Dwona 1:1-17

  • Dwona bɔle mɔdenle kɛ ɔnriandi Gyihova (1-3)

  • Gyihova maanle anwoma kpole bie dule (4-6)

  • Ngyegyelɛ ne vi Dwona (7-13)

  • Bɛvuandinle Dwona bɛdole nyevile ne anu (14-16)

  • Fɛlɛ kpole bie menle Dwona (17)

1  Gyihova hanle hilele Ametae ara Dwona*+ kɛ:  “Dwazo kɔ suakpole Nenɛvɛ+ azo na ka ndɛnebualɛ mɔɔ tia ye la kile ye, ɔluakɛ menwu bɛ amumuyɛyɛlɛ ne.”  Noko Dwona yɛle ye adwenle kɛ ɔnriandi Gyihova yeahɔ Tahyehye; ɔhɔle Dwɔpa na ɔnwunle meli bie mɔɔ ɛlɛkɔ Tahyehye la. Yemɔti ɔduale ye kakɛ ne na ɔhɔvole kɛ ɔ nee bɛ kɔ Tahyehye, na yeavi Gyihova anye zo.  Akee Gyihova maanle anwoma kpole bie dule nyevile ne azo, ahumu ne dule kpole kpalɛ wɔ nyevile ne azo yemɔti anrɛɛ meli ne bubu.  Meli kavolɛma ne mɔ ahonle dule kpole kpalɛ yemɔti bɛ nuhua ko biala bɔle ɔ bo kɛ ɔfɛlɛ ye nyamenle ne kɛ ɔboa ye. Na bɛbɔle ɔ bo kɛ bɛfuandi meli ne anu ninyɛne bɛagua nyevile ne anu amaa yeayɛ felafela.+ Noko ɛnee Dwona ɛwolo ɛhɔ meli ne abo nehane, ɔlale ɛkɛ na ɔlafele botoo.  Meli kavolɛma kpanyinli ne hɔle ɔ nwo ɛkɛ na ɔhanle kɛ: “Duzu ati a wɔlafe a? Dwazo, tea nu fɛlɛ wɔ nyamenle ne! Bie a nɔhalɛ Nyamenle ne bahile kɛ ɔdwenle yɛ nwo na yɛanwu.”+  Yemɔti bɛzele bɛ nwo ngoko kɛ: “Bɛrɛla, bɛmaa yɛgua ma*+ yɛkpondɛ ahenle mɔɔ ɛmaa esiane ɛhye ɛdo yɛ la.” Yemɔti bɛguale ma, na ma ne bɔle Dwona.+  Bɛzele ye kɛ: “Yɛsɛlɛ wɔ ka kile yɛ, ɛdawɔ a wɔmaa esiane ɛhye ɛdo yɛ la ɔ? Duzu gyima a ɛyɛ a, yɛɛ nienwu a ɛvi a? Maanle boni anu a ɛvi a, yɛɛ menli boni mɔ anu a ɛvi a?”  Ɔbuale kɛ: “Mele Hibulunli yɛɛ mesulo* Gyihova, Nyamenle ne mɔɔ wɔ anwuma la, Ahenle mɔɔ bɔle nyevile nee azɛlɛ resee la.” 10  Akee ɛhye maanle menli ne ahonle dule kpole kpalɛ na bɛbizale ye kɛ: “Duzu debie a wɔyɛ a?” (Menli ne nwunle kɛ ɔlɛnriandi Gyihova ɔluakɛ ɔhanle ɔhilele bɛ.) 11  Yemɔti bɛzele ye kɛ: “Duzu a yɛva yɛyɛ wɔ amaa nyevile ne agua amaa yɛ a?” Ɔluakɛ ɛnee ahumu ne ɛlɛmaa nyevile ne abu azɛlɛkye mgbole. 12  Ɔbuale kɛ: “Bɛmaa me zo na bɛvuandi me bɛdo nyevile ne anu, na nyevile ne bagua dii amaa bɛ; ɔluakɛ meze kɛ medame ti a ahumu ɛhye ɛlɛtu atia bɛ a.” 13  Noko akee menli ne bɔle mɔdenle kɛ bɛka meli ne bɛahɔ aze, noko bɛangola, ɔluakɛ ahumu ne maanle nyevile ne akee bule azɛlɛkye mgbole kpalɛ tiale bɛ. 14  Akee bɛdeanle nu bɛvɛlɛle Gyihova na bɛhanle kɛ: “O Gyihova, yɛsɛlɛ wɔ, mmamaa yɛwu ɔlua nrenyia ɛhye ati!* Mmamaa yɛdi tenlenenli mogya nwo ɛzonle, ɔluakɛ mɔɔ sɔ ɛ nye la a wɔyɛ a, O Gyihova.” 15  Akee bɛmaanle Dwona zo na bɛvuandinle ye bɛdole nyevile ne anu; na nyevile ne guale dii. 16  Menli ne zulole Gyihova kpole kpalɛ,+ ɔti bɛbɔle afɔle bɛmaanle Gyihova na bɛbɔle ye ɛwɔkɛ. 17  Akee Gyihova zoanle fɛlɛ kpole bie maanle ɔramenle Dwona, na Dwona lile alehyenlɛ nee aledwolɛ kenle nsa wɔ fɛlɛ ne akunlu.+

Ɔbodwɛkɛ

Ɔ bo kile “Abubule.”
Anzɛɛ “mesonle.”
Anzɛɛ “ɔlua nrenyia ɛhye ɛkɛla ti.”