Ayezaya 64:1-12
64 Saa anrɛɛ ɛkpakye anwuma anu na wɔadwu aze,Amaa ɛdawɔ ti awoka akpusu,
2 Kɛ mɔɔ senle maa ɛyɛne sɔ,Na senle ne maa nzule wu la a,Anrɛɛ wɔ agbɔvolɛ banwu wɔ duma,Na maanle maanle ne mɔ anwo awoso bɛ wɔ ɛ nyunlu!
3 Mekɛ mɔɔ ɛyɛle nwanwane ninyɛne mɔɔ yɛ nye ɛnla la,+Ɛdwule aze, na awoka ne mɔ kpusule wɔ ɛ nyunlu.+
4 Ɔvi tete, awie ɛtɛtele anzɛɛ ɛtɛtiele,Yɛɛ awie ɛtɛnwunle Nyamenle biala kɛ wɔmɔ ala,Mɔɔ ɛdi ɛboa menli mɔɔ anye la ɛ nwo zo* la.+
5 Ɛ nee menli mɔɔ fa fɛlɛkolilɛ yɛ mɔɔ tenrɛ la ɛyia,+Menli mɔɔ kakye wɔ na bɛdua wɔ ndenle ne mɔ azo la.
Nea! Ɛvale ɛya wɔ mekɛ mɔɔ yɛhɔle zo yɛyɛle ɛtane la,+Yɛyɛle zɔ mekɛ tendenle.
Asoo akee ɔwɔ kɛ ɛdie yɛ ngoane ɔ?
6 Yɛ muala yɛyɛ kɛ awie mɔɔ anwo ɛnde,Na yɛ tenlene nyɛleɛ kɔsɔɔti ɛyɛ kɛ amozihɔlɛ ɛdanlɛ.+
Yɛ muala yɛbanwoso kɛ nya,Na yɛ ɛtane ne mɔ bapia yɛ ahɔ kɛ anwoma.
7 Awie biala ɛnle ɛkɛ mɔɔ bɔ wɔ duma a,Awie biala ɛngeha ɔ nwo kɛ ɔsɔ wɔ,Ɔluakɛ wɔva ɛ nyunlu wɔvea yɛ,+Na wɔmaa yɛ ɛtane ne mɔ ɛzɛkye yɛ.*
8 Noko kɛkala, O Gyihova, ɛle yɛ Ze.+
Yɛmɛ, yɛle ndɛtɛlɛ, yɛɛ wɔmɔ a ɛle yɛ Nwovolɛ ne a;*+Yɛ muala yɛle ɛ sa anloa gyima.
9 O Gyihova, mmafa yɛ nwo ɛya kpole,+Yɛɛ mmakakye yɛ ɛtane ne mɔ dahuu.
Yɛbodo wɔ, nea yɛ, ɔluakɛ yɛ muala yɛle wɔ menli.
10 Wɔ azuamgbole nwuanzanwuanza ne mɔ ɛhakyi fienemgbole.
Zayɔn ɛhakyi fienemgbole,Gyɛlusalɛm ɛdɔ mgbane.+
11 Bɛva senle bɛyelaYɛ anyunlunyia sua* nwuanzanwuanza ne,Mɔɔ yɛ nenyia mɔ yele wɔ ayɛlɛ wɔ nu la,+Na ninyɛne kɔsɔɔti mɔɔ yɛ nye die nwo la ɛzɛkye.
12 O Gyihova, ɔlua ɛhye ati, asoo ɛbadɛnla ɛkɛ koonwu?
Asoo ɛbayɛ koonwu wɔamaa bɛahile yɛ nyane kpole ɔ?+
Ɔbodwɛkɛ
^ Anzɛɛ “si abotane kendɛ wɔ.”
^ Hibulu aneɛ nu, “wɔmaa yɛholo wɔ yɛ ɛtane ne mɔ asa anu.”
^ Anzɛɛ “ɛle Ahenle mɔɔ nwonle yɛ a.”
^ Anzɛɛ “ɛzonlenlɛ sua kɛnlɛma.”
