Ɛzoanvolɛma Gyima 19:1-41
19 Mɔɔ Apɔlɔso+ wɔ Kɔlente la, Pɔɔlo hɔle maanzinli ne mɔ mɔɔ ɛmbikye nyevile ne la anu na ɔrale Ɛfɛsɛse.+ Na ɔnwunle ɛdoavolɛma bie wɔ ɛkɛ
2 na ɔbizale bɛ kɛ: “Mekɛ mɔɔ bɛrayɛle diedima la, bɛnyianle sunsum nwuanzanwuanza ɔ?”+ Bɛbuale ye kɛ: “Kyɛkyɛ o, yɛtɛtele ye ɛlɛ kɛ sunsum nwuanzanwuanza bie wɔ ɛkɛ.”
3 Ɔti ɔbizale bɛ kɛ: “Ɛnee ɛzɔnenlɛ* ne boni a bɛnyianle a?” Bɛbuale ye kɛ: “Dwɔn ɛzɔnenlɛ ne ɔ.”+
4 Pɔɔlo hanle kɛ: “Dwɔn zɔnenle menli vale yɛle anlubɛnwo nwo sɛkɛlɛneɛ,+ na ɔzele menli ne kɛ bɛlie mɔɔ ɔli ɔ nzi ɔlɛba+ mɔɔ yemɔ a le Gyisɛse la bɛli.”
5 Mɔɔ bɛdele ɛhye la, bɛmaanle bɛzɔnenle bɛ wɔ Awulae Gyisɛse duma nu.
6 Na mekɛ mɔɔ Pɔɔlo vale ɔ sa guale bɛ nwo zo la, sunsum nwuanzanwuanza ne rale bɛ nwo zo+ na bɛbɔle ɔ bo bɛhanle aneɛ ngakyile nee ngapezo.+
7 Ɛnee bɛ muala bɛle mrenyia kɛyɛ 12.
8 Ɔhɔle nyianusua ne anu,+ ɔvale akɛnrazilɛ ɔdendɛle too siane nsa, ɔmaanle ɛdendɛlɛ na ɔ nee bɛ zuzule Nyamenle Belemgbunlililɛ ne anwo wɔ adenle mɔɔ tɔ ɛnzolɛ nu la azo.+
9 Na mɔɔ bie mɔ anlie anli fee, na bɛhanle Adenle Ne+ anwo edwɛkɛ ɛtane wɔ menli ne anyunlu la, ɔhwenle ɔ nwo ɔvile bɛ nwo+ na ɔ nee ɛdoavolɛma ne hɔle, na ɛnee ɔmaa ɛdendɛlɛ dahuu wɔ Taelanɛse sukulu sua ne anu.
10 Ɛhye hɔle zo too ɛvolɛ nwiɔ, yemɔti bɛdabɛ mɔɔ bɛwɔ Ehyea maanzinli ne anu la, Dwuuma nee Gilikima amuala dele Awulae edwɛkɛ ne.
11 Na Nyamenle luale Pɔɔlo anwo zo yɛle nwanwane ninyɛne mgbole dɔɔnwo,+
12 yemɔti bɛvale ye adɛladeɛ nee ye aguzo bɔbɔ bɛhɔguale wuliravolɛma anwo zo+ na bɛ ewule ne mɔ hɔle, yɛɛ sunsum ɛtane ne mɔ vile bɛ nwo dule.+
13 Noko Dwuuma bie mɔ mɔɔ bɛluolua nu bɛtu sunsum ɛtane la noko bɔle mɔdenle kɛ bɛbabɔ Awulae Gyisɛse duma wɔ bɛdabɛ mɔɔ sunsum ɛtane wɔ bɛ nwo la anwo zo, bɛka kɛ: “Mese wɔ wɔ Gyisɛse mɔɔ Pɔɔlo ka ɔ nwo edwɛkɛ la duma nu kɛ ɛvi ɔ nwo tu.”+
14 Ɛnee Dwuuma ɛsɔfo kpanyinli bie mɔɔ bɛfɛlɛ ye Siva la amra mrenyia nsuu a yɛ ɛhye a.
15 Noko sunsum ɛtane ne buale bɛ kɛ: “Meze Gyisɛse+ yɛɛ meze Pɔɔlo;+ na bɛmɛ bɛle nwane mɔ?”
16 Akee nrenyia ne mɔɔ sunsum ɛtane ne wɔ ɔ nwo la hɔle bɛ nwo zo, ɔ nee bɛ honle ngoko ngoko na ɔlile bɛ nwo zo konim, yemɔti bɛlɛle bɛ nwo zɔ bɛnriandile bɛvile sua nu ɛkɛ ne mɔɔ ɛnee bɛbodɛboda a.
17 Awie biala dele edwɛkɛ ɛhye, Dwuuma nee Gilikima mɔɔ wɔ Ɛfɛsɛse la amuala; na ɛzulolɛ hanle bɛ muala na bɛhɔle zo bɛyele Awulae Gyisɛse duma ne ayɛlɛ.
18 Na bɛdabɛ mɔɔ bɛrayɛle diedima la anu dɔɔnwo rahanle bɛ nyɛleɛ ne mɔ wɔ bagua nu.
19 Nɔhalɛ nu, ngonyiama ne anu dɔɔnwo kpalɛ vale bɛ mbuluku rayelale bɛ maanle awie biala nwunle ye.+ Na mɔɔ bɛbule nwolɛ mgbonda la, bɛnwunle kɛ bɛ bolɛ le dwɛtɛ fufule 50,000.
20 Na ɔlua Gyihova* tumi ne ati, ye edwɛkɛ ne hɔle zo dɛlɛle na ɔlile konim dɔɔnwo.+
21 Mɔɔ ɛhye mɔ zile la anzi, Pɔɔlo zile kpɔkɛ kɛ saa ɔvi Masidonea+ nee Akaya a, ɔbadoa zo yeahɔ Gyɛlusalɛm.+ Ɔhanle kɛ: “Saa mekɔ ɛkɛ a, ɔwɔ kɛ mekɔ Wulomu noko.”+
22 Yemɔti ɔzoanle ye boavolɛma ne mɔ nwiɔ, Timote+ nee Yilasetɛse+ wɔ Masidonea, noko yemɔ ɔdɛnlanle Ehyea maanzinli ne anu ekyii.
23 Mekɛ zɔhane, basabasayɛlɛ kpole bie+ zile mɔɔ fale Adenle Ne+ anwo a.
24 Ɔluakɛ ɛnee dwinvolɛ bie mɔɔ bɛfɛlɛ ye Dimiteleɛse, mɔɔ fa dwɛtɛ fufule yɛ Aatɛmese ɛzonlenlɛsua la, ɛmaa dwinvolɛma ne ɛnyia nvasoɛ dɔɔnwo.+
25 Ɔboɔboale bɛ nee awie mɔ mɔɔ bɛyɛ zɔhane gyima ne bie la anloa na ɔhanle kɛ: “Ayi mɔ, bɛ muala bɛze kɛ gyima ɛhye a maa yɛnyia yɛ nwo a.
26 Kɛkala bɛnwu ye yɛɛ bɛde kɛ tɛ Ɛfɛsɛse+ ɛke angome, emomu asɛɛ Ehyea maanzinli ye anu amuala, Pɔɔlo ɛhye ɛli menli dɔɔnwo adwenle na yemaa bɛnyia adwenle fofolɛ kɛ nyamenle mɔɔ bɛva bɛ sa bɛyɛ la ɛnle nyamenle fee.+
27 Bieko, saa yɛmaa ɛhye kɔ zo a, tɛ yɛ gyima ɛhye angome a bazɛkye a, emomu, bɛbabu nyamenle raalɛ Aatɛmese mɔɔ le kpole la ɛzonlenlɛsua ne debie mgbane, na anyunlunyia mɔɔ bɛfa bɛsonle ye wɔ Ehyea maanzinli ye anu nee azɛlɛ ye azo amuala la babɔ ye.”
28 Mɔɔ menli ne dele ɛhye la bɛvale ɛya kpole, na bɛdeɛdeanle nu kɛ: “Ɛfɛsɛsema Aatɛmese ne le kpole!”
29 Ɔti suakpole ne azo yɛle begyebegye, na bɛ muala bɛhɔhwenle Geeyɛse nee Alesetaakɛse,+ Masidoneama mɔɔ nee Pɔɔlo lua la bɛhɔle nwɔhoalilɛleka ne.
30 Pɔɔlo ɛdeɛ, ɛnee ɔkpondɛ kɛ ɔkɔ menli ne anu, noko ɛdoavolɛma ne ammaa ye adenle.
31 Mgbanyima mɔɔ nea ɛvoyia nee nwɔhoa zo bie mɔ mɔɔ bɛle ɔ gɔnwo mɔ bɔbɔ la dole ye nrɛlaleɛ kɛ ɔmmafa ye ngoane ɔto esiane nu ɔkɔ nwɔhoalilɛleka ne.
32 Nɔhalɛ nu, mɔɔ bie mɔ ɛlɛka edwɛkɛ ɛhye la ɛnee bie mɔ noko ɛlɛka edwɛkɛ fofolɛ; ɔluakɛ basabasayɛlɛ kpole bie zile ayiama ne anu, noko ɛnee menli dɔɔnwo ɛnze deɛmɔti bɛrayia ɛkɛ ne la.
33 Ɔti bɛvale Alɛzanda bɛvile menli ne anu bɛvindele, Dwuuma ne hwenle ye rale ɔ nyunlu, na Alɛzanda maanle ɔ sa zo kɛ ɔkpondɛ kɛ ɔkilehile edwɛkɛ nu ɔkile menli ne.
34 Noko mɔɔ bɛnwunle kɛ ɔle Dwuunli la, bɛ muala bɛbɔle nu bɛdeɛdeanle nu kɛyɛ dɔnehwele nwiɔ kɛ: “Ɛfɛsɛsema Aatɛmese ne le kpole!”
35 Mɔɔ suakpole ne azo kɛlɛvolɛ ne maanle menli ne yɛle koonwu la, ɔhanle kɛ: “Ɛfɛsɛsema, nwane a ɛnze kɛ Ɛfɛsɛse suakpole ye a nea Aatɛmese kpole ne ɛzonlenlɛsua ne nee ananze ne mɔɔ vi anwuma radɔle aze la azo a?
36 Kɛmɔ awie biala ɛngola ɛnzu ɛhye anwo kpolera la ati, ɔwɔ kɛ bɛka bɛ ahonle bɛto azule nu na ɔnle kɛ bɛpele bɛ nwo bɛyɛ debie.
37 Ɔluakɛ bɛva mrenyia ɛhye mɔ mɔɔ bɛtɛwuale debie wɔ ɛzonlenlɛsua nu anzɛɛ bɛtɛtendɛle bɛtɛtiale yɛ nyamenle raalɛ ne la bɛra ɛke.
38 Yemɔti saa Dimiteleɛse+ nee dwinvolɛma ne mɔ mɔɔ bɛ nee ye lua la lɛ edwɛkɛ bie tia awie a, kenle mɔɔ bɛfa bɛdi edwɛkɛ wɔ kɔɔto la wɔ ɛkɛ yɛɛ yɛlɛ amɛnladoma;* awie lɛ edwɛkɛ tia ɔ gɔnwo a, ɔva ɔrɛla ɛkɛ.
39 Noko saa bɛkpondɛ debie gyɛne bieko a, ɛnee ɔwɔ kɛ bɛyɛ ye kɛ mɔɔ mɛla ne kile la.
40 Ɔluakɛ edwɛkɛ ɛhye mɔɔ ɛzi ɛnɛ la bahola ava yɛ ado ngyegyelɛ nu, bɛbahola bɛado yɛ ɛzonle kɛ yɛlɛte atua ɔluakɛ yɛnlɛ debie mɔɔ yɛbagyinla zo yɛahile deɛmɔti basabasayɛlɛ ɛhye ɛra la anu a.”
41 Na mɔɔ ɔhanle ɛhye ɔwiele la, ɔmaanle ayiama ne zandenle.
