Ayezaya 59:1-21
59 Nea! Gyihova asa ɛnle ezinra somaa kɛ ɔkɛlie ngoane,+Yɛɛ ɔ nzo nu ɛnyɛ se kɛ ɔkɛde edwɛkɛ.+
2 Kyɛkyɛ, bɛ amumuyɛ ne mɔ a ɛhwe bɛ ɛvi bɛ Nyamenle ne anwo a.+
Bɛ ɛtane ne mɔ ɛmaa yeva ɔ nyunlu yevea bɛ,Na yekpo kɛ ɔkɛdie bɛ.+
3 Ɔluakɛ mogya ɛmaa bɛ sa nu ɛyɛ evinli+Yɛɛ ɛtane ɛyɛ bɛ sa mrɛlɛsɛka ne mɔ anwo evinli.
Bɛ nloa ka adalɛ edwɛkɛ,+ yɛɛ bɛ tafinlima ka ninyɛndane.
4 Awie biala ɛnga tenleneyɛlɛ nwo edwɛkɛ,+Yɛɛ awie biala kɔ kɔɔto a ɔnga nɔhalɛ.
Bɛfa bɛ nwo bɛto ninyɛne mgbane zo+ na bɛka edwɛkɛ mɔɔ nvasoɛ ɛnle zo.
Bɛnrenzɛ ngyegyelɛ na bɛwo munzule.+
5 Bɛbobɔ ɛwɔlɛ aholonvia,Yɛɛ bɛnwo kɛdɛba ndendane.+
Awie biala mɔɔ kɛli bɛ aholonvia ne bie la bawu,Yɛɛ kolonvia ne mɔɔ bɛkɛgelegele la bobɔ bɔna.
6 Bɛ ndendane ne ɛnrɛyɛ tɛladeɛ,Yɛɛ bɛnrɛva mɔɔ bɛyɛ la bɛnrɛheda bɛ nwo.+
Bɛ gyima le munzule,Yɛɛ basabasayɛlɛ wɔ bɛ sa nu.+
7 Bɛ gyakɛ nriandi kɔyɛ ɛtane,Yɛɛ bɛyɛ ye ndɛndɛ bɛka tenlenenli mogya bɛgua.+
Amumuyɛ ninyɛne a bɛdwenle nwo a;Ɛzɛkyelɛ nee amaneɛnwunlɛ wɔ bɛ ndenle nu.+
8 Bɛnze anzodwolɛ adenle,Yɛɛ pɛlepɛlelilɛ ɛnle bɛ ndenle nu.+
Bɛmaa bɛ ndenle kyeɛhyea;Awie biala mɔɔ kɛva zolɛ la ɛnrɛnwu anzodwolɛ.+
9 Ɛhye ati a pɛlepɛlelilɛ nee yɛ avinli ɛwa,Na tenleneyɛlɛ ɛmbikye yɛ la.
Yɛ nye la wienyi ade, noko nea, awozinli a wɔ ɛkɛ a;Yɛlɛkpondɛ alehyenlɛ wienyi, noko yɛtɛdua awozinli kabii nu.+
10 Yɛfuovua bane nwo kɛ anyenzinliravolɛma;Yɛdi nvuovua kɛ menli mɔɔ ɛnlɛ ɛnyelɛ.+
Yɛtɔ aze ewiazo henlema kɛ asɛɛ aledwolɛ nu;Yɛgyi menli mɔɔ anwo yɛ se la avinli a yɛle kɛ menli mɔɔ ɛwu la.
11 Yɛ muala yɛtea nu kɛ ezizileYɛɛ yɛkulu kɛ abubule la.
Yɛ nye la pɛlepɛlelilɛ ade, noko bie ɛnle ɛkɛ;Yɛlɛkpondɛ ngoanelielɛ noko ɔ nee yɛ avinli twe.
12 Ɔluakɛ yɛ atuadelɛ dɔɔnwo ne mɔ wɔ ɛ nyunlu;+Yɛ ɛtane ne mɔ anu ko biala di daselɛ tia yɛ.+
Ɔluakɛ yɛze yɛ atuadelɛ ne mɔNee yɛ ɛtane ne mɔ kpalɛ.+
13 Yɛdo mɛla yɛɛ yɛkpo Gyihova;Yɛhakyi yɛ nzi yɛzi yɛ Nyamenle ne.
Yɛha nzisi nee atuadelɛ nwo edwɛkɛ;+Yɛzuzu adalɛ edwɛkɛ nwo wɔ yɛ ahonle nu yɛmaa yevinde yɛ nloa.+
14 Bɛhwe pɛlepɛlelilɛ bɛhɔ ɔ nzi,+Yɛɛ tenleneyɛlɛ gyi moamoa;+Ɔluakɛ nɔhalɛlilɛ ɛdɔ aze wɔ gua ne azo,Yɛɛ mɔɔ tenrɛ la ɛngola ɛmba ɛkɛ.
15 Nɔhalɛlilɛ ɛminli,+Yɛɛ bɛwua awie biala mɔɔ kɛhwe ɔ nwo kɛvi ɛtane nwo la anwo ninyɛne.
Gyihova nwunle ɛhye na ɔ nye anlie nwolɛ,*Ɔluakɛ ɛnee pɛlepɛlelilɛ ɛnle ɛkɛ.+
16 Ɔnwunle kɛ awie biala ɛnle ɛkɛ,Na ɔzinle ɔ nwo kɛ awie amkpa bɛ ti kyɛlɛ la,Ɔti ɔ sa vale ngoanelielɛ* rale,Na ye tenleneyɛlɛ ne boale ye.
17 Akee ɔwulale tenleneyɛlɛ kɛ konle tɛladeɛNa ɔzoale ngoanelielɛ* bulalɛ kyɛlɛ ne.+
Ɔvale nzenralɛlilɛ tɛladeɛ ne ɔwulale+Na ɔvale mɔdenlebɔlɛ ɔkyekyele ɔ nwo kɛ tɛladeɛ aguzo.*
18 Ɔbadua bɛ kakɛ wɔ mɔɔ bɛyɛ la anwo:+
Ɔbava ɛya yeara menli mɔɔ kyi ye la anwo zo, ɔbahwe ye agbɔvolɛ anzo,+
Na yeadua mbɔra ne mɔ kakɛ kɛ mɔɔ ɔfɛta la.
19 Bɛbazulo Gyihova duma ne wɔ adɔleɛ nehaneNa bɛawula ye anyunlunyia wɔ aduduleɛ,Ɔluakɛ ɔbara kɛ azule mɔɔ ɛbu azeMɔɔ Gyihova sunsum ne pia ye la.
20 “Kpɔnevolɛ ne+ bara Zayɔn,+Ɔbara Gyekɔbo abozoamra mɔɔ bɛhwe bɛ nwo bɛvi mɛladonlɛ nwo la ɛkɛ,”+ kɛ Gyihova se la ɛne.
21 “Mame, ngyekyeleɛ mɔɔ me nee bɛ bayɛ la ɛne,”+ Gyihova a se a. “Me sunsum ne mɔɔ wɔ ɛ nwo zo nee me edwɛkɛ ne mɔɔ meva mewula ɛ nloa la ɛnrɛvi ɛ nloa anu anzɛɛ ɛ mra nloa anu anzɛɛ wɔ nlɔnra nloa anu, ɔvi ɛnɛ mɔɔ kɔ la yɛɛ dahuu,” Gyihova a se a.
Ɔbodwɛkɛ
^ Hibulu aneɛ nu, “na ɛnee ɔle ɛtane wɔ ɔ nye zo.”
^ Anzɛɛ “konimlilɛ.”
^ Anzɛɛ “konimlilɛ.”
^ Anzɛɛ “tɛladeɛ aguzo mɔɔ ɛnlɛ ɔ sa.”
