Ɛzoanvolɛma Gyima 7:1-60
7 Na ɛsɔfo kpanyinli ne bizale ye kɛ: “Ɛhye mɔ le zɔ ɔ?”
2 Sitivin buale kɛ: “Mediema nee egya mɔ, bɛdie. Anyunlunyia Nyamenle ne yele ɔ nwo hilele yɛ nenyia Ebileham wɔ mekɛ mɔɔ ɛnee ɔwɔ Mɛsɔpɔteemea kolaa na yeahɔdɛnla Hɛlan la,+
3 na ɔzele ye kɛ: ‘Ɛvi wɔ azɛlɛ zo nee wɔ mbusuafoɔ avinli tu na kɔ azɛlɛ ne mɔɔ mebahile wɔ la azo.’+
4 Akee ɔvile Kaledeama maanle nu ɔhɔdɛnlanle Hɛlan. Na mɔɔ ye papa wule la anzi,+ Nyamenle maanle ɔvile ɛkɛ na ɔradɛnlanle azɛlɛ ne mɔɔ bɛde zo kɛkala la azo.+
5 Noko yeammaa ye bie kɛ ye agyapadeɛ, ɛleka mɔɔ ɔbava ɔ gyakɛ yeazie bɔbɔ la, yeanva yeammaa ye; noko ɔbɔle ye ɛwɔkɛ kɛ ɔbava yeamaa ye kɛ agyapadeɛ, na ɔwu a yeava yeamaa ɔ bo zo amra,+ noko mekɛ zɔhane ɛnee ɔnlɛ ralɛ.
6 Eza Nyamenle zele ye kɛ ɔ bo zo amra bayɛ nyɛvolɛ wɔ azɛlɛ mɔɔ ɛnle bɛ ɛdeɛ la azo na menli ne bava bɛ ayɛ ngɛkɛlɛ na bɛahile bɛ nyane too ɛvolɛ 400.+
7 Nyamenle hanle kɛ, ‘Mebabua maanle ne mɔɔ ɔbava bɛ yeayɛ ngɛkɛlɛ la ndɛne,+ na ɛhye mɔ anzi bɛbavi ɛkɛ na bɛarazonle me wɔ ɛke.’+
8 “Eza ɔ nee ye yɛle mrenyiazo ɛpɛlɛ nwo ngyekyeleɛ,+ na ɔwole Ayezeke+ na ɔpɛle ye mrenyiazo wɔ kenle mɔtwɛ ne azo,+ na Ayezeke wole Gyekɔbo,* yɛɛ Gyekɔbo wole mbusua mgbanyinli 12 ne.*
9 Na mbusua mgbanyinli ne mɔ anye bolole Dwosefi+ na bɛdɔnenle ye bɛhɔle Yigyibiti.+ Noko ɛnee Nyamenle nee ye lua,+
10 na ɔliele ye wɔ ye amaneɛnwunlɛ kɔsɔɔti anu, ɔmaanle ye nrɛlɛbɛ yɛɛ ɔmaanle ɔnyianle Yigyibiti Belemgbunli Falo anyunlu ɛlolɛ. Na Falo maanle ɔnleanle Yigyibiti nee ye sua nu amra amuala anwo zo.+
11 Noko ɛhɔne rale Yigyibiti nee Keena amuala, ɛhɛe, ɔvale anwongyelelɛ kpole ɔrale, na yɛ nenyia mɔ annyia debie mɔɔ bɛbali a.+
12 Noko Gyekɔbo dele kɛ aleɛ wɔ Yigyibiti na ɔzoanle yɛ nenyia mɔ wɔ mekɛ mɔɔ limoa la.+
13 Bɛhɔle mɔɔ tɔ zolɛ nwiɔ ne la, Dwosefi lale ɔ nwo ali hilele ɔ mediema ne mɔ na Falo nwunle Dwosefi abusua ne.+
14 Ɔti Dwosefi vale nrɛlaleɛ hɔmaanle ɔ ze Gyekɔbo kɛ ɔ nee ye sua nu amra amuala ɛrɛla,+ bɛ muala bɛle menli* 75.+
15 Yemɔti Gyekɔbo hɔle Yigyibiti,+ na ɔwule ɛkɛ+ yɛɛ ɛkɛ ne a yɛ nenyia mɔ noko wule a.+
16 Bɛvale bɛ bɛhɔle Hyikɛm na bɛziele bɛ wɔ nla ne mɔɔ Ebileham dɔle vile Heemɔ amra ne mɔ asa anu wɔ Hyikɛm la anu.+
17 “Ɔka ekyii na ɛwɔkɛ ne mɔɔ Nyamenle bɔle Ebileham la ara nu la, ɛnee menli ne anwo ɛzo na bɛyɛ dɔɔnwo kpalɛ wɔ Yigyibiti,
18 hɔkpulale kɛ belemgbunli gyɛne mɔɔ ɛnze Dwosefi la ralile Yigyibiti ebia ne.+
19 Nrenyia ɛhye luale nrɛlɛbɛ adenle zo ɔ nee yɛ maanle ne lile na ɔhilele yɛ nenyia mɔ nyane ɔmaanle bɛkpole bɛ mbɔdɔma bɛmaanle bɛwule.+
20 Mekɛ zɔhane a bɛwole Mosisi a, na ɛnee ɔ nwo yɛ fɛ wɔ Nyamenle anyunlu. Bɛnleanle* ye siane nsa wɔ ye papa sua nu.+
21 Noko mekɛ mɔɔ bɛhɔgyakyile ye wɔ ɛleka bie la,+ Falo ara raalɛ ne hɔvale ye na ɔtetele ye kɛ ɔ ra nrenyia.+
22 Ɔti bɛhilele Mosisi Yigyibiti nrɛlɛbɛ kɔsɔɔti. Nɔhalɛ nu, ɛnee ɔtendɛ a tumi wɔ nu yɛɛ ɔyɛle ninyɛne mgbole.+
23 “Noko mekɛ mɔɔ ɔlile ɛvolɛ 40 la, ɔrale ye ahonle nu* kɛ ɔkakpɔla* ɔ mediema Yizilayɛma.+
24 Mɔɔ ɔnwunle kɛ bɛlɛyɛ ko amumuyɛ la, ɔliele ye na ɔlile ɔ ti anloma ɔhunle Yigyibitinli ne mɔɔ ɛlɛyɛ ye amumuyɛ la.
25 Ɛnee ɔdwenle kɛ ɔ mediema ne mɔ banwu kɛ Nyamenle balua ɔ nwo zo alie bɛ ngoane, noko bɛannwu ye zɔ.
26 Aleɛ hyenle la, ɔhɔdole bɛ kɛ bɛlɛko, na ɔbɔle mɔdenle kɛ ɔkpɔda bɛ wɔ anzodwolɛ nu na ɔhanle kɛ: ‘Ayi mɔ, bɛle mediema. Duzu ati a bɛlɛyɛ bɛ nwo asa ɛ?’
27 Noko ko ne mɔɔ ɛlɛyɛ ɔ gɔnwo ne asa la zuhunle ye na ɔhanle kɛ: ‘Nwane a yɛle wɔ yɛ neavolɛ nee ndɛnebuavolɛ wɔ yɛ nwo zo a?
28 Ɛkpondɛ kɛ ɛku me kɛ mɔɔ anoma ɛhunle Yigyibitinli ne la ɔ?’
29 Mɔɔ Mosisi dele ɛhye la, ɔnriandile ɔhɔyɛle ɛyɛvolɛ wɔ Medeanema azɛlɛ zo, na ɔwole mralɛ mrenyia nwiɔ wɔ ɛkɛ.+
30 “Ɛvolɛ 40 pɛle nu la, anwumabɔvolɛ bie yele ɔ nwo hilele ye wɔ fienemgbole ne mɔɔ bikye Saenae Boka ne la anu wɔ kpɔkɛ bie mɔɔ ɛlɛsɔ la anu.+
31 Mɔɔ Mosisi nwunle ye la, ɔzinle ɔ nwo. Noko mekɛ mɔɔ ɔbikyele nwolɛ kɛ ɔnea ye boɛ la, ɔdele Gyihova* ane kɛ;
32 ‘Mame a mele wɔ nenyia mɔ Nyamenle ne, Ebileham nee Ayezeke yɛɛ Gyekɔbo Nyamenle ne a.’+ Mosisi anwo bɔle ɔ bo wosole ye na yeangulo kɛ ɔkɛnlea ye bieko.
33 Gyihova* zele ye kɛ: ‘Yeye wɔ mgbɔlaboa ne ɔluakɛ ɛleka mɔɔ ɛgyi la le azɛlɛ nwuanzanwuanza.
34 Nɔhalɛ nu, menwu kɛzi bɛlɛyɛ me menli ne mɔɔ wɔ Yigyibiti la amumuyɛ la, yɛɛ mede bɛ nyane ɛzunlɛ ne noko,+ na mera kɛ mebalie bɛ. Akee bɛla, maa menzoa wɔ wɔ Yigyibiti.’
35 Mosisi ɛhye mɔɔ bɛkpole ye na bɛhanle kɛ: ‘Nwane a yɛle wɔ neavolɛ nee ndɛnebuavolɛ la?’+ yemɔ ala a Nyamenle luale anwumabɔvolɛ ne mɔɔ ɔyele ɔ nwo ɔhilele ye wɔ kpɔkɛ ne anu la anwo zo zoanle ye+ kɛ neavolɛ nee dievolɛ a.
36 Nrenyia ɛhye yele bɛ vile ɛkɛ,+ ɔyɛle sɛkɛlɛneɛ nee nwanwane ninyɛne wɔ Yigyibiti+ nee Nyevile Kɔkɔlɛ ne+ anloa yɛɛ fienemgbole ne anu ɛvolɛ 40.+
37 “Mosisi ɛhye a zele Yizilayɛma kɛ: ‘Nyamenle bamaa ngapezonli bie mɔɔ le kɛ medame la avi bɛ mediema ne mɔ anu ara la.’+
38 Ɛhye a le ahenle mɔɔ ɔ nee Yizilayɛma luale wɔ fienemgbole ne anu na anwumabɔvolɛ+ ne dendɛle hilele ye+ nee yɛ nenyia mɔ wɔ Saenae Boka ne azo, na bɛvale edwɛkɛ nwuanzanwuanza ne mɔɔ tumi wɔ nu bɛmaanle ye la.+
39 Yɛ nenyia mɔ andie ye, emomu bɛkpole ye,+ na wɔ bɛ ahonle nu bɛhulole kɛ anrɛɛ bɛkɛzia bɛkɛhɔ Yigyibiti,+
40 bɛzele Aalɔn kɛ: ‘Yɛ nyamenle maa yɛ maa ɔli yɛ nyunlu. Ɔluakɛ Mosisi ɛhye mɔɔ yele yɛ vile Yigyibiti azɛlɛ zo la, yɛnze mɔɔ ɛdo ye a.’+
41 Ɔti bɛyɛle ɛnlankɛ ralɛ wɔ zɔhane mekɛ ne na bɛbɔle afɔle bɛmaanle ananze ne na bɛliele bɛ nye wɔ debie mɔɔ bɛva bɛ sa bɛyɛ la anwo.+
42 Ɔti Nyamenle hwenle ɔ nwo vile bɛ nwo ɔmaanle bɛzonlenle anwomanyunlu ninyɛne,+ kɛ mɔɔ bɛhɛlɛ ye wɔ Ngapezoma buluku ne anu la: ‘O Yizilayɛma, asoo medame a bɛbɔle afɔle bɛmaanle me na bɛvale afɔlebɔdeɛ bɛrɛlɛle me wɔ ɛvolɛ 40 ne mɔɔ bɛlile ye wɔ fienemgbole ne anu la anu ɔ?
43 Emomu, Molɔko+ ɛdanlɛsua ne yɛɛ nyamenle Relɛfaa ɛwɔlɔra ne a bɛkpale a, bɛyɛle ananze ɛhye mɔ kɛ bɛsonle bɛ. Yemɔti mebava bɛ meahɔ Babelɔn anzi lɔ.’+
44 “Ɛnee yɛ nenyia mɔ lɛ daselɛ ɛdanlɛsua ne wɔ fienemgbole ne anu kɛ mɔɔ Ɔtendɛ yeahile Mosisi la ɔhanle kɛ ɔnlea mɔɔ yenwu ye la azo ɔyɛ bie la.+
45 Na yɛ nenyia mɔ liele na bɛ nee Dwɔhyua vale rale azɛlɛ ne mɔɔ Nyamenle dule maanle maanle ne mɔ wɔ zolɛ la azo.+ Ɛnee ɔwɔ bɛ nwo ɛkɛ ne too ɔradwule Devidi mekɛ zo.
46 Ɔnyianle Nyamenle anyunlu ɛlolɛ na ɔzɛlɛle ye kɛ ɔmaa ye adenle ɔmaa ɔzi sua ɔmaa Gyekɔbo Nyamenle ne.+
47 Noko Sɔlɔmɔn a zile sua maanle ye a.+
48 Noko, Anwuma Anwumanli ne ɛndɛnla sua mɔɔ bɛva bɛ sa bɛzi la anu,+ kɛ mɔɔ ngapezonli ne hanle la kɛ:
49 ‘Gyihova* se, anwuma le me belemgbunli ebia+ yɛɛ azɛlɛ ye le me gyakɛ abo ebia.+ Sua boni a bɛbazi bɛamaa me a? Anzɛɛ nienwu a me ɛnwomenlelielɛ ɛleka ne wɔ a?
50 Asoo tɛ me sa a yɛle ninyɛne ɛhye mɔ amuala ɔ?’+
51 “Anzosesebɛ menli mɔɔ bɛduodua bɛ nzo na bɛngulo kɛ bɛkakyi bɛ adwenle a, bɛko bɛtia sunsum nwuanzanwuanza ne dahuu; kɛ mɔɔ bɛ ze mɔ yɛle la, zɔhane ala a bɛyɛ a.+
52 Ngapezoma ne mɔ anu boni a bɛ ze mɔ anyɛ ye kpɔdekpɔde a?+ Ɛhɛe, bɛhunle bɛdabɛ mɔɔ bɛhanle bɛdole ɛkɛ ne kɛ tenlenenli ne bara la,+ bɛle kɛ bɛdabɛ ala la ɔluakɛ bɛmɛ a bɛyele ye bɛmaanle na bɛhunle ye a,+
53 bɛmɛ a bɛnyianle Mɛla ne mɔɔ anwumabɔvolɛma vale rale la a,+ noko bɛanli zo.”
54 Mɔɔ bɛdele ɛhye la, bɛvale ɛya kpole* na ɛnee bɛkpondɛ kɛ bɛbo ye.
55 Noko, kɛmɔ ɛnee sunsum nwuanzanwuanza ne ɛyi ye tɛkɛɛ la ati, ɔnleanle anwuma na ɔnwunle Nyamenle anyunlunyia ne nee Gyisɛse kɛ ɔgyi Nyamenle asa fema zo,+
56 na ɔhanle kɛ: “Nea! Menwu kɛ anwuma ɛbuke na sonla Ra ne+ gyi Nyamenle asa fema zo.”+
57 Mɔɔ bɛdele ɛhye la bɛvale ɛnelɛ kpole bɛdeanle nu na bɛvale bɛ sa bɛduoduale bɛ nzo, na bɛ muala bɛdule bɛhɔle ɔ nwo zo.
58 Bɛvale ye bɛvindele sua ne kandiba, na bɛbɔle ɔ bo bɛzile ye awolɛ.+ Alasevolɛ ne mɔ+ yele bɛ adɛladeɛ aguzo ne guale kpavolɛ bie mɔɔ bɛfɛlɛ ye Sɔɔlo la anwo ɛkɛ.+
59 Mɔɔ bɛlɛsi Sitivin awolɛ la, ɔzɛlɛle kɛ: “Awulae Gyisɛse, die me sunsum.”
60 Akee ɔhotole na ɔvale ɛnelɛ kpole ɔdeanle nu kɛ: “Gyihova,* mmatwe bɛ nzo wɔ ɛtane ɛhye anwo.”+ Ɔhanle ɛhye ɔwiele la, ɔwule.*
Ɔbodwɛkɛ
^ Anzɛɛ “tete selɛma ne.”
^ Anzɛɛ ɔkola ɔkile, “yɛle Gyekɔbo noko zɔhane ala.”
^ Anzɛɛ “ɛkɛla.”
^ Anzɛɛ “Bɛtetele.”
^ Anzɛɛ “ɔbɔle kpɔkɛ.”
^ Anzɛɛ “ɔkanlea.”
^ Anzɛɛ “ɔyɛle bɛ nyane.”
^ Giliki aneɛ nu, “ɔlale wɔ ewule nu.”
