Hagae 1:1-15

  • Ɛzonlenlɛsua ne mɔɔ bɛanzi la anwo anzohwenlɛ (1-11)

    • ‘Ɔle kpalɛ kɛ bɛkɛdɛnla bɛ azua ngɛnlɛma nu ɔ?’ (4)

    • “Bɛdwenle mɔɔ bɛlɛyɛ la anwo kpalɛ” (5)

    • Bɛdua ma dɔɔnwo noko ekyi bie a bɛte a (6)

  • Menli ne diele Gyihova ane (12-15)

1  Wɔ Belemgbunli Dalayɛse ɛvolɛ mɔɔ tɔ zo nwiɔ, ye siane mɔɔ tɔ zo nsia, kenle mɔɔ limoa la anu, Gyihova luale ngapezonli Hagae*+ anwo zo dendɛle hilele Hyealeteɛle ara Zɛlubabɛle,+ Dwuda amɛnlado ne nee Gyɛhozadake ara Dwɔhyua, ɛsɔfo kpanyinli ne kɛ:  “Mɔɔ ɛlɔne Gyihova ɛha la ɛne, ‘Menli ɛhye mɔ se, “Mekɛ ɛtɛdwule mɔɔ ɔwɔ kɛ bɛsi* Gyihova sua* ne a.”’”+  Na Gyihova edwɛkɛ ne rale ngapezonli Hagae+ ɛkɛ ne bieko kɛ:  “Asoo mekɛ ɛdwu kɛ bɛkɛdɛnla bɛ azua ngɛnlɛma nu, wɔ mekɛ mɔɔ sua ɛhye ɛlɛsɛkye la ɔ?+  Mɔɔ ɛlɔne Gyihova ɛha la ɛne, ‘Bɛdwenle* mɔɔ bɛlɛyɛ la anwo kpalɛ.  Bɛdua ma dɔɔnwo, noko ekyi bie a bɛte a.+ Bɛdi aleɛ, noko bɛ ko ɛnyi. Bɛno noko mɔɔ bɛno la ɛnza bɛ. Bɛkeda ɛdanlɛ, noko bɛ nwo ɛnyɛ bɛ wuluwulu. Mɔɔ di ɛkpa la fa ye ezukoa ne gua kodoku mɔɔ abo le adokule la anu.’”  “Mɔɔ ɛlɔne Gyihova ɛha la ɛne, ‘Bɛdwenle* mɔɔ bɛlɛyɛ la anwo kpalɛ.’  “‘Bɛhɔ awoka ne mɔ azo lɔ bɛhɔva mbaka bɛrɛla.+ Bɛzi sua ne,+ amaa me nye alie nwolɛ na bɛawula me anyunlunyia,’+ Gyihova a se a.”  “‘Ɛnee bɛ nye la dɔɔnwo ade, noko ekyi bie a bɛnyianle a; na mekɛ mɔɔ bɛvale bɛrale sua nu la, menwudale menguale ye lɔ.+ Duzu ati ɔ?’ kɛ ɛlɔne Gyihova se la ɛne. ‘Ɔluakɛ me sua ne ɛlɛsɛkye, wɔ mekɛ mɔɔ awie biala nriandi kɔnea ɔdaye mumua ne ye sua la.+ 10  Ɔti anwuma andɔ ɛbɔlɛ yɛɛ azɛlɛ ne ammaa bɛ aleɛ. 11  Meammaa ezule andɔ angua azɛlɛ ne, awoka, ma, nwanye fofolɛ, nwole, ninyɛne mɔɔ fifi wɔ azɛlɛ ne azo, menli nee nyɛmoa yɛɛ bɛ sa anloa gyima biala azo.’” 12  Hyealeteɛle+ ara Zɛlubabɛle+ nee Gyɛhozadake+ ara Dwɔhyua mɔɔ le ɛsɔfo kpanyinli la nee menli mɔɔ ɛha la kɔsɔɔti diele Gyihova bɛ Nyamenle ne ane nee ngapezonli Hagae edwɛkɛ ne, ɔluakɛ Gyihova bɛ Nyamenle ne a zoanle ye a; na Gyihova ati menli ne zulole. 13  Akee Gyihova ɛbɔfoɔ, Hagae, hanle edwɛkɛ ɛhye mɔɔ Gyihova ɛva ɛzoa ye la hilele menli ne kɛ: “‘Me nee menli ɛhye mɔ lua,’+ kɛ Gyihova se la ɛne.” 14  Ɔti Gyihova hanle Hyealeteɛle ara Zɛlubabɛle mɔɔ le Dwuda+ amɛnlado nee Gyɛhozadake ara Dwɔhyua+ mɔɔ le ɛsɔfo kpanyinli la yɛɛ menli mɔɔ ɛha la kɔsɔɔti ahonle; na bɛrabɔle ɔ bo kɛ bɛsi ɛlɔne Gyihova bɛ Nyamenle ne sua ne.+ 15  Ɛhye zile wɔ Belemgbunli Dalayɛse ɛvolɛ mɔɔ tɔ zo nwiɔ, siane ne mɔɔ tɔ zo nsia la kenle 24 ne anu.+

Ɔbodwɛkɛ

Ɔ bo kile “Bɛwole Ye Ɛvoyia Nu.”
Anzɛɛ “bɛsia bɛsi.”
Anzɛɛ “ɛzonlenlɛsua.”
Anzɛɛ “Bɛzuzu.”
Anzɛɛ “Bɛzuzu.”