Ɛzoanvolɛma Gyima 22:1-30
22 “Mediema nee egya mɔ, akee bɛmaa mengilehile me edwɛkɛ ne anu mengile bɛ.”+
2 Mɔɔ bɛdele kɛ ɔlɛtendɛ yeahile bɛ wɔ Hibulu aneɛ nu la, akee bɛyɛle koonwu kpalɛ, na ɔhanle kɛ:
3 “Mele Dwuunli,+ bɛwole me wɔ Taasɛse mɔɔ wɔ Selesea+ la, noko Gameeleɛle+ a hilele me debie wɔ suakpole ɛhye azo, kɛ mɔɔ yɛ nenyia mɔ Mɛla ne kile la pɛpɛɛpɛ a,+ na ɛnee mebɔ Nyamenle gyima ne anwo mɔdenle kɛ mɔɔ bɛ muala bɛyɛ ye ɛnɛ la.+
4 Menyɛle menli mɔɔ boka Adenle ɛhye anwo la kpɔdekpɔde, memaanle bɛkyekyele bɛ bɛguale bɛ efiade na bɛhunle bɛ,+
5 kɛ mɔɔ ɛsɔfo kpanyinli ne nee mgbanyima ne mɔ amuala di nwolɛ daselɛ la. Eza menliele ngɛlata wɔ bɛ lɔ kɛ mefa meahɔmaa mediema mɔɔ wɔ Damasekɛse la, na menzile nu kɛ mekahye bɛdabɛ mɔɔ bɛwɔ ɛkɛ la meakyekye bɛ meara Gyɛlusalɛm meamaa bɛahwe bɛ nzo.
6 “Na mɔɔ melua adenle zo melɛkɔ na ɔka ekyii medwu Damasekɛse la, kɛyɛ ewiazo bulu nee nwiɔ, arɛlevilɛ nu ala, wienyi kpole bie vi anwuma rabɔle yiale me,+
7 na mempɛle menfinle na mendele ɛnelɛ bie kɛ: ‘Sɔɔlo, Sɔɔlo, duzu ati a ɛlɛyɛ me kpɔdekpɔde ɛ?’
8 Membuale kɛ: ‘Yɛmenle, ɛdawɔ nwane ɔ?’ Na ɔbuale me kɛ: ‘Medame Gyisɛse mɔɔ mevi Nazalɛte mɔɔ ɛlɛyɛ me kpɔdekpɔde la ɔ.’
9 Na menli mɔɔ nee me lua la nwunle wienyi ne, noko bɛande ahenle mɔɔ dendɛle hilele me la ane.
10 Akee menganle kɛ: ‘Yɛmenle, duzu a ɔwɔ kɛ meyɛ a?’ Awulae zele me kɛ: ‘Dwazo na kɔ Damasekɛse na bɛbaha debie biala mɔɔ ɔwɔ kɛ ɛyɛ la bɛahile wɔ.’+
11 Noko kɛmɔ wienyi ne anyunlunyia ne ammaa meannwu debie la ati, menli mɔɔ nee me lua la sosɔle me sa vale me hɔle Damasekɛse.
12 “Ɛnee nrenyia bie mɔɔ bɛfɛlɛ ye Ananayase, mɔɔ ɔdi Mɛla ne azo kpalɛ na Dwuuma amuala ka ɔ nwo edwɛkɛ kpalɛ la wɔ ɛkɛ,
13 ɔrale me nwo ɛkɛ. Ɔgyinlanle me nwo ɛkɛ ne na ɔzele me kɛ: ‘Adiema Sɔɔlo, nwu debie bieko!’ Na ɛkɛ ne ala memaanle me nye zo na menwunle ye.+
14 Ɔhanle kɛ: ‘Yɛ nenyia mɔ Nyamenle ne ɛkpa wɔ kɛ ɛnwu ye ɛhulolɛdeɛ, na ɛnwu tenlenenli ne+ na ɛde ɔ ne,
15 ɔluakɛ ɛbali ɔ nwo daselɛ wɔaha ninyɛne mɔɔ wɔde nee mɔɔ wɔnwu ye la wɔahile menli muala.+
16 Na duzu a akee ɛlɛkendɛ a? Dwazo, maa bɛzɔne* wɔ na bɔ ye duma fa wowo wɔ ɛtane ne mɔ.’+
17 “Noko mɔɔ menziale mengɔle Gyɛlusalɛm+ na melɛyɛ asɔne wɔ ɛzonlenlɛsua ne anu la, menwunle ɛnyelɛzodeɛnwunlɛ bie
18 na menwunle kɛ ɔlɛka yeahile me kɛ: ‘Ka ɛ nwo fi Gyɛlusalɛm ɛke, ɔluakɛ bɛnrɛlie me nwo daselɛ ne mɔɔ ɛlɛdi la bɛnrɛdo nu.’+
19 Na menganle kɛ: ‘Awulae, bɛdabɛ mumua ne bɛze ye wienyi kɛ ɛnee mekɔ nyianu azua ne mɔ anu na mebo bɛdabɛ mɔɔ bɛdie wɔ bɛdi la na megua bɛ efiade;+
20 na mɔɔ bɛwola wɔ dasevolɛ Sitivin mogya bɛagua la, ɛnee megyi ɛkɛ, na menliele mendole nuhua, na meneanle bɛdabɛ mɔɔ bɛlɛku ye la adɛladeɛ ne mɔ azo.’+
21 Noko ɔzele me kɛ: ‘Kɔ, ɔluakɛ mebazoa wɔ wɔ maanle maanle mɔɔ wɔ moamoa la anu.’”+
22 Na bɛdiele ye too ɔhanle edwɛkɛ ɛhye. Akee bɛdeɛdeanle nu bɛhanle kɛ: “Ye nrenyia ɛhye fi azɛlɛ ye azo, ɔluakɛ ɔnfɛta kɛ ɔtɛnla aze!”
23 Kɛmɔ ɛnee bɛlɛteɛdea nu bɛavuandivuandi bɛ adɛladeɛ aguzo ne mɔ bɛagua, na bɛsande munlutu wɔ anwomanyunlu la ati,+
24 sogyama kpanyinli ne hanle kɛ bɛva Pɔɔlo bɛrɛla ɛleka mɔɔ sogyama ne de la, na ɔhanle kɛ ɔwɔ kɛ bɛbo* ye na bɛbizebiza ye edwɛkɛ amaa yeanwu debie fɔɔnwo mɔɔ ɔti bɛlɛteɛdea nu bɛagua Pɔɔlo anwo zo la.
25 Noko mɔɔ bɛzanle ye nu kɛ bɛbo ye la, Pɔɔlo zele sogya kpanyinli ne mɔɔ gyi ɛkɛ la kɛ: “Asoo mɛla maa adenle kɛ bɛkɛbo Wulomunli wɔ mekɛ mɔɔ bɛtɛbuale ye fɔlɛ* la ɔ?”+
26 Mɔɔ sogya kpanyinli ne dele ɛhye la, ɔhɔle sogyama kpanyinli ne anwo ɛkɛ na ɔzele ye kɛ: “Duzu a ɛkpondɛ kɛ ɛyɛ a? Ɔluakɛ nrenyia ɛhye le Wulomunli.”
27 Ɔti sogyama kpanyinli ne hɔle ɔ nwo ɛkɛ na ɔbizale ye kɛ: “Saa ɛle Wulomunli a ka kile me?” Ɔhanle kɛ: “Ɛhɛe.”
28 Sogyama kpanyinli ne buale kɛ: “Menduale ezukoa kpole kpalɛ na meahola meayɛ Wulomunli.” Pɔɔlo hanle kɛ: “Mame, bɛwole me Wulomunli.”+
29 Ɔti ɛkɛ ne ala menli mɔɔ anrɛɛ bɛbo ye na bɛabizebiza ye edwɛkɛ ne la hwenle bɛ nwo vile ɔ nwo ɛkɛ; na mɔɔ sogyama kpanyinli ne nwunle kɛ ɔle Wulomunli na yegua ye kyeenyi la, ye ahonle dule.+
30 Ɔti aleɛ hyenle la, kɛmɔ ɛnee ɔkpondɛ kɛ ɔnwu deɛmɔti Dwuuma ne ɛlɛto ye ɛzonle la ati, ɔyele ye na ɔmaanle ɛsɔfo mgbanyinli ne mɔ nee Sanhedelin ne amuala rayiale nu. Akee ɔmaanle Pɔɔlo dwule aze na ɔmaanle ɔgyinlanle bɛ avinli.+
