.
37 Bɛbuale ye kɛ: “Gyisɛse mɔɔ vi Nazalɛte la a ɛlɛse a!”
38 Yemɔti ɔdeanle nu kɛ: “Gyisɛse, Devidi Ara, nwu me anwunvɔne!”
39 Na menli mɔɔ li bɛ nyunlu la bɔle ɔ bo deanle ye na bɛzele ye kɛ ɔyɛ koonwu, noko ɔhɔle zo ɔdeɛdeanle nu kpole kɛ: “Devidi Ara, nwu me anwunvɔne!”
40 Yemɔti Gyisɛse gyinlanle na ɔhanle kɛ bɛva nrenyia ne bɛrɛlɛ ye. Mɔɔ ɔbikyele Gyisɛse anwo ɛkɛ ne la, ɔbizale ye kɛ:
41 “Duzu a ɛkulo kɛ meyɛ memaa wɔ a?” Ɔbuale ye kɛ: “Awulae, maa menwu debie.”
42 Yemɔti Gyisɛse zele ye kɛ: “Nwu debie; wɔ diedi ɛmaa wɔde kpɔkɛ.”+
43 Na ɛkɛ ne ala ɔnwunle debie na ɔbɔle ɔ bo ɔdoale ye,+ na ɔwulale Nyamenle anyunlunyia. Na mɔɔ menli dɔɔnwo ne nwunle ye la, bɛdabɛ noko bɛyele Nyamenle ayɛlɛ.+
Ɔbodwɛkɛ
^ Anzɛɛ “yeammaa me nwo angyele me.”
^ Anzɛɛ “diedi ɛhye bie.” Giliki aneɛ nu, “diedi ne.”
^ Anzɛɛ “tokule.”
^ Nea Edwɛkɛbohilelɛ.
^ Anzɛɛ “bali munli.”
