Ɛzoanvolɛma Gyima 27:1-44
27 Mɔɔ akee bɛzile kpɔkɛ kɛ ɔwɔ kɛ yɛkɔ Yetali la,+ bɛvale Pɔɔlo nee pilizama bie mɔ bɛwulale sogya kpanyinli bie mɔɔ bɛfɛlɛ ye Dwuleɛse mɔɔ wɔ Ɔgɛsetɛse sogyama ekpunli ne anu la asa anu.
2 Yɛhɔvole meli bie mɔɔ vi Adelameteɛm ɛlɛkɔ azua mɔɔ wɔ Ehyea maanzinli ne ɛnwea nloa azo la anu na yɛdule yɛ bo; ɛnee Alesetaakɛse,+ Masidoneanli bie mɔɔ vi Tɛsalonaeka la boka yɛ nwo.
3 Aleɛ hyenle la yɛradwule Saedɛn, na Dwuleɛse lale ahunlunyele ali hilele Pɔɔlo na ɔmaanle ye adenle ɔmaanle ɔhɔle ɔ gɔnwo mɔ anwo ɛkɛ na ɔmaanle bɛboale ye.
4 Mɔɔ yɛdule yɛvile ɛkɛ ne na yɛlua nyevile ne azo la, yɛhɔvale Saepelɛse, amaa anwoma ne mɔɔ ɛnee ɛlɛbɔ atia yɛ la angyegye yɛ.
5 Akee yɛhɔvale nyevile ne akunlu lɔ yɛluale Selesea nee Pamefelea yɛragyinlanle Maela mɔɔ wɔ Lesea la.
6 Ɛkɛ ne sogya kpanyinli ne nyianle meli bie mɔɔ vi Alɛzandelea ɛlɛkɔ Yetali la, na ɔmaanle yɛhɔvole nu.
7 Ɛnee yɛngola kɔ kpalɛ, yemɔti yɛlile kenle dɔɔnwo wɔ adenle nu, yɛ nwo hyelele yɛ kpalɛ na yɛaradwu Kenaedɛse. Kɛmɔ ɛnee anwoma ne ɛlɛbɔ atia yɛ la ati, yɛhɔvale Kiliti mɔɔ wɔ Salemoni la amaa anwoma ne angyegye yɛ.
8 Yɛsianenle aze kpalɛ kpalɛ ɛdeɛ, noko yɛvɛle dedee na yɛrale ɛleka bie mɔɔ bɛfɛlɛ ye Ahonle Kɛnlɛmazo, mɔɔ bikye Lasia suakpole ne la.
9 Yɛhyɛle ɛkɛ ne kpalɛ na ɛnee esiane wɔ nu kɛ yɛbadoa adendulɛ ne azo, ɔluakɛ ɛnee ɛhɔne mɔɔ bɛkye ye Mgbɔdalɛ Kenle ne+ la mekɛ ne bɔbɔ ɛpɛ nu, yemɔti Pɔɔlo dule bɛ folɛ
10 kɛ: “Ayi mɔ, mekola menwu ye kɛ adendulɛ ɛhye bamaa ninyɛne dɔɔnwo azɛkye na bɛaminli, tɛ meli ne nee nuhua ninyɛne ne angome, emomu yɛ ngoane* noko boka nwo.”
11 Noko sogya kpanyinli ne diele melikavolɛ ne nee meli menle ne, na yeandie mɔɔ ɛnee Pɔɔlo ɛlɛka la.
12 Kɛmɔ habɔ* ɛkɛ ne ɛnle ɛleka mɔɔ bɛdi fɔsɛlɛ wɔ ɛkɛ a ɔyɛ boɛ la ati, bɛ nuhua dɔɔnwo hanle kɛ bɛmaa yɛbɔ mɔdenle yɛhɔ Fonekese, habɔ bie mɔɔ wɔ Kiliti mɔɔ ɔ nye kile sɔlɔ aduduleɛ nee nyiakɛ aduduleɛ la, na yɛhɔli fɔsɛlɛ ne wɔ ɛkɛ.
13 Mɔɔ nyiakɛ anwoma ne bɔle bɛtɛɛ la, bɛnyianle adwenle kɛ bɛbahola bɛadwu ɛleka mɔɔ bɛkulo kɛ bɛkɔ la, yemɔti bɛdule sɛkɛ ne na bɛsianenle aze kɛ bɛkava Kiliti ɛnweazo.
14 Noko bɛandwu ɛleka biala yɛɛ anwoma ɛsesebɛ bie mɔɔ bɛfɛlɛ ye Yulokilo* la dule a.
15 Mekɛ mɔɔ anwoma ne bɔle meli ne ɛsesebɛ na yɛngola yɛngɔ yɛ nyunlu bieko la, yɛgyakyile nu yɛmaanle ɔvale yɛ ɔhɔle.
16 Akee yɛhɔvale bɔra ekyi bie mɔɔ bɛfɛlɛ ye Kɔda la anwo ɛkɛ amaa yɛabɔ yɛ nwo bane wɔ anwoma ne anwo, noko yɛ nwo hyelele yɛ kpalɛ na yɛahola yɛava ɛlɛne ekyi* ne yɛazie boɛ wɔ meli ne anu.
17 Noko mɔɔ bɛkpogyale ye zo la, bɛvale debie bɛsosɔle ɛlɛne ne anu, na kɛmɔ ɛnee bɛsulo kɛ bɛbahɔnwe Sɛtese* ɛnwea ne azo la ati, bɛdwulale avela ne bɛmaanle anwoma ne vale yɛ hɔle.
18 Kɛmɔ ɛnee ahumu ne ɛlɛtu kpole atia yɛ la ati, aleɛ hyenle ala la bɛbɔle ɔ bo bɛvuandinle meli ne anu ninyɛne ne bie bɛguale.
19 Na ye kenle nsa ne azo, bɛvale bɛ sa bɛyeyele meli ne anwo ninyɛne ne bie bɛguale ye lɔ.
20 Mɔɔ yɛannwu sɛnzɛne ne anzɛɛ nwɔlɔra ne mɔ wɔ kenle dɔɔnwo anu na ahumu ne bɔle yɛ ɛsesebɛ la, akee anyelazo mɔɔ yɛlɛ kɛ yɛbanyia ngoane la amuala bɔle ɔ bo kɛ ɔwie.
21 Mɔɔ bɛanli aleɛ wɔ mekɛ tendenle bie anzi la, Pɔɔlo dwazole gyinlanle bɛ avinli na ɔhanle kɛ: “Ayi mɔ, anrɛɛ ɔwɔ kɛ bɛfa me folɛdulɛ ne, na yɛandu yɛanvi Kiliti yɛanva nyevile ne azo na yɛanwu amaneɛ kpole ɛhye na yɛaminli ninyɛne dɔɔnwo ɛhye mɔ.+
22 Noko kɛkala, mesɛlɛ bɛ bɛnyia akɛnrasesebɛ, bɛ nuhua ko* bɔbɔ ɛnrɛminli, meli ye ala a bazɛkye a.
23 Nɔe, Nyamenle ne mɔɔ mele ye ɛdeɛ na mesonle ye la anwumabɔvolɛ+ rale me nwo ɛke
24 na ɔhanle kɛ: ‘Pɔɔlo mmasulo. Ɔwɔ kɛ ɛkɔgyinla Siza anyunlu,+ na nea! Nyamenle balie bɛdabɛ mɔɔ ɛ nee bɛ lua la amuala ngoane.’
25 Ɔti ayi mɔ, bɛnyia akɛnrasesebɛ ɔluakɛ medie Nyamenle medi kɛ mɔɔ bɛha bɛhile me la bayɛ zɔ.
26 Noko, ɔwɔ kɛ yɛkɔnwe bɔra bie ɛnweazo.”+
27 Yɛlile kenle bulu nee nna, alehyenlɛ nee aledwolɛ wɔ Edelea Nyevile ne azo, na mɔɔ bɛbɔle nɔɔzo bulu nee nwiɔ la, gyimayɛvoma ne dele nganeɛ kɛ bɛlɛbikye azɛlɛ bie.
28 Bɛvale debie bɛzuzule na bɛnwunle kɛ kuma ne kɛyɛ mita* 36, yemɔti bɛhɔle bɛ nyunlu ekyii na bɛzuzule ye bieko la bɛnwunle kɛ ɔkɛyɛ mita* 27.
29 Na kɛmɔ ɛnee bɛsulo kɛ yɛkɛfofo awolɛ zo la ati, bɛdole sɛkɛ nna wɔ ɛlɛne ne abo lɔ, na ɛnee bɛ kunlu a anrɛɛ aleɛ ɛhye.
30 Na mɔɔ gyimayɛvoma ne kpondɛ avi meli ne anu anriandi na bɛdwulale ɛlɛne ekyi ne wɔ nyevile ne anu bɛyɛle kɛ asɛɛ bɛkado sɛkɛ ne bie wɔ ɛlɛne ne ati lɔ la,
31 Pɔɔlo zele sogya kpanyinli ne nee sogyama ne kɛ: “Saa menli ɛhye mɔ andɛnla meli ye anu a, bɛnrɛnyia ngoane.”+
32 Na sogyama ne pepɛle nyɛma ne mɔ mɔɔ dedɛ ɛlɛne ekyi ne anu la anu bɛmaanle ɔhɔle.
33 Ɔka ekyii aleɛ kye la, Pɔɔlo maanle bɛ kɔsɔɔti anwosesebɛ kɛ bɛli debie na ɔhanle kɛ: “Ɛnɛ le kenle 14 mɔɔ bɛhendɛ dedee mɔɔ bɛtɛdile aleɛ biala a.
34 Ɔti mesɛlɛ bɛ bɛli debie; na ɛhye baboa bɛ ɔluakɛ bɛ nuhua ko biala ati enrinli ko bɔbɔ ɛnrɛminli.”
35 Mɔɔ ɔhanle ɛhye la, ɔvale paano, ɔlale Nyamenle ase wɔ bɛ kɔsɔɔti bɛ nyunlu ɛkɛ, na ɔbɔle ɔ bo kɛ ɔbubu yeali.
36 Ɔti bɛ muala bɛnyianle akɛnrasesebɛ na bɛdabɛ noko bɛbɔle ɔ bo bɛlile debie.
37 Ɛnee yɛdayɛ mɔɔ yɛwɔ meli ne anu la amuala dodo le menli* 276.
38 Mekɛ mɔɔ bɛlile debie bɛ ko yile la, bɛbɔle ɔ bo bɛvuandinle hwiiti ne mɔɔ wɔ meli ne anu la bɛguale nyevile ne anu amaa nuhua ayɛ felafela.+
39 Mɔɔ aleɛ hyenle la, ɛnee bɛnnwu azɛlɛ ne,+ noko bɛnwunle ɛnwea dɔɔnwo bie wɔ azule ne anloa na bɛbɔle mɔdenle kɛ saa ɔkɛyɛ boɛ a bɛfa meli ne bɛahɔnwe ɛkɛ.
40 Ɔti bɛpepɛle sɛkɛ ne mɔ amuala bɛmaanle bɛguale nyevile ne anu, eza bɛzianyinle ɛdahoma ne mɔ; na mɔɔ bɛvolale ɔ nyunlu avela ne la, anwoma ne bɔle bɛ hɔle ɛnwea ne anloa.
41 Mɔɔ bɛhɔnwenle ɛnwea dɔɔnwo* bie mɔɔ wɔ nyevile ne anu la azo la, meli ne ati minle ɛnwea ne anu na ɔhale ɛkɛ, na nyevile azɛlɛkye ne bubule ɔ bo ne bɔkɔɔ.+
42 Ɛhye ati, sogyama ne yɛle kɛ bɛku pilizama ne amuala amaa bie anweɛ anvo file zo na yeanriandi.
43 Noko kɛmɔ ɛnee sogya kpanyinli ne kulo kɛ ɔdie Pɔɔlo ngoane la ati, yeammaa bɛanyɛ mɔɔ ɛnee bɛkulo kɛ bɛyɛ la. Ɔhanle kɛ bɛdabɛ mɔɔ bɛze azule weɛ la ɛlimoa ɛgua nyevile ne anu ɛweɛ ɛhɔ file zo,
44 na bɛdabɛ mɔɔ bɛha la ɛdoa bɛ, bie mɔ ɛbutubutu ndaboa zo na bie mɔ noko ɛbutubutu meli ne azinli ne bie mɔ azo. Yemɔti bɛ muala bɛholale bɛdwule aze.+
Ɔbodwɛkɛ
^ Anzɛɛ “ɛkɛla.”
^ Anzɛɛ “meli agyinlaleɛ.”
^ Ɛhye kile, sɔlɔ aduduleɛ anwoma bie.
^ Ɔle ɛlɛne ekyi mɔɔ esiane si a bɛfo nu a.
^ Nea Edwɛkɛbohilelɛ.
^ Anzɛɛ “ɛkɛla ko.”
^ Anzɛɛ “ɛkɛla.”
^ Anzɛɛ “ese.”
