Luku Edwɛkpa 16:1-31
16 Akee ɔzele ye ɛdoavolɛma ne kɛ: “Ɛnee sukoavolɛ bie wɔ ɛkɛ, na bɛbɔle ye sonvolɛ* bie somolɛ bɛhilele ye kɛ ɔlɛsɛkye ye ninyɛne.
2 Yemɔti ɔvɛlɛle ye na ɔhanle kɛ, ‘Duzu edwɛkɛ a metete ye ɛ nwo la? Fa wɔ sonvolɛ gyima ne anwo mgbondabulɛ ngɛlata ne bɛla, ɔluakɛ ɛnrɛhola ɛnrɛnlea me awuke ye azo bieko.’
3 Akee sonvolɛ ne hanle hilele ɔ nwo kɛ, ‘Duzu a menyɛ a, me menle ɛlɛdie me gyima avi me sa nu? Menlɛ anwosesebɛ mɔɔ mebava meadu kuma a, yɛɛ ninyɛne asɛlɛ noko yɛ me nyiane.
4 Aa! Menwu mɔɔ mebayɛ a, amaa saa bɛye me gyima nu a awie mɔ alie me wɔ bɛ azua nu.’
5 Na ɔvɛlɛle bɛdabɛ mɔɔ bɛtua ɔ menle kakɛ la ngoko na ɔzele mɔɔ limoa la kɛ, ‘Ɛtua me menle ɛzɛ?’
6 Ɔbuale ye kɛ, ‘Ɔlivi nwole ɛzuzudeɛ* 100.’ Ɔzele ye kɛ, ‘Die wɔ mgbondabulɛ kɛlata ne na tɛnla aze kɛlɛ 50 ndɛndɛ ne ala.’
7 Ɔzele bieko noko kɛ, ‘Wɔmɔ ɛtua ɛzɛ?’ Ɔhanle kɛ, ‘Hwiiti ɛzuzudeɛ mgbole 100.’* Ɔzele ye kɛ, ‘Die wɔ mgbondabulɛ kɛlata ne na kɛlɛ 80.’
8 Mɔɔ ɔyɛle la ɛnle kpalɛ ɛdeɛ noko ɔ menle hanvole akɛlɛ ne, ɔluakɛ ɔvale ye adwenle ɔlile gyima;* ewiade ɛhye* anu menli ze kɛzi bɛfa bɛ adwenle bɛdi gyima la wɔ bɛ awolɛndoazo ɛhye anu bɛtɛla menli mɔɔ wɔ wienyi ne+ anu la.
9 “Eza meka meahile bɛ kɛ: Bɛlua anwonyia mɔɔ ɛndenrɛ la azo bɛva agɔnwolɛ,+ amaa mekɛ mɔɔ ɛhye mɔ kɛminli la bɛalie bɛ bɛahɔ ɛleka mɔɔ bɛbadɛnla ye dahuu la.+
10 Awie mɔɔ di nɔhalɛ wɔ debie ekyi nu la, di nɔhalɛ wɔ ninyɛne dɔɔnwo noko anu, yɛɛ awie mɔɔ ɛnli nɔhalɛ wɔ debie ekyi nu la ɛnli nɔhalɛ wɔ ninyɛne dɔɔnwo noko anu.
11 Yemɔti saa bɛanla bɛ nwo ali kɛ bɛdi nɔhalɛ wɔ anwonyia mɔɔ ɛndɛnrɛ la anu a, nwane a bava mɔɔ le nɔhalɛ la awula bɛ sa nu a?
12 Na saa bɛanla bɛ nwo ali kɛ bɛdi nɔhalɛ wɔ ninyɛne mɔɔ le awie ɛdeɛ la anu a, nwane a bava debie amaa bɛ a?+
13 Sonvolɛ biala ɛnrɛhola ɛnrɛzonle menlenlɛ nwiɔ, ɔluakɛ ɔbahulo ko na yeakpɔ ko, anzɛɛ ɔbali ko eni yeagyakyi ko. Bɛnrɛhola bɛnrɛzonle Nyamenle nee Anwonyia.”+
14 Ɛnee Falasiima mɔɔ bɛkulo ezukoa la ɛlɛtie ɛhye mɔ amuala na bɛbɔle ɔ bo bɛgolole ɔ nwo.+
15 Yemɔti ɔzele bɛ kɛ: “Bɛmɛ bɛyɛ bɛ nwo tenlenema wɔ menli nyunlu,+ noko Nyamenle ze bɛ ahonle nu.+ Ɔluakɛ debie mɔɔ anwo hyia menli la le kyibadeɛ wɔ Nyamenle anyunlu.+
16 “Bɛbɔle Mɛla ne nee Ngapezoma ne nolo bɛradwule Dwɔn mekɛ zo. Ɔvi mekɛ zɔhane, bɛlɛbɔ Nyamenle Belemgbunlililɛ ne nolo kɛ edwɛkpa, na menli ngakyile kɔsɔɔti ɛlɛpele adwu nwo.+
17 Nɔhalɛ nu, ɔnyɛ se kɛ anwuma nee aze* bapɛ nu aze, noko Mɛla ne anu ngɛlɛlerakpɔkɛ foa bie ɛnnrɛvi nu mɔɔ ɔnrɛra nu a.+
18 “Awie biala mɔɔ kɛbɔ ɔ ye ewole na ɔkɛgya fofolɛ la ɛzɛkye agyalɛ, yɛɛ awie biala mɔɔ kɛgya raalɛ mɔɔ ɔ hu ɛbɔ ye ewole la ɛzɛkye agyalɛ.+
19 “Ɛnee nrenyia bie le sukoavolɛ, na ɔta ɔwula tɛladeɛ kɔkɔlɛ nee buluwu afonla nee lenen, na ɔfa ninyɛne ngɛnlɛma ɔdie ɔ nye alehyenlɛ biala.
20 Noko ɛnee bɛfa nrenyia bie mɔɔ sɛlɛzɛlɛ debie mɔɔ bɛfɛlɛ ye Lazalɛse na nganlɛ ɛdudu ɔ nwo amuala la bɛbatɛnla ye anlenkɛ ne anloa,
21 ɛnee ɔkulo kɛ ɔnyia mgbokpoloka ne mɔɔ vi sukoavolɛ ne ɛkponle ne azo gua aze la bie ɔdi. Ɛnee ahwea bɔbɔ batafe ye nganlɛ ne mɔ anu.
22 Mekɛ bie anzi, nrenyia ne mɔɔ sɛlɛzɛlɛ debie la wule na anwumabɔvolɛma ravale ye hɔle Ebileham anwo lɔ.*
“Sukoavolɛ ne noko wule na bɛziele ye.
23 Na mɔɔ ɔwɔ Nla* ne anu ɔlɛnwu amaneɛ la, ɔkpogyale ɔ nye zo, na ɔnwunle Ebileham wɔ moamoa kɛ Lazalɛse wɔ ɔ nwo ɛkɛ.*
24 Yemɔti ɔdeanle nu ɔhanle kɛ, ‘Egya Ebileham, nwu me anwunvɔne na soa Lazalɛse maa ɔva ɔ sa ɛrɛlɛsɛka ɔbɔ nzule nu ɔrape me tafinlima azo, ɔluakɛ melɛnwu amaneɛ wɔ sendɔlɔra ɛhye anu.’
25 Noko Ebileham hanle kɛ, ‘Me ra, kakye kɛ mɔɔ ɛde aze la ɛnyianle ninyɛne mgbalɛ mɔɔ ɛhyia nwolɛ la, noko Lazalɛse ɛdeɛ ninyɛne ɛtane ngome a ɔnyianle a. Na kɛkala bɛlɛkyekye ɔ rɛle yɛɛ wɔmɔ ɛlɛnwu amaneɛ a.
26 Ɛhye mɔ kɔsɔɔti anzi, bɛva kuma kpole bɛdo yɛ nee bɛ avinli, yemɔti bɛdabɛ mɔɔ bɛkulo kɛ bɛfi ɛke bɛba bɛ nehane la ɛnrɛhola ba yɛɛ bɛdabɛ mɔɔ bɛkulo kɛ bɛfi bɛ nehane bɛba ɛke la ɛnrɛhola.’
27 Akee ɔhanle kɛ, ‘Saa zɔhane ɛdeɛ a, egya, mesɛlɛ wɔ, soa ye maa ɔhɔ me papa sua nu,
28 ɔluakɛ melɛ mediema mrenyia nnu wɔ ɛkɛ, amaa yeali bɛ daselɛ kpalɛ na bɛdabɛ noko bɛamba amaneɛnwunlɛ ɛleka ɛhye.’
29 Noko Ebileham hanle kɛ, ‘Bɛlɛ Mosisi nee Ngapezoma ne wɔ nehane, maa bɛdie bɛ.’+
30 Na ɔhanle kɛ, ‘Kyɛkyɛ, egya Ebileham, emomu, saa awie vi mowuamra anu kɔ bɛ ɛkɛ a yɛɛ bɛbanlu bɛ nwo a.’
31 Noko ɔzele ye kɛ, ‘Saa bɛandie Mosisi+ nee Ngapezoma ne a, awie vi mowuamra anu dwazo kɔ bɔbɔ a bɛnrɛdie ye.’”
Ɔbodwɛkɛ
^ Anzɛɛ “awuke zo neavolɛ.”
^ Anzɛɛ “ɔlale nrɛlɛbɛ ali; ɔyɛle badwema.”
^ Anzɛɛ “mekɛ ɛhye.” Nea Edwɛkɛbohilelɛ.
^ Anzɛɛ “azɛlɛ.”
^ Giliki aneɛ nu, “Ebileham akɛnra anu.”
^ Anzɛɛ “Hades,” ɛhye kile, alesama nla. Nea Edwɛkɛbohilelɛ.
^ Giliki aneɛ nu, “wɔ ɔ kɛnra anu.”
