Ɛzoanvolɛma Gyima 25:1-27
25 Ɔti, mɔɔ Fɛsetɛse+ rale maanzinli ne anu na ɔbɔle ye gyima bo la, ye kenle nsa anzi ɔvile Sizalia ɔhɔle Gyɛlusalɛm.
2 Na ɛsɔfo mgbanyinli nee Dwuuma mgbanyima ne mɔ hanle Pɔɔlo anwo edwɛkɛ ɛtane hilele ye.+ Yemɔti bɛbɔle ɔ bo bɛkpale Fɛsetɛse kyɛlɛ
3 kɛ ɔlo bɛ* na ɔzoa ɔmaa bɛhɔva Pɔɔlo bɛrɛla Gyɛlusalɛm. Noko ɛnee bɛlɛ adwenle kɛ bɛbazia Pɔɔlo wɔ adenle nu bɛahu ye.+
4 Noko Fɛsetɛse buale kɛ ɔwɔ kɛ Pɔɔlo da efiade wɔ Sizalia na ɔnrɛhyɛ ɔdaye mumua ne ɔbazia yeahɔ ɛkɛ.
5 Ɔhanle kɛ: “Yemɔti saa bɛnea na amgba nrenyia ne ɛyɛ debie ɛtane a ɛnee bɛmaa bɛ mgbanyima ne mɔ nee me ɛhɔ na bɛhɔha bɛ edwɛkɛ ne.”+
6 Ɔti mɔɔ ɔlile kenle kɛyɛ mɔtwɛ anzɛɛ bulu wɔ bɛ nwo ɛkɛ ne la, ɔhɔle Sizalia, na aleɛ hyenle la ɔhɔdɛnlanle ndɛnebualɛ ebia nu na ɔhanle kɛ bɛva Pɔɔlo bɛrɛla.
7 Mɔɔ ɔrale la, Dwuuma mɔɔ vi Gyɛlusalɛm rale la bɔle ye yiale, bɛdole ye ɛzonle mgbole dɔɔnwo, noko bɛannyia nwolɛ daselɛ biala.+
8 Noko Pɔɔlo hilehilele ye edwɛkɛ ne anu kɛ: “Metɛyɛle ɛtane biala mɔɔ tia Dwuuma Mɛla ne anzɛɛ ɛzonlenlɛsua ne anzɛɛ Siza a.”+
9 Kɛmɔ ɛnee Fɛsetɛse kulo kɛ ɔnyia Dwuuma ne anyunlu ɛlolɛ la ati,+ ɔbuale Pɔɔlo kɛ: “Ɛkulo kɛ ɛkɔ Gyɛlusalɛm na bɛkɔdi edwɛkɛ ne wɔ me nyunlu wɔ ɛkɛ ɔ?”
10 Noko Pɔɔlo hanle kɛ: “Megyi Siza ndɛnebualɛ ebia ne anyunlu, ɛleka mɔɔ ɔwɔ kɛ bɛdi me edwɛkɛ la. Metɛyɛle Dwuuma ɛtane biala, kɛ mɔɔ ɛdawɔ noko ɛlɛnwu ye wienyi la.
11 Saa amgba mele ɛtanevolɛ na meyɛ debie mɔɔ fɛta ewule a,+ menzulo kɛ bɛkɛhu me; emomu saa ɛzonle mɔɔ menli ɛhye mɔ ɛdo me la ɛnle nɔhalɛ a, ɛnee ɔnle kɛ awie biala ye me maa bɛ fa kpɔda bɛ. Medo me edwɛkɛ ne memaa Siza!”+
12 Mɔɔ Fɛsetɛse nee ye mgbanyima dendɛle wiele la, ɔbuale kɛ: “Wɔdo wɔ edwɛkɛ ne wɔmaa Siza a; ɛnee Siza ɛkɛ ne a ɛbahɔ a.”
13 Mekɛ ekyi guale nu la, Belemgbunli Agelepa nee Bɛnise rakpɔlale Fɛsetɛse wɔ Sizalia.
14 Kɛ mɔɔ ɛnee bɛbahyɛ ekyii wɔ ɛkɛ ne la ati, Fɛsetɛse vale Pɔɔlo edwɛkɛ ne dole belemgbunli ne anyunlu na ɔhanle kɛ:
“Nrenyia bie wɔ ɛke mɔɔ Filese gyakyile ye wɔ efiade ɛkɛ a,
15 na mekɛ mɔɔ ɛnee mewɔ Gyɛlusalɛm la, ɛsɔfo mgbanyinli nee Dwuuma mgbanyima ne mɔ hanle ɔ nwo edwɛkɛ hilele me+ na bɛzɛlɛle kɛ menli ye edwɛkɛ membua ye fɔlɛ.
16 Noko membuale bɛ kɛ ɔnle Wulomuma amaamuo kɛ bɛbaye awie mɔɔ bɛdo ye ɛzonle la bɛamaa kɛ bɛfa bɛakpɔda awie biala wɔ mekɛ mɔɔ ɔ nee menli mɔɔ dole ye ɛzonle ne la ɛtɛyiale nu na ɔtɛkilehilele ye edwɛkɛ ne anu wɔ bɛ nyunlu la.+
17 Ɔti mɔɔ bɛrale ɛke la, meandwenlehwenle me bo aze, emomu aleɛ hyenle ala la mendɛnlanle ndɛnebualɛ ebia ne anu na memaanle bɛvale nrenyia ne bɛrale.
18 Menli mɔɔ dole ye ɛzonle ne la dwazole gyinlanle, noko bɛangola bɛanga ninyɛndane mɔɔ menzuzule kɛ yeyɛ la biala bie wɔ ɔ nwo.+
19 Bɛ nee ye zule bɛdabɛ mumua ne bɛ ɛzonlenlɛ+ nee nrenyia bie mɔɔ bɛfɛlɛ ye Gyisɛse mɔɔ yewu noko Pɔɔlo ɛlɛka kɛ ɔde aze la anwo kpolera ala.+
20 Na kɛmɔ ɛnee mennwu mɔɔ meyɛ ye wɔ kpolerazulɛ ɛhye anwo la ati, membizale ye saa ɔkɛhulo kɛ ɔkɛhɔ Gyɛlusalɛm na bɛkɛli edwɛkɛ ne wɔ ɛkɛ a.+
21 Noko mɔɔ Pɔɔlo hanle kɛ bɛmaa ɔla efiade kɔkpula kɛ Maanle Maanle Belemgbunli ne kɛbua ye ndɛne la,+ menyɛle kɛ bɛva ye bɛzie kɔkpula kɛ mebava ye meahɔmaa Siza la.”
22 Akee Agelepa zele Fɛsetɛse kɛ: “Mekulo kɛ medame mumua ne metie nrenyia ne.”+ Ɔhanle kɛ, “Ɛhyema ɛbadie ye.”
23 Ɔti mɔɔ aleɛ hyenle la, Agelepa nee Bɛnise zieziele bɛ nwo hyeleenyi na bɛ nee sogyama mgbanyima nee mgbanyima mɔɔ wɔ suakpole ne azo la hɔle ɛleka mɔɔ bɛdi ye edwɛkɛ ne la; na Fɛsetɛse maanle bɛvale Pɔɔlo bɛrale.
24 Na Fɛsetɛse hanle kɛ: “Belemgbunli Agelepa nee bɛdabɛ mɔɔ bɛ nee yɛ wɔ ɛke la amuala, bɛnwu nrenyia ɛhye, Dwuuma amuala kpale me kyɛlɛ wɔ Gyɛlusalɛm nee ɛke na bɛdeɛdeanle nu kɛ, ɔnle kɛ ɔtɛnla ngoane nu bieko.+
25 Noko menwunle kɛ ɔtɛyɛle debie biala mɔɔ maa ɔfɛta ewule a.+ Yemɔti mekɛ mɔɔ nrenyia ɛhye hanle kɛ yedo ye edwɛkɛ ne yemaa Maanle Maanle Belemgbunli ne la, menzile kpɔkɛ kɛ mebava ye meahɔ.
26 Noko menlɛ debie kpaziwɔkɛ mɔɔ mekɛlɛ meahɔmaa me Menle ne a. Yemɔti meva ye mera bɛ kɔsɔɔti bɛ nyunlu ɛke, na ye titili ɛdawɔ Belemgbunli Agelepa ɛ nyunlu, amaa saa bɛneɛnlea ye edwɛkɛ ne anu bɛwie a, meanyia debie meahɛlɛ.
27 Ɔluakɛ menea a ndelebɛbo ɛnle nu kɛ mebava pilizanli meahɔ na menrɛhile ɛzonle mɔɔ bɛdo ye la.”
Ɔbodwɛkɛ
^ Giliki aneɛ nu, “ɔboa bɛ ɔmaa bɛ sa ɛha ye.”
