Ɛzoanvolɛma Gyima 12:1-25
12 Mekɛ zɔhane anu ala Belemgbunli Hɛlɔdo bɔle ɔ bo kɛ ɔyɛ asafo ne anu amra bie mɔ kpɔdekpɔde.+
2 Ɔvale konle dadeɛ ɔhunle Dwɔn adiema Gyemise.+
3 Mɔɔ ɔnwunle kɛ Dwuuma anye ɛlie nwolɛ la, ɔdoale zo ɔhɔhyele Pita. (Ɛhye zile wɔ Paano Mɔɔ Mgbɔvonle Ɛnle Nu mekɛ ne anu.)+
4 Ɔhyele ye ɔdole ye efiade+ na ɔmaanle sogyama ekpunli nna mɔɔ sogyama nna a wɔ ko biala anu la hakyihakyile bɛ nwo zinzale ye, na ɔyɛle kɛ ɔbaye ye* yeamaa menli ne wɔ Akpabɛnwo ne anzi.
5 Yemɔti Pita lale efiade ne, noko asafo ne zɛlɛle Nyamenle ɛsesebɛ maanle ye.+
6 Nɔe ne mɔɔ aleɛ kye a Hɛlɔdo baye ye amaa bɛ la, ɛnee Pita la sogyama nwiɔ avinli na bɛva kyeenyi nwiɔ bɛgua ye, yɛɛ sinzavolɛma gyigyi efiade anlenkɛ ne anloa ɛlɛsinza.
7 Na nea! Gyihova* anwumabɔvolɛ ragyinlanle ɛkɛ,+ na wienyi bie dale efiade ɛkɛ ne. Ɔbɔle Pita abati ɔdunwuele ye na ɔhanle kɛ: “Maa ɔyɛ ndɛ dwazo!” Na kyeenyi ne vi ɔ sa kpolole guale.+
8 Anwumabɔvolɛ ne zele ye kɛ: “Wula wɔ tɛladeɛ ne nee wɔ mgbɔlaboa ne.” Ɔyɛle ye zɔ. Akee ɔzele ye kɛ: “Wula wɔ tɛladeɛ aguzo ne na toa me.”
9 Na ɔvindele ɔdoale ye, noko yeannwu kɛ mɔɔ anwumabɔvolɛ ne ɛlɛyɛ la ɛlɛsi amgba. Nɔhalɛ nu, ɛnee ɔdwenle kɛ ɛnyelɛzodeɛnwunlɛ ɔ.
10 Bɛzenle sinzavolɛma mɔɔ limoa nee mɔɔ tɔ zo nwiɔ la anwo, bɛdwule bulalɛ anlenkɛ kpole ne mɔɔ bɛdua nu bɛfinde suakpole ne azo anloa la, ɔ ngome ɔbukele ɔmaanle bɛ. Mɔɔ bɛvindele la, bɛluale adenle ne azo bɛhɔdwule awɔdenle ko azo, na ɛkɛ ne ala anwumabɔvolɛ ne gyakyile ye hɔle.
11 Na mɔɔ Pita nwunle mɔɔ ɛzi la, ɔhanle kɛ: “Kɛkala menwu ye wienyi kɛ Gyihova* zoanle ye anwumabɔvolɛ maanle ɔraliele me ɔvile Hɛlɔdo asa anu nee debie biala mɔɔ ɛnee Dwuuma anye la kɛ ɔbazi me nwo zo la anu.”+
12 Mɔɔ ɔnwunle ɛhye la, ɔhɔle Dwɔn mɔɔ bɛfɛlɛ ye Maake+ la ɛ mame Mɛle sua nu, ɛleka mɔɔ ɛnee menli dɔɔnwo ɛyia na bɛlɛyɛ asɔne la.
13 Mekɛ mɔɔ ɔbɔle anuhɔlɛ anlenkɛ ne anu la, sonvolɛ bɛlɛra bie mɔɔ bɛfɛlɛ ye Wuloda la rale kɛ ɔbanlea ahenle holɛ ko.
14 Mɔɔ ɔdele Pita ane la, anyelielɛ ngome ammaa yeambuke anlenkɛ ne, emomu ɔziale ɔhɔbɔle bɛ amaneɛ kɛ Pita gyi anlenkɛ ne anzi lɔ.
15 Bɛzele ye kɛ: “Debie ɛlɛyɛ wɔ.” Noko ɔhanle ye anyebolo zo kɛ ɔle nɔhalɛ. Bɛhanle kɛ: “Ye anwumabɔvolɛ ɔ.”
16 Noko Pita hɔle zo gyinlanle ɛkɛ ne bɔle nu. Mɔɔ bɛbukele anlenkɛ ne la, bɛnwunle ye na ɔzinle bɛ nwo.
17 Noko ɔmaanle ɔ sa zo kɛ bɛyɛ koonwu na ɔhanle kɛzi Gyihova* yele ye vile efiade ne la amuala ɔhilele bɛ, na ɔzele kɛ: “Bɛhɔbɔ Gyemise+ nee mediema ne mɔ amaneɛ.” Akee ɔvindele na ɔhɔle ɛleka fofolɛ.
18 Mɔɔ aleɛ hyenle la, sogyama ne yɛle basaa wɔ mɔɔ ɛzi Pita anwo zo la anwo.
19 Hɛlɔdo kpondɛle ye ɛsesebɛ na mɔɔ yeannwu ye la, ɔbizebizale sinzavolɛma ne edwɛkɛ na ɔmaanle bɛvale bɛ bɛhɔle kɛ bɛhɔhwe bɛ nzo;+ akee ɔvile Dwudiya ɔhɔle Sizalia na ɔdɛnlanle ɛkɛ ne mekɛ ekyi.
20 Ɛnee yeva* menli mɔɔ wɔ Taya nee Saedɛn la anwo ɛya.* Yemɔti bɛyɛle adwenle ko na bɛhɔle ɔ nwo ɛkɛ, na mɔɔ bɛ nee Belasetɛse, kpanyinli mɔɔ nea belemgbunli ne sua nu* ninyɛne zo dendɛle wiele la, bɛkpondɛle anzodwolɛ, ɔluakɛ ɛnee bɛnyia bɛ aleɛ bɛfi belemgbunli ne maanle nu.
21 Kenle mɔɔ bɛhilele la dwule la, Hɛlɔdo wulale belemgbunli tɛladeɛ na ɔdɛnlanle ndɛnebualɛ ebia zo ɔdendɛle ɔhilele bɛ.
22 Na menli mɔɔ rayiale la bɔle ɔ bo deɛdeanle nu kɛ: “Ɛhye le nyamenle bie ane, na tɛ sonla ne ɔ!”
23 Ɛkɛ ne ala Gyihova* anwumabɔvolɛ bɔle ye, ɔluakɛ yeanwula Nyamenle anyunlunyia, ɔlɔle azonlɛ na ɔwule.
24 Na Gyihova* edwɛkɛ ne hɔle zo dɛlɛle na menli dɔɔnwo liele lile.+
25 Na Baanabase+ nee Sɔɔlo ɛdeɛ, mɔɔ bɛwiele moalɛ gyima ne yɛ wɔ Gyɛlusalɛm la,+ bɛziale na bɛhɔvale Dwɔn+ mɔɔ eza bɛfɛlɛ ye Maake la bɛbokale bɛ nwo bɛhɔle.
Ɔbodwɛkɛ
^ Anzɛɛ “ɔbaye ye yeabua ye ndɛne.”
^ Anzɛɛ “Ɛnee Hɛlɔdo ɛva.”
^ Anzɛɛ “ɔlɛko yeatia bɛ.”
^ Giliki aneɛ nu, “belemgbunli ne suakunlu lɔ.”
