Ɛzoanvolɛma Gyima 9:1-43
9 Na Sɔɔlo mɔɔ ɛnee ɔlɛkɔ zo yeanwunlonwunla Awulae ɛdoavolɛma ne na ɔkulo kɛ ɔku bɛ la,+ hɔle ɛsɔfo kpanyinli ne ɛkɛ
2 na ɔzele ye kɛ ɔmaa ye ngɛlata ɔmaa ɔva ɔhɔ nyianu azua mɔɔ wɔ Damasekɛse la anu, amaa yeahye* awie biala mɔɔ ɔbanwu ye kɛ ɔboka Adenle Ne+ anwo la, nrenyia o, raalɛ o yeara Gyɛlusalɛm.
3 Na mɔɔ ɔlua adenle zo na ɔbikyele Damasekɛse la, arɛlevilɛ nu ala wienyi bie vi anwuma rabɔle yiale ye,+
4 na ɔdɔle aze, na ɔdele kɛ ɛnelɛ bie ɛlɛka ahile ye kɛ: “Sɔɔlo, Sɔɔlo, duzu ati a ɛlɛyɛ me kpɔdekpɔde ɛ?”
5 Ɔbizale kɛ: “Yɛmenle, ɛdawɔ nwane ɔ?” Ɔhanle kɛ: “Medame Gyisɛse+ mɔɔ ɛlɛyɛ me kpɔdekpɔde la ɔ.+
6 Noko dwazo na kɔ suakpole ne azo na bɛbaha mɔɔ ɔwɔ kɛ ɛyɛ la bɛahile wɔ.”
7 Akee menli mɔɔ nee ye lua la gyinlanle na ɛnee bɛdɔ mumule, bɛdele ɛnelɛ ne ɛdeɛ, noko bɛannwu awie biala.+
8 Sɔɔlo akee vile azɛlɛ ne anwo dwazole, ɛnee ɔ nye ne gua zo ɛdeɛ, noko ɛnee ɔnnwu ɛhwee. Yemɔti bɛzɔle ɔ sa na bɛ nee ye hɔle Damasekɛse.
9 Na yeannwu debie too kenle nsa,+ yɛɛ yeanli na yeanlo debie.
10 Ɛnee ɛdoavolɛ bie mɔɔ bɛfɛlɛ ye Ananayase+ la wɔ Damasekɛse, Awulae hanle hilele ye wɔ ɛnyelɛzodeɛnwunlɛ nu kɛ: “Ananayase!” Ɔbuale kɛ: “Awulae, mewɔ ɛke.”
11 Awulae zele ye kɛ: “Dwazo, kɔ awɔdenle ne mɔɔ bɛfɛlɛ ye Fɔɔnwo la azo na kɔkpondɛ nrenyia bie mɔɔ bɛfɛlɛ ye Sɔɔlo mɔɔ vi Taasɛse+ la, ɔwɔ Dwudase sua nu ɛkɛ. Na nea! ɔlɛyɛ asɔne,
12 na yenwu nrenyia bie mɔɔ bɛfɛlɛ ye Ananayase la wɔ ɛnyelɛzodeɛnwunlɛ nu kɛ yerava ɔ sa yegua ɔ nwo zo amaa yeanwu debie bieko.”+
13 Noko Ananayase buale kɛ: “Awulae, mede nrenyia ɛhye anwo edwɛkɛ mevi menli dɔɔnwo ɛkɛ ne kɛ yeyɛ wɔ nwuanzanwuanzama mɔɔ wɔ Gyɛlusalɛm la kpɔdekpɔde dɔɔnwo.
14 Na ɛsɔfo mgbanyima ne mɔ ɛmaa ye tumi kɛ ɔrɛla ɛke na ɔrahye* awie biala mɔɔ kɛbɔ wɔ duma la.”+
15 Noko Awulae zele ye kɛ: “Kɔ! ɔluakɛ mekpa nrenyia* ɛhye+ kɛ ɔli me duma ne anwo daselɛ ɔhile maanle maanle+ nee arelemgbunli+ yɛɛ Yizilayɛma.
16 Ɔluakɛ mebamaa yeanwu amaneɛ dɔɔnwo ne mɔɔ ɔbanwu ye wɔ me duma nu la wienyi.”+
17 Ɔti Ananayase hɔle na ɔwolole sua nu ɛkɛ na ɔvale ɔ sa ɔguale ɔ nwo zo na ɔhanle kɛ: “Adiema Sɔɔlo, Awulae Gyisɛse mɔɔ yele ɔ nwo hilele wɔ wɔ adenle nu wɔ mekɛ mɔɔ ɛlɛba la ɛzoa me ɛ nwo ɛke amaa wɔanwu debie bieko na sunsum nwuanzanwuanza ne ayi wɔ tɛkɛɛ.”+
18 Na ɛkɛ ne ala, debie bie mɔɔ le kɛ fɛlɛ abonle la vi ɔ nye zo guale aze na ɔnwunle debie bieko. Na ɔdwazole ɔmaanle bɛzɔnenle ye,*
19 ɔlile debie na ɔnyianle anwosesebɛ.
Ɔ nee ɛdoavolɛma ne dɛnlanle mekɛ ekyi wɔ Damasekɛse,+
20 na ndɛndɛ ne ala ɔhɔle nyianu azua ne mɔ anu na ɔbɔle ɔ bo ɔhanle Gyisɛse anwo edwɛkɛ kɛ yemɔ a ɔle Nyamenle Ara ne a.
21 Noko ɔyɛle bɛdabɛ mɔɔ bɛdiele ye la amuala azibɛnwo na bɛhanle kɛ: “Asoo tɛ nrenyia ne mɔɔ yɛle bɛdabɛ mɔɔ bɛbɔle duma ɛhye kpɔdekpɔde wɔ Gyɛlusalɛm la ɛne?+ Asoo yeamba ɛke kɛ ɔbahye bɛ* na yeava bɛ yeahɔmaa ɛsɔfo mgbanyinli ne mɔ ɔ?”+
22 Noko Sɔɔlo hɔle zo nyianle tumi kpole kpalɛ na kɛzi ɔhilehilele nu kɛ Gyisɛse a le Kelaese ne la zinle Dwuuma mɔɔ wɔ Damasekɛse la anwo kpalɛ.+
23 Na mekɛ guale nu la, Dwuuma ne bɔle adwenle kɛ bɛku ye.+
24 Noko Sɔɔlo nwunle adwenle mɔɔ bɛbɔle ye wɔ ɔ nwo la. Eza bɛtetɛle ye wɔ nlenkɛ mgbole ne mɔ anloa alehyenlɛ nee aledwolɛ kɛ bɛbanyia ye bɛahu ye.
25 Yemɔti ye ɛdoavolɛma ne vale ye dɛnlanle kɛndɛne nu na bɛvale ye bɛluale bane ne tokule bie anu nɔɔzo bɛdwulale ye aze bɛtɛɛ.+
26 Mɔɔ ɔrale Gyɛlusalɛm+ la, ɔbɔle mɔdenle kɛ ɔkaboka ɛdoavolɛma ne anwo noko ɛnee bɛ muala bɛsulo ye, ɔluakɛ bɛanlie bɛanli kɛ ɔle ɛdoavolɛ.
27 Yemɔti Baanabase+ raboale ye na ɔvale ye ɔhɔle ɛzoanvolɛma ne ɛkɛ, ɔhanle kɛzi Sɔɔlo nwunle Awulae wɔ adenle nu+ na ɔdendɛle ɔhilele ye nee kɛzi Sɔɔlo vale akɛnrazilɛ dendɛle wɔ Gyisɛse duma nu wɔ Damasekɛse la anwo edwɛkɛ kɔsɔɔti ɔhilele bɛ.+
28 Yemɔti ɔdɛnlanle bɛ nwo ɛkɛ na ɔ nee bɛ hɔle ɛleka biala mɔɔ bɛhɔle la* wɔ Gyɛlusalɛm, ɔvale akɛnrazilɛ ɔdendɛle wɔ Awulae duma nu.
29 Ɔ nee Dwuuma mɔɔ bɛka Giliki aneɛ la dendɛle yɛɛ bɛzule kpolera, na bɛbɔle mɔdenle kɛ bɛku ye.+
30 Mɔɔ mediema ne mɔ nwunle ɛhye la, bɛvale ye bɛhɔle Sizalia na bɛmaanle ɔhɔle Taasɛse.+
31 Nɔhalɛ nu, akee asafo ne mɔ mɔɔ wɔ Dwudiya nee Galeli yɛɛ Samɛlea amuala la+ nyianle anzodwolɛ, bɛ nwo yɛle se; na mekɛ mɔɔ bɛvale Gyihova* anwo ɛzulolɛ nee arɛlekyekyelɛ mɔɔ sunsum nwuanzanwuanza ne fa maa la+ bɛluale la, bɛ nwo hɔle zo yɛle dɔɔnwo.
32 Na mɔɔ Pita ɛlɛkpɔsa maanzinli ne anu amuala la, ɔrale nwuanzanwuanzama mɔɔ wɔ Leda+ la noko anwo ɛkɛ.
33 Ɔnwunle nrenyia bie mɔɔ bɛfɛlɛ ye Yiniase la wɔ ɛkɛ, ɛnee yela ye ɛkpa zo too ɛvolɛ mɔtwɛ, ɔluakɛ ɛnee yebubu.
34 Pita zele ye kɛ: “Yiniase, Gyisɛse Kelaese ɛyɛ wɔ ayile.+ Dwazo na toto wɔ ɛkpa ne.”+ Na ɔdwazole ndɛndɛ ne ala.
35 Mɔɔ bɛdabɛ mɔɔ bɛde Leda nee Hyɛlɔn Azɛlɛ Sɛsɛ ne azo amuala nwunle ye la, bɛliele Awulae bɛlile.
36 Na ɛnee ɛdoavolɛ bie mɔɔ bɛfɛlɛ ye Tabeta, mɔɔ ɔ bo kile “Dɔkase”* la wɔ Dwɔpa. Ɛnee gyima kpalɛ ɛyi ye tɛkɛɛ yɛɛ ɔboa ehyiavolɛma.
37 Noko mekɛ ne anu ɔ nwo dole ye na ɔwule. Yemɔti bɛbiale ye na bɛvale ye bɛdole ɛbolɔnsam zo sua bie anu.
38 Kɛmɔ Leda bikye Dwɔpa la ati, mɔɔ ɛdoavolɛma ne dele kɛ Pita wɔ suakpole zɔhane azo la, bɛzoanle menli nwiɔ bɛmaanle bɛhɔle ye ɛkɛ na bɛzele ye kɛ: “Yɛsɛlɛ wɔ, ka ɛ nwo bɛla yɛ nwo ɛke.”
39 Akee Pita dwazole na ɔ nee bɛ hɔle. Mɔɔ ɔdwule ɛkɛ ne la bɛvale ye bɛhɔle sua ne mɔɔ wɔ ɛbolɔnsam ne azo la anu; na ahunlanvolɛ mraalɛ ne mɔ amuala rale ɔ nwo ɛkɛ, ɛnee bɛlɛsu bɛava adɛladeɛ dɔɔnwo nee aguzo ngakyile mɔɔ Dɔkase yɛle wɔ mekɛ mɔɔ ɔde aze la bɛahile ye.
40 Akee Pita maanle awie biala vindele+ na ɔhotole ɔyɛle asɔne. Ɔhakyile ɔ nye funli ne anwo, na ɔhanle kɛ: “Tabeta, dwazo!” Ɔbukele ɔ nye na mɔɔ ɔnwunle Pita la, ɔdwazole ɔdɛnlanle aze.+
41 Ɔzɔle ɔ sa ɔmaanle ɔdwazole, na ɔvɛlɛle nwuanzanwuanzama ne nee ahunlanvolɛ mraalɛ ne mɔ na ɔvale ye ɔmaanle bɛ mɔɔ ɛnee ɔde ngoane nu a.+
42 Bɛdele ɛhye wɔ Dwɔpa amuala, na menli dɔɔnwo liele Awulae lile.+
43 Ɔdɛnlanle Dwɔpa mekɛ ekyi wɔ Saemɔn mɔɔ yɛ nwoma nwo gyima+ la anwo ɛkɛ.
Ɔbodwɛkɛ
^ Anzɛɛ “yeakyekye.”
^ Giliki aneɛ nu, “ɔkyekye; ɔgua ye kyeenyi.”
^ Anzɛɛ “adwinli bulalɛ.”
^ Anzɛɛ “bɛnlomanle ye nzule nu.”
^ Giliki aneɛ nu, “yeakyekye bɛ.”
^ Giliki aneɛ nu, “ɔlile akɔneaba.”
^ Giliki duma Dɔkase nee Elam duma Tabeta abo a le “Kɛtɛboɛ.”
