Ayezaya 42:1-25
42 Nea! Me sonvolɛ+ mɔɔ meboa ye!
Awie mɔɔ mekpa nu meye ye+ na melie ye medo nu!*+
Meva me sunsum ne mewula ye nu;+Ɔbava pɛlepɛlelilɛ yearɛlɛ maanle maanle ne mɔ.+
2 Ɔnrɛdea nu anzɛɛ ɔnrɛmaa ɔ ne zo,Yɛɛ ɔnrɛmaa bɛnrɛde ɔ ne wɔ awɔdenle zo.+
3 Ɔnrɛbu ndɔ baka mɔɔ bɛkposo ye la,Yɛɛ ɔnrɛnlua kɛnlaneɛ nu nyɛma mɔɔ asɛɛ ɛnlu la.+
Ɔbava pɛlepɛlelilɛ yeara wɔ nɔhalɛlilɛ nu.+
4 Ɔnrɛyɛ bɛtɛɛ anzɛɛ ɔ nwo ɛnrɛbɛlɛ ye kɔkpula kɛ ɔbava pɛlepɛlelilɛ yeara azɛlɛ ne azo;+Na mbɔra ne mɔ ɛlɛkendɛ ye mɛla.*
5 Edwɛkɛ mɔɔ Gyihova, nɔhalɛ Nyamenle ne,Ahenle mɔɔ bɔle anwuma, Bedevinli Ko ne mɔɔ ɔtɛlɛ nuhua,+Ahenle mɔɔ tɛlɛ azɛlɛ ne nee debie biala mɔɔ wɔ zo la anu,+Ahenle mɔɔ maa menli mɔɔ de zo la ɛnwomenle+Na ɔmaa menli mɔɔ lua zo la sunsum la ɛha la ɛne:+
6 “Medame Gyihova, mevɛlɛ wɔ wɔ tenleneyɛlɛ nu;Mezɔ ɛ sa.
Mebabɔ ɛ nwo bane na meava wɔ meayɛ ngyekyeleɛ meamaa menli+Nee kɛnlaneɛ meamaa maanle maanle ne,+
7 Amaa wɔabuke anyenzinliravolɛma anye,+Wɔaye pilizama wɔavi efiadeNa wɔaye bɛdabɛ mɔɔ bɛde awozinli nu la wɔavi efiade.+
8 Medame a mele Gyihova a. Me duma ɛne;Menva me anyunlunyia memmaa awie biala,*Yɛɛ menva me ayɛlɛyelɛ memmaa ananze mɔɔ bɛgua la.+
9 Nea, alimoa ninyɛne ne mɔ ɛra nu;Kɛkala melɛka ninyɛne fofolɛ nwo edwɛkɛ.
Meka nwolɛ edwɛkɛ meahile bɛ kolaa na bɛasisi.”+
10 Bɛdo edwɛne fofolɛ bɛmaa Gyihova,+Bɛye ye ayɛlɛ wɔ azɛlɛ ne ɛleka biala,+Bɛmɛ mɔɔ bɛfo nyevile nee debie biala mɔɔ wɔ nuhua,Bɛmɛ mbɔra nee menli mɔɔ wɔ zolɛ la.+
11 Bɛmaa fienemgbole nee azuamgbole mɔɔ wɔ zo la ɛmaa bɛ ne zo,+Kidaa+ namunamu ne mɔ ɛmaa bɛ ne zo.
Bɛmaa menli mɔɔ de bodane zo la ɛva anyelielɛ ɛdeɛdea nu;Bɛmaa bɛdea nu wɔ awoka ne mɔ ati zo.
12 Bɛmaa bɛwula Gyihova anyunlunyiaNa bɛbɔ ye ayɛlɛyelɛ ne nolo wɔ mbɔra ne mɔ azo.+
13 Gyihova bavinde kɛ katakyie.+
Ɔbaheha ɔ nwo kɛ kovolɛ.+
Ɔbadea nu, ɛhɛe, ɔbava konle ɛnelɛ yeadea nu;Ɔbahile kɛ ɔ nwo yɛ se tɛla ye agbɔvolɛ.+
14 “Meyɛ koonwu mekɛ tendenle.
Mezie me nwo dii na mehomo me nwo zo.
Mebakponle na mealie ɛnwomenle mgbole wɔ mekɛ ko ne alaKɛ raalɛ mɔɔ ɛvo awolɛ zo la.
15 Mebazɛkye awoka mgbole nee ngyikyiNa meamaa mbaka kɔsɔɔti mɔɔ wɔ zolɛ la awe.
Mebamaa azule ne mɔ ahakyi mbɔra*Na meamaa nzubula asesa.+
16 Mebamaa anyenzinliravolɛma ava adenle mɔɔ bɛnze la azo+Na meamaa bɛalua adenle mɔɔ bɛtɛfale zo ɛlɛ la anu.+
Mebamaa awozinli mɔɔ wɔ bɛ nyunlu la ahakyi wienyi+Na meamaa adenle mɔɔ zolɛ le ahuhunduu la ayɛ azɛlɛ sɛsɛ.+
Ɛhye a mebayɛ meamaa bɛ a, na menrɛkpo bɛ.”
17 Bɛdabɛ mɔɔ bɛfa bɛ rɛle bɛwula ananze mɔɔ bɛze la anu,Bɛdabɛ mɔɔ bɛka bɛkile mbulalɛ ananze ne mɔ kɛ: “Bɛle yɛ nyamenle” la,Bɛbazia bɛ nzi na bɛ nyunlu agua aze bɔkɔɔ.+
18 Bɛmɛ anzondiliravolɛma, bɛdie;Bɛmɛ anyenzinliravolɛma, bɛnlea na bɛnwu ye.+
19 Nwane a anye ɛzi ɛdɛla me sonvolɛ,Nwane a anzo ɛdi ɛdɛla soanvolɛ ne mɔɔ mezoa ye la a?
Nwane a anye ɛzi kɛ ahenle mɔɔ bɛdua ye kakɛ,Anzɛɛ ɔ nye ɛzi kɛ Gyihova sonvolɛ ne a?+
20 Ɛnwu ninyɛne dɔɔnwo, noko ɛnvede ɛ nye ɛnnea.
Ɛbuke ɛ nzo, noko ɛndie.+
21 Gyihova tenleneyɛlɛ ne ati,Ɔ nye die kɛ ɔbakpogya mɛla* ne zo na yeali ye eni.
22 Noko bɛle menli mɔɔ bɛsesa bɛ nwo ninyɛne na bɛwua bɛ;+Bɛ muala bɛha adokule nu yɛɛ bɛgua efiade.+
Bɛsesa bɛ nwo ninyɛne na awie ɛnle ɛkɛ mɔɔ ɔbalie bɛ a,+Yɛɛ bɛwua bɛ na bɛnnyia awie ɛnga kɛ: “Bɛva bɛ bɛzia bɛrɛla!”
23 Bɛ nuhua boni a badie ɛhye a?
Nwane a bayɛ ɛnzolɛ na yeadie amaa yeaboa ye kenle bie ɛ?
24 Nwane a maanle bɛwuale GyekɔboNa bɛsesale Yizilayɛ anwo ninyɛne a?
Asoo tɛ Gyihova, Ahenle mɔɔ yɛyɛle ɛtane yɛtiale ye la ɔ?
Bɛkpole kɛ bɛkɛlua Ye ndenle nu,Yɛɛ bɛanli Ye mɛla* zo.+
25 Yemɔti ɔwolale ye ahonle mɔɔ ɛfutu,Ye ɛya ne nee konle nu ɛya kpole ne ɔguale ɔ nwo zo.+
Ɔyelale debie biala mɔɔ ɛbɔ ye ɛyia la, noko yeandwenle nwo.+
Ɔyelale ye, noko yeanva ye ahonle yeanli ɔ nzi.+
Ɔbodwɛkɛ
^ Anzɛɛ “me ɛkɛla die ye to nu.”
^ Anzɛɛ “ye adehilelɛ.”
^ Anzɛɛ “Me nee awie biala ɛngyɛ me anyunlunyia.”
^ Anzɛɛ “ɛnwea.”
^ Anzɛɛ “adehilelɛ.”
^ Anzɛɛ “adehilelɛ.”
